“Rarawa Nakon Te Riaboro” N Aron Are E Karaoia Iesu
“Rarawa nakon te riaboro, ao ane e na biri nako mai roumi iai.”—IAKOBO 4:7.
1. Tera te kakaitara are e ataia Iesu bwa e na bon rinanona, ao tera mwina?
E ATAIA Iesu Kristo bwa e na rinanon te kakaitara mairoun te Riaboro. Te koaua aei e a kaotaraeaki man te bwai are e taekinna te Atua nakon te naeta ni kangai: “N na kaki te kakaiwi i marenam ma te aine aei [ae iteran ana botaki Iehova i karawa], ao i marenan am kariki ma ana kariki: e na kaikoaka atum [Iesu Kristo], ao ane ko na kaikoaka bukini waena ngkoe.” E kaineta raoi aei nakon te taimonio are karitei are e taetae rinanon te naeta. (Karikani Bwaai 3:14, 15; Te Kaotioti 12:9) Ni kaikoakani bukini waen Iesu e nanonaki te karawawata are rinanona ike e a tiringaki iai ni menana i aon te aba, ma e aki teimaan kioina bwa e a manga kautia Iehova nakon te neboaki i karawa. Ma kamanatuan atun te naeta, e nanonaki iai kamaunaakin te Riaboro ao e na aki manga noraki.—Wareka Mwakuri 2:31, 32; Ebera 2:14.
2. Bukin tera ngkai e koaua raoi Iehova bwa e na bon tokanikai Iesu n rarawa nakon te Riaboro?
2 E koaua raoi Iehova bwa ni menan Iesu i aon te aba, ao e na bon tokanikai ni kakororaoa mwiokoana ao n rarawa nakon te Riaboro. Bukin tera bwa e koaua raoi n aei Iehova? Ibukina bwa e a kamani karika Iesu i karawa n ririki aika bwakanako ao n tia ni karaua n tirobaeia ao n ataia raoi bwa e rangi n ongeaba ao ni kakaonimaki te “tia makuri ae rabakau” ae “te moa ni bung i buakoni baika karikaki ni bane.” (Taeka N Rabakau 8:22-31; I-Korote 1:15) Ai ngaia are ngke e kanakoaki Iesu nako aon te aba ao mani kariaiakaki kataakina iroun te Riaboro ni karokoa matena, e aki nanokokoraki te Atua bwa e na bon tokanikai Natina ae te rikitemanna aei.—Ioane 3:16.
E Kateimatoaia Ana Toro Iehova
3. Tera aron te Riaboro nakoia ana toro Iehova?
3 E arana te Riaboro Iesu bwa “uean aonaba” ao e kauringia taan rimwina bwa a na boni bwainikirinaki n aron naba are e riki nakoina. (Ioane 12:31; 15:20) A rangi n ribaaki Kristian ni koaua irouia kaain te aonnaba aika mena i aani mwaakan Tatan te Riaboro ibukina bwa a beku iroun Iehova, ao ngkai taan uarongorongo ibukin te raoiroi ngaiia. (Mataio 24:9; 1 Ioane 5:19) E aki toki te Riaboro ni mamatania nikiraia taani kabiraki ake a na uea ma Kristo n ana Tautaeka n Uea i karawa. Ao a mamatanaki naba taani Kakoaua aika bati ibukin Iehova iroun Tatan ake a kantaningaa te maiu n aki toki n te aonnaba ae te bwaretaiti. Ti kauringaki ae kangai n Ana Taeka te Atua: “E nakonako ami kairiribai are te riaboro n ai aron te raian ae bekorara, n ukoukora ae e na oongnga.”—1 Betero 5:8.
4. Tera ae kakoauaaki ni boong aikai bwa a a bon tia n tokanikai ana aomata te Atua n rarawa nakon te Riaboro?
4 Ti tokanikai n rarawa nakon te Riaboro kioina ngkai ngaira kaain te botaki ae boutokaaki iroun Iehova ae te Atua. Iangoa te rongorongo ae koaua aei: Inanon 100 te ririki n nako, ao a a tia tabeman taan tautaeka aika taiani kabanea ni kairimatoa ao n iowawa ni kataia ni kamaunai mataia Ana Tia Kakoaua Iehova. Ma e tabe n rikirake ngkai mwaitiia taani Kakoaua ao e a roko n te mwaiti ae kaania 7,000,000 n ekaretia aika raka i aon 100,000 mwaitiia ni kabutaa te aonnaba. Ma taan tautaeka ake taiani kabanea ni kairimatoa ao n iowawa nakoia ana aomata Iehova, boni ngaiia aika mauna nako mataia!
