Teimatoa N Ririkirake Ma Ana Botaki Iehova
“Ao te Atua, ae mai Rouna te raoi . . . E na katauraoingkami nakoni makuri aika raraoi ni kabane, ba e na tauaki ana taeka.”—EBERA 13:20, 21.
1. Iraman mwaitiia kaain te aonnaba, ao iraman mwaitiia kaain Aaro ake tabeua?
N TE RIRIKI ae 1999, mwaitiia kaain te aonnaba e a roko n te ware ae onoua te birion! Mai buakon te mwaiti anne, te boki ae The World Almanac e kaongoraira bwa iai kaain te Mutirim aika 1,165,000,000 mwaitiia; 1,030,000,000 aika kaain te Aro ni Katorika n Rom; 762,000,000 aika Intu; 354,000,000 aika Buddhist; 316,000,000 aika Borotetanti; ao 214,000,000 aika kaain Aaro n Orthodox.
2. Tera ae e kona n taekinaki ibukin te Aro ni kaineti ma taai aikai?
2 Ibukin te iraraure imarenaia Aaro ao te mangaongao ae bati ni boong aikai, te koaua bwa aomata aika mirion ma mirion mwaitiia aikai, bwa a iwawaaki n te aro ae boraoi ma nanon te Atua? Tiaki ngaia anne, “ba tiaki te tia karika te kiriwe te Atua, ma te tia karika te raoi.” (1 I-Korinto 14:33) N te itera are teuana, tera aron te botaki n itaritari ae katobibia te aonnaba ae kaainaki irouia taan toro iroun Iehova? (1 Betero 2:17) Te karaurau n ukeuke e kakoaua bwa ‘te Atua, ae mai Rouna te raoi, e angania bwaai ni kabane ake a raraoi ibukin karaoan nanona.’—Ebera 13:20, 21.
3. Tera are e riki i Ierutarem ni Bentekota 33 C.E., ao bukin tera?
3 Tiaki mwaitiia aomata aika kaain Ana Tia Kakoaua Iehova ae kataua akoaia iroun te Atua; ao e aki naba anaaki nanon te Atua n taiani ware. E aki rineia tibun Iteraera ibukina bwa a “maiti riki nakoia botanaomata ni kabane.” Ni koauana, a “karako riki” mwaitiia. (Te Tua-Kaua 7:7) Ma ibukina bwa e aki kakaonimaki Iteraera, ni Bentekota 33 C.E., Iehova e a moanna n akoa riki te ekaretia ae boou ae kaainaki irouia taan rimwin Iesu Kristo. A kabiraki n taamnein Iehova ae raoiroi, ao a tataningamarau ni waaki nako n tataekina te koaua ibukin te Atua ao Kristo nakoia tabemwaang.—Mwakuri 2:41, 42.
Teimatoa n Ririkirake
4. Bukin tera bwa ko na taku bwa e rikirake riki te ekaretia ni Kristian rimoa?
4 N te moan tienture, te ekaretia ni Kristian e teimatoa n ririkirake, ni kauka te mwakuri n taabo aika boou, ni kakiritiania aomata, ao ni karababa riki te oota i aon ana kaantaninga te Atua. Moani Kristian a aki toki ni kaboraoa aia kaantaninga ma rikiraken te oota ae boou ae kaotaki nakoia, rinanon reeta aika a kairaki koreaia iroun te Atua. A kaungaki nanoia irouia abotoro ao tabeman riki ake a kawariia, ao a kakoroa raoi iai bukin aia mwakuri ni minita. Rongorongo aikai a kabwarabwaraki raoi n te Baibara n Erene ni Kristian.—Mwakuri 10:21, 22; 13:46, 47; 2 Timoteo 1:13; 4:5; Ebera 6:1-3; 2 Betero 3:17, 18.
