Teimatoa N Aki-Kaingingaki ao Tokanikai n te Kabobirimwaaka Ibukin te Maiu

NGKANA ko na borau ao e buaka taari, tera baom ae ko na tangiria? Ko tangira te booti ae uarereke ke te kaibuke ae kabaaki raoi ma n tuabeniben? Ko na boni bae n rinea te kaibuke, kioina ngkai e kona n teimatoa ni buti ni kaaitarai naao aika korakora ma n urubwai.

Ti kona naba n namakina te nanokokoraki i nanon ara tai ni boborau ribuakon buakan ao karuanikain te aonnaba aei. N te katoto, a kona ni kaminoaki aia iango rooro-n-rikirake ao n namakina te nanokokoraki ibuakon reimauruan te aonnaba ma aekan bwaai aika tatangiraki irouia aomata. Aomata tabeman ake a a tibwa riki bwa Kristian, a kona ni bon namakina naba te nanokokoraki. Tabeman naba aika a a tia n teimatoa ni beku iroun te Atua i nanon ririki aika bati, a kona ni manga kataaki ibukina bwa e baenikai koron bukin bwaai ake a reireiaki iai aika a kakaantaningai.

A aki tibwa namakinaki aeka n namakin aikai, bwa a a tia naba n namakina te nanokokoraki n taai tabetai ana toro Iehova aika kakaonimaki n aroia, Mote, Iobi ao Tawita. (Warekaia Iteraera 11:14, 15; Iobi 3:1-4; Taian Areru 55:4) Ma e ngae n anne, e ataaki aroaroni maiuiia bwa a teimatoa n taromauria Iehova. E kaungaira aia katoto aika raraoi, bwa ti na teimatoa naba, ma e tangiria Tatan te Riaboro ni kabwaoua kawaira i nanon ara tai ni kabobirimwaaka ibukin te maiu ae akea tokina. (Ruka 22:31) Ti na kanga ngkanne ni kona n “teimatoa n te onimaki”? (1 Betero 5:9) Ao ti na kanga ni kona ni kakorakoraia raora n onimaki?

E Tangirira Iehova bwa Ti na Aki Kaingingaki

E bon tauraoi Iehova n taai nako ni buokira ni kateimatoaira ngkana ti kakaonimaki nakoina. E kaaitara ma kataaki aika mwaiti te tia areru ae Tawita, ma e onimakina te Atua, ao e a kairaki bwa e na anene ni kangai: “E karierakeai [Iehova] mai nanon te kinono ae kamamate, mai nanon te bokaboka ae nimnim; ao E katokaa waeu i aon te bwa, ao E kateimatoa nakonakou.”​—Taian Areru 40:2.

E kakorakoraira Iehova bwa ti na boutokaa “te buaka ae raoiroi ae ana buaka te onimaki” bwa ti aonga ni kona n “taua te maiu are aki toki.” (1 Timoteo 6:12) E katauraoi naba aanga aika ti na kona n tei n nene iai, ao n tokanikai n ara buaka n taamnei. E kaumakiia raona ni Kristian te abotoro Bauro bwa a na karekei ‘korakoraia iroun te Uea, ao ni korakorani mwakana,’ ao a na ‘karin bwaai ni buaka ni kabane ake mairoun te Atua bwa a aonga ni kona n tei n eeka nako ana kai ni bakarere te Riaboro.’ (I-Ebeto 6:10-​17) Ma tera ae e kona ni karika nanokokorakira? Ao ti na kanga ni kona n rarawa nakon bwaai ni kamamaara aika karuanikai?

Kawakiniko man Bwaai ni Kamamaara

Ti wanawana ngkana ti uringa te koaua ae kakawaki aei: E kona n raoiroi ke ni buakaka aroarora ni Kristian, man arora ni karaoi ara motinnano. A kaaitara naba rooro-n-rikirake ma karaoan motinnano ni kaineti ma aia mwakuri, reitan aia reirei, ao te iein. A kona n iangoia aomata aika ikawai bwa a na mwaing nakon te tabo teuana ke ni manga karekea riki aia mwakuri teuana i rarikin aia mwakuri ni kareke tianti. Ti karaoi motinnano ni katoa bong ni kaineti ma kamanenan ara tai ao karaoan bwaai aika bati riki. Tera ae na kona ni buokira ni karaoi motinnano aika raraoi aika a na kakorakoraira riki n teimatoa, n toro iroun te Atua? E taekina ae kangai temanna te aine ae e a tia ni waakina te maiu ni Kristian i nanon te tai ae maan: “I butiia Iehova bwa e na buokai ngkana I karaoi au motinnano. I kakoauaa bwa e kakawaki butimwaean ao maiuakinan reirei aika nako man te Baibara rinanon botaki ni Kristian, mairouia unimwaane, ao ni booki aika kabwarabwaraa te Baibara.”