5. E kanga ni kakoauaaki Itaia 54:17 ni kaineti ma ana toro Iehova?
5 Ngke e taetae te Atua nakon te ekaretia are i Iteraera rimoa are e aranna bwa ana “aine” ao e berita ni kangai: “Bon akea te kai-ni-buaka teuana ae karaoaki n ekiko nako ae na tokanikai; ao ane ko na kabuakakai neewe ni kabane aika tei rake n ekiko nako ngkana a kaetaki taekam. Ai ngaia anne tibangaia ana toro Iehova, ao aia raoiroi ae reke mai Rou.” (Itaia 54:11, NW; 54:17) E a kakoroaki nanon te berita anne irouia ana toro Iehova ni “boong aika kaitira.” (2 Timoteo 3:1-5, 13) Ti teimatoa n rarawa nakon te Riaboro, ao bon akea ana bwai ni buaka teuana are e na kataia n ekiia nako iai ana aomata te Atua ae e na tokanikai, bwa kioina ngkai e boni boutokaira Iehova.—Taian Areru 118:6, 7.
6. Tera ae ti tuangaki n ana taetae ni burabeti Taniera ni kaineti ma baika a na riki nakon ana waaki n tautaeka te Riaboro?
6 E a rangi ni kaan rokon tokin te waaki ae buakaka aei ike a nang bane ni kamaunaaki iai ana waaki n tautaeka Tatan. Ni kairan te burabeti are Taniera n te taamnei ae raoiroi, e a korea iai te taetae ni burabeti ae kangai: “N aia bong uea akanne ao E na katea ueana Atuani karawa, ae na bon aki uruaki n aki toki, ao e na aki katukaki tauan taekana nakon te botanaomata teuana, ma e na ururu ma ni kamaunai uea akanne [aika tei ngkai] ni kabane, ao e na tei matoa n aki toki.” (Taniera 2:44) Ngkana e riki anne ao a nang uaia ni kamaunaaki ana tautaeka Tatan ao aia tautaeka botannaomata aika aki kororaoi. A nang bane ni mauna n aki toki ana mwakuri nako te Riaboro, ao e nang tei Ana Tautaeka n Uea te Atua n tautaekana te aonnaba aei ni kabutaa n akea ae e na kaitaraa.—Wareka 2 Betero 3:7, 13.
7. Ti kanga n ataia bwa a boni kona n tokanikai n rarawa nakon te Riaboro ana toro Iehova n tatabemania nako?
7 Bon akea te nanokokoraki bwa e na bon teimatoa ni waaki ana botaki Iehova ao ni kakabwaiaaki irouna. (Wareka Taian Areru 125:1, 2.) Tera ngaira arora? E taekinaki n te Baibara bwa ti boni kona n tokanikai n rarawa nakon te Riaboro, n aron naba are e karaoia Iesu. Ni koauana, e kaotaki n te taetae ni burabeti are e taekinna Kristo rinanon te abotoro Ioane bwa a na boni kamaiuaki “te koraki ae uanao” ake a kantaningaa te maiu i aon te aba n tokin te waaki ae ngkai, n aki ongei ana waaki n tutuki Tatan. N aron are e taekinaki n te Baibara, a takakaa ni kangai: “Ana bwai Atuara ae tekateka i aon te kaintokanuea te kamaiu, ao ana bwai naba te Tiibutetei [ae Iesu Kristo].” (Te Kaotioti 7:9-14) A taekinaki taani kabiraki bwa a kataea ana kai Tatan, ao raoia ake “tiibu tabemang” a tokanikai n rarawa nakon Tatan. (Ioane 10:16; Te Kaotioti 12:10, 11) Ma aei are e kainnanoaki iai te mwakuri korakora ao te tataro ma nanora ni koaua bwa ti aonga ni kamaiuaki “mairoun Teuare buakaka.”—Mataio 6:13, BK.
Te Katoto ae Kororaoi ni Kaineti ma te Rarawa Nakon te Riaboro
8. Tera te moani kariri are koreaki are e kamanenaa te Riaboro ni kariria iai Iesu n te rereua, ao tera ana kaeka Kristo iai?
