Karaoa Ae Boraoi Ma Ana Tataro Ae Tatangira Iesu
“Tamau, . . . kamimitonga natim, bwa e aonga n neboiko.” —IOANE 17:1.
1, 2. Kabwarabwaraa te bwai are e karaoia Iesu nakoia ana abotoro aika kakaonimaki imwini bukamaruan te Toa ae te Riao n 33 C.E.
E A BONI bwakanako te tai n tairikin Nitian 14 n te ririki 33 C.E. A a tibwa tia ni bukamarua te Toa ae te Riao Iesu ma raona. A kauringaki iai aroni kamaiuaia aia bakatibu iroun te Atua man tautoronakia i Aikubita. Ma a na rinanoni ‘kamaiuaia ae teimatoa n aki toki’ ae te bwai ae moanibaan te kakannato, taan rimwina aika kakaonimaki. N te bong are imwina, e nang tiringaki aia tia Kairiri ae akea ana bure irouia ake a ribaia. Ma e na bitaki te mwakuri n riribai aei nakon te kakabwaia. E na riki katutuan raraan Iesu bwa aani kamaiuaia te botannaomata man te bure ao te mate.—I-Ebera 9:12-14.
2 Ibukini kakoauaan ae ti na aki mwaninga te babaire ae tatangira aei, e a manga karaoa te botaki ae boou ni katoa ririki Iesu n onea mwin te Toa ae te Riao. E karaoa anne n otean te bwerena ae aki karikaki, ao n tibwaia nakoia ana abotoro aika 11 ake a kakaonimaki ao e taku: “E tei te baei ibukin rabwatau ae N na anga ibukimi. Kakaraoa aei bwa kanuringau.” E karaoa naba anne ma te mwangko ae kanoana te wain ae uraura, n tuangakia ni kangai: “E tei te mwangko aei ibukin te berita ae boou ae aanaki n raraau ae e na kawawaeaki ibukimi.”—Ruka 22:19, 20.
3. (a) Tera te bitaki ae bubura are e riki imwini maten Iesu? (b) Baikara titiraki aika ti riai n iaiangoi ni kaineti ma ana tataro Iesu n Ioane mwakoro 17?
3 E a kaan roko tokin te berita n Tua nikawai i marenan te Atua ma te natannaomata ae Iteraera. E na oneaki mwina n te berita ae boou i marenan Iehova ao taan rimwin Iesu aika kabiraki. E rangi n tabeaianga Iesu ibukini marurungin te I-Iteraera n taamnei ae boou aei. A iraraure tibun Iteraera n aia taromauri ike e a aki karineaki iai aran te Atua. (Ioane 7:45-49; Mwakuri 23:6-9) Ni kaitaraan anne, e tangiriia taan rimwina Iesu bwa a na kateimatoa katiteuanaakia, n te aro are a na kona ni kaai ni boonnano ni mwakuri bwa a aonga n neboa aran te Atua. Ma tera ae e karaoia Iesu? E anaa te tataro ae moan te tamaroa are a na kona ni kakabwaiaaki iai aomata nako ngkana a warekia. (Ioane 17:1-26; nora te taamnei mai moa.) Ti kona n ururing rikaaki ao n titirakinira ni kangai: “E kaekaaki ana tataro Iesu iroun te Atua?” Ti riai naba n tuoira ao n titirakinira ni kangai: “E boraoi au mwakuri ma ana tataro Iesu?”
BAIKE E MOANIBWAI IESU
4, 5. (a) Tera reireiara man ana moan taeka Iesu n ana tataro? (b) E kanga Iehova ni kaekaa ana tataro ni bubutii Iesu ibukin te tai ae imwaina?