5. Bukin tera bwa e a tabe n rikirake ana botaki te Atua ngkai, ao bukin tera bwa ti riai ni kaboraoa arora ma ngaia?
5 N ai aroia Kristian ake n te moan tienture, Ana Tia Kakoaua Iehova aika a maiu ngkai a a tia naba n rikirake man aroia are e mangori riki. (Tekaria 4:8-10) Ni moa mani kabanean ririkin te ka 19 n tienture, e a teretere bwa taamnein te Atua e memena i aon ana botaki. Ibukina bwa ti onimakina te kairiri mairoun te taamnei ae raoiroi ao tiaki mairouia aomata, ti a teimatoa n ririkirake n aron ootara i aon te Baibara ao ni karaoan nanon te Atua. (Tekaria 4:6) Kioina ngkai ti a mena inanoni “boong aika kaitira,” moan te kakawaki bwa ti na teimatoa n rikirake ma ana botaki Iehova ae waaki raoi. (2 Timoteo 3:1-5) Karaoan anne e buokira ni kakorakora riki ara kaantaninga, ma ni buoka karaoan te kaotioti ae bwanin n taekan ana Tautaeka n Uea te Atua are e a tia ni kateaki ngkai, imwain rokon tokin te waaki ae i aon te aonnaba ngkai.—Mataio 24:3-14.
6, 7. Baikara itera aika tenua ake ti na iangoi are e a tia n rikirake iai ana botaki Iehova?
6 Bon iai ibuakora, aomata aika a moanna n iraorao ma ana botaki Iehova inanon 1920 tabun, 1930 tabun, ao 1940 tabun. Inanon ririki akanne, antai mai buakora ake a kona n iangoia bwa e na rangi ni korakora te rikirake ao te katamaroa n ana botaki te Atua, ae e na waaki nako ni karokoa te bong aei? Iangoi mwaneka aika kakawaki ake a a tia n touaki inanon taai aika tibwa nako! E manena n te itera n taamnei, iangoan bwaai ake e a tia ni karaoi Iehova rinanoia ana aomata ake a baireaki raoi irouna.
7 E rangi n ringaki nanon Tawita rimoa ngke e iangoi ana mwakuri aika kamimi Iehova. “Ngkana I kani kaoti baikai ma n taekin,” e taku, “ao a maiti riki nakon aika konaki ni warekaki.” (Taian Areru 40:5) Bon arora naba anne, ae ti babanga n taekin ana mwakuri aika kakannato aika a riai ni kamoamoaki aika mwaiti, ake e karaoi Iehova inanon ara tai aei. Ma e ngae n anne, ti na iangoi itera aika tenua ake e a tia n rikirake iai ana botaki Iehova: (1) rikiraken te oota i aon bwaai n taamnei, (2) te mwakuri ni minita ae katamaroaki ma ni karababaki riki, ao (3) bitaki aika a karaoaki n te tai ae riai, ni kaineti ma babaire aika a waakinaki inanon te botaki.
Kukurei n te Kaotaota i aon Bwaai n Taamnei
8. N aron ae taekinaki n Taeka N Rabakau 4:18, ibukin te kaotaota n taamnei, tera ae ti a tia n ota iai ni kaineti ma te Tautaeka n Uea?
8 E kakoauaki Taeka N Rabakau 4:18 ni kaineti ma rikiraken te oota i aon bwaai n taamnei, teutana imwin teutana. E taku: “Ao kawaiia akana raoiroi ai aron te oota ngkana e bo mainiku, ae karaka ootana ni karokoa te tawanou.” Ai kukureira ngaira n te kaotaaki n taamnei teutana imwin teutana, ae ti a tia n namakinna! E katuuaki taekan ana Tautaeka n Uea te Atua n te bwabwaro ae booaki i Cedar Point Ohio, n 1919. Te Tautaeka n Uea aei bon te rabwata ae e kabonganaki iroun Iehova ibukin katabuan arana ao karaoiroan arona ao riaina n tautaeka. Ni koauana, te kaotaaki i aon bwaai n taamnei e a tia ni buokira bwa ti na oota n te koaua are mani Karikani Bwaai ni karokoa Te Kaotioti, ae te Baibara e kaotiota ana kaantaninga Iehova ae e na katabua arana rinanon te Tautaeka n Uea ae kairaki iroun Natina. Boni ngaia te kaantaninga ae kakannato ae bwainaki irouia taan tangira te raoiroi ni kabaneia.—Mataio 12:18, 21.
9, 10. N te 1920 tabun, tera ae e ataaki ibukin te Tautaeka n Uea ao botaki aika uoua aika a kairiribai, ao tera buokara ae reke mai iai?
9 N te bwabwaro ae booaki i Cedar Point n 1922, te tia kabwarabwara ae kakannato ae J. F. Rutherford, e kaungai nanoia ana aomata te Atua bwa a na “kaotiota, ni kaotiota, mani kaotiota te Uea ao ana tautaeka n uea.” N te kaongora ae atunaki ni “Bungiakin te Botannaomata” ae boretiaki n Te Taua-n-Tantani are bwain Maati 1 1925 e katuuaki taekan te oota i aon bwaai n taamnei ni kaineti ma taetae ni burabeti tabeua ake a kotea katean ana Tautaeka n Uea te Atua n te ririki 1914. Inanon 1920 tabun, e ataaki naba bwa iai botaki aika uoua aika a kairiribai, ake—ana botaki Iehova ao ana botaki Tatan. E a waaki nako te buaka aei imarenaia, ao ti na mena n te botaki ae e na reke te tokanikai irouna, ngkana ti teimatoa n rikirake ma ana botaki Iehova.
10 Ti a kanga n tia ni buokaki n te oota n taamnei aei? Kioina ngkai ana Tautaeka n Uea te Atua ao te Uea ae Iesu Kristo bon tiaki ana bwai te aonnaba aei, ao ngaira naba ti aki kona n riki bwa ana bwai te aonnaba aei. Ngkana ti kaokoroira ma te aonnaba, ao ti kaotira iai bwa ti tei n ana itera te koaua. (Ioane 17:16; 18:37) Ngkai ti a nori kangaanga aika a kakaiaki ake a roota te aonnaba ae buakaka aei, ai kukureira ngaira ngkai ti a aki reitaki ma ana botaki Tatan! Ao ai akoakira ngaira ngkai ti a mweeraoi n te aro n taamnei, ni menara inanon ana botaki Iehova!
11. Tera te ara man te Baibara ae butimwaeaki irouia ana aomata te Atua n 1931?
11 N te bwabwaro i Columbus, Ohio n 1931, e kamanenaki raoi Itaia 43:10-12. Taan Reirei n te Baibara a butimwaea te ara ae kaokoro ae Ana Tia Kakoaua Iehova. Ai raoiroira te kakabwaia aei ae te kona ni kaotiota aran te Atua, bwa a aonga ni weteaki aomata tabemwaang, ma ni kamaiuaki iai!—Taian Areru 83:18; I-Rom 10:13.
12. Tera te oota i aon bwaai n taamnei ni kaineti ma te koraki ae uanao ae katauraoaki n 1935?
12 Imwain 1930, a mwaiti ana aomata te Atua ake a aki mataata raoi ni kaineti ma aia kaantaninga ibukin maiuia n taai aika imwaia. Tabeman a iangoa te maiu i karawa, ma a tii anaaki naba nanoia n ana reirei te Baibara ibukin te baretaiti n te aonnaba. E kamaiu te reirei man te bwabwaro ae booaki i Washington D.C., n 1935, ae kaotia bwa te koraki ae uanao are e taekinaki n Te Kaotioti mwakorona 7, bon te koraki aika a kaantaninga te maiu i aon te aonnaba. Man te tai arei n ua ngkai, e a waakinaki ni kakorakoraki riki ikotakiia kaain te koraki ae uanao. Tiaki te koaua bwa ti na rangi ni kukurei ngkai ti aki babanga n aron ataakin ae antai te koraki ae uanao? Ngkai ti a noriia aomata aika mwaiti aika a tabe n ikotaki mai buakoia botannaomata, baronga, ao taetae ni kabane, ao ti a kaungaki iai bwa ti na kakorakorai riki nanora ma n tarataraira bwa e na boraoi butirakera ma aron rikiraken ana botaki Iehova.
13. Tera te kauntaeka ae kakawaki ae e kateretereaki n te bwabwaro i St. Louis, n 1941?
13 Te kauntaeka ae kakawaki riki ae riai n tabeakinaki iroun te botannaomata, e kaotaki n te bwabwaro i St. Louis Missouri n 1941. Bon taekan te riai n tautaekana te iuniweeti. Boni ngaia te kauntaeka ae e riai ni kaetaki n te tai ae e a kaan n roko ngkai, ao e na waetata naba n roko te bong ae kakannato ae kakamaaku ae e a tia ni baireaki ibukin karaoan anne! E kamatataaki naba n 1941, taekan te bwai ae irekereke ma te kauntaeka anne, ae taekan te kakaonimaki, are ti kaotia iai bwa e ngaa te itera ae ti tei ibukina, ni kaineti ma te kauntaeka ibukin riain te Atua n tautaeka.
14. N te bwabwaro ibukia aaba aika kakaokoro ae karaoaki n 1950, tera te reirei iai ibukia tooka ake a taekinaki n Taian Areru 45:16?
14 N te bwabwaro ibukiia aaba aika kakaokoro ae booaki n 1950 i New York City, e karauaki ni kateretereaki iai bwa antai tooka ake a taekinaki n Taian Areru 45:16. Bon te tai ae rangi ni kamaiu, ngke Brother Frederick Franz e maroroakina te reirei anne ao e kabwarabwara bwa tooka ake a na mena n te aonnaba ae boou a boni mena naba ibuakora ngkai. N te bwabwaro anne ao ake a karaoaki naba imwina, a mwaiti oota i aon bwaai n taamnei ake a kaotiotaki. (Taian Areru 97:11) Ai kukureira ngaira ngkai kawaira bon “ai aron te oota ngkana e bo mainiku, ae karaka ootana ni karokoa te tawanou”!
Te Ririkirake n Ara Mwakuri ni Minita
15, 16. (a) Ti a kanga ni karikirakea riki ara mwakuri ni minita ni Kristian inanon ririki ake man 1920 tabun ni karokoa 1930 tabun? (b) Baikara booki aika a kawaekoa riki karaoan te mwakuri ni minita inanon ririki ake a nako?
15 Ana kauoua ni waaki ana botaki Iehova ae e a tia n rikirake riki iai, e kaineti ma ara mwakuri ae kakawaki riki—ae tataekinan te Tautaeka n Uea ao kairaia aomata bwa a na riki bwa taan rimwin Kristo. (Mataio 28:19, 20; Mareko 13:10) Ibukin katiaan te mwakuri aei, te botaki aei e aki toki ni kauringira aron kakawakin karababan riki ara mwakuri ni minita ae ti kakaraoia. N te ririki 1922, a bane Kristian ni kaungaki bwa a na ira tataekinan te rongorongo. Bon tabeia Kristian n tatabemania nako aroni kaotiotan aia oota, ao buokan tataekinan te koaua. (Mataio 5:14-16) N 1927, e baireaki kaokoroan te Taabati koraki bwa boong ibukin tataekinan te rongorongo. Ni moa man Beberuare 1940, a taneiai taani Kakoaua n nonoraki ni kabuta Te Taua-n-Tantani ao te Consolation (ae te Awake! ngkai) irarikin te kawai, n taabo ni bitineti.
16 E moanna ni kabonganaki te boki ae uarereke ae te Model Study n 1937, are e kamatataaki iai riain manga okiraia aomata bwa a na reiakinaki taekan te koaua man te Baibara. Inanon ririki ake imwin anne, e a katuuaki riki waakinan taian reirei n te Baibara ma aomata. E a kakorakoraki riki karaoan te mwakuri aei ngke e a tibwaki te boki ae boou ae “Let God Be True” n 1946, ao te boki ae The Truth That Leads to Eternal Life n 1968. N taai aikai, ti kabongana te boki ae Knowledge That Leads to Everlasting Life. Rinanoakin reirei aikai a kawenea aan kairan te aomata ae boto i aon te Baibara bwa e na riki bwa te tia rimwin Kristo, ae nene.
Te Ririkirake ni Kaineti ma Katamaroan Taiani Babaire Inanon te Botaki
17. N aron are e taekinaki n Itaia 60:17, e a kanga n tia n rikirake riki ana botaki Iehova?
17 Te katenua n itera are e a tia n rikirake iai ana botaki Iehova e reitaki ma katamaroani babaire tabeua inanon te botaki. N aron are e taekinaki n Itaia 60:17, e berita ni kangai Iehova: “N na uota mai te koora n onea mwin te burati, ao N na uota mai te tirewa n onea mwin te biti, ao N na onea mwin te kai n te burati, ao N na onoi mwin atibu n te biti: ao N na karaoa te Raoi ba am tia tau-taeka, ao te Raoiroi ba te tia taua arom.” N aron ae boraoi ma te taetae ni burabeti aei, bon iai mwaneka ake a a tia ni karaoaki ibukin katamaroan te tararua i aon te mwakuri n tataekina te Tautaeka n Uea, ao kawakinan te nanai.
18, 19. Tera aron katamaroan taiani babaire inanon te botaki, ake a karaoaki inanon ririki ake a a bwakanako?
