Ti Kainnanoa Ana Botaki Iehova

KO A TIA n ongo iroun te aomata temanna ae kangai, “I kakoaua bwa iai te Atua, ma I aki kakoauai botaki n Aro”? Iango aika ai aron akanne a kakaotaki naba irouia aomata aika a kakaonimaki n taromauri n aia Aro rimoa, ma a bwara nanoia ngke aia Aro a aki kona ni katoki kain nanoia ibukin bwaai n taamnei. E ngae ngke a bwara nanoia irouia botaki n Aro, ma a kamatoa n taku bwa a boni kan taromauria te Atua. Ma a kakoaua bwa e raoiroi riki ngkana a taromauria n te aro ae boraoi ma nanoia, nakon ae a na taromauri n reitaki ma te ekaretia ke te botaki teuana.

Tera ana taeka te Baibara iai? E tangiriia Kristian te Atua bwa a na reitaki ma te botaki teuana?

A Kakabwaiaki Kristian Ake Rimoa Ibukina bwa E Baireaki Raoi Aia Waaki

Ni Bentekota 33 C.E., Iehova e aki nurakina taamneina ae raoiroi i aoia taan onimaki tabeman aika a maae nako, ma e nurakinna i aon te koraki ni mwaane ao aine ake a botaki “n te tabo ae ti teuana,” are inanon te ru are i eta ni kaawan Ierutarem. (Mwakuri 2:1) E a kateaki iai te ekaretia ni Kristian, ae imwina riki, e a riki bwa te botaki ae katobibia te aonnaba. A kakabwaiaki iai taan rimwin Kristo rimoa. N te aro ra? Te bwai teuana, a mwiokoaki n te mwakuri ae kakawaki—ae tataekinan euangkerion ana Tautaeka n Uea te Atua ni karokoa ae a roota “aonaba ni bane.” (Mataio 24:14) Aomata aika boou aika kaain te ekaretia a kona n reireiaki irouia raoia n onimaki, aron tataekinan te rongorongo.

E aki maan ao rongorongon te Tautaeka n Uea e a roko n taabo aika a raroa nako, ake itinanikun oon Ierutarem. Imarenan 62 ao 64 C.E., te abotoro Betero e korea ana moan reta nakoia Kristian ake a “uamae i Bonto, ao Karatia, ao Kabatokia, ao Atia, ao Bitunia,” ake a mena n te aba ae aranaki ngkai bwa Turkey. (1 Betero 1:1) Bon iai naba taan onimaki i Baretain, Rebanon, Turia, Kubero, Kuriti, Kurete, ao Itare. Ngke e kororeta Bauro nakoia I-Korote n 60-61 C.E., te euangkerio e a tia n “taekinaki i aonaba ni kabane aika i aani karawa.”—I-Korote 1:23.

Te kauoua ni kakabwaia ae reke man te ikotaki inanon te botaki teuana, bon te uaia ni kaunga nano ae kona ni waakinaki imarenaia Kristian. Ni botaki ma te ekaretia, Kristian a kona n ongora n reirei aika a kaunga nano, n uaia n reirei n te Baibara ae Tabu, n taekin rongorongo aika a kakorakora riki aia onimaki, ao n iraorao n tataro ma raoia n onimaki. (1 I-Korinto, mwakorona 14) Ao mwaane aika ikawai n te onimaki a kona n ‘tararua ana nanai te Atua.’​—1 Betero 5:2.

Ni kaainakin te ekaretia, e a reke naba aia tai Kristian n ikikina imarenaia ao e a rikirake naba te tangira irouia. A aki namakina karawawatakia ngke a iraorao ma te ekaretia, ma moan Kristian a kateimatoaki ma ni kakorakoraki riki iai.​—Mwakuri 2:42; 14:27; 1 I-Korinto 14:26; I-Korote 4:15, 16.

Bukina teuana riki are e kainnanoaki iai te ekaretia ae katiiteuanaki ae katobibia te aonnaba ke te botaki, bon kakorakoran riki te boonnano. A reireiaki Kristian aron te taetae n “te taeka ae ti teuana.” (1 I-Korinto 1:10) Moan te kakawaki karaoan anne. A kakaokoro nako aroia kaain te ekaretia, n aron buburan aia reirei ao kateia. A kakaokoro oin aia taetae, ao e kakaokoro naba aroaroia. (Mwakuri 2:1-11) N taai tabetai iai bwaai aika e kaokoro aia iango iai. Ma a buokaki Kristian bwa a na kaetii bwaai aikai, inanon te ekaretia.​—Mwakuri 15:1, 2; I-Biribi 4:2, 3.

