Rarawa Nakon te Riaboro

1, 2. Baikara baika ti riai n atai ibukin Tatan ao taimonio?

E NA kakukurei te maiu n ana aonnaba ae boou Iehova. Ti nangi maiu n aron are e moani kantaningaia te Atua. Ma ti maeka moa ngkai n te aonnaba ae tauaki taekaia kaaina iroun Tatan ma ana taimonio. (2 I-Korinto 4:4) E ngae ngke ti aki kona n noriia, ma bon iai ngaiia ao a rangi ni korakora.

² Ti na maroroakina n te mwakoro aei arora ni kaania Iehova ao ni kamanoira mairoun Tatan. E berita Iehova bwa e na buokira. Ma ti riai n atai ana anga Tatan ao taian taimonio ake a kabonganai ni mwamwanaira iai ao n ninira.

E “BEKORARA N AI ARON TE RAIAN”

3. Tera ae e kani karaoia te Riaboro nakoira?

³ E taku Tatan bwa a taromauria Iehova aomata tii ibukini kabwaiaia, ao ti na katoka ara beku Irouna ngkana e a riao te kangaanga. (Wareka Iobi 2:​4, 5.) Ngkana iai ae e kaotia bwa e kan reiakina taekan Iehova, a ataia Tatan ma taimonio, ao a kataia ni katokia. A un ngkana e katabua maiuna nakon Iehova ao ni bwabetitoaki. E kabotauaki te Riaboro n te Baibara bwa e “bekorara n ai aron te raian, n ukoukora ae e na ongnga.” (1 Betero 5:8) E kan urua ara iraorao ma Iehova Tatan.​—Taian Areru 7:​1, 2; 2 Timoteo 3:12.

4, 5. (a) Tera ae e aki kona ni karaoia Tatan? (b) Tera ae e nanonaki n te “rarawa nakon te Riaboro”?

⁴ Ma ti aki riai ni maaka Tatan ma ana taimonio. E a tia Iehova n tiatiana te bae a kona ni karaoia nakoira. E berita Iehova bwa a na kamaiuaki “te koraki ae uanao” ake Kristian ni koaua man “te rawawata ae korakora.” (Te Kaotioti 7:​9, 14) Akea te bae e kona ni karaoia te Riaboro n tuka rikin anne, bwa Iehova e kamanoia Ana aomata.

⁵ Ngkana ti teimatoa ni kaania Iehova, e na aki kona Tatan n urua ara iraorao ma te Atua. E karaui nanora Ana Taeka te Atua ni kangai: “E memena iroumi Iehova tii ngkana kam teimatoa ni memena irouna.” (2 Rongorongo 15:2; wareka 1 I-Korinto 10:13.) A bati mwaane ma aine ake a kakaonimaki ngkoa n aron Abera, Enoka, Noa, Tara, ao Mote, ake a rarawa nakon te Riaboro n aroia n teimatoa ni kaania Iehova. (Ebera 11:​4-40) Ti kona naba ni karaoa anne. E berita ni kangai Ana Taeka te Atua: “Rarawa nakon te Riaboro, ao ane e na birinako mairoumi.”​—Iakobo 4:7.

TI “KABOKORAKORA”

6. E kangaa n ninira Tatan?

⁶ E ngae ngke e ataia Tatan bwa e tiatianaki iroun Iehova te bae e kona ni karaoia nakoira, ma e na bon teimatoa ni kataia ni kamamaraa ara iraorao ma te Atua. E ninira ngkai Tatan n aanga aika bati aika kakaokoro, ao e kabonganai ana kawai ake e a kamani kakabonganai i nanoni nga ma nga te ririki. Baikara tabeua mai iai?