18 N 1919, e rineaki te service director n ekaretia nako ake a bubutii bwa a na baireaki ibukin tataekinan te rongorongo. E a kakorakoraki riki iai tataekinan te rongorongo. E a katokaki rineakia riikan ao unimwaane n te kaoti nano n 1932, ao maikanne are e a toki naba iai kabonganan te kaoti nano irouia kaain te ekaretia ibukin waakinan taiani mwakuri iai. E a roko te botaki n te mwaneka ae kakawaki teuana n 1938, ngke taani mwiokoaki ni kabane n te ekaretia a rineaki n te aro ae boraoi ma te babaire mairoun te Atua, ibukina bwa anne are e waakinaki n te ekaretia ni Kristian rimoa. (Mwakuri 14:23; 1 Timoteo 4:14) N 1972, a kateaki mataniwi ao tooro-ni-minita bwa taani beku, n aron are e karaoaki irouia mwaane aika Kristian rimoa. N onean mwin ae tii temanna te mwaane ae e na kateaki bwa te mataniwi n te ekaretia teuana, I-Biribi 1:1 ao kiibu riki tabeua, a kaotia bwa aomata aika a boraoi aroia ma kaetieti man te Baibara ibukia mataniwi, a na riki bwa te rabwata n unimwaane.—Mwakuri 20:28; I-Ebeto 4:11, 12.
19 N 1975, e moan waakinaki te babaire are ana komete tabeua te Rabwata n Tautaeka ibukia Ana Tia Kakoaua Iehova, a na tararua ana mwakuri ana botaki te Atua ni katobibia te aonnaba. A kateaki naba Komete Ibukin Mwaangan te Totaieti, aika a na tararuaa te mwakuri n aia aono. Man te tai arei, ao e a waakinaki kabebetean riki te mwakuri n ana etekuata te Totaieti ao ni mwaangan te Watch Tower Society, bwa e aonga n tabeakinaki ‘ae kakawaki riki.’ (I-Biribi 1:9, 10) Uotaia taani kawakin tiibu ake a mwakuri i aan ana kairiri Kristo boni kairan tataekinan te rongorongo, karaoan te reirei ae uaana inanon te ekaretia, ao kawakinan raoi ana nanai te Atua.—1 Timoteo 4:16; Ebera 13:7, 17; 1 Betero 5:2, 3.
Ana Kairiri Iesu ae Karaoaki Ngkai
20. Tera ae ti riai n ataia ibukin nakoan Iesu ngkana ti na kona ni kaboraoi arora ma ana botaki Iehova?
20 Kaboraoan arora ma rikirakeni waakin ana botaki Iehova e nanonna bwa ti riai n ataa nakoan Iesu Kristo are e mwiokoia nakoina te Atua, are e na bon riki bwa “atun te ekaretia.” (I-Ebeto 5:22, 23) E raoiroi naba Itaia 55:4 are ti tuangaki iai ae kangai: “Noria, I [Iehova] anga Ngaia ba te tia kakoaua au taeka i mataia botanaomata, ao te tia kaiririia botanaomata, ao te tia mataniwiia.” E bon ataa aron te kairiri Iesu. E ataiia naba ana tiibu ma aia mwakuri. Ao ngke e tuoi ekaretia ake itiua i Asia Minor, bon nimaua ana tai ni kangai: “I atai am makuri.” (Te Kaotioti 2:2, 19; 3:1, 8, 15) Iesu e ataa naba kainnanora, n aron naba Tamana are Iehova. E kangai Iesu imwain are e anga ana Katoto n Tataro: “E atai baika riai ba kam na anganaki Tamami, ngkana kam tuai ni butia.”—Mataio 6:8-13.
21. E a kanga ni kaotaki ana kairiri Iesu inanon te ekaretia ni Kristian?
21 E a kanga ni kaotaki ana kairiri Iesu? Te anga teuana, bon irouia mataniwi ni Kristian aika ‘bwaai n tangira aika mwaane.’ (I-Ebeto 4:8) Te Kaotioti 1:16 e kaotia bwa unimwaane aika kabiraki a mena i angaatain Kristo, are nanona bwa a mena i aani mwaakana. Ni boong aikai, Iesu e kaira te babaire ibukin aia mwakuri unimwaane, e ngae ngkana unimwaane aikai a kaantaninga te maiu i karawa ke i aon te aonnaba. N aron are e kabwarabwaraki n te kaongora are imwain aei, a kateaki mairoun te taamnei ae raoiroi n te aro ae e boraoi ma kaetieti ake n te Baibara. (1 Timoteo 3:1-7; Tito 1:5-9) N te moan tienture, te botaki n unimwaane teuana are i Ierutarem e riki bwa te rabwata n tautaeka ae tararuai ekaretia, ao te mwakuri n tataekina te Tautaeka n Uea. E karaoaki naba ae ai aron anne inanon ana botaki Iehova ae ngkai.
