Kakauongo Nakon Ana Taeka Te Taamnei!

“Ane iai taningana, ao ke e ongo ana taeka te Tamnei nakoia ekaretia.”​—TE KAOTIOTI 3:22.

1, 2. Tera te reirei ae kaokiokaki taekana n ana rongorongo Iesu nakoia ekaretia aika itua n te boki ae Te Kaotioti?

A RIAI ni kakauongo raoi ana toro Iehova nakon ana taeka Iesu Kristo aika kairaki iroun te taamnei nakoia ekaretia aika itua, aika a taekinaki ni bokin te Baibara ae Te Kaotioti. E koaua bwa ni katoai rongorongo aikai ao iai taeka n reirei aikai iai: “Ane iai taningana, ao ke e ongo ana taeka te Tamnei nakoia ekaretia.”​—Te Kaotioti 2:7, 11, 17, 29; 3:6, 13, 22.

² Ti a tia n iangoa ngkoa ana rongorongo Iesu nakoia anera, ke mataniwin ekaretia ake i I-Ebeto, Temurena, ao Berekamo. Ti na kanga ni kona ni kakabwaiaki man ana taeka ake a kairaki iroun te taamnei ae raoiroi, nakoia ekaretia ake aua riki?

Nakon te Anera are i Tuateira

3. E tei iia Tuateira, ao tera te bwai are e taabangaki ataakina iai?

³ E kamoamoaia ao e boaia naba kaain te ekaretia are i Tuateira “Natin te Atua.” (Wareka Te Kaotioti 2:18-​29.) E tei Tuateira (ae Akhisar ngkai) irarikin mwaangan te Karaanga ae Gediz (ae Hermus rimoa) n aban Asia Minor ake mai maeao. E riki ni kakannato te kaawa aei kioina ngke a rabakau ni karaobwai kaaina. A kabongana waakan te aroka teuana taani kataa iai, bwa ngaia oin aia bwai ni kataa ibukin kaara aika taatangiraki aika te uraura ao te uraro. Nei Ruria boni ngaia “te tia kaboa te kunnikai ae uraura, ae te I-Tuateira” are e riki bwa te Kristian n ana tai ­Bauro ni kawara Biribi are i Kuriiti.​—Mwakuri 16:12-​15.

4. E kamoamoaki ibukin tera te ekaretia are i Tuateira?

⁴ E kamoamoaa te ekaretia are i Tuateira Iesu ibukin aia mwakuri aika raraoi, aia tangira, aia kakaonimaki, nanomwaakaiia, ao aia mwakuri ni minita. Ni koauana, ‘a mwaiti riki aia mwakuri ngkai nakon ake rimoa.’ E ngae ngkana iai taekan ara mwakuri aika raraoi, ma ti riai n taratarai raoi aroarora.

5-7. (a)  Antai “te aine are Ietebera,” ao tera ae na karaoaki nakoina ibukin ana kariri? (b) A buokaki bwa a na karaoa tera aine aika tangira te Atua man ana rongorongo Kristo nakon te ekaretia are i Tuateira?

⁵ A kariaia reirei aika kairua ao te wene ni bure kaain te ekaretia are i Tuateira. Iai ibuakoia “te aine are Ietebera” ae nanonaki iai aine aika titeboo aroaroia ma te Uea n aine ae buakaka ae Ietebera, are uea i aon barongan Iteraera ake tengaun. A taekinna taan rabakau tabeman bwa a kataia ni kairarangia Kristian ‘burabeti aika aine’ mai Tuateira, bwa a na taromauri antiia taan iokinibwai ma taani karao-bwai ao ni boutokai botaki ake a irekereke ma te anga karea nakoia bouannanti. A bia aki ukoukora aia aanga ni kairoroia aomata tabeman i nanon ekaretia ni Kristian ni boong aikai, aine aika a iangoia ibon irouia bwa burabeti ngaiia!

⁶ E a kaan ana tai Kristo ni ‘kaaki te aine are Ietebera i aon te nne ni wene, ao ni karokoa te rawawata ae korakora i aoia aomata naba ake a wene ni bure ma ngaia, ngkana a aki rairi nanoia ni kitan aia mwakuri.’ A a aki riai n aantaeka mataniwi n ekaretia nakon reirei aika bubuaka ao kariri aikai, ao akea te Kristian ae e na riai ni karaoa te wene ni bure n taamnei ao n rabwata ke n taromauri boua bwa a aonga n ataia bwa a bane ni bubuaka “ana bwai Tatan aika nano.” Ngkana ti mutiakin ana taeka ni kauring Iesu, ti na kona ngkanne n ‘taua te bwai ae iai iroura’ ngkai, ao e na aki tautaeka te bure i aora. Kioina ngkai a a tia n rawa taani kabiraki ake a kautaki nakoni mwakuri aika bubuaka, waaki ni kaibwabwaru, ao kariri riki tabeua, a nang anganaki ngkanne te “tauu aroia botanaomata” ao n uaia n urui tautaeka aikai ma Kristo. Iai itoi ni kaikonaki i nanon ekaretia ni boong aikai, ao te koraki aika kabiraki a na anganaki “te itoi ni ngaina ae raneanea,” ae taekan teuare e nang mareaki, ae Iesu Kristo, ngkana a manga kautaki nako karawa.​—Te Kaotioti 22:16.

⁷ E kauringaki te ekaretia are i Tuateira bwa e na aki butimwaea te kariri ae buakaka mairouia aine ake a kitana ma ni kabwaoua te koaua. A kateimatoaki aine aika tangira te Atua man ana rongorongo Kristo ae kairaki iroun te taamnei nakoia ekaretia, bwa a na kawakina nneia are a anganaki iroun te Atua. A aki kataia n taua taekaia mwaane ao a aki naba kabwakaia taari mwaane nakon karaoan te wene ni bure n taamnei ke n rabwata. (1 Timoteo 2:12) Ma, a karaoi bannan mwakuri aika raraoi ao a beku ibukin neboan te Atua. (Taian Areru 68:11; 1 Betero 3:1-6) Ngkana e tararuai raoi bwaai aika iai irouna te ekaretia, n aron itiakin ana reirei ma aroaroia kaaina, ao n iaiangoa te mwakuri ibukin te Tautaeka n Uea bwa te bwai ae kakawaki, ao e nang roko ngkanne Kristo ma kakabwaia aika kamimi, ma tiaki motikan taekaia.

Nakon te Anera are i Tareteiti

8. (a) E tei iia Tareteiti, ao baikara rongorongona tabeua? (b) Bukin tera ngke e kainnanoa buokana te ekaretia are i Tareteiti?

⁸ E kainnanoa buokana n te tai ae waekoa te ekaretia are i Tareteiti kioina ngke e a mate ni kaineti ma bwaai n taamnei. (Wareka Te Kaotioti 3:1-6.) Bon te kaawa ae kaubwai Tareteiti ao e tei tao 30 te maire i maiakin Tuateira. E riki ni kaubwai te kaawa aei ae e kaainaki ngkoa irouia 50,000 aomata, man te waaki n iokinibwai iai, n ikotaki ma maiuraoin tanona n te ununiki, ao karaoan kunnikai man kunia tiibu ao ai robwan aontano aika tamaroa. Ni kaineti ma ana rongorongo te tia koro rongorongo rimoa ae Josephus, e taekinna bwa e korakora mwaitiia I-Iutaia i aon Tareteiti n te moan tienture B.C.E. Ibuakon bwaai aika kuneaki ni mwaeran te kaawa ni kawai, bon te tinakoka ao ana tembora atuaia I-Ebeto ae Nei Riana.

9. Tera ae riai ni karaoaki ngkana ti kabwarabae ni karaoi mwiokoara?

⁹ E tuanga te anera mai Tareteiti Kristo ni kangai: “I atai am makuri, ba iai taekam ba ko maiu, ao ko boni mate.” Tera arona ngkana ti atongaki bwa ti marurung ni kaineti ma bwaai n taamnei, ma ai aron ae ti matu nako n te aro ae ti aki kakabongana mwiokoara ni Kristian, ti kabwarabae ni karaoa ara beku, ao ti “nangi mate” iai n te aro n taamnei? Ti riai n ‘teimatoa n uringa aron are ti anganaki ma are ti ongo’ ni kaineti ma rongorongon te Tautaeka n Uea, ao ti riai ni manga karikirakei aroarora n toro iroun te Atua. Ti bon riai ni moanna n anganga ara ibuobuoki ma nanora ni koaua n taian bobotaki nako. (Ebera 10:24, 25) E kauringia kaain te ekaretia are i Tareteiti Kristo ni kangai: “Ngkana ko aki kamarurungko, ao I a nako im n ai aron te tia ira, ao ane ko na bon aki ata te aua ae N na nako im iai.” E kaineti te kauring aei nakoira ni boong aikai? Ti na waekoa n anganna taekan aroarora.

10. Tera ae e kakoauaki bwa e kona naba n reke irouia Kristian tabeman, e ngae ngke a rotaki n aekan aroaro ake a riki i Tareteiti?

¹⁰ E ngae ngke a riki aroaro n aron are irouia kaain Tareteiti, ma bon iai naba tabeman ‘aika a tuai ni kabaarekai kunnikaiia, ao aika nakonako ma Kristo ma kunnikaia ae te mainaina; aika bon tau iai.’ A teimatoa ni kinaaki bwa Kristian ngaiia, a aki kabaarekaki n aroaroia kaain te aonnaba ao Aaro tabeua. (Iakobo 1:27) Mangaia are e na bon ‘aki kamaunai araia man te boki ni kamaiu Iesu, ma e na kamoamoaia i matan Tamana ao anera.’ Ibukina ngke a taekinaki bwa a tau n nakonako ma Kristo, te koraki aika kabiraki ake a kaikonakaki bwa buun Kristo, a a kunnikaiakaki n te rinen ae raoiroi ae raneanea ae itiaki, ae e tei ibukin raoiroin aia mwakuri ana aomata Iehova aika tabu. (Te Kaotioti 19:8) A kaungaki nanoia bwa a na kataea ana kai te aonnaba kioina ngkai iai mwakuri aika kamimi aika katauraoaki imwaaia i karawa. Iai naba kakabwaia aika a mena imwaia te koraki aika a tataningaa te maiu n aki toki n te aonnaba. A a tia naba ni koreaki araia n te boki ni kamaiu.

11. Tera ae ti riai ni karaoia ngkana ti a moanna n nimatutu n te aro n taamnei?

¹¹ Bon akea mai ibuakora ae kan reke irouna te aroaro n taamnei ae kananokawaki are e riki n te ekaretia i Tareteiti. Ma tera ae ti na karaoia ngkana ti a namakinna bwa ti a moanna n nimatutu n te aro n taamnei? Ti riai ni waekoa ni karaoa ae riai ibukin kabwaiara. Iangoia bwa aongkoa a atikaki nanora nakon aroaro aika aki-kakukureia te Atua ke e a moanna ni karako iririra n taian bobotaki ke n te mwakuri ni minita. Ti bia ukoukora buokara mairoun Iehova rinanon botumwaakara n tataro. (I-Biribi 4:6, 7, 13) Ti na buokaki n teimatoa ni marurung n te itera n taamnei, ngkana ti katoa bong ni wareka ao n nenera te Baibara ao ana boki nako “te touati ae kakaonimaki.” (Ruka 12:42-​44) Ao ti na katotongia ngkanne aomata ake i Tareteiti ake a a tia n akoaki iroun Kristo, ao ti kona n riki naba bwa bwaai ni kaunganano nakoia raora n onimaki.

Nakon te Anera are i Biraterebia

12. Ko na kanga ni kabwarabwaraa aroaron te Aro are i aon Biraterebia rimoa?

¹² E kamoamoaa te ekaretia are i Biraterebia Iesu. (Wareka Te Kaotioti 3:7-​13.) Bon te kaawa ae kaubwai Biraterebia (arana ngkai Alasehir) bwa e karaoaki iai te wain ao e mena ni mwakoron Asia Minor mai maeao. Atuaia ae te kabanea ni kakannato bon Dionysus, are atuan te wain. E teretere bwa I-Iutaia ake a maeka i Biraterebia a kataia n anai nanoia I-Iutaia ake a riki ni Kristian bwa a na manga teimatoa ni kawakini ke n okiri bwaai tabeua aika katauaki i aan te Tua Mairoun Mote. Ma a aki tokanikai iai.

13. E kanga Kristo ni kamanenaa “ana kiing Tawita”?

¹³ Kristo are “iai i Rouna ana kiing Tawita,” e a a tia naba n anganaki mwiokon bwaai ni kabane aika irekereke ma te Tautaeka n Uea, ao baireaia taan onimaki. (Itaia 22:22; Ruka 1:32) E kamanenaa te kiing anne Iesu ni katauraoi iai kakabwaia ao mwioko ibukin te Tautaeka n Uea nakoia Kristian ake i Biraterebia rimoa ao n taabo riki tabeua. Ni moa man te ririki te 1919 e a tia ni kauka “te mataroa ae warebwe” imwain “te touati ae kakaonimaki” are e kaineti ma tataekinan te Tautaeka n Uea. Akea te kairiribai temanna ae e kona ni kaina te mataroa anne. (1 I-Korinto 16:9; I-Korote 4:2-4) Te koaua bwa e a tia ni kainaki te mataroa nakon kakabwaia aika irekereke ma te Tautaeka n Uea nakoia “ana botanaomata Tatan,” kioina ngke bon tiaki kaain te I-Iteraera n taamnei ngaiia.