7. E aera Tatan ngkai e ninia ana aomata Iehova?

⁷ E korea ae kangai te abotoro Ioane: “A bane kaain te aonnaba ni mena i aani mwaakan teuare buakaka.” (1 Ioane 5:19) E taui taekaia kaain te aonnaba aei aika buakaka Tatan, ao e kan taui naba taekaia ana aomata Iehova. (Mika 4:1; Ioane 15:19; Te Kaotioti 12:​12, 17) E ataia te Riaboro bwa e a kimototo ana tai, ngaia are e a rangi ni karawawataira n tatabemanira nako bwa ti na aki kakaonimaki nakon te Atua. N tabetai ao e ninira te Riaboro n te aro ae kai noraki, ma n tabetai ao e a manga aki kai noraki.

8. Tera ae a riai n ataia Kristian n tatabemania nako?

⁸ Ti wareka ae kangai n I-Ebeto 6:12: Ti “kabokorakora [“kaunrabwata,” kabwarabwara mai nano] ma . . . taanga n taamnei aika buakaka i karawa.” A bokakano Kristian n tatabemania nako ma te Riaboro ao taimonio. Ti riai n ataia bwa aomata nako ake a katabui maiuia nakon Iehova, a a uataboa te buaka aei. N ana reta te abotoro Bauro nakoia I-Ebeto, ao e kaumakiia iai Kristian tentai bwa a na “tei n nene.”​—I-Ebeto 6:​11, 13, 14.

9. Tera ae a kataia ni karaoia Tatan ma taimonio nakoira?

⁹ A kataia Tatan ma taimonio ni mwamwanaira n aanga aika kakaokoro. Tiaki nanona bwa ngkai ti a tia n rarawa nakon Tatan n te anga teuana, ti a aki kona ni manga kaririaki riki irouna. E kataia te Riaboro n ukera mamaarara bwa e aonga n rinei ana bwai ni kamwane ni kamwaneira iai. Ma ti aki riai ni mwane, bwa e reireinira te Baibara taekan ana bwai ni kamwane nako te Riaboro. (2 I-Korinto 2:11; nora Kabwarabwaraana 31.) Teuana mai iai bon te tabunea.

KARAROAINGKAMI MAIROUIA TAIMONIO

10. (a) Tera te tabunea? (b) Tera ana iango Iehova n te tabunea?

¹⁰ E irekereke te tabunea ma baika mwaaka ake a kaira te aomata bwa e na reitaki ma taimonio, aika bwaai n aroni kaiwanakini kanoan taai aika a na roko, te wauwi, te kakaraoi, ke te kataia n taetae ma maate. E tuangira te Baibara bwa e “riribaaki” te tabunea, ae nanona bwa ti aki kona n irekereke ma te tabunea ao n taromauria naba Iehova. (Te Tua-Kaua 18:​10-12; Te Kaotioti 21:8) A riai Kristian n rarawa nakon aeka n tabunea nako.​—I-Rom 12:9.

11. E na kairira nakea anaakin nanora ni baika mwaaka?

¹¹ E ataia Tatan bwa ngkana e anaaki nanora ni baika mwaaka, e na kai katikira ngkanne nakon te tabunea. A na urua ara iraorao ma Iehova aeka n tabunea nako.

E KATAIA TATAN NI MWAMWANAIRA

12. E kangaa Tatan ni kamangaoa ara iango?

¹² E kataia Tatan ni kamangaoi aia iango aomata. E karioa te nanououa teutana imwin teutana, n uaa ae a a iangoa aomata “te raoiroi bwa te buakaka ao te buakaka bwa te raoiroi.” (Itaia 5:20) E kauekea te Riaboro iangoan ae a aki manena ana reirei ni kairiri te Baibara, ao ti na kukurei riki ngkana ti aki tabeakin ana kaetieti te Atua.