4 E bwakanako ana tai Iesu ni maroro ma taan rimwina n reireinia te atatai ae kakawaki mairoun te Atua. Imwina, e tararake nako karawa ao e tataro ni kangai: “Tamau, e a roko te tai, kamimitonga natim, bwa e aonga n neboiko natim, kioina ngkai ko a tia n anganna te mwiokoaki i aoia aomata ni kabane, bwa e aonga n anga te maiu are aki toki natim nakoia te koraki nako ake ko anganna. . . . I a tia n neboiko i aon te aba, ni katiaan te mwakuri are ko anganai bwa N na karaoia. Mangaia ae kamimitongai ngkai Tamau i rarikim, n te mimitong are mimitongiu i rarikim imwaini karikaia kaain te aonnaba.”—Ioane 17:1-5.
5 Nori baika e moanibwai Iesu n ana moan taeka n ana tataro. Te bwai ae moanibwaia, bon neboan Tamana ae i karawa. E boraoi aei ma te moani bubutii n ana tataro ni katoto Iesu aei: “Tamara, e bia katabuaki aram.” (Ruka 11:2) Te kauoua, e tataro ibukini kainnanoia taan rimwina bwa ‘e aonga n angania te maiu are aki toki.’ Imwin anne, e a bubutii Iesu ni kangai: “Kamimitongai ngkai Tamau i rarikim, n te mimitong are mimitongiu i rarikim imwaini karikaia kaain te aonnaba.” E karekea kaniwangan Natina ae kakaonimaki Iehova ae raka riki nakon are e bubutii iai rinanon anganakin Iesu “arana ae moanibaan te raoiroi riki” nakoia anera ni kabane.—I-Ebera 1:4.
‘ATAAKIN TE ATUA AE KOAUA N TII NGAIA’
6. Tera te bwai ae a riai ni karaoia abotoro bwa a aonga ni karekea te maiu n aki toki, ao ti kanga n ataia bwa a bon tokanikai?
6 E tataro naba Iesu ibukin te bwai ae ti riai ni karaoia ngaira aika taani bure bwa ti aonga n tau ni karekea te bwaintituaraoi ae te maiu n aki toki. (Wareka Ioane 17:3.) E taekinna bwa ti riai n ataa’ te Atua ao Kristo n taai nako. E irekereke te anga teuana ni karaoan aei ma kamanenaani matara ao taningara n reiakina ae bati riki ibukin Iehova ao Natina. Te anga riki teuana ae kakawaki ni kaineti ma karekean te atatai ibukin te Atua bon namakinan te kukurei ni maiuakini baike ti reiakin ibukina. A a tia ana abotoro Iesu ni kakairi n te mwakuri ni kakamaiu akana uoua akanne, n aron are e tataroia ni kangai: “I a tia n taekin taeka ake ko anganai nakoia.” (Ioane 17:8) Ma ibukini karekean te maiu n aki toki, a riai ni kateimatoa kaatuuan aia iango i aoni baike e taekin te Atua ao ni maiuakin ni katoabong. A tokanikai abotoro aika kakaonimaki ni karaoan anne ni karokoa tokini maiuia i aon te aba? Ni koauana a bon tokanikai. Ti ataa anne ibukina bwa a teimatoa ni koreaki araia n tatabemania nako i aon atibu aika 12 aika a aana te Ierutarem ae Boou i karawa.—Te Kaotioti 21:14.