8 E kataia te Riaboro n urua ana kakaonimaki Iesu. Ngke e mena Iesu n te rereua ao e kakorakoraa Tatan ni kabonganai kariri ni kakerikaka iai Ana ongeaba nakon Iehova. Ma e ngae n anne, e katea te banna ni katoto ae kororaoi Iesu ni kaineti ma te rarawa nakon Tatan. Imwin ana aki mamatam i nanon 40 te ngaina ao 40 te bong, e bae Iesu n rangi ni bora ni baki. E taku Tatan: “Ngkana tao Natin te Atua Ngkoe, ao Ko na tua ba a na riki ni berena atibu aikai.” Ma e rawa Iesu ni kamanenaa mwaakana are mairoun te Atua ibukin oini kabwaiana. Ma n oneani mwin anne, e kangai Iesu: “E koreaki ae kangai, E aki maiu te aomata n ti te berena, ma e maiu n taeka nako aika a oti nako mai win te Atua.”—Mataio 4:1-4; Te Tua-Kaua 8:3.
9. Bukin tera bwa ti na rarawa nakon ana kariri te Riaboro ae tangiran te wene ni bure?
9 E a kataia ngkai te Riaboro n ukeri ana anga ake e na kona ni kabwakaia iai ana toro Iehova rinanon tangiran te wene ni bure. Ngaia are ti riai n nanomatoa n rarawa nakon ana kariri te wene ni bure ake a taabangaki karaoaia n te aonnaba ae kammaira aei. E katereaki ae kangai n Ana Taeka te Atua: “Kam aki ataiia aomata aika buakaka ba e aki reke uean te Atua i rouia? Kam na tai burebureaki: e aki reke uean te Atua irouia taani wene ni bure, ma taan taromauri boua, ma taani kimoa bun te aomata, ma mwaane aika baka ni kan aine, ao mwaane aika bo ma mwaane.” (1 Korinto 6:9, 10) E teretere raoi ngkanne bwa a na bon aki kariaiakaki aomata aika bubuaka ao aika rawa ni bitii aroaroia n rin i aan ana waaki te Atua ae boou i aon te aba.
10. Tera te kariri naba teuana are taekinaki ni Mataio 4:5, 6 are e kamanenaa Tatan bwa e na urua iai ana kakaonimaki Iesu?
10 Ni kaineti ma te kariri teuana are e rinanona Iesu ni menana n te rereua, ao e koreaki ae kangai n te Baibara: “E kairia te riaboro nakon te kawa ae tabu, ao e katokaa i aon taubukini maneaban te Atua, ao e taku nako Ina, Ngkana tao Natin te Atua Ngkoe, ao Ko na ewe nako: ba e koreaki ae kangai, E na mwiokoia ana anera i bukim; ao, A na tabekiko ni baiia, Ba e kawa n toki waem n te atibu.” (Mataio 4:5, 6) E iangoia Tatan bwa ni karaoan aei e na riki iai bwa te bwai ae kamimi ae e na kaota koauan ae Iesu bon te Mesia. Ma ni koauana bon te mwakuri ae aki riai ao ni kainikatonga, ae e aki kakukureia te Atua ao e na bon aki naba boutokaia. Ma e ngae n anne, e a manga kaotiota naba kakaonimakina Iesu nakon Iehova ngke e kaeka ao ni mwanewea are e taekinaki n te Baibara ni kangai: “E a manga koreaki ae kangai, Ko na tai kata Iehova ae Atuam.”—Mataio 4:7; Te Tua-Kaua 6:16.
11. E na kanga ni kona Tatan ni kairarangira, ao e na tera mwina?
11 E bae naba Tatan ni karirira n ukoukorani karineara i bon iroura n aanga aika kakaokoro. Tao e na kataia ni kairarangira ni baika tatangiraki n te aonnaba aei, n aroni kunnikai ao aroni katamaroaara ke tao ni kaakibotu aika aki raoiroi. Ma ngkana ti kaaki ana reirei te Baibara ao ni kakairi n aron te aonnaba aio, ti kona ni kantaningaia ngkanne bwa a na kamanoira anera man rotakibuakara ni waaki aikai? E ngae ngke e raraoma ni koaua te Uea are Tawita n ana bure are irekereke iai ma Batateba, ma e bon aki kamanoaki man uaan ana mwakuri. (2 Tamuera 12:9-12) Ti bia aki kataa Iehova n aaro aika aki riai, n aron teuana, karikirakean ara iraorao ma kaain te aonnaba aei.—Wareka Iakobo 4:4; 1 Ioane 2:15-17.
12. Tera te kariri are taekinaki ni Mataio 4:8, 9, ao e kanga Natin te Atua ni kaekaa?
12 Bon iai riki te kariri teuana are e kamanenaa te Riaboro n te rereua, ae irekereke ma anganakin Iesu te mwaaka n tautaeka. E kaoti nakon Iesu tautaekan te aonnaba aei ma kakannatoia ao e taku: “I anganiko baikai ni kabane ngkana Ko katorobubua ni bobaraki n taromauriai.” (Mataio 4:8, 9) Ai boni buakakara te waaki aei, ae tangiran te kan taromauriaki are bon tii ana bwai Iehova ao kairarangan Iesu bwa e na aki kakaonimaki nakon te Atua! E a riki te anera are kakaonimaki ngkoa bwa te tia bure, te tia mataai ni kanibwaibwai, ao te tia kariri ae koro buakakana ae Tatan te Riaboro, kioina bwa e kabatiaa iaiangoan te kan taromauriaki. (Iakobo 1:14, 15) Ma ni kaitaraan aei, e rangi n nanomwaaka Iesu n teimatoa ni kakaonimaki nakon Tamana are i karawa. E taekina ae kangai: “Naako akuu, Tatan; ba e koreaki ae kangai, Ko na taromauria Iehova ae Atuam, ao ko na toro i Rouna n ti Ngaia.” Mangaia are e a manga rawa naba Iesu nakon te Riaboro n te aro ae mataata ao n aki wimakiki. E aki tangiria n irekereke ma ana waaki Tatan Natin te Atua, ao e rawa naba ni kan taromauria te aomata ae buakaka aei!—Mataio 4:10; Te Tua-Kaua 6:13; 10:20.
“Rarawa Nakon te Riaboro, ao Ane E na Biri Nako Mai Roumi Iai”
13, 14. (a) Ngke e kaotii tautaekan te aonnaba aei te Riaboro nakon Iesu, tera raoi are e kan anganna? (b) E kanga Tatan ni kataia ni kabuakakai nanora?
13 Ngke e kaotii tautaekan nako te aonnaba aei te Riaboro nakon Iesu, ai aron ae e kan anganna te mwaaka n tautaeka ae akea n ai arona. E kantaningaia Tatan bwa e na anaaki nanon Iesu ni baike e nori ao ni kakoauaa bwa e na boni kona n riki bwa te tia tautaeka i aon te aba ae te kabanea ni mwaakaroiroi. Ni boong aikai e a aki anganira tautaekan te aonnaba aei te Riaboro ma e a kabuakakai nanora ni kabonganaani matara, taningara ao ara iango.
14 E tautaekana te aonnaba aei te Riaboro. Ao boni ngaia naba are babaarongai waaki ni kanako rongorongo. Anne bukina ae e aki kamimi ngkai baika noraki, a ongoraeakinaki ao ni warekaki n te aonnaba aei bwa e a taabangaki iai te wene ni bure ao te tiritiri. Bwaai ni kanako rongorongo n te aonnaba aei a kauekea i nanora kani karekeani baika bati aika akea uaaia nakoira. Aikai aeka n aanga ake e teimatoa ni kamanenai te Riaboro ni burebureira iai n tangirani bwaikorakin te maiu aei ake a na taraa n anai nano ni matara, n taningara ao n ara iango. Ma ngkana ti rawa n tarai, n ongoraeakini ao ni kani wareki baika a bobuaka ma ana reirei te Baibara, ai aron ae ti a kangai iai: “Naako akuu, Tatan!” Ti a katotonga iai Iesu ngkana ti tei n nene ao ni kakorakoraira n rarawa nakon ana waaki Tatan ae buakaka aei. E kona n otara te koaua ae ti aki irekereke ma ana waaki Tatan n ninikoriara ni kaotira bwa Ana Tia Kakoaua Iehova ngaira ao taan rimwini Kristo nakoia raora ni mwakuri, raora n reirei, kaain rarikira ao ara koraki.—Wareka Mareko 8:38.