13. E kangaa Tatan ni kataia ni kauekea te nanououa?

¹³ Ana anga naba Tatan ae moan te kokona iai boni kataabangakan te nanououa. E a kamani kakabongana n te tai ae maan. N te onnaroka are i Eten ao e kataia ni kauekea te nanououa ngke e titirakina Ewa ni kangai: “Te koaua ae e taku te Atua bwa kam na tai amwarake mani kain nako te onnaroka aei?” (Karikani Bwaai 3:1) Imwina riki n ana tai Iobi ao Tatan e titirakina Iehova i mataia anera ni kangai: “Te koaua bwa akea bukini maakakin te Atua iroun Iobi?” (Iobi 1:9) Imwini bwabetitoan Iesu ao e kataia Tatan ngke e kangai: “Ngkana ngkoe temanna natin te Atua, ao tuangia atibu aikai bwa a na riki bwa taian amwarake.”​—Mataio 4:3.

14. E kangaa Tatan ni kananououaia aomata bwa e karuanikai te tabunea ke e aki?

¹⁴ E teimatoa naba ngkai te Riaboro ni kauekea te nanououa. E kataia ni kananououaia aomata bwa e boni buakaka te tabunea ke e aki, n arona ni karaoi iterana tabeua bwa a na taraa n akea bureia. Iai naba Kristian tabeman ake a kamatakiaki nakoni karuanikain te tabunea. (2 I-Korinto 11:3) Ngaia are tera ae ti na karaoia ibukini kamanoara? Ti na kangaa n taraia raoi bwa ti aki mwamwanaaki n ana anga Tatan? Ti na neneri itera aika uoua ake ti kona ni mwamwanaaki iai, ae te kaakibotu ao te bwainnaoraki.

E KABONGANAI TATAN BAIKA TI TANGIRI N NINIRA IAI

15. Ti na kangaa n irekereke ma taimonio rinanon ara kaakibotu?

¹⁵ A bati birim ngkai, taamnei, kamataku n te TV, takaakaro n te kaombiuta, ao atureti n te Intanete aika kaotaki iai taekaia taimonio, te tabunea, ao te mwaaka. A bati aika iangoi baikai bwa a kaunga ao a aki karuanikai, ao a aki ataa karuanikain ae a a karinia taimonio ni maiuia. E kona naba te aomata n irekereke ma te tabunea rinanon te kaiwa, warekan rainin te nanonibai, te kabwarabwara n te kaati ibukin norani kawaim bwa e nakoraoi ke e aki, ao te crystal ball ae te booro ae te kiraati ae kabonganaaki ibukin te kaiwa. E karabaa karuanikain aei te Riaboro ao e kataia ni karaoi baikai bwa a na taraa ni kaminonano, a na anainano, ao ni kaunga. E kona n iangoia naba te aomata bwa e aki karuanikai matakuakinani baika irekereke ma te taimonio ke te mwaaka, bwa e bon aki karaoa te tabunea. E aera ngkai e karuanikai te iango aei?​—1 I-Korinto 10:12.

16. E aera ngkai ti riai n rarawa nakon te kaakibotu ae e oti iai baika mwaaka?

¹⁶ A aki kona n nori ara iango Tatan ma taimonio. Ma a kona n ataa te bae ti tangiria ao arora n iango mani mamatakuakinani baike ti rinei ibukira ma ara utu, ao man ara kaakibotu naba. Ngkana ti rinei birim, katangitang, ke booki ake iai taekaia ibonga iai, te kakaraoi, taniakia aomata irouia taimonio, antimaomata, turaekura, ke bwaai riki tabeua n aron akanne, a na ataia iai Tatan ma taimonio bwa ti nano ni baikai. Ao ane a nang kataia ni kairekerekeira ma taekan te tabunea ae bati riki.​—Wareka I-Karatia 6:7.

17. E kangaa Tatan ni kabongana buaka tangiran te kani marurung iroura?

¹⁷ E kona naba Tatan ni kabongana buaka tangiran te kani marurung iroura. A bati ngkai aika rotakibuaka n te aoraki. E kona ni katai aeka ni bwainnaoraki aika kakaokoro te aomata, ma akea buokana iai. (Mareko 5:​25, 26) E kona n rangi ni kakaii nanona ao n tauraoi ni katai bwaai nako. Ma ngaira aika Kristian, ti riai n taratara raoi n aki rinei bwainnaoraki aika irekereke ma “mwaakan te tabunea.”​—Itaia 1:13.