7. Tera ae nanonaki n ‘ataakin’ te Atua, ao bukin tera bwa e rangi ni kakawaki?
7 Ni kaineti ma taan rabakau n te taetae ni Kuriiti, te taetae ni Kuriiti ae rairaki bwa “riai n ataiko” e kona n rairaki naba bwa “riai ni waakinaanako karekean te atatai” ke “riai n teimatoa n ataia.” A irekereke nanon taeka akana uoua akanne ao a kaai ni kakawaki naba. Te rairai riki teuana n te kabwarabwara mai nano n Te Baibara ae Tabu-te Rairai ae te Aonnaba ae Boou n Ioane 17:3, boni “karekea te atatai.” Mangaia are e kaineti te taeka ae “riai n ataiko” ma te mwakuri ae waakinako ibukin ‘ataakin’ te Atua. Ma e bati riki ae irekereke n ataakin te Aomata ae kakannato n te iuniweeti nakon iaiangoan raoi aroaron te Atua ma ana kantaninga. E nanonaki naba n ataakin Iehova karekean te itoman ae kaan ni kaineti ma tangirana ao raao n te onimaki. E kabwarabwaraaki ni kangai n te Baibara: “Ane aki tatangira ao e aki ataa te Atua.” (1 Ioane 4:8) Mangaia are e nanonaki naba n ataakin te Atua bwainan te ongeaba nakoina. (Wareka 1 Ioane 2:3-5.) Ai korakorara kakabwaiaakira ngkai ti warekaki naba i buakoia naake a ataa Iehova! Ma ti riai ni kawakinira bwa ti na aki kabuaa ara iraorao ae kakawaki ma Iehova, n aron Iuta Itekariota. Ti bia kakorakoraira ni kateimatoa te iraorao anne. Ngkanne, ti a kona n tau ni karekea te bwaintituaraoi ae te maiu n aki toki.—Mataio 24:13.
“IBUKIN ARAM AE KO KATOKAA”
8, 9. Tera te moanibwai ae kakawaki iroun Iesu n ana tai ni mwakuri ni minita i aon te aba, ao tera aia katei Aaro are e rarawa nako iai?
8 Imwini warekan ana tataro Iesu are e koreaki n Ioane mwakorona 17, antai ae kona n nanokokoraki n ana tangira ae korakora Iesu tiaki tii ibukia ana abotoro n te tai arei ma bon taan rimwina naba n taai aika a na roko? (Ioane 17:20) Ti riai naba n oota bwa e aki moanibwai iroun Iesu kamaiuara. Ana kantaninga ae kakawaki man te moantai ni karokoa tokin ana mwakuri ni minita i aon te aonnaba boni katabuan ao neboan aran Tamana. N te katoto, ngke e katanoataa mwiokoana Iesu n te tinakoka i Natareta, e wareka ae kangai man te nira ni boki are Itaia: “E anganai taamneina Iehova, bwa e kabirai bwa N na tataekina te rongorongo ae raoiroi nakoia kainnano.” Akea te nanououa bwa e bon taekina aran te Atua n te aro ae mataata ngke e wareka te mwioko aei.—Ruka 4:16-21.
9 Ni kaineti ma aia katei I-Iutaia, a a kamani kabwarai nanoia aomata mataniwi n Aaro bwa a na aki kamanena aran te Atua, imwain rokon Iesu i aon te aba. Ti kona ni kakoauaa bwa e bon rarawa Iesu nakon aeka ni katei aika bobuaka ma te Baibara. E taku nakoia taani kakaitaraa: “I roko n aran Tamau, ma kam aki butimwaeai, ma ngkana e roko temanna n oin arana, ao kam na bae ni butimwaeia.” (Ioane 5:43) Tabebong ngkanne imwaini maten Iesu, e a kaota te bwai ae kakawaki ni maiuna n ana tataro aei: “Tamau, neboa aram.” (Ioane 12:28) Ngaia are ti aki riai ni mimi ngkai e kairekerekea te bwai ae kakawaki aei Iesu ibukin aran Tamana rinanon te tataro ae ti nang neneria ngkai.
10, 11. (a) Tera ae irekereke iroun Iesu ni kaotiotan aran Tamana? (b) Tera te tia ae a riai ni kakorakoraia nako iai taan rimwin Iesu?
10 E tataro ni kangai Iesu: “I a tia ni kaotiota aram nakoia aomata ake ko anganai mai buakoia kaain te aonnaba. Bon am bwai ngaiia ao ko anganai, ao a kakairi n am taeka. Irarikina, N nang aki manga mena i buakoia kaain te aonnaba, ma a mena ngaiia i buakoia kaain te aonnaba, ao ngai N nang roko iroum. Tamau ae ko Tabu, kawakinia ibukin aram ae ko katokaa i aou, bwa a aonga ni katiteuanaaki n arora.”—Ioane 17:6, 11.
