‘Ara Tabo Ni Kamaiu Iehova Ni Boong Ni Kananoanga’

“Mairoun Iehova maiuia akana raoiroi: Bon aia tabo ni kamaiu ae korakora Ngaia ni boong ni kananoanga.”​—TAIAN ARERU 37:39.

1, 2. (a) Tera are tataroia Iesu ibukia taan rimwina? (b) Tera ana kaantaninga te Atua ni kaineti ma ana aomata?

MOAN te mwaaka Iehova. Iai mwaakana ni kamanoia taan taromauria aika kakaonimaki ni waaki nako ake e bon taku. E boni kona naba ni kaokoroia ana aomata mai buakoia kaain te aonnaba ma ni katikuia n te tabo teuana ae mano ma n rau. Ma e ngae n anne e tataro Iesu nakon Tamana i karawa ibukia taan rimwina ni kangai: “I aki tataro ba Ko na uotiia nako mai aon te aba, ma I tataro ba Ko na kawakinia mairoun teuare buakaka.”​—Ioane 17:15.

² E aki iangoia Iehova bwa e na uotira nako “mai aon te aba.” Ma bon nanona bwa ti na maeka i buakoia kaain te aonnaba aei bwa ti aonga n tataekina ana rongorongo ae kamaiu ao ni kabebeteia aomata. (I-Rom 10:13-15) Ma kioina ngkai ti maeka n te aonnaba, nanona bwa ti kona n tabareaki iai iroun “teuare buakaka,” n aron ae e oti n ana tataro Iesu. A karika te maraki ae bati ma te rawawatannano aomata aika a aki ongeaba ao taanga n taamnei aika buakaka, ma tiaki n ae a na mano mai iai Kristian.​—1 Betero 5:9.

3. Tera are a na boni kaaitara naba ma ngaai taan taromauria Iehova, ao tera te karaunano ae ti kunea n ana Taeka te Atua?

³ I aan taiani kataaki ao e na boni bae n rotira te bwarannano, n taai tabetai. (Taeka N Rabakau 24:10) A bati rongorongoia aomata aika kakaonimaki n te Baibara ake a rinanon naba te karawawataki. E taku te tia areru: “A bati karawawatan te aomata ae raoiroi: ma Iehova E na kamaiua mani baikai ni kabane.” (Taian Areru 34:19) Eng, a na boni bae naba n riki mwakuri aika bubuaka nakon “te aomata ae raoiroi.” N tabetai ti katotonga ana namakin te tia areru are Tawita ngke e kangai ngkoa: “I nimamate ao I bati ni kaikoakaki.” (Taian Areru 38:8) Ma e karaunano atakin ae “E a kaan Iehova ma akana a uruaki nanoia, ao e kamaiuia akana a raraoma tamneiia.”​—Taian Areru 34:18; 94:19.

4, 5. (a) Tera ae ti riai ni karaoia bwa ti aonga ni karekea kamanoara mairoun te Atua, ni kaineti ma Taeka N Rabakau 18:10? (b) Baikara mwaneka ake ti riai ni karaoi bwa ti aonga ni karekea buokara mairoun te Atua?

⁴ E oti n ana tataro Iesu bwa e bon tabeakinira Iehova ao ara “tabo ni kamaiu ae korakora Ngaia ni boongi ni kananoanga.” (Taian Areru 37:39) A taekinaki naba aeka n taeka akanne n te boki ae Taeka N Rabakau ni kangai: “Bon te nono ae e korakora Iawe, e nako iai te aomata ae raoiroi, ao e tan iai.” (Taeka N Rabakau 18:10, BK) E oti n te kibu aei te koaua ae kakawaki ni kaineti ma aron Iehova ni mwamwannanoia ana karikibwai. E kaakamanoia aomata te Atua ma ai moara ra riki te koraki ake a raoiroi, ake a ukoukoria, n ai aron ae kaanga a biri nako nanon te nono ae korakora ibukin kamanoaia.

⁵ Ma ti na kanga ni biri nakon Iehova ibukin kamanoara ngkana ti a kaaitara ma kangaanga aika karawawata? Ti na rinanon ngkai mwaneka aika tenua aika ti na karaoi bwa ti aonga ni karekea buokara mairoun Iehova. Te moanibwai, ti na kawara Tamara are i karawa n te tataro. Te kauoua, ti na mwakuri ni kaineti ma are tangiraki iroun taamneina ae raoiroi. Ao te katenua ti na aantaeka nakon ana babaire Iehova n ukoukora te reitaki ma raora ni Kristian ake a kona ni kabebetea karawawatakira.

Mwaakan te Tataro

6. Tera aia iango Kristian ni koaua ni kaineti ma te tataro?

⁶ Tabeman taan rabakau i aon tuan te mauri, a iangoa te tataro bwa bwainnaorakian naba te rawawatannano ao te tabeaianga. Kioina ngkai e kakoauaki bwa reken te tai ni kainabwabu n tataro e kona ni kauarerekea te tabeaianga, e na bon tii te arona naba ngkanne ma te kakauongo nakon tangiraoin bwaai tabeua aika karikaki ke te kabutaki n ringaki. A aki kamangora te tataro Kristian ni koaua n taraia bwa kaanga te aeka ni bwainnaoraki teuana ibukin karauan te iango. Ti iangoa te tataro bwa te taetae ni kawai ma te karinerine ma te tia Karikiriki. E irekereke te tataro ma tangiran ao onimakinan te Atua iroura. Eng, te tataro boni kanoan naba ara taromauri.

7. Tera ae nanonaki n te tataro ma te onimaki, ao a na kanga ni buokira aeka n tataro aikai bwa ti na kona n tokanikai i aon te karawawataki?

⁷ E riai n irianaki ara tataro ma nanora n onimakina Iehova ke ni kakoauaa. E korea ae kangai te abotoro Ioane: “Aio onimakinana i roura, ba ngkana ti bubuti te bwai teuana n ai aron nanona, ao E bon ongo i roura.” (1 Ioane 5:14) Iehova are Teuare Moan te Rietata, are bon tii ngaia te Atua ni koaua ae moan te mwaaka, e na bon tabeakina raoi aia tataro ni koaua taan taromauriia. E karaunano ataakin ae e bon ongora iroura Atuara ae tatangira ngkana ti kaota rawawatan nanora ma ara kangaanga nakoina.​—I-Biribi 4:6.

8. Bukin tera ngkai a aki riai n namakinna Kristian aika a kakaonimaki bwa a maamaa ke akea uaaia, ngkana a taetae ni kawai ma Iehova n te tataro?

⁸ A aki riai n namakinna Kristian aika kakaonimaki bwa a maamaