A A Kabwaia Akana Neboa Te Atua

“A na taromauri ni bobaraki i matam, te Uea; ao a na neboa aram.”​—Taian Areru 86:9.

1. Bukin tera bwa ti kona n neboa te Atua n aaro aika kakawaki riki nakon ae kona ni karaoaki irouia baika karikaki aika aki maiu?

E RIAI ni karaoiroaki Iehova irouia ana karikibwai ni kabane. A neboa naba Iehova ana karikibwai aika aki maiu, ma ngaira aika aomata, iai ara konabwai n taetae, n iango, ni kaitau, ao n taromauria. E taetae nakoira ngkanne te tia areru ngke e kangai: “Kam na kanene bwanami nakon te Atua ni kakatonga, aonaba ni kabane: kam na anenea karinean arana: katamaroa karaoiroana.”​—Taian Areru 66:1, 2.

2. Antai aika a a tia n ongeaba nakon te kaetieti ibukin neboan aran te Atua, ao bukin tera?

² A rawa n neboa te Atua angiia aomata, ao a rawa naba ni kakoauaa. Ma n aaba aika 235 mwaitiia, e a raka ngkai i aon onoua te mirion taani Kakoaua ibukin Iehova aika kaotiotia bwa a nori “ana bwai [te Atua] ake a aki nonoraki” man ana karikibwai, ao a a tia naba n “ongo” n aia kaotioti baika karikaki aika aki maiu. (I-Rom 1:20; Taian Areru 19:2, 3) A a tia naba ni karekea ataakin ao tangiran Iehova imwin reiakinan te Baibara. E a kaman taekinaki ae kangai n Taian Areru 86:9, 10: “A na bane n roko botanaomata aika Ko karikiia ao a na taromauri ni bobaraki i matam, te Uea; ao a na neboa aram. Ba Ko kakanato Ngkoe, ao Ko karaoi bwaai ni kamimi: bon ti Ngkoe te Atua.”

3. A kanga “te koraki ae uanao” n “toro i Rouna ni ngaina ao ni bong”?

³ E kabwarabwaraki naba n Te Kaotioti 7:9, 15 taekaia “te koraki ae uanao” aika taan taromauri bwa “a toro i Rouna [te Atua] ni ngaina ao ni bong ni maneabana.” E bon aki imanonoia ana toro te Atua bwa a na karaoiroia n akea tokina, ma taan taromauriia a mena n te botaki teuana ae katobibia te aonnaba. Mangaia are ngkana e a bong n aaba tabeua, ao ana toro te Atua ngkanne ake a mena n iteran te aonnaba are teuana, a manga uarongorongo. Ngaia anne are e a kona n taekinaki iai bwa akea motirawaia n neboan Iehova. N te tai ae e a kaan ngkai, ao a nang bane n takarua ni karaoiroa Iehova, “akana iai ikeikeia” ni kabane. (Taian Areru 150:6) Ma ni karokoa te tai anne, tera ae ti kona ni karaoia n tatabemanira nako, ibukin neboan te Atua? Baikara kangaanga aika ti kona ni kaaitara ma ngaai? Ao baikara kakabwaia aika a katauraoaki imwaia te koraki ake a neboa te Atua? Ni kaekaan anne, ti na iangoa te rongorongo man te Baibara ae kaineti ma te baronga n Iteraera ae Kata.

Te Kangaanga Rimoa

4. Tera te kangaanga are a kaaitara ma ngaia te baronga are Kata?

⁴ A bubutii kaain te baronga n Iteraera are Kata imwain rinia n te Aba ni Berita, bwa e na kariaiakaki tikuia n te aba ae tau ibukin kaikawaaia kaao, are i mainikun te karaanga are Ioretan. (Warekaia Iteraera 32:1-​5) Ngkana a tiku n te aba anne, a na boni bae ni kaaitara iai ma kangaanga aika kakaiaki. Baronga ake i maeaon Ioretan a na kamanoaki n te Marua ae Ioretan, are e tuuka rinia taanga ni buaka. (Iotua 3:13-​17) Ma, e taekina ae kangai ibukin aaba ake i mainikun Ioretan, te boki ae The Historical Geography of the Holy Land, ae koreaki iroun George Adam Smith: “[A] bane n aoraoi ao n raababa aban Arabia, ao akea bwaai n tutuki i aona. Mangaia are e aki toki n niniaki irouia taan ririanna aika mwaiti ni katoa ririki, ibukin uteutena.”

5. Tera ae e kaungai nanoia tibun Kata iai Iakoba, bwa a na karaoia ngkana a buakanaki?

⁵ Tera aroia te baronga ae Kata ni kaaitarai kangaanga aika teimatoa n riiriki aikai? N tienture ake mai mwaina, ao e taetae ni burabeti aia bakatibu are Iakoba imwain matena ni kangai: “E kuribaiaki Kata irouia tani kuribai, ao ngaia e manga kuribai n rimuia.” (Karikani Bwaai 49:19, BK) A taraa ni karawawata taeka aikai. Ma ni koauana, e nanonaki iai te kaetieti ibukiia te baronga ae Kata bwa a na iri taangaia. E kaotia Iakoba bwa ngkana a karaoa anne, ao ane a na kerikaki taani buaka n te aro ae kamaamaa, ao e na kakioia nako tibun Kata.

Kangaanga ni Kaineti ma Ara Taromauri Ngkai

6, 7. E kanga n titeboo aroaroia Kristian ni boong aikai ma te baronga are Kata?

⁶ N aron te baronga are Kata, Kristian ni boong aikai, a kaaitara naba ma kangaanga ao karawawata man ana waaki Tatan; akea te kamanomano n te aro ni kakai, ae totokoa niniakira. (Iobi 1:10-​12) A mwaiti mai buakora aika kaaitarai kangaangan te reirei, karekean bwaai aika kainnanoaki ibukin te maiu, ao kaikawaaia ataei. E na aki mwanuokinaki naba ae bon iai ana kangaanga te aomata i bon irouna. Tabeman a riai n nanomwaaka ibukin ‘kateketeke n irikoia’ n aron toabuakan bwain rabwataia, ke te aoraki. (2 I-Korinto 12:7-​10) Tabeman a taonaki n te iango are ai bon akea bonganaia. A roko “boong aika bubuaka” ae taekan te kara irouia tabeman, ao a tuukaki aron aia beku Kristian iroun Iehova, bwa e a bua korakoraia are rimoa.​—Te Minita 12:1.

⁷ E kauringira naba te abotoro Bauro bwa “ti kaunrabata . . . ma taanga n tamnei aika buakaka ake i aani karawa.” (I-Ebeto 6:12) Ti aki toki ni kaaitara ma ‘nanon aon te aba,’ ae te nano ni karitei ao te aroaro ni maiu ae buakaka aika a kaungaki karaoaia iroun Tatan ma ana taimonio. (1 I-Korinto 2:12; I-Ebeto 2:2, 3) N aron are e riki nakon Rota are e mamaaka te Atua, ngaira ni boong aikai ti kona naba n taonaki n te rawawata ibukin bwaai aika kammaira aika taekinaki ao ni karaoaki irouia aomata aika ti mena i buakoia. (2 Betero 2:7) E boni kona naba ni buakanira Tatan. E tabe naba ngkai Tatan ni buakania kaain te nikira aika kabiraki, aika “a kakawakin ana tua te Atua, ma n taua kaotiotan Iesu.” (Te Kaotioti 12:17) A buakanaki naba ana “tiibu tabemang” Iesu iroun Tatan ngke a katabuaki n tataekina te rongorongo n taabo ake a mena iai, ao ni bwainikirinaki naba.​—Ioane 10:16.

Ko na Kariaia Konakim ke Ko na Ira Taangam?

8. Tera arora ae riai ngkana e buakanira Tatan, ao bukin tera?

⁸ Tera arora ae riai ngkana e buakanira Tatan? N aroia kaain te baronga are Kata rimoa, ti riai naba ni kakorakoraira ni bwaai n taamnei ao ni buakanna, ni kaineti ma ana kairiri te Atua. E kananokawaki taekinan ae iai tabeman aika a bwara nanoia ibukin kangaangan te maiu aei, n te aro are a aikoa tabeakin mwiokoaia ni kaineti ma bwaai n taamnei. (Mataio 13:20-​22) E taekina ae kangai temanna te tia Kakoaua ni kaineti ma karakon mwaitiia aomata aika roroko n iri taiani bobotaki: “Ni koauana, a bon rikirake ni kua taari. A a boni bane n taonaki n te rawawata ae korakora.” Te koaua, bwa ni boong aikai, ao a mwaiti aroaro aika kakuaia aomata. Mangaia are e kona ni bebete iangoan tabera ae taromaurian te Atua, bwa ngaia naba te kangaanga teuana ae karawawataira. Ma e eti te iango anne?

9. E na kanga n reke motikan rawara ngkana ti amoa amon Kristo?

⁹ Iangoa ana taeka Iesu nakoia te koraki ake n ana bong, ake a korakai ibukin kangaangan te maiu aei, ae kangai: “Bane mai nako Iu, ngkami akana kam kua ao kam rawawata, ao N na motiki rawami.” E nanona Iesu iai bwa motikan rawaia aomata e na reke man kauarerekean aia beku iroun te Atua? Tiaki ngaia, bwa e taku Iesu: “Amoa amou i aomi, ao reirei i Rou; ba I nimamanei ao I nanorinano; ao e na reke i roumi iai motikan rawaia tamneimi.” Te amo bon te kai ke te biti, ae buoka te aomata ke te man ni kabebetea uotana ae tinebu. Bukin tera ngkai e na katokaa te amo anne te aomata i aona? Tiaki te koaua bwa e a kaman tia n “rawawata” uotara? Eng, ma e kona n rairaki ni kangai te taetae n Erene n te kibu aei: “Rin i aan amou ma ngai.” Iangoa aron anne, e anga nanona Iesu bwa e na buokira n uota uotara! Ti aki katukaki bwa ti na karaoia n oin korakorara.​—Mataio 9:36; 11:28, 29, 2 I-Korinto 4:7.

10. Tera mwin ara kakorakora n neboa te Atua?

¹⁰ Ngkana ti amoa te amo are e anganira Iesu are ti a riki iai bwa taan rimwina, ti a buakana iai ngkanne Tatan. E berita ni kangai Iakobo 4:7: “Kam na rarawa nakon te riaboro, ao ane e na biri nako mai roumi iai.” E aki nanonaki n aei bwa e bebete te rarawa nakon te Riaboro. E kainnanoaki te kakorakora ngkana ti na beku iroun te Atua. (Ruka 13:24) Ma e taekinaki te berita ae kangai n te Baibara n Taian Areru 126:5: “Akana kamae n ununiki ma rannimataia a na tai ma te kakatonga.” Eng, ti taromauria te Atua ae tituaraoi. Boni ngaia “te tia kabo aia onimaki akana kakorakoraia n ukoukoria,” ao e kakabwaiaia te koraki ake a neboia.​—Ebera 11:6.

Neboa te Atua n Tataekinan Euangkerion te Tautaeka n Uea

11. E na kanga n riki te mwakuri ni minita bwa otangara man buakanakira iroun Tatan?

¹¹ E tua Iesu ni kangai: “Ma ngaia ae kam na nako ni kakiritiania botanaomata ni kabaneia.” Te mwakuri n tataekina te rongorongo ae raoiroi, bon te kawai ae kakawaki ibukin anganakin te Atua ‘te karea ae karaoiroana.’ (Mataio 28:19; Ebera 13:15) ‘Nangoan waera n te tauraoi are reke n Euangkerion te raoi,’ boni ngaia naba anne kabobongan “bwaai ni buaka” ni kabane, ake otangara ni buakanakira iroun Tatan. (I-Ebeto 6:11-​15) Karaoiroan te Atua n te mwakuri ni minita, bon te kawai teuana ae rangi n tamaroa ibukin nabeakinan ara onimaki. (2 I-Korinto 4:13) E buokira ni kakeaa te bwarannano. (I-Biribi 4:8) Buokan te mwakuri ni minita iroura, e karekea nakoira ara tai ni bobotaki n ikaungaunga ma raora n taromauri.

12, 13. E na kanga ni kakabwaiaki am utu man karaoan te mwakuri ni minita ni katoa tai? Kabwarabwaraa.

¹² E kona n riki te mwakuri ni minita bwa te waaki ae raoiroi n te utu. Te koaua bwa a kainnanoi aaro ni kakibotu naba rooro-n-rikirake. Ma e ngae n anne, tiaki nanona bwa e na kabotu te tai ae kabaneaki ibukin karaoan te mwakuri ni minita irouia kaain te utu. A kona kaaro ni karika te tai anne bwa e na kakukurei riki, ngkana a reireinia natiia bwa a na mwaatai n te mwakuri ni minita. A aki ngkanne kukurei rooro-n-rikirake ni bwaai aika a mwaatai ni karaoi? A na buokiia natiia bwa a na tangira te mwakuri ni minita ngkana a karaoi babaire aika raraoi ibukiia n aki kairoroiia bwa a na karaoa ae riaon aia kona.​—Karikani Bwaai 33:13, 14.