11 E bati riki ae irekereke ni kaotiotan aran Tamana nakoia taan rimwina nakon ae e na tii kamanena te ara ae Iehova. E buokiia naba Iesu bwa a na ataa nanon aran te Atua, n aron aroarona aika rangi n tamaroa ao baika e karaoi nakoira. (Te Otinako 34:5-7) Irarikin anne, e teimatoa Iesu ni buokiia taan rimwina bwa a na ataa aran Iehova ni kabutaa te aonnaba ngkai e a Uea i karawa. Tera tiana ae e iaiangoia? E na ikotiia taan rimwina aika bati imwain tokin te waaki ae buakaka ae ngkai i aon te aba. Ai tamaroara ngkanne te ara ae Iehova bwa e nang kaotia ae e mwakuri ibukini kamaiuaia taani kakoaua ibukina aika kakaonimaki!—Etekiera 36:23.
“BWA A AONGA NI KAKOAUAA KAAIN TE AONNABA”
12. Baikara bwaai aika tenua aika ti kainnanoi bwa ti aonga n tokanikai n ara mwakuri ni kakamaiu?
12 Ni menan Iesu i aon te aba, e mwakuri korakora ni buokiia taan rimwina bwa a na tokanikai i aoni mamaaraia. E rangi ni kakawaki aei bwa a aonga ni kataubobongaa te mwakuri are e a tia ni moanna. E tataro Iesu ni kangai: “N aron ae ko kanakoai nako buakoia kaain te aonnaba, I kanakoia naba ngai naakai nakoia kaain te aonnaba.” E katuruturui bwaai aika a kainnanoi mani kakawaki aika tenua Iesu ibukia bwa a aonga n tokanikai n te mwakuri ni kakamaiu aei. Te moan, e tataro ibukia taan rimwina bwa a na aki arona aroia kaain ana aonnaba ae buakaka Tatan. Te kauoua, e tataro bwa a na kona ni katabuaki, ke n teimatoa n itiaki rinanoni maiuakinan taiani koaua man Ana Taeka te Atua. Te katenua, e okioki ni bubutii ibukia taan rimwina bwa a na kona ni katiteuanaaki n te bwai ni kabaebae naba ae te tangira are e kabaeaki iai ma Tamana. E kainnanoaki n aei tuoara i bon iroura. Ti riai n titirakinira ni kangai: ‘E boraoi au mwakuri ma ana bubutii Iesu aika tenua akanne?’ Ibukin iaiangoani baikanne, e a kamataata raoi Iesu “bwa a aonga ni kakoauaa kaain te aonnaba ae ko kanakomaiai.”—Wareka Ioane 17:15-21.
13. N te aro raa ae e kaekaaki iai ana tataro Iesu n te moan tienture C.E.?
13 E kona n noraki kaekaan ana tataro Iesu anne rinanon te ukeuke n reirei ni bokin te Baibara ae Aia Mwakuri Abotoro ae mena imwin Euangkerio aika aua. Iangoa aron te iraraure i buakoia Kristian ngkoa, are e kaainaki irouia I-Iutaia ma Tientaire, kaubwai ma raarikin, ao tooro ma aia toka. Ma e ngae n anne, a a bane ni katiteuanaaki n te aro ae kaan ike a a kona ni kabotauaki iai ma bwain rabwatan te aomata aika kakaokoro ao Iesu are atuia. (I-Ebeto 4:15, 16) Ai kamimira te katiteuanaaki ae kona n reke i buakoia aomata n ana aonnaba Tatan ae bwenaua! E riai ni kamoamoaaki Iehova ni baikai ni kabane bwa e kona ni karaoi rinanon te taamnei ae raoiroi ae mwaaka.—1 I-Korinto 3:5-7.