18. Baikara bwainnaoraki ake e na rawa nako iai te Kristian?

¹⁸ Iai tabeman i buakoia I-Iteraera rimoa ake a kabongana “mwaakan te tabunea.” E taku Iehova nakoia: “Ngkana kam arori baimi, ao I karabai matau mairoumi. E ngae ngke kam kabatiai ami tataro, ma I aki ongo.” (Itaia 1:15) Iangoa aei​—E bon aki kan ongo n aia tataro Iehova! Ti aki kani karaoa te bwai ae e na urua ara iraorao ma Iehova, n te aro are e nang aki buokira, ao riki ngkana ti a aoraki. (Taian Areru 41:3) Ngaia are ti riai ni kakaae nako moa bwa e irekereke ma te tabunea ke te mwaaka ara bwainnaoraki are ti iangoia ke e aki. (Mataio 6:13) Ngkana e irekereke, ti riai n rawa nako iai!​—Nora Kabwarabwaraana 32.

KARAKINAIA TAIMONIO

19. Tera ae e kauekea maakakin te Riaboro irouia aomata aika bati?

¹⁹ E ngae ngke iai tabeman ake a iangoia bwa bon tii taian otokaraki taekan te Riaboro ao taimonio, ma iai ake a ataia bwa bon iai ngaiia man te baere a a tia n rinanona. A bati aika mamaakuia anti ao a a tautoronaki ni katei ake a boto i aoni maakakia taimonio. Iai ake a kabutaanako maakakia taimonio mani karakinani baika buakaka ake a karaoi taimonio nakoia aomata. A kakaongora karaki aikai irouia aomata ao a kani manga kakarakini nakoia tabeman riki. Ao a a mamaaka te Riaboro aomata ibukini karaki aikai.

20. Ti kangaa ni kabutiinako ana kewe Tatan?

²⁰ Iangoa aei​—E kani mamaakaki Tatan irouia aomata. (2 I-Tetaronike 2:​9, 10) Bon te tia kewe ngaia ae ataa aroni kairan aia iango naake a taatangira te tabunea ao ni kairiia bwa a na kakoauai baika aki koaua. A kona aomata akanne ni karakini karaki ake a taku bwa a bon nori ke n ongo. Ngkana e a okioki karakinani karaki aikai, e na bati riki betanakia. Ti aki kani buoka Tatan ni kabutaanako maakakina mani kaokiokani karaki aikai.​—Ioane 8:44; 2 Timoteo 2:16.

21. N oneani mwini karakinaia taimonio, tera ae ti kona n tataekinna?

²¹ Ngkana iai ana toro Iehova ae butika ma taimonio, ke e tai manga kaongoraeia tabemwaang. A aki riai ana aomata Iehova ni maakui baika e kona ni karaoi te Riaboro ma ana taimonio. Ma ti riai ni kaatuua iangoan Iesu ao te mwaaka are e anganna Iehova. (Ebera 12:2) E aki kakarakinia taimonio Iesu nakoia taan rimwina. E kaatuua taekan te Tautaeka n Uea ao “ana mwakuri te Atua aika moanibaa n tamaroa.”​—Mwakuri 2:11; Ruka 8:1; I-Rom 1:​11, 12.

22. Tera ae ko motinnanoia bwa ko na karaoia?

²² Ti bia aki mwaninga are tian Tatan bon uruakan ara iraorao ma Iehova. E na boni katai aanga nako bwa e aonga n riki anne. Ma ti atai raoi ana anga te Riaboro ao ti motinnanoia bwa ti na rawa nakon aeka n tabunea nako. Ti na “tai kakatokaa boran te Riaboro” bwa mwina e kamamaraa ara motinnano. (Wareka I-Ebeto 4:27.) Eng, ngkana ti rarawa nakon te Riaboro, ti na bon aki mwane n ana bwai ni kamwane, ao ti na kamanoaki i aani bain Iehova.​—I-Ebeto 6:11.