Titiraki aika kakawaki aika a aki kona ni kaekaki irouia unimwaanen te ekaretia, a uotaki nakoia mataniwi aika mwamwananga, aika a ikawai n te onimaki n ai aron Bauro. Bwaai aika kakawaki aika reitaki ma te reirei ni Kristian a uotaki nakon te rabwata n tautaeka are e mena i Ierutarem. N te moan tai, te rabwata n tautaeka e kaainaki irouia ana abotoro Iesu Kristo, ma imwina riki, e a kaainaki naba irouia unimwaanen te ekaretia are i Ierutarem. Ekaretia ni kabaneia a aantaeka n te mwaaka mairoun te Atua, are e mwiokoaki iai te rabwata n tautaeka ao taan tei ibukina, ni kaineti ma bairean te mwakuri ni minita, rineaia mwaane ibukin nakoa tabeua, ao karaoan moti n nano ni kaineti ma taian reirei. Ngke e baireaki te bwai teuana iroun te rabwata n tautaeka, a butimwaea te moti anne taian ekaretia, ao a “kimareirei ni kabebetean nanoia arei.”​—Mwakuri 15:1, 2, 28, 30, 31.

Eng, Iehova e kabongana te botaki teuana n te moan tienture. Ma tera arona n taai aikai?

Ti Kainnanoa te Botaki ni Boong Aikai

N ai aroia Kristian ake n te moan tienture, Ana Tia Kakoaua Iehova ni boong aikai a nanona raoi mwiokoaia ibukin tataekinan euangkerion te Tautaeka n Uea. Te aro teuana are a waakina te mwakuri aei iai, bon rinanon kabutan Baibara ao booki aika a buoka aron reiakinan te Baibara, ae te waaki ae kainnanoa te babaire ae raoiroi.

Booki ni Kristian a riai ni karauaki ni katauraoaki raoi, a riai n tuoaki ibukin kairua, ao a riai ni boreetiaki ma ni kanakoaki nakoia ekaretia. Ao Kristian n tatabemania nako a riai n anga nanoia ni uoti booki aikai nakoia aomata aika a kan wareki. N te aro aei, rongorongon te Tautaeka n Uea e a tia n roko irouia aomata aika mirion ma mirion mwaitiia. Taan ua rongorongo ibukin te euangkerio a kataia ni bwaina te babaire ae raoiroi ngkana a waakina tataekinan te rongorongo, n taraia bwa akea te tabo ae bati ni kamwakuraki, ao akea te tabo ae aki kamwakuraki. Bwaai aikai a kainnanoa te babaire.

Kioina ngkai “te Atua E bon aki nanonano,” e riai n rairaki te Baibara ao booki aika kabwarabwara te Baibara. (Mwakuri 10:34) N te tai aei, te maekatin aei e kona n reke n taetae aika 132 mwaitiia, ao raona ae te Awake!, e a boreetiaki ngkai n taetae aika 83 mwaitiia. Karaoan anne e kainnanoi tiim n rairai aika baireaki raoi, n aaba aika mwaiti.

A kaungaki nanoia kaain te ekaretia ngkana a kaei bobotaki ni Kristian ao taian runga. A ongora iai kabwarabwara man te Baibara aika kamaiu, a uaia n reirei n te Baibara, a uaia n taekin rongorongo aika kaunga, ao a ikotaki ma raoia n taromauri n tatataro. Ao n ai aroia tariia ake n te moan tienture, a kakorakoraki riki aia onimaki ngke a kawaraki irouia mataniwi aika mwamwananga aika a tatangira. Mangaia are Kristian ni boong aikai a kaaina te nanai ae “ti te nanaina, ao ti temanna te tia kawakintiibu.”​—Ioane 10:16.

Te koaua bwa a aki kororaoi Ana Tia Kakoaua Iehova, ao a aki naba kororaoi tariia ake n te moan tienture. Ma e ngae n anne, a uaia ni mwakuri ni boo nanoia iai. Ibukin anne, e a tabe ni waakinaki tataekinan rongorongon te Tautaeka n Uea ni katobibia te aonnaba ngkai.—Mwakuri 15:36-40; I-Ebeto 4:13.

[Taamnei n iteraniba 29]

Kristian ni boong aikai a kaaina te nanai ae “ti te nanaina, ao ti temanna te tia kawakintiibu”