¹³ Irarikin anne, e karikirakeaki te itoman ae kaan i nanon te utu, ngkana a bane kaaina n reitaki ni karaoiroa te Atua. Iangoa te tari te aine ae e kitanaki iroun buuna ae tiaki kaain te onimaki, ao e a tiku ma natina aika niman. E kaaitara moa neiei ma karekean ana mwakuri, ao karekean maiuia natina. Te koaua bwa e a rangi n kua neiei, n te aro are e a kakeaa tabeakinan bwaai n taamnei aika kainnanoaki irouia natina? E ururing rikaaki te aine aei ao e taku: “I kakaonimaki n reirei n te Baibara ao booki aika kabwarabwaraa te Baibara, ao I kataia ni maiuakini bwaai ake I wareki. I kairia natiu aikai nakon taian bobotaki ao n te mwakuri ni minita ni katoa tai. Tera uaan au kakorakora iai? A a bane ni bwabetitoaki natiu aika niman aikai.” E kona naba n reke buokam man te mwakuri ni minita, ni kaineti ma am kakorakora ni kaikawaiia natim “i nanon te kaetaki ma te reireiaki ae mairoun te Uea.”​—I-Ebeto 6:4, BK.

14. (a) A na kanga rooro-n-rikirake n neboa te Atua n aia kuura n reirei? (b) Tera ae e kona ni buokia rooro-n-rikirake bwa a na aki “maamaa n te euangkerio”?

¹⁴ Rooro-n-rikirake, ngkana arona bwa kam maeka n taabo aika e kariaiakaki iai tataekinan te rongorongo ae raoiroi n am kuura, ko neboa te Atua rinanon karaoan anne, ke ko katokanikaia maakakia aomata, n te aro are ko a aki karaoia? (Taeka N Rabakau 29:25) E korea ae kangai te tia Kakoaua temanna ae ai 13 ana ririki i Puerto Rico: “I tuai man namakina te maamaa n tataekinan te rongorongo n au kuura n reirei, ibukina bwa I ataia bwa bon te koaua te rongorongo aei. I kaakatea baiu n tain te reirei, ao I taekin bwaai ake I a tia n reiakin man te Baibara. Ni mwawan au tai, I nakon te tabo n tangoboki n au kuura ao I wareka iai te boki ae Young People Ask.”a E a tia Iehova ni kakabwaiaa ana kekeiaki neiei? E ribootina ae kangai neiei: “N taai tabetai, ao a kona n titirakinai raou n reirei n taekan au koaua, ao ni butiai naba aia boki ae aekan aei.” Ngkana ko tuai man karaoa aei, tao ko riai moa ni karekea ataakin “nanon te Atua, are raoiroi, are kakukurei, are koro-raoi,” rinanon te ukeuke n reirei i bon iroum. (I-Rom 12:2) Ngkana ko a kakoauai baika ko reiakini, ao ko na bon aki manga “maamaa n te euangkerio.”​—I-Rom 1:16.

E a ‘Uki te Mataroa’ Nakon te Mwakuri

15, 16. Tera te “mataroa ae warebwe ae kamateraoi,” are a a tia n rin iai Kristian tabeman, ao baikara kakabwaia aika reke ma iai?

¹⁵ E koreia te abotoro Bauro bwa ‘e uki nakoina te mataroa ae warebwe ae kamateraoi.’ (1 I-Korinto 16:9) Ko kona ni karaoi mwakuri riki tabeua ma aroarom aika ngkai? N te katoto, karaoan te mwakuri n regular ke n auxiliary bwaiania, e nanonaki iai bwa ko na kabanea 70 ke 50 te aoa ni katoa namwakaina n tataekinan te rongorongo. A mataiakinaki bwaiania irouia raoia ni Kristian ibukin aroia ni beku ma te kakaonimaki. Ma aroia ni kabanea te tai ae bati riki n te mwakuri ni minita, e aki reke iai irouia namakinan ae a rietata riki nakoia tariia ma mwaneia. Ma n onean mwin anne, a karikirakea te aroaro are e kaungaunga iai Iesu ni kangai: “Tooro ngaira aika akea manera; ti karaoa ti ae riai ba ti na karaoia.”​—Ruka 17:10.

¹⁶ E kainnanoaki te taotaonakinnano, te babaire ibukin kabonganan te tai, ao te nano ni kan anga boni ngkoe, ni karaoan te mwakuri ni bwaiania. Ma, a materaoi kakabwaia aika reke mai iai. E taku ana taeka te bwaiania ae te roro-n-rikirake ae arana Nei Tamika: “Bon te kakabwaia ni koaua bairean raoi taekan te koaua ae ana Taeka te Atua. Ni karaoan te mwakuri ni bwaiania, ko aki toki ni kakamanena iai te Baibara. Ao ngkana I ririanna i marenan auti, I iangoi kiibu aika a na aitara raoi ma aomata ake N na kaitiboo ma ngaiia.” (2 Timoteo 2:15) E taku te bwaiania temanna ae arana Nei Mica: “Bon te kakabwaia ae kamimi norakin bitakin aroaroia aomata, imwin reken te koaua irouia.” E taekina kukureina te bwaiania ae Matthew n norakin “te aomata are e butimwaea te koaua ma n riki bwa kaain te onimaki. Bon akea riki te aeka ni kukurei teuana ae raoiroi riki nakon aei.”

17. E kanga n tokanikai temanna te Kristian man iango aika kabwaraa nanona ibukin te bwaiania?

¹⁷ Ko kona n iangoa rinim ni mataroan te bwaiania? Tao ko bon kani karaoia ma ko namakinna bwa ko aki tau nako iai. E kakoauaa aei temanna te tari ae te ateiaine ae Nei Kenyatte, ngke e kangai: “I aki toki n iaiangoia bwa e na bon aki nakoraoi karaoan te mwakuri ni bwaiania irou. I taku bwa I tuai kona uotau iai. I babanga ni katauraoa au moan taeka nakoia aomata ke ni kaakarabakau man te Baibara.” Ma e mwiokoaki temanna te bwaiania ae te tari te aine ae e a ikawai irouia unimwaane bwa e na buoka neienne. E ururing rikaaki Nei Kenyatte ao e taku: “E kakukurei te mwakuri ma te bwaiania aei, ao e a karekea nanou ni kani bwaiania.” E na bon reke naba te nano ni kani bwaiania iroum ngkana iai ae kaungaa nanom ao n reireiko aron karaoana.

18. Baikara kakabwaia aika kona n reke nakoia te koraki ake a karaoa te mwakuri ni mitinare?

¹⁸ E kona ni kauki mataroa nakon mwioko riki tabeua karaoan te mwakuri ni bwaiania. N te katoto, tabeman taanga ni mare, a kona ni katauaki bwa a na ira te kataneiai ibukia mitinare, bwa a aonga n nako n tataekina te rongorongo ae raoiroi n aaba aika a ianena mairouia. A riai ni kataneiaia ma katein te aba are a na mitinare iai, tao n aron te taetae, te katei, ao te amwarake ae boou nakoia. Ma a rabunaki nako mwengabuaka aikai n taiani kakabwaia. E taku temanna ae e a maan ni karaoa te mwakuri ni mitinare i Mexico, ae arana Mildred: “Akea te tai teuana ae I a tia n nanokawaki iai n rinean nakoau aei. I a kaman mamataiakina te nakoa aei ma ngke I uarereke.” Baikara kakabwaia aika a reke nakon neiei? “E rangi ni kangaanga reken te aomata ae N na reirei ma ngaia n te Baibara i aon abau. Ma ikai, a a tia n reke aman aomata aika I reirei ma ngaiia, ao a bane ni moana karaoan te mwakuri ni minita n tii teuana te tai!”

19, 20. A kanga n tia ni kakabwaiaki aomata aika mwaiti man karaoan te mwakuri i Betaera, buokan te mwakuri ni katobibia te aonnaba, ao te Kuura Ibukin Kataneiakiia Minita?

¹⁹ A bati naba kakabwaia aika reke nakoia te koraki ake a mwakuri ni mwaangan ana aobiti Ana tia Kakoaua Iehova. E taekina ana mwakuri i Tiaman n te Betaera te tari te mwaane ae te roro-n-rikirake ae arana Sven ni kangai: “I namakinna bwa I karaoa te mwakuri ae e na teimatoa manenana. I kona naba ni kamanena au ataibwai ni karekea au mwakuri n te aonnaba aei, ma ngkana ngaia anne, ao titeboo ngkanne ma I a karin mwane n te bangke ae e a kan ruuti.” Te koaua, bwa e kainnanoaki te nano ni kan anga n te mwakuri ae akea boom iai. Ma e taku Sven: “Ngkana ko a okira mwengam, ko ataia bwa bwaai ni kabane aika ko a tia ni karaoi n te bong anne, bon ibukin Iehova. Ao e na karekea nakoim te namakin ae rangi n tamaroa.”