15. E aera ngkai te rarawa nakon Tatan, e nanonaki iai te teimatoa n taratara raoi?
15 E a ‘kitana’ Iesu te Riaboro imwin aki tokanikaina n urua Ana kakaonimaki nakon te Atua n te katenua n tai. (Mataio 4:11) Ma e ngae n anne, e aki katoka karirian Iesu Tatan, bwa ti tuangaki ae kangai: “Ao te riaboro, ngke e a tia ni kabane kariri, ao e nako mai Rouna ni kamaanna.” (Ruka 4:13) Ti riai ni kaitaua Iehova ngkana ti tokanikai n rarawa nakon te Riaboro. Ma ti bon riai naba n teimatoa ni bubutii ana ibuobuoki te Atua, ngkai e na manga okirira te Riaboro n te tai are e a tia n namatia ae tao ti aki kantaningaia. Ai ngaia are ti bia teimatoa n taratara raoi n taai nako, ao n tauraoi ni karaoa te beku ae tabu ibukin Iehova ma te botumwaaka n aki ongei kataaki ake ti aitara ma ngaai.
16. Tera te mwaaka are e anganira Iehova, ao bukin tera bwa ti riai n tataroakinna?
16 Ti riai n tataroakina reken te taamnei ae raoiroi mairoun te Atua are ngaia te kabanea ni mwaaka i aoni bwaai ni kabane, bwa ti aonga ni kona ni buokaki bwa ti na teimatoa n rarawa nakon te Riaboro. E kona n anganira te kona bwa ti na karaoi baika ti aki kona ni karaoi n oini korakorara. E karaui nanoia taan rimwina Iesu ni kaineti ma tatauraoin taamnein te Atua n taai nako ngke e kangai: “Ngkai kam ata te angania natimi baika raraoi ngkami akana kam buakaka, ao tiaki e maiti riki iroun Tamami are i karawa te kan anga te Tamnei are Raoiroi nakoia akana butiia?” (Ruka 11:13) Ti bia teimatoa n tataroakina te taamnei ae raoiroi mairoun Iehova. Ti na kona ni buokaki ao ni kakorakoraaki n te mwaaka aei bwa ti na teimatoa n rarawa nakon te Riaboro ao n tokanikai i aona. Irarikin te katoa tai n tataro ma te nano ni koaua, ti riai naba ni karin ara bwai ni buaka ake mairoun te Atua bwa ti aonga ni kona n “eki nako ana bwai n nanowanawana te riaboro.”—I-Ebeto 6:11-18.
17. Tera te kimwareirei are e buoka Iesu n tokanikai n rarawa nakon te Riaboro?
17 Iai riki te bwai are buoka Iesu bwa e na rarawa nakon te Riaboro, ao e boni kona naba n ibuobuoki nakoira. E taekinaki ae kangai n te Baibara: “I bukin te kimareirei are kamenaki i mwaina [Iesu], ao E aki mutiakina kamaamaeana, ao E tekateka i angaatain ana kaintokanuea te Atua.” (Ebera 12:2) E kona naba n reke iroura te aeka ni kimwareirei anne ni boutokaan riain Iehova n tautaeka, karinean arana ae tabu ao kakantaningaan te kaniwanga ae imwaira ae te maiu n aki toki. Ai boni kakimwareireira norani kamaunaakin Tatan ma ana waaki nako ao noran ‘abanakin te aba irouia akana nimamannei ao ni kukurei ni kabatiaan te raoi’! (Taian Areru 37:11) Ai ngaia are teimatoa rarawa nakon te Riaboro, n aron are e karaoia naba Iesu.—Wareka Iakobo 4:7, 8.
Ko na Kanga ni Kaeka?
• Tera te kakoaua are e oti iai bwa e bon teimatoa Iehova ni boutokaia ana aomata?
• E kanga Iesu ni katea te katoto ni kaineti ma te rarawa nakon Tatan?
• N aaro raa aika ko kona iai n rarawa nakon te Riaboro?
[Taamnei n iteraniba 26]
Ti na riki bwa ana kairiribai te Atua ngkana ti raona te aba
[Taamnei n iteraniba 28]
E rawa Iesu ni butimwaei tautaekan te aonnaba aei ni kabane ake e kan anganna Tatan