Teimatoa n Ririkirake ma Ngaia!
22. Tera te ibuobuoki ae katauraoaki iroun te Rabwata n Tautaeka?
22 Ana bwai te Tautaeka n Uea ni kabane i aon te aonnaba a a tia ni mwiokoaki nakon “te toro ae kakaonimaki ae wanawana,” ao aia Rabwata n Tautaeka Ana Tia Kakoaua Iehova, ae e tei ibukin te toro anne. (Mataio 24:45-47) Te Rabwata n Tautaeka e tabeakina riki katauraoan te reirei i aon bwaai n taamnei ao kairan te ekaretia ni Kristian. (Mwakuri 6:1-6) Ma ngkana raao n taromauri a rootaki ni kabuanibwai aika a riki n te aonnaba, te Rabwata n Tautaeka e butiia te botaki teuana ke botaki tabeua ake a kinaaki i aan tuan te aba bwa a na karekea te ibuobuoki nakoia, ma ni manga karaoi auti ao Maneaba n Uea ake a uruaki iai. Ngkana a karawawataki Kristian tabeman ke a bainikirinaki, e na waakinaki kateimatoakiia n te aro n taamnei. Ao n ‘taai aika kangaanga,’ a kabaneaki aanga ibukin waakinakoan te mwakuri n tataekina te rongorongo.—2 Timoteo 4:1, 2.
23, 24. N aki ongeia bwa tera ae riki nakoia ana aomata, ma tera ae kakatauraoaki iroun Iehova n taai nako, ao tera ae ti riai ni kamatoai nanora nako iai?
23 N aki ongeia bwa tera ae riki nakoia ana aomata, ma e teimatoa Iehova ni katauraoa te amwarake n taamnei ao te kairiri ae kainnanoaki. Te Atua e anga naba te ataibwai ao te wanawana nakoia taari ake a mwiokoaki bwa a na katauraoi ibukin rikiraken ao katamaroan riki ana babaire te Atua inanon ana botaki. (Te Tua-Kaua 34:9; I-Ebeto 1:16, 17) N taai nako, Iehova e katauraoa ae ti kainnanoia ibukin kakoroan bukin mwiokoara ni kakiritianakia te botannaomata ao kakororaoan ara mwakuri ni minita ni katobibia te aonnaba.—2 Timoteo 4:5.
24 Ti bon aki nanououa bwa Iehova e aki kona ni kitania ana aomata aika kakaonimaki; e na kamaiuia mai buakon te “rawawata are korakora” ae i aoni kawaina n roko ngkai. (Te Kaotioti 7:9-14; Taian Areru 94:14; 2 Betero 2:9) Bon iai bukina aika mwaiti ae ti riai n teimatoa n onimaki raoi iai ni karokoa te toki, n aron are ti karaoia naba n te moan tai. (Ebera 3:14) Mangaia are ti bia kamatoai nanora bwa ti na teimatoa n ririkirake ma ana botaki Iehova.
Ko na Kanga ni Kaeka?
• Bukin tera ngkai ti kona n taekinna bwa e tabe n ririkirake ana botaki Iehova?
• Baikara koaua aika a kaotia bwa ana aomata te Atua a namakina kaokaotakiia n te itera n taamnei, teutana imwin teutana?
• Baikara katamaroa ake a a tia ni karaoaki ni kaineti ma te mwakuri ni minita ni Kristian?
• Baikara bitaki aika a a tia ni karaoaki n te tai ae riai ni kaineti ma babaire aika a waakinaki n aia botaki taan toro iroun Iehova?
[Taamnei n iteraniba 27]
N ai aron Tawita, ti aki kona ni karakin ana mwakuri Iehova aika kamimi ni kabane
[Taamnei n iteraniba 28]
E a kakabwaiaki ana nanai te Atua man bitaki aika karaoaki n te tai ae riai nakon waaki tabeua ake a bwainaki inanon te botaki