²⁰ A a tia naba ni karekei kakabwaia taari mwaane tabeman ibukin buokan te mwakuri ni katobibia te aonnaba, ae katean aobiti n tararua n aaba aika ianena. A korea ae kangai te taanga teuana ake a a tia ni mwakuri n aaba aika wanua: “A rangi n tamaroa taari n aaba aikai. Moan te kananokawaki kitanakiia, ao ai wantai uruakin nanora. Ai tamaroa ra bwaai aika ti a tia n nori ao n rinanoi!” Iai naba te Kuura Ibukin Kataneiakiia Minita, are a kataneiaki iai ni bwaai n taamnei taari mwaane aika akea buuia. E korea ae kangai temanna ae e a tia n rinanon te kuura aei: “E rangi ni kangaanga kakaaean taeka aika N na kona iai ni kaitauingkami ibukin te kuura ae moanibaan te tamaroa aei. Bon akea riki te botaki teuana ae e na kabanea korakorana n angareirei n aron aei!”

21. Baikara kangaanga aika kaaitara ma ngaai Kristian n aia tai ni mwakuri ibukin te Atua?

²¹ Eng, a mwaiti mataroa aika uki nakon te mwakuri. Te koaua, bwa a aki kona ni mwakuri i Betaera angiina mai buakora, ke n aaba aika ianena. E kakoauaa naba Iesu bwa a na kariki “uaa” Kristian aika kakaokoro mwaitiia, ibukin kakaokoron aroaroia. (Mataio 13:23) Ara kangaanga ngkanne ngkai Kristian ngaira, boni kamanenan raoi ara tai n te aro ae uaana ni karaoa iai ara kabanea n raoiroi, n te mwaiti ae botau ma ara konabwai. Ngkana ti karaoa anne, ti a angan Iehova iai neboana, ao ti a kona ni kakoauaa iai ngkanne bwa e rangi ni kukurei iroura. Iangoa ngkanne te tari te aine ae kara ae Ethel arana, are e maeka n te tabo are a tararuaki iai kaara. E katoa tai n tataekina te rongorongo ae raoiroi nakoia raona ni maeka n te tabo aei, ao e uarongorongo naba n te tareboon n angiin ana tai. E kaakaraoa ana beku neiei ma nanona ni kabane n aki ongea mamaaran rabwatana.​—Mataio 22:37.

22. (a) Baikara aanga tabeua riki aika ti kona ni karaoiroa iai te Atua? (b) Tera te bwai ae moani baan te tamaroa ae mena imwaira?

²² Uringnga, ae tataekinan te rongorongo ae raoiroi bon tii teuana mai buakon aanga aika ti kona n angan Iehova iai neboana. Ngkana ti kaakaraoa te katoto ae moanibaan te tamaroa ni kateira ao n arora ni katamaroaira n ara tabo ni mwakuri, n ara kuura n reirei, ao ni mwengara, ti kakukureia iai ngkanne nanon Iehova. (Taeka N Rabakau 27:11) E beritana ae kangai Taeka N Rabakau 28:20: “A na kabatiaki kabaian te aomata ae kakaonimaki.” Mangaia are, ti riai ni “kamae n ununiki ni kabatia” n ara beku nakon te Atua, kioina ngkai ti ataia bwa ti na manga taia mwina ae taiani kakabwaia aika taonako. (2 I-Korinto 9:6) Ni karaoan aei, bon te kakabwaia nakoira ngkanne te maiu n te tai ae moanibaan te tamaroa anne, ike a na bane iai te koraki “akana iai ikeikeia” n angan Iehova te neboaki are e riai n anganaki!​—Taian Areru 150:6.

[Kabwarabwara ae nano]

Ko Uringnga?

• A kanga ni beku ana aomata te Atua iroun Iehova ni “ngaina ao ni bong”?

• Tera te kangaanga are a kaaitara ma ngaia te baronga ae Kata, ao tera reireiaia Kristian ni boong aikai, mai iai?

• E na kanga n riki te mwakuri ni minita bwa otangara man ana kai ni bakarere Tatan?

• Tera te ‘mataroa ae uki’ are a a tia n rin iai tabeman, ao baikara kakabwaia aika a tia n reke nakoia?

[Taamnei n iteraniba 31]

Ti karekea te iraorao ae kaunga nano n te mwakuri ni minita