14. (a) Tera are e beritanna Iesu nakoia kaain te ekaretia are i Biraterebia? (b) Ti na kanga n teimatoa n aki bwaka n tain “te aua ni kaririaki”?

¹⁴ E berita Iesu nakoia Kristian ake i Biraterebia rimoa ni kangai: “Ngkai ko a tia n taua te taeka are au nanomwaka, ao N na kawakiniko naba man te aua ni kaririaki are nangi roko i aoia kaain aonaba ni kabane.” E kainnanoaki te aeka n nanomwaaka are e kaotiotia Iesu ibukin tataekinan te rongorongo. E aki roko n te bwara nanona nakoia kairiribai ma e teimatoa ni karaoa nanon Tamana. Mangaia are e a manga kautaki Kristo nakon te maiu ae akea tokina i karawa. Ngkana ti kamatoaa ara iango ibukin taromaurian Iehova ao ni boutokaa te Tautaeka n Uea n arora n tataekina te rongorongo ae raoiroi, ti na bon kawakinaki iai bwa ti na aki bwaka i nanon tain tuoakira n “te aua ni kaririaki.” Ti na ‘teimatoa n tau bwaai aika reke iroura’ mairoun Kristo n arora ni kekeiaki ni karikirakea riki mwaitiia aika kan ongora rongorongon te Tautaeka n Uea. Karaoan aei, e na reke iai te bau mai karawa ae akea boona ibukia te koraki aika kabiraki ao te maiu n aki toki i aon te aba ibukia raoia aika kakaonimaki.

15. Tera te bwai ae e riai n reke irouia aomata ake a na riki bwa ‘bouan maneaban te Atua’?

¹⁵ E taekina naba ae kangai Kristo: “Ane tokanikai, ao N na karaoia ba bouani maneaban Atuau, . . . ao N na korea aran Atuau i aona, ma aran ana kawa Atuau, are Ierutarem nabangkai, are kume n ruo mai karawa mairoun Atuau, ao N na korea naba arau nabangkai i aona.” A riai ni boutokaa te taromauri ae koaua mataniwin ekaretia aika kabiraki. A riai n teimatoa n tau n riki bwa kaain te “Ierutarem nabangkai” n aroia n tataekina rongorongon ana Tautaeka n Uea te Atua ao ni kawakina itiakiia n te aro n taamnei. Aio te aroaro ae riai ibukia, ngkana a kan riki bwa bouan te tembora are karaoiroaki i karawa, ao ngkana a tataekina aran ana kaawa te Atua i karawa, are a kaainna ao a tataekina aran Kristo ngkai a kaikonakaki bwa buun Kristo. Ao ni koauana, a na riai ni kabonganai taningaia n “ongo ana taeka te Tamnei nakoia ekaretia.”

Nakon te Anera are i Raorikeia

16. Baikara rongorongo tabeua ibukin Raorikeia?

¹⁶ E boaa te ekaretia are i Raorikeia Kristo kioina ngke a aki-bwerengaki. (Wareka Te Kaotioti 3:14-​22.) Bon te kaawa ni kaubwai Raorikeia ao a mena iai taiani bangke. E tei tao 90 te maire i mainikun Ebeto n te tuta ni kawai are a totoua taan iokinibwai ni mwaruan te karaanga ae Lycus ae manguroroo. E taabangaki naba ataakina man kunnikai aika karaoaki iai n te karai ae roroo. Kioina ngkai Raorikeia boni kautuun te kuura ni kataneiai ae kakannato ibukia taokita, akea te nanououa bwa boni ngaia naba ae karaoa bwainnaorakian te mata ae te Phrygian powder. Asclepius are atuan te bwainnaoraki, boni ngaia te atua temanna ae e tataromauriaki n te kaawa anne. E taraa n tiraua mwaitiia I-Iutaia i Raorikeia ao tabeman mai buakoia boni kaubwai.

17. Bukin tera ngke a boaaki kaain Raorikeia?

¹⁷ E taetae Iesu ma te mwaaka ni kainetia kaain te ekaretia are i Raorikeia rinanon aia “anera,” kioina ngke boni ngaia “te tia kaotioti are kakaonimaki are koaua, are Moaia aika karikaki iroun te Atua.” (I-Korote 1:13-​16) A boaaki kaain Raorikeia kioina ngke a ‘aki mariri ao a aki bue’ n te aro n taamnei. A nang mumutaki mai wiin Kristo kioina ngke e a kerikaki tangiran bwaai n taamnei irouia. A na bon riai ni mataata n nanon te kaikonaki arei. N uakaan ma ngaiia ao iai koburake n ran aika bue i Ierabori, ao te ran ae mwaitoro i Korote. E na bae n aabue te ran ngkana e a roko n te kaawa kioina ngkai e raroa kawaina are e buti iai nako Raorikeia. I nanon ana tai ni buti te ran aei, ao e rinanon moa kawain te ran. Ngkana e a uakaan ma Raorikeia, e na manga biri rinanon timanti n ran.

18, 19. A na kanga ni buokaki Kristian ni boong aikai aika titeboo aroia ma ake i Raorikeia?

¹⁸ A bon aki bue ke ni mwaitoro n taai aikai aomata aika kaakaraoi aroaro ake a kaakaraoi naba kaain Raorikeia. A na waekoa ni bururuaki nako man te wi n aron te ran ae aabue! E aki tangiriia Iesu bwa a na riki bwa taan taetae ibukina aika ‘taan raoi aika rineaki i bukini Kristo.’ (2 I-Korinto 5:20) A na kabuai kakabwaiakia n riki bwa taan tataekina rongorongon te Tautaeka n Uea ngkana a aki rairi nanoia. A ukoukora kaubwain aon te aba kaain Raorikeia ao a ‘aki ataia ae aomata aika a kai nanoia ngaiia, a kananoanga, ao akea karabaaia.’ Ibukin kainaaomataia man te maiu ni kainnano, te mataki, ao akean karabaaia n te aro n taamnei, te koraki ake a riki n ai aroia naba ni boong aikai a riai ni kabooa ‘te koora ae kaburoaki’ mairoun Kristo ae taekan te onimaki ae kataaki raoi, n ikotaki ma “kunnikai aika mainaina” aika tei ibukin te raoiroi, ao te “kabira ni mata” are e na karikirakea raoiroin te noraba n te itera n taamnei. A kukurei mataniwi aika Kristian ni buokiia bwa a na ataa kainnanoia ni kaineti ma bwaai n taamnei bwa a aonga n rikirake ni “kaubai n te onimaki.” (Iakobo 2:5, BK; Mataio 5:3) Irarikin anne, a riai naba mataniwi ni buokiia bwa a na kamanena “te kabira ni mata” bwa a aonga ni butimwaea ao ni karaoa ae boraoi ma ana reirei Iesu, ana kairiri, ana katoto, ao nanona. Aio bon te bwainnaoraki ibukin buakanakin “ana kaibabaru te rabata, ma aia kaibabaru maata, ma kainikatongan te maiu aei.”​—1 Ioane 2:15-​17.

¹⁹ E boaia ao n reireinia aomata ni kabane aika e tangiriia Iesu. A riai ni karaoa aei ma te nano n akoi mataniwi aika mena i aan ana kairiri Iesu. (Mwakuri 20:28, 29) A riai kaain Raorikeia ni ‘kakorakoraia ao n rairi nanoia,’ ni karaoi bitaki n aia iango ao n aroaroni maiuiia. Iai tabeman ibuakora aika a moanna n taneiai n te aeka ni maiu ae a kamwinibaaea aia beku iroun te Atua? Ngkana ngaia aei, ao ti bia ‘kaboa te kabira ni mata mairoun Iesu’ bwa ti aonga ni kona n nora kakawakin te ingaingannano ibukin ukoukoran moa Uean te Atua.​—Mataio 6:33.

20, 21. Antai aika mutiakina ana “karebwerebwe” Iesu ni boong aikai, ao tera ae a kaantaningaia?