Ngkana ti karaoi ara motinnano, ao e raoiroi riki bwa ti na titirakinira ni kangai: ‘Te koaua bwa e na teimatoa kukureiu n au motinnano aika I karaoi n te bong aei, i nanon nimaua ke tebwina te ririki ma ngkai, ke N na uringaaba iai? I kakorakoraai n taraia raoi bwa au motinnano aikai, a na aki karika mamaarau n te itera n taamnei, ma a na buoka rikirakeu iai?’​—I-Biribi 3:16.

Tabeman aika a a tia ni bwabetitoaki a bwaka ngkana a kaririaki ke ni kariaia bwa a na kuri n urui ana tua te Atua, ao aei are e a kairiia bwa a na nanotiotio. A kakorakoraia ni kan oki tabeman aika a a tia ni kabaneaki man te ekaretia ibukin aroia ngkoa n aki raraoma ni karaoi mwakuri aika bure, ma a manga waekoa naba ni kabaneaki tabeua te tai imwin okiia, kioina ngkai a manga karaoi naba buure ake a a tia ni kabaneaki iai. Tao e riki anne ibukina bwa a aki tataro ni bubutii te ibuobuoki mairoun te Atua bwa a na ‘riba te buakaka ao a nim ma te raoiroi’? (I-Rom 12:9; Taian Areru 97:10) Ti riai ni bane ni ‘kaeti kawaira.’ (Ebera 12:13) Mangaia are ti na iangoi reirei tabeua aika a na kona ni buokira ni kateimatoaira n te aro n taamnei.

Teimatoa n Aki-kaingingaki Rinanon Mwakuri ni Kristian

Teuana te anga ae ti na taua iai birira n te kabobirimwaaka ibukin te maiu are aki toki, boni kabatiaan te mwakuri n tataekina rongorongon te Tautaeka n Uea. Eng, ara mwakuri ni minita ni Kristian bon te bwai n ibuobuoki ae kakawaki ibukini kateimatoan nanora ao ara iango ni kani karaoa nanon te Atua ao ni karekea te kaniwanga are te maiu ae akea tokina. Ni kaineti ma aei, e kaumakiia kaain Korinto Bauro ni kangai: “Tariu aika kam tangiraki, kam na teimatoa n aki kaingingaki. Kakorakoraingkami ni makuri i bukin te Uea, ngkai kam ataia ba e aki matebuaka ami makuri i bukin te Uea.” (1 I-Korinto 15:58, BK) Nanon te taeka ae “teimatoa” bon ‘te tei n nene.’ Te “aki kaingingaki” ae nanonaki n te kibu aei e kona ni kaineti ma ‘te aomata ae e aki kariaia bwa e na bwaranako kabaean roona man te atinro.’ Mangaia are katabetabeara n te mwakuri ni minita, e na kona ni kateimatoaira n ara mwakuri ni Kristian. E manena maiura ao e reke kukureira ngkana ti buokiia aomata bwa a na kinaa Iehova.​—Mwakuri 20:35.

E korea ae kangai Nei Pauline ae te Kristian temanna ae e a tia ni kabanea te maan ae raka i aon 30 te ririki n riki bwa te bwaiania ae kabwanina ana tai n te mwakuri n uarongorongo n abana ao itinanikun abana: “Bon te otanga te mwakuri ni minita kioina ngkai tataekinan te rongorongo nakoia tabeman e karekea namakinan ae iai te koaua irou.” E kona naba n reke te namakin aei man te katoa tai n irii mwakuri ni Kristian riki tabeua n aron kaakaean botaki n taromauri ao te botumwaaka ni karaoa te reirei i bon iroura n te Baibara.

Kateimatoaki man te Botaki n Itaritari

Kaainakin te botaki ibukia taan taromauri ni koaua ae katobibia te aonnaba, e kona ni kakorakoraa kateimatoara. Ai te kakabwaia tera te reitaki ma te botaki n itaritari ae tatangira aei ae katobibia te aonnaba! (1 Betero 2:17) Ao ti kona naba ni kateimatoaia iai raora n onimaki.

Iangoi ana mwakuri n ibuobuoki te aomata ae raoiroi ae Iobi. E kairoroaki naba te tia karaunano ni kewe are Eribati bwa e na kakoauai taeka aikai: “A a tia am taeka ni kateimatoa ane kani bwaka, ao ko a tia ni kamatoai bubuaniwae aika mamara.” (Iobi 4:4) Tera arora n ibuobuoki nakoia raora tabeman? Ti bane ni mwiokoaki ibukin buokaia tarira ma mwanera n taamnei bwa a na botumwaaka n aia beku ibukin te Atua. N ara tai ni bobotaki ma ngaiia, ti riai ni karaoi nanon taeka aikai: “Kam na kakorakorai baai aika mamara, ao kateimatoai bubuaniwae aika aki konamaki.” (Itaia 35:3) Mangaia are bukin tera ngkai ko aki katea tiam bwa ko na kakorakoraa ao ni kaungaa raom ni Kristian temanna ke uoman n taai ake ko kaitiboo iai ma ngaiia? (Ebera 10:24, 25) Am taeka ni kaunganano ibukini kamoamoan aia mwakuri ma am kakaitau nakoia ibukin teimatoaia ni kakukureia Iehova, e na buokiia n teimatoa n aki-kaingingaki ma te kaantaninga are a na tokanikai n te kabobirimwaaka ibukin te maiu.

A kona ni karaoa ae korakora riki unimwaane aika Kristian ibukin kaungaaia te koraki aika a tibwa rin i nanon te ekaretia. E kona ni karaoaki aei rinanon taekinan iango n ibuobuoki ao reirei aika raraoi man te Baibara ao man te kaai ni mwakuri ma ngaiia n te mwakuri ni minita. E aki toki te abotoro Bauro ni kabonganai taai aika angaraoi ibukin kakorakorakiia aomata. E korakora nanona ni kan noria Kristian i Rom bwa e aonga ni buokiia ni kakorakoraiia n te itera n taamnei. (I-Rom 1:11) E arania tarina ma mwanena ake i I-Biribi bwa ‘kakimwareireiana ao ana bau n uea’ ao e kaungaia bwa a “na tei matoa i nanon te Uea.” (I-Biribi 4:1) Ngke e ongo Bauro taekan aia kangaanga tarina ake i I-Tetaronike, e kanakoa Timoteo bwa e na ‘kateimatoaia ao ni kabebetei nanoia, n te aro are a na akea ae na kairarangaki nako ngkana a rawawata.’​—1 I-Tetaronike 3:1-3.

Abotoro aika Bauro ao Betero, a nori ao n ataa kakawakin aia kakaonimaki ni mwakuri, raoia n taromauri. (I-Korote 2:5; 1 I-Tetaronike 3:7, 8; 2 Betero 1:12) Ti bia kakairi naba ngaira n aki taratarai mamaaraia tarira, ma ti na taratarai aroaroia aika raraoi ao aroia n tokanikai ni buaka bwa a aonga n teimatoa n nene ao ni karinea Iehova.

Ngkana ti taatarai mamaaraia ke ni kabuakakaia aomata, ao ti na kona ni karekea riki aia kangaanga tabeman bwa a na aki kona n teimatoa i nanon te onimaki. Ai kakawaki ra uringan ae “a rawawata, ao a mae nako” tarira n te aonnaba aei! (Mataio 9:36) E bon riai bwa a na kaantaningaa reken raun nanoia ao kabebeteaia n te ekaretia ni Kristian. Ti bia bane ni karaoa ara kabanea n tamaroa ni kakorakoraia raora n onimaki ao ni buokiia bwa a na teimatoa n aki-kaingingaki.

A kona naba tabeman ni karaoi mwakuri nakoira, aika a na kona n totonako iai arora n teimatoa. E riai bwa ti na kariaia te taetae ae aki-riai ke te mwakuri ni bangaaomata bwa e na katotonakoira man ara mwakuri ibukin Iehova? Ti bia aki kariaia temanna bwa e na kakerikaka arora n teimatoa n nene!​—2 Betero 3:17.

A Kateimatoaira Ana Berita te Atua

Ana berita Iehova ibukin te maiu ae kakukurei nakon taai aika a na roko i aan ana Tautaeka n Uea, e buokira bwa ti na teimatoa n aki-kaingingaki. (Ebera 6:19) Ao kakoauaan are e na boni kakoroi bukin ana berita te Atua, e kaungaira bwa ti na ‘kamarurungira n teimatoa n te onimaki.’ (1 I-Korinto 16:13; Ebera 3:6) A kona ni kataaki ara onimaki ngkana e baenikai kakoroan bukin ana berita tabeua te Atua. Mangaia are e rangi ni kakawaki bwa ti na tarataraira raoi bwa ti na aki burebureaki n reirei aika kewe ao ni kabetinakoaki man ara kaantaninga.​—I-Korote 1:23; Ebera 13:9.

E riai n riki bwa kauringakira aia katoto ae buakaka kaain Iteraera ake a kamaunaki kioina ngke a aki onimakina ana berita Iehova. (Taian Areru 78:37) Ti na aki katotongia ma ti bia teimatoa n toro iroun te Atua n aki-kaingingaki ma te nano n umaki ni boong aika kaitira aikai. E taekina ae kangai temanna te unimwaane ae e a maan n nakoana aei: “I maeka n te aro are kaanga e nang roko ana bong ae kakannato Iehova nakon te ingabong.”​—Ioera 1:15.

Eng e a rangi ni kaan ana bong ae kakannato Iehova. Ma bon akea te bwai ae ti na maakua ngkana ti teimatoa ni kaan ma te Atua. Ngkana ti maiuakina ana kaetieti aika raraoi ao n teimatoa n aki-kaingingaki, ao ti na kona n tokanikai ni biri n te kabobirimwaaka ibukin te maiu ae akea tokina!​—Taeka N Rabakau 11:19; 1 Timoteo 6:12, 17-​19.

[Taamnei n iteraniba 21]

Ko kaakaraoa am kabanea ni kona ni buokiia raom ni Kristian bwa a na teimatoa n aki-kaingingaki?

[Picture Credit Line n iteraniba 19]

The Complete Encyclopedia of Illustration/J. G. Heck