Titiraki Mairouia Taani Wareware

Tera aia kaantaninga Ana Tia Kakoaua Iehova i aon te kaoti nano?

Bon iai reirei aika mataata aika taekinaki n te Baibara aika buokia ana toro te Atua ni bwaina te kaantaninga ae riai i aon te bwai aei. Ma n taraana, bon akea te reirei ae kabuakaka te kaoti nano i aon te bwai teuana. N te katoto teuana, bon akea bukina bwa te baba n tararua e na aki karaoa te kaoti nano ibukin karaoan moti aika a reitaki ma waakinan aia kambwana. A mwaiti aia tai aia ekaretia Ana Tia Kakoaua Iehova ake a karaoi moti n nano ibukin taai ni bobotaki ao aron kabonganan ana mwane te ekaretia, n te kaoti nano ae te katei bai.

Ma tera aron te kaoti nano n rineia kaain te tautaeka? E koaua, bwa n aaba tabeua aika a inaaomata, e nakon ae tao 50 te katebubua mai buakoia kaain aaba aikai aika a aki roko ni kaotii nanoia n tain te rinerine. Ma Ana Tia Kakoaua Iehova, a aki urua inaaomataia aomata tabemwaang ni kaotii nanoia n rineia kaain te tautaeka; ao a aki naba kabuakakai taiani waaki n rinerine. A bon karineia ma n ongeaba irouia naake a rineaki n tain te rinerine, bwa a na tautaeka. (I-Rom 13:1-7) Irakin ke aki irakin te kaoti nano n rinea te aomata ae e kan riki bwa kaain te tautaeka, bon te bwai ae riai ni motikaki irouia Ana Tia Kakoaua Iehova n tatabemania nako, n te aro ae boraoi ma mataniwin nanoia ae kataneiaki n te Baibara, ao n ataakin baeia iroun te Atua ao te Tautaeka. (Mataio 22:21; 1 Betero 3:16) Ngkana a nang motika oin nanoia, taani Kakoaua a bon riai moa n iangoi bwaai aikai.

Te moan bwai, Iesu Kristo e bon tuangia taan rimwina ni kangai: “Tiaki ana bwai te aba ngaiia; n ai arou ngkai tiaki ana bwai te aba Ngai.” (Ioane 17:14) Ana Tia Kakoaua Iehova a rangi ni mutiakina raoi te reirei aei. Kioina ngkai “tiaki ana bwai te aba ngaiia,” a aki i-rekereke ma waaki n tautaeka aika a waakinaki n te aonnaba.​—Ioane 18:36.

Te kauoua ni bwai, te abotoro Bauro e taekinna bwa “te man” are e tei ibukin Kristo nakoia aomata ake a maiu n ana tai. (I-Ebeto 6:20; 2 I-Korinto 5:20) Ana Tia Kakoaua Iehova a boni kakoaua bwa e a tia ngkai Kristo Iesu n riki bwa te Uea n ana Tautaeka n Uea te Atua i karawa, ao a riai, ni katotongi aroia taan tei ibukin Kristo, ni kaotiota te rongorongo aei nakoia botannaomata nako. (Mataio 24:14; Te Kaotioti 11:15) Taan tei ibukin te tautaeka a kaantaningaki bwa a na aki tei i nuka ao n aki totokoi bwaai aika a karaoaki imarenaia kaain aaba ake a kanakoaki nako iai. Kioina ngkai Ana Tia Kakoaua Iehova bon taan tei ibukin ana Tautaeka n Uea te Atua are i karawa, a namakinna naba bwa a aki riai n i-rekereke ke n totokoi waaki n tautaeka aika a waakinaki n aaba ake a maeka iai.

Te katenua ni bwai ae riai n iangoaki, bwa aomata aika a ira rinean are e na kaaina te tautaeka, a na kona naba ni bukinaki ni bwaai ake e karaoi, te aomata are a rineia. (Kabotaua ma 1 Timoteo 5:22, The New English Bible.) Kristian a riai ni karaua n iangoia raoi bwa a tangiria n tabeka te uota anne ke a aki.

Te kaaua ni bwai, Ana Tia Kakoaua Iehova a taku bwa moan te kakawaki bonnanoia ni Kristian. (I-Korote 3:14) Ngkana a i-rekereke Aaro ma waaki n tautaeka, ao n tokina, e na karika te iraraure imarenaia kaain te Aro anne. Ana Tia Kakoaua Iehova a katotonga Iesu Kristo ngke a aki i-irekereke ma waaki n tautaeka ao ngkanne a kateimatoa iai boonnanoia ni Kristian.​—Mataio 12:25; Ioane 6:15; 18:36, 37.

Te kanimaua ao te kabanea ni bwai, aki-irekerekeia ma waaki n tautaeka, e angania Ana Tia Kakoaua Iehova te inaaomata n taetae ngkana a kawaria aomata ni kabane, n taekina te rongorongo ae kakawaki nakoia ae taekan te Tautaeka n Uea, n aki ongeia bwa tera te tautaeka ae a tangiria riki, taan ongora irouia.—Ebera 10:35.