²⁰ E taku Kristo: “Noria, I tei i rarikin te mataroa, ao I karebwerebwe: ngkana e ongo bwanau temanna, ao ngkana e kauka te mataroa, ao N na nako ina, ao N na amarake ma ngaia, ao ngaia ma Ngai.” E aki toki n angareirei i aon bwaai n taamnei Iesu ngkana e kaai n amwarake ma aomata. (Ruka 5:29-​39; 7:36-​50; 14:1-​24) E a karebwerebwe ngkai ni mataroan te ekaretia ae titeboo arona ma are i Raorikeia. E na tabeakinaki ana karebwerebwe irouia kaain te ekaretia aei, a na manga karikirakea tangirana, a na butimwaaia nako buakoia ao ni kariaia bwa e na reireinia? Ngkana a karaoa anne, ao ane e na kaai n amwarake ma ngaiia n te baka ike a nang kabatiaaki iai kakabwaiakia n te itera n taamnei.

²¹ A butimwaea Iesu ni boong aikai “tiibu tabemang” n te aro ni kaikonaki ao aei are e na karekea te maiu n aki toki nakoia. (Ioane 10:16; Mataio 25:34-​40, 46) Kristo e na angania te koraki aika kabiraki ake a a tia ni buaka ibukina, te kakabwaia bwa a na ‘tekateka ma Ngaia n ana kaintokanuea, n ai arona ngke E tokanikai, ma n tekateka ma Tamana n ana kaintokanuea.’ Eng, e beritana kaniwangaia taani buaka aika kabiraki Iesu bwa a na uaia n tekateka ma ngaia i aon te kaintokanuea i angatain Tamana i karawa. Ao a ingainga naba nanoia taani buaka aika tiibu tabemwaang nakon te maiu i aon te aonnaba ae tikauarerei i aan te Tautaeka n Uea.

Reirei Ibukira ni Kabane

22, 23. (a) A na kanga ni karekei kakabwaiakia Kristian ni kabane man ana taeka Iesu nakoia ekaretia ake itua? (b) Tera ae ti riai ni kamatoai nanora iai?

²² Bon akea te bwai ae ti na raraoma iai, bwa e boni korakora kakabwaiakia Kristian man ana taeka Iesu nakoia ekaretia ake itua i Asia Minor. A kairaki unimwaane aika Kristian aika tatangira, bwa a na kamoamoaia naba kaain te ekaretia n tatabemania nako aika a teimatoa ni marurung n te itera n taamnei, kioina ngkai a ataia bwa e kamoamoaia naba Kristian n te aro ae riai Iesu. A buokaki taari irouia unimwaane ngkana iai mamaaraia bwa a na kabonganai bwainnaoraki n taamnei man te Baibara. Ti bane ni kona n teimatoa ni karekei kakabwaiara man ana taeka n reirei Kristo aika kakaokoro nakoia ekaretia aika itua, ngkana ti aki tabwarabwara ni kamanenai ma n tataromwaaka.a

²³ Ni boong aika kaitira aikai, ti riai ni katinanikua te aki-bwerengaki, te matai ni kanibwaibwai, ke te bwai riki teuana are e na kona ni kakerikaka tangiran ara beku nakon te Atua. A bia bane ekaretia n teimatoa ni kaotaa nako ootaia n aron kai-n-taura ake a kateaki ni kamatoaki n aia tabo iroun Iesu. Ngkai Kristian ngaira, ti bia kamatoai nanora ni kakauongo raoi nakon Kristo ngkana e taetae ao n ongora naba nakon ana taeka te taamnei. Ngkana ngaia anne ti nang karekea iai te kukurei ae akea tokina n aroia taani kaotaota aika kamoamoaa Iehova.

[Kabwarabwara ae nano]

Ko na Kanga ni Kaeka?

• Antai “te aine are Ietebera,” ao bukin tera ngkai a aki riai ni katotongnga aine aika tangira te Atua?

• Baikara aroaro aika a riiriki n te ekaretia are i Tareteiti ao tera ae ti kona ni karaoia bwa ti aonga n aki katotongia Kristian akekei?

• Baikara bwaai ake e beritan Iesu nakon te ekaretia are i Biraterebia ao ti na kanga ni kamanenai ni boong aikai?

• Bukin tera ngke a booaki kaain Raorikeia, ao tera te kaantaninga ae mena imwaaia Kristian aika ingainga nanoia?

[Taamnei n iteraniba 16]

A riai ni kararoaki ana mwakuri aika bubuaka “te aine are Ietebera”

[Taamnei n iteraniba 16]

E a tia ni kauka “te mataroa ae warebwe” Iesu ae na karekei kakabwaia aika irekereke ma te Tautaeka n Uea nakoia taan rimwina

[Taamnei n iteraniba 18]

Ko butimwaea Iesu ao n ongora n ana taeka?