14. Tera aroni kaekaan ana tataro Iesu ni boong aikai?
14 E kananokawaki bwa e bon aki kamaiuia abotoro man te mate, te katiteuanaaki n te aro ni kakai aei. Ma n aron ae e a kaman taekinaki ao e na korakora kabwaouaan te koaua ike e a riki iai te iraraure i marenaia te koraki n Aro teuana ma Aaro ake aongkoa Kristian ngaiia. (Mwakuri 20:29, 30) Ma n 1919, e a kainaomataia taan rimwina Iesu aika kakaonimaki man tauakia i aaia Aaro aika kewe ao n ikotiia n “te bwai ni kabaebae ae katiteuanaia aomata n te aro ae kororaoi.” (I-Korote 3:14) Tera aron rotakin te aonnaba ni kabutaa n aia mwakuri n uarongorongo? E raka i aon itua te mirion mwaitiia “tiibu tabemwaang” ake a nako mai buakoia “botannaomata ma baronga ma natannaomata, ma taian taetae” aika a kairiraki bwa tii tenanaina ma ana kabiraki te Atua. (Ioane 10:16; Te Kaotioti 7:9) Ai kamimira kaekaan ana tataro Iesu aei: “Bwa a aonga n ataia kaain te aonnaba bwa ko kanakomaiai, ao ko tangiriia naakai n aron ae ko tangirai”!—Ioane 17:23.
TE MOTIKA AE ANAINANO
15. Tera ana bubutii ae okoro Iesu ibukia taan rimwina aika kabiraki?
15 N te moantairiki n Nitian 14, e anga te karinerine Iesu nakoia ana abotoro rinanoni karaoan te berita ma ngaiia bwa a na kairiri ma ngaia n ana Tautaeka n Uea. (Ruka 22:28-30; Ioane 17:22) Ngaia are e a tataro Iesu ngkai ni kangai ibukia te koraki ni kabane ake a na riki bwa taan rimwina aika kabiraki: “Tamau, I kani butiiko ibukia te koraki ake ko anganai, bwa a bia mena ike I mena naba iai, bwa a aonga n nora mimitongiu are ko anganai, ibukina bwa ko a kaman tangirai imwaini moan rikia ataei n te aonnaba.” (Ioane 17:24) Aei are e a karika te kimwareirei ao a aki bakantang iai ana tiibu tabemwaang Iesu, ao bon te bwai ni kakoaua naba ibukin te katiteuanaaki i buakoia Kristian ni koaua ni kabane n te aonnaba ni boong aikai.
16, 17. (a) Tera te motinnano are e katerea Iesu ni motikan ana tataro? (b) Tera ae ti riai ni motinnanoia bwa ti na karaoia?
16 Ibukina bwa a kairiraki aomata irouia mataniwin aia Aaro, a a rineia angiia mai buakoia n te aonnaba aei bwa a na katinanikua te bwai ni kakoaua ae teretere raoi bwa iai ana aomata Iehova aika a kinaa raoi ma ni katiteuanaaki. E noraki koauan naba anne n ana bong Iesu. Ngaia are e motikia n taeka aika anainano aikai: “Tamau ae ko raoiroi, ni koauana a bon aki ataiko kaain te aonnaba, ma I ataiko ngai, ao a ataia naba naakai ae ko kanakomaiai. Ao I a tia ni kaotiota aram nakoia ao N na boni manga kaotia, bwa e aonga ni mena i nanoia te tangira are ko tangirai iai, ao N na katiteuanaaki ma ngaiia.”—Ioane 17:25, 26.
17 Antai ae e kona n taekinna bwa e aki boraoi ana mwakuri Iesu ma ana tataro? Ngkai Atun te ekaretia, e teimatoa ni buokira bwa ti na ataa aran Tamana ao ana kantaninga. Ti bia teimatoa n aantaeka nakon ana kairiri rinanon ingaingara n ongeaba nakon ana tua are ti na uarongorongo ao ni karekeia taan rimwina. (Mataio 28:19, 20; Mwakuri 10:42) Ti bia mwakuri korakora naba ni kateimatoa katiteuanaakira ae kakawaki. Ni karaoani baikanne, ti a karaoa iai ae boraoi ma ana tataro Iesu are ti na neboa aran Iehova ao ni karekea te kimwareirei ae akea tokina.