Ibukin reirei man te Baibara aika a kaotaki i eta, n aaba aika mwaiti, kaain Ana Tia Kakoaua Iehova a motiki oin nanoia bwa a na aki ira te kaoti nano n rinea ae na kaaina te tautaeka, ao e boutokoaki inaaomataia ni karaoa anne n tuan abaia. Ma tera ae nang karaoaki, ngkana tuan te aba e tangiria kaain te aba bwa a na ira te kaoti nano n rinea ae na kaaina te tautaeka? Ngkana ngaia anne, taani Kakoaua n tatabemania nako a kabaeaki bwa a na karaoa te moti n nano ae boraoi ma mataniwin nanoia ae boto i aon te Baibara, n aron te bwai ae a na karaoia. Ngkana te aomata e motika nanona bwa e na kawara te tabo ni karebwaoki, ao boni ngaia anne ana moti n nano. Bwaai ake e karaoi n te tabo ni karebwaoki arei, bon tii imarenana ma ana tia Karikiriki.

Te Watchtower ibukin Nobemba 15 1950 e taekina ae kangai n iteraniba 445 ao 446: “N taabo ike Kaitara e kairoroia aomata bwa a na ira te kaoti nano n rinea ae na kaaina te tautaeka . . . [taani Kakoaua] a kona naba ni kawari taabo ni karebwaoki ma n rin iai. A tangiraki iai bwa a na kanikinaea te beba n rinerine ke ni kaota nanoia iai. Taan ira te rinerine a na karaoa ae a tangiria ma aia beba n rinerine. Mangaia are taani kaotioti ibukin te Atua a tei imatana ao a bon riai ni karaoa ae boraoi ma ana tua ao aia onimaki. Bon tiaki tabera te tuatuangia aroia ae a na karaoia ma beba n rinerine.”

Tera ae na karaoaki ngkana bun te aine ae te Kristian bon tiaki kaain te onimaki, ao e imanonoa buna bwa e na ira te kaoti nano n rinea ae na kaaina te tautaeka? Eng, e boni bae n aantaeka nakon buna, n ai aroia naba Kristian ngkai a aantaeka irouia akana iai te mwaaka irouia. (I-Ebeto 5:22; 1 Betero 2:13-17) Ngkana e ongeaba iroun buna ao e kawara te tabo ni karebwaoki, ao boni ngaia anne oin ana moti n nano. Akea ae riai n tiribureia iai.​—Kabotaua ma I-Rom 14:4.

Tera aron aaba aika a aki bae aomata i aan te tua bwa a na ira te kaoti nano n rinea ae na tautaeka, ma a riribaki aomata aika a aki kawari taabo ni karebwaoki—ao tao a kona naba ni kaikoakaki? Ao tera aroia aomata aika a karawawataki ni katuaeakaki ngkana a aki kawari taabo ni karebwaoki, e ngae ngkana e aki katauaki n te tua bwa a riai n ira te kaoti nano n rinea ae na kaaina te tautaeka? Ngkana e riki anne ke bwaai n aron aikai, te Kristian e riai ni motika oin nanona. “A na uoti oin uotaia aomata n tatabemania nako.”​—I-Karatia 6:5.

Tao a na iai aomata aika a na kerikaki aia onimaki ngkana a noria bwa taani Kakoaua ibukin Iehova temwangina a kawari taabo ni karebwaoki n tain te rinerine n abaia, ma temwangina a bon aki. A kona n taku bwa ‘a aki teimatoa ni waakina te waaki ae tii teuana, Ana Tia Kakoaua Iehova.’ Ma a riai aomata n ataia bwa ni bwaai aika riai ni baireaki irouia aomata n tatabemania nako n te aro ae boraoi ma mataniwin nanoia, n aron te bwai aei, Kristian n tatabemania nako a tei imatan Iehova ae te Atua ibon irouia, ao a riai ni karaoa oin aia moti n nano iai.​—I-Rom 14:12.

Ni moti n nano ni kabane ake a karaoi Ana Tia Kakoaua Iehova ibon ibukiia i aon bwaai aika kakaokoro nako, a tarataraia bwa a na kawakina aroia ni Kristian ae a na aki i-rekereke ma waaki n tautaeka, ao inaaomataia n tataetae nakoia aomata. Ni bwaai ni kabane, Ana Tia Kakoaua Iehova a onimakina Iehova ae te Atua bwa e na kakorakoraia, ni kawanawanaiia, ma ni buokia bwa a na aki urua aia onimaki. A kaota iai onimakinan ana taeka te tia areru: “Bon au bwa ae rietata ma neu ni kamaiu ae rietata Ngkoe; ma ngaia ae Ko na kairirai ma n tuangai arou i bukin aram.”​—Taian Areru 31:3.