Kaboowiana n te Tanirim ao Kairana Nakoni Birato

E a kaani bong ngke ai tenua ana tai Betero ni kakeaa Iesu. E a toki aia waaki ni bwainingare kaain te Tanirim ao a a maenako. A a manga ikotaki ngke e a tabwena mainiku n ingabongin te Kanimabong, bwa a na karaoa te bae e taraa n eti i aan te tua ni kaineti ma aia boowi are a karaoia n te tairiki anne. E a kairaki Iesu nako mataia.

A a manga kairoroa naba kaain te boowi ni kangai: “Ngkana bon te Kristo ngkoe, ao tuangira.” E kaeka Iesu ni kangai: “E ngae ngkana I tuangingkami, ma kam na bon aki naba kakoauaa. Ao ngkana I titirakiningkami, ao kam na bon aki kaeka.” Ma e ninikoria Iesu ni kaotia nakoia bwa boni ngaia teuare e a kaman taekinaki n Taniera 7:13. E taku: “Imwin te tai aei, ao e na tekateka Natin te aomata i angaatain te Atua ae mwaaka.”​—Ruka 22:67-69; Mataio 26:63.

A teimatoa ni kangai: “Mangaia are boni ngkoe Natin te Atua?” E kaeka Iesu ni kangai: “Ao ane kam a bon taekinna bwa ngaia ngai.” E taraa n ae aei ai boni kamatoaan tiringan Iesu ni bukinana n taetae ni bakannatua. A titiraki ni kangai: “E aera ngkai ti kainnanoia riki taani kakoaua?” (Ruka 22:70, 71; Mareko 14:64) Ngaia are a kabaea Iesu ao ni kairianako nakon te Kowana n Rom ae Bontio Birato.

E bae Iuta Itekariota n nora Iesu ngke e a kairaki nakoni Birato. Ngke e a ataia bwa e a moti kamatean Iesu, e a uringaaba ao ni bwara nanona. E aki kaota te rairannano ni koaua nakon te Atua, ma e nako ni kaoki mwakoro n tirewa ake 30. E tuangia mataniwi n ibonga Iuta ni kangai: “I boni bure ngke I kamwanea te aomata ae akea ana bure.” Ma e karekea te kaeka ae akea te nanoanga iai ae kangai: “Tera ara bwai iai? Bon am kangaanga anne!”​—Mataio 27:4.

E karenakoi mwakoro n tirewa Iuta n te tembora ao imwina e a manga kabatiaa riki ana bure ngke e kataia ni bakabureia. Ngke e kataia Iuta ni kabaea roroana ao e a mwaoto naba te mwaanga are kabaea iai te roobu. E bwaka i aon te bwaa ike e a maenako iai rabwatana.​—Mwakuri 1:17, 18.

E boni moaningabong naba ngke e a kairaki Iesu nakon ana baareti Bontio Birato. Ma a rawa n rinnako I-Iutaia ake a kaira Iesu. N aia iango, a na baareka ngkana e kaan aia reitaki ma Tientaire, ao a na aki tau ni katoonga amwaraken te toa n Nitian 15, ae moanibongin te Toa ae te Bwerena ae Aki Karikaki, are e iangoaki bwa iteran te Toa ae te Riao.

E otinako Birato ao e titirakinia ni kangai: “Tera ae kam bukina iai te aomata aei?” A kaeka ni kangai: “Ngke arona bwa tiaki te tia bure teuaei, ao ti na aki kairia nakoim.” E bae n iangoia Birato bwa a kataia ni kairoroa, ngaia are e taku: “Uotianako ngkami ao motika taekana ni kaineti ma ami tua.” A kaeka I-Iutaia ni kaota nanoia ae korakora ni kan tiritiri ni kangai: “Ti aki kariaiakaki n te tua bwa ti na tiringa temanna.”​—Ioane 18:29-31.

Ngkana a bon tiringa Iesu n te Toa ae te Riao, e na bae n riki te kiriwe irouia aomata. Ma ngkana a kona ni karekea angan tiringana irouia kaain Rom bwa aongkoa e bure ni kaitaraa te tautaeka anne, a na aki ngkanne bukinaki I-Iutaia aikai irouia aomata.

A aki taekina aia bukibuki mataniwin te Aro nakoni Birato, are a kabuakakaa ngkoa Iesu iai bwa e bakannatua. A otei aia bukibuki ni kewe aika kakaokoro ni kangai: “Ti nora teuaei [1] bwa e anaa nanon ara botannaomata, [2] ao e katabuaka kabwakaan te taekiti nakoni Kaitara, ao [3] e taku bwa te Kristo ngaia ae te Uea.”​—Ruka 23:2.

Ngkai e tei Birato ibukin Rom, e bon tabeaianga ibukin te bukibuki are e taku Iesu bwa te uea ngaia. Ngaia are e a manga rinnako riki n te baareti Birato, e wetea Iesu ao e titiraki ni kangai: “Aia Uea I-Iutaia ngkoe?” Ae nanona, ‘Ko a tia n urua tuan te embwaea n atongko bwa te uea ni kaitaraa Kaitara?’ E bae ni kan ataia bwa tera aron ana atatai Birato ibukina, ngaia are e taku Iesu: “Ko taekina aei i bon iroum ke a tuangko tabeman taekau?”​—Ioane 18:33, 34.

E kaotia Birato ae bon akea kinaakin Iesu irouna ao ataakin te koaua ibukina, ma e boni kan ataia ngaia are e kaeka ni kangai: “Bwa ngai ngkai te I-Iutaia?” E taku riki: “Bon am natannaomata ma mataniwi n ibonga aika a kairiko nakoiu. Tera ae ko karaoia?”​—Ioane 18:35.

E aki kani karabaa te koaua Iesu ni kaineti ma te nakoa n uea aei. E kaeka n te aro ae e na rangi ni mimi iai te Kowana ae Birato.