Rarawa Nakon Tatan, Ao E Na Birinako!

“Kam na irira nanon te Atua; ma kam na rarawa nakon te riaboro, ao ane e na biri nako mai roumi iai.”​—IAKOBO 4:7.

1, 2. (a) Baikara aroaron te Riaboro aika oti n te taeka are koreaki n Itaia mwakorona 14? (b) Baikara titiraki aika ti na maroroakini?

TE RIABORO boni karoton raoi te kainikatonga. E teretere raoi nanorietana n taeka ake e korei ana burabeti te Atua ae Itaia. Tebubua tabun te ririki imwain are e riki Baburon bwa te tautaeka ae mwaakaroiroi n te aonnaba, e taekinaki bwa a kangai ana aomata Iehova ni kaitaraa “ueani Baburon”: “Ko taku i nanom, N na rierake nako karawa, N na karietata au kaintokanuea i etan ana itoi te Atua [uea ake a riki mairoun Tawita] . . . N na katotonga aron Teuae Moan te Rietata.’” (Itaia 14:3, 4, 12-15; Warekaia Iteraera 24:17) Titeboo nanorietan “ueani Baburon” ma Tatan are “atuan aon te aba.” (2 I-Korinto 4:4) Ma e na kakeeaki kainikatongan Tatan, n aron naba Baburon are e a kabwakaki n te aro ae kamaamaa.

² Kioina ngkai iai te Riaboro, ti bon riai n iangoi titiraki aikai: Ti riai ni maaka Tatan? E aera ngkai e kaungaia aomata bwa a na bwainikirinia Kristian? Ti na kanga n totokoa burebureakira iroun te Riaboro?

Ti Riai ni Maaka te Riaboro?

3, 4. E aera ngkai a aki maaka te Riaboro, Kristian aika kabiraki ma raoraoia?

³ A rangi ni kaunganano ana taeka Iesu Kristo aikai nakoia Kristian aika kabiraki: “Ko na tai makui baika ko nangi maraki iai: noria, e nang kakia tabemang mai buakomi te riaboro i nanon te auti ni kaikain, ba kam aonga ni kataki iai; ao tengaun ami bong n rawawata iai. Ko na kakaonimaki ni karokoa matem, ao N na anganiko te bau are te maiu.” (Te Kaotioti 2:10) A aki maaka te Riaboro taani kabiraki ma raoia aika a kaantaningaa te maiu i aon te aba. E aki oioi aki-maakuia man ninikoriaia, ma ibukina bwa a maaka te Atua ma ni karinea, ao ‘a karabaia i aan nuuni baina ni kiba.’​—Taian Areru 34:9; 36:7.

⁴ Taan rimwin Iesu Kristo rimoa a ninikoria ao a kakaonimaki ni karokoa mateia n aki ongei baike a karawawataki iai. A aki maaka ana mwakuri Tatan te Riaboro, bwa a ataia ae Iehova e aki kona ni mwanuokina taekaia aomata aika kakaonimaki irouna. N aron naba anne, n aki ongea te bwainikirinaki ae korakora ae rotiia ngkai, Kristian aika kabiraki ma raoraoia aika katabuaki nakon te Atua a kananomatoaia bwa a na aki kariaia uruakan aroia ni kakaonimaki iroun te Atua. Ma e ngae n anne, e katerea te abotoro Bauro bwa e kona ni karekea mateia aomata te Riaboro. Tiaki anne ae ti na rangi ni maaku iai?

5. Tera reireiara man Ebera 2:14, 15?

⁵ E taku Bauro bwa e ‘buokanibwai Iesu n te raraa ma te iriko’ bwa “ni matena E na kataea ana kai teuare iai i rouna maakan te mate, are te riaboro; ao E na kainaomataia aomata ni kabaneia aika a toronaki n aia bong ni maiu ni kabane ni maamaakan te mate.” (Ebera 2:14, 15) E tauaki aron Iuta Itekariota iroun Tatan are “teuare iai i rouna maakan te mate,” ao imwin anne e kabonganaia mataniwia I-Iutaia ao kaain Rom bwa a na kamatea Iesu. (Ruka 22:3; Ioane 13:26, 27) Rinanon maten Iesu ae te karea, e a kainaaomataia iai te botannaomata ae bubure mairoun Tatan, ao e a kaangaraoa nakoira aroni karekean te maiu are aki toki.​—Ioane 3:16.

6, 7. Tera aron mwaakan te Riaboro ni kamatea te aomata?

⁶ Tera aron mwaakan te Riaboro ni kamatea te aomata? E a kamani karekea te mate nakoia aomata Tatan, mangke e moani waakina ana mwakuri aika bubuaka, ana kewe, ao ana kairiri. E riki aei ibukina bwa e a bure Atam ao e a kabutanako te bure ao te mate nakoia kanoana. (I-Rom 5:12) N reitaki ma anne, a bwainikirinaki naba taan taromauria Iehova irouia ana toro Tatan aika maeka i aon te aba, ao tabeman a a bon tia ni kamateaki, n aron are a karaoia naba nakon Iesu Kristo.

⁷ Ma ti aki riai n iangoia bwa e kona te Riaboro n tiringia aomata nako ake e kan tiringia. E kamanoia ana botannaomata te Atua, ao e na aki kariaia bwa a na kamaunaki ni kabane taan taromauri ni koaua aika n te aonnaba iroun Tatan. (I-Rom 14:8) Ni koauana, e kariaia Iehova bwa a na bwainikirinaki ana aomata ni kabane, ao e kariaia naba bwa a na kamateaki tabeman ake a niniaki iroun te Riaboro. Ma e ngae n anne, e anga te kaantaninga ae kakukurei te Baibara, ae taekan manga-utiia te koraki ake a mena taekaia n te “boki ni kauring.” Akea te bwai ae kona ni karaoia te Riaboro ni kaineti ma totokoan manga-utia maate aikai!​—Maraki 3:16; Ioane 5:28, 29; Mwakuri 24:15.

E Aera Ngkai E Bwainikirinira Tatan?

8. E aera te Riaboro ngkai e bwainikirinia ana toro te Atua?

⁸ Ngkana ana toro te Atua ngaira ae ti kakaonimaki, e bae n iai ngkanne bukin bwainikirinara iroun te Riaboro. Tiana bon uruakan ara onimaki. Iai ara iraorao ae kakawaki ma Tamara are i karawa, ao e tangiria Tatan ni kan uruanna. Ti aki riai ni mimi n aei, bwa i Eten ngkoa ao e taetae ni burabetiia Iehova, bwa e na iai te kairiribai i marenan te “aine” ni kaikonaki ao te “naeta,” ao i marenaia naba aia “kariki.” (Karikani Bwaai 3:14, 15) E ataaki te Riaboro n te Baibara bwa “te naeta nikawai,” ao e kaotaki bwa e a kani bane ana bong, ao e a rangi n un. (Te Kaotioti 12:9, 12) Ni waakinakon te kairiribai i marenan “kariki” aika uoua, a kona ni kaantaningaia naake a kakaonimaki n toro iroun Iehova, bwa a na bwainikirinaki. (2 Timoteo 3:12) Ko a ataa ngkanne bukin bwainikirinara iroun Tatan?

9, 10. Tera te bukibuki are e tabekia te Riaboro, ao tera aron irekerekena ma aroaroia aomata?

⁹ E a tia te Riaboro ni katea te bukibuki ni kaineti ma te riai n tautaeka i aoni bwaai ni kabane. N te bukibuki aei ao e kananououaa iai kakaonimakia aomata nakon aia tia Karikiriki. E karokoa te bwainikirinaki Tatan i aon te mwaane ae raoiroi ae Iobi. Bukin tera? Bwa e aonga n urua ana kakaonimaki Iobi nakon Iehova. A buoka ana kaantaninga Tatan n te tai anne, buun Iobi ao ‘taani motika nanoangana aika kabotu’ aika teniman. N aron ae oti n te boki ae Iobi, e kabuakakaa te Atua te Riaboro, ni bukinna bwa akea te aomata ae kona n teimatoa ni kakaonimaki nakoina, ngkana e anganaki moa ana tai ni kataa te aomata anne. Ma e nenematoa ana kakaonimaki Iobi, mangaia are e a kakoauaki iai bwa bon te tia kewe Tatan. (Iobi 1:8–​2:9; 16:2; 27:5; 31:6) E kakorakoraa naba te Riaboro ni bwainikirinia taani Kakoauaa Iehova ni boong aikai, bwa e na uruana aia kakaonimaki bwa e aonga ni kakoauaki.

¹⁰ N ataakin ae e bwainikirinira te Riaboro bwa e na kataia n uruana ara kakaonimaki nakon te Atua, ti a buokaki iai bwa ti na kaninikoriaira ao ni kakorakoraira. (Te Tua-Kaua 31:6) Atuara bon te tia Tautaeka i aoni bwaai ni kabane, ao e na buokira bwa ti na kateimatoa ara kakaonimaki. Ti bia teimatoa n ukoukora kakukureian Iehova n arora ni kateimatoa ara kakaonimaki, n anganna te kaeka nakon te tia kakaniko are te katoki are Tatan te Riaboro.​—Taeka N Rabakau 27:11.

“Kawakinira Mairoun Teuare E Buakaka”

11. Tera ae nanonaki n te bubutii ae, “Tai taonira n te kaririaki”?

¹¹ Rikira bwa aomata aika teimatoa ni kakaonimaki bon tiaki te bwai ae bebete; e kainnanoaki iai te kakorakora n tataro. A rangi n ibuobuoki taeka ake n Ana Tataro te Uea. E taekina iterana teuana Iesu ni kangai: “Tai taonira n te kaririaki, ma kawakinira mairoun Teuare e buakaka.” (Mataio 6:13, BK) E aki karirira Iehova bwa ti na bure. (Iakobo 1:13) Ma n tabetai e a manga taekinaki n te Baibara bwa e kona ni karaoa anne, ma ni koauana, e tii kariaia rikina. (Ruta 1:20, 21) Ngkana ti tataroa are taekinna Iesu, ti butiia Iehova ngkanne bwa e na aki kitanira ngkana ti kaririaki. Ao e na bon aki kitanira bwa e kangai ana karaunano te Baibara: “E kakaonimaki te Atua, ae bon aki kitaningkami ba kam na kaririaki n te aro ae kam aki kona n teimatoa iai; ma E na karaoia ba raon te kaririaki kawaimi ni biri nako maiai, ba kam aonga ni kona n taon nanomi.”​—1 I-Korinto 10:13.

12. E aera ngkai ti tataro ni kangai: “Kawakinira mairoun Teuare e buakaka”?

¹² E taku Iesu imwin taekinan te kaririaki n ana tataro: “Ma kawakinira mairoun Teuare e buakaka.” A kangai rairai tabeua man te Baibara: “Kamaiuira man te buakaka,” ke “Kawakinira man te buakaka.” (Contemporary English Version) Ma n te Baibara, te kibuntaeka ae ‘kamaiura man’ e kabonganaki riki ni kaineti ma te aomata, ao ana Euangkerio Mataio e taekina te Riaboro bwa “te tia kariri.” (Mataio 4:3, 11) Mangaia are e kakawaki ae ti na tataro ni bubutii kamaiuara mairoun “Teuare e buakaka” are Tatan te Riaboro. E kataia n anai nanora bwa ti na bure nakon te Atua. (1 I-Tetaronike 3:5) Ngkana ti bubutii ni kangai: “Kawakinira mairoun Teuare e buakaka,” ti butiia iai Tamara are i karawa bwa e na kawakinira ao ni buokira bwa e aonga n aki burebureira te Riaboro.

Tai Kariaia Burebureakim Iroun te Riaboro

13, 14. E aera ngkai a riai I-Korinto ni bita aroia nakon te mwaane are te tia wene ni bure n aia ekaretia?

¹³ Ngke e kaungaia ngkoa Kristian ake i Korinto Bauro, ao e kangai: “Ma ane kam kabara ana bure, ao ngai I kabara naba: ba ane I a tia ni kabara naba, ngkana tao I a tia ni kabara te bwai teuana, ao I boni kabara naba i bukimi i matani Kristo; ba ti aonga n aki burebureaki iroun Tatan: ba ti aki babanga n aron ana kuneman.” (2 I-Korinto 2:10, 11) E kona ni burebureira te Riaboro n aanga tabeua, ma e aera ngkai e korea taekan anne Bauro n te kibu ae i eta aei?

¹⁴ E kaetiia I-Korinto Bauro ibukina bwa a kariaia te mwaane ae te tia wene ni bure bwa e na teimatoa ni kaaina te ekaretia. E bae ni kukurei Tatan iai, ibukina bwa e a tia te ekaretia n irekereke ma “te wene ni bure teuana ae bon akea i buakoia Tientaire.” Ma n tokina, e a kabaneaki man te ekaretia te tia bure. (1 I-Korinto 5:1-5, 11-13) E a manga bon raraoma te mwaane anne rimwi riki. Ngkana a rawa ni kabwara ana bure teuarei ao a aki kariaia I-Korinto kaokana nakon te ekaretia, ao e na burebureiia ngkanne te Riaboro n te itera teuana. N te aro raa? A na katotonga Tatan ni bangaaomata ao n aki-nanoanga. Ngkana e a “taonaki n te rawawata ae e riao” teuare raraoma, ao ni bwara nanona n taromauria te Atua, a na bukinaki naba iai unimwaane bwa tabeia rinanoan aei i matan Iehova ae te Atua ae rangi n nanoanga. (2 I-Korinto 2:7, BK; Iakobo 2:13; 3:1) Ni koauana, bon akea te Kristian ni koaua ae e na kani katotonga Tatan n iowawa, ni bangaaomata, ao n aki-nanoanga.

Kamanoaki ni Bwaai ni Buaka Mairoun te Atua

15. Te buaka raa ae ti buaka iai, ao e boboto i aon tera te tokanikai?

¹⁵ Ngkana ti na kawakinaki mairoun te Riaboro, ti riai ni buakani mwaakaia taamnei aika buakaka. Te tokanikai i aoia taamnei aika buakaka, e kainnanoaki ae ti na kamanenai ara “bwai ni buaka nako ake mairoun te Atua.” (I-Ebeto 6:11-18) E irekereke te bwai ni buaka aei ma “te tanga are te raoiroi.” (I-Ebeto 6:14) E aki ongeaba iroun te Atua te Uea are Tauro i Iteraera ngkoa, ao e karawawataki ngke e a bua mairouna te taamnei ae raoiroi. (1 Tamuera 15:22, 23) Ma ngkana ti karaoa ae raoiroi ao ni karin bwaai ni buaka ni kabane ake a na kawakina ara onimaki, e na reke iroura te taamnei ae raoiroi mairoun te Atua, ao baike ti kainnanoi ibukin kamanoara mairoun Tatan ao ana anera aika buakaka ake taimonio.​—Taeka N Rabakau 18:10.

16. Ti na kanga n teimatoa ni kamanoaki man mwaakaia taamnei aika buakaka?

¹⁶ Ti riai naba ni wareka Ana Taeka te Atua ma n reiakinna ni katoatai, ao ni kakamanenai naba booki ake a katauraoaki rinanon “te touati ae kakaonimaki,” bwa ti aonga n teimatoa ni kamanoaki man mwaakaia taamnei aika buakaka. (Ruka 12:42) Mangaia are ti na kaon ara iango ni bwaai aika reitaki ma te onimaki, ni kaineti ma ana reirei Bauro ae kangai: “Taari, ngkana iai bwaai aika koaua, bwaai aika riai, bwaai aika eti, bwaai aika itiaki, bwaai aika tangiraki ngkai a raraoi, bwaai aika riai ni kamoamoaki, ngkana iai te raoiroi teuana, ao ngkana iai te bwai ae e kamoamoaki te aba iai, ao kam na ururingi baikai n iangoi.”​—I-Biribi 4:8.

17. Tera ae e na buokira bwa ti na riki bwa aomata aika mwaatai n tataekina te rongorongo ae raoiroi?

¹⁷ E kariaia Iehova bwa ti na nangoi waera “n te tauraoi are reke n Euangkerion te raoi.” (I-Ebeto 6:15) Te roroko ni bobotaki ni Kristian e na kamwaataira n tataekina te rongorongo ae raoiroi ae taekan Uean te Atua. Ai kakimwareirei ra buokaia tabemwaang bwa a na reiakina ana koaua te Atua, ao ni kainaaomataki n te onimaki! (Ioane 8:32) Moan te manena “ana kabaang te Tamnei, ae ana taeka te Atua” bwa e kamanoira man reirei aika kewe ao e ‘urui noono.’ (I-Ebeto 6:17; 2 I-Korinto 10:4, 5) E buokira kamanenan raoi Ana Taeka te Atua ae te Baibara n reireinira te koaua, ao ni kamanoira bwa ti na aki mwamwanaki n ana waaki ni kamwane te Riaboro.

18. Ti na kanga “n teimatoa n eki nako ana bwai n nanowanawana te riaboro”?

¹⁸ E moana maroroakinan ara bwai ni buaka n te onimaki Bauro ni kangai: “Kam na korakora iroun te Uea, ao ni korakorani mwakana. Kam na karin ami bwai ni buaka nako ake mairoun te Atua, ba kam aonga ni kona n teimatoa n eki nako ana bwai n nanowanawana te riaboro.” (I-Ebeto 6:10, 11) Te taeka n Erene ae rairaki ikai bwa “teimatoa,” e irekereke ma aron te tautia n taua ni kamatoaa nnena. Ti taui naba nnera ni kamatoai n ara buaka ibukin te onimaki, e ngae ngkai e kabonganai ana bwai n nanowanawana Tatan aika kakaokoro, ibukin uruan ao kabuakakan aron katiteuanakira ma tarira, reirei ake ti kamanenai, ao arora ni kakaonimaki iroun te Atua. Ma e tuai man tokanikai ana buaka te Riaboro, ao e bon aki konaa!a

Rarawa Nakon te Riaboro ao E na Birinako

19. Tera te anga teuana ae ti na korakora iai ni kaitaraa te Riaboro?

¹⁹ Ti kona n tokanikai n ara buaka n te onimaki ni kaitaraa te Riaboro ao mwaakaia taamnei aika buakaka ake a kairaki irouna. Akea bukina ae ti na ruru iai ni maaka Tatan, bwa e korea ae kangai te tia rimwin Kristo ae Iakobo: “Kam na irira nanon te Atua; ma kam na rarawa nakon te riaboro, ao ane e na biri nako mai roumi iai.” (Iakobo 4:7) Te anga teuana ae ti na korakora iai ni kaitaraa Tatan ao taian taamnei aika buakaka ake raona, boni man te aki irekereke ma mwakuri n tabunea n aekaia nako, ao n aki iraorao naba ma ake a kaakaraoia. E kateretereaki n te Baibara bwa a riai ana toro Iehova n aki kakoauai banna aika aongkoa a kaotii baika a tuai n riki, ke n irekereke ma te kateimaro, te kaiwa, ao te tabunea. Ngkana ti teimatoa n tabetabe n te mwakuri ni Kristian ma ni korakora n te onimaki, ti aki riai ni maaka tabuneakira ngkana iai ae kataia ni karaoia.​—Warekaia Iteraera 23:23; Te Tua-Kaua 18:10-12; Itaia 47:12-15; Mwakuri 19:18-20.

20. Ti na kanga n rarawa nakon te Riaboro?

²⁰ Ti “rarawa nakon te riaboro” ngkana ti nim ma kaetietin te Baibara ao ana koaua, ao ngkana ti kananomatoaira naba ni kaitaraa. E boraoi waakin te aonnaba ma aroaron Tatan, ibukina bwa boni ngaia atuana. (2 I-Korinto 4:4) Mangaia are ti rawa nakon te aroaro n te aonnaba, n aron te nanorieta, te bangaaomata, kaakaraoan ae buakaka, te mwakuri n tiritiri, ao te kanibwaibwai. Ti ataia bwa e birinako te Riaboro ngke e kaitaraki iroun Iesu ni kabonganakin te Baibara ni kataakina ngke e kataaki n te rereua. (Mataio 4:4, 7, 10, 11) N aron naba anne, e na ‘birinako mairoura’ Tatan bwa e a konaaki, ngkana ti aantaeka ma nanora ni koaua iroun Iehova ao n onimakinna n ara tataro. (I-Ebeto 6:18) Ni kaineti ma ana boutoka Iehova ae te Atua ao Natina ae tangiraki, bon akea ae kona n iowawa nakoira n aki toki, ao ai uana naba ma te Riaboro!​—Taian Areru 91:9-11.

[Kabwarabwara ae nano]

Tera Am Kaeka?

• Ti riai ni maaka Tatan te Riaboro?

• E aera ngkai e kauekea te bwainikirinaki Tatan i aoia Kristian?

• E aera ngkai ti tataro bwa ti na kawakinaki mairoun “Teuare e buakaka”?

• Ti na kanga ni kona n tokanikai n te buaka ibukin te onimaki?

[Taamnei n iteraniba 18]

Ko tatataro kawakinam mairoun “Teuare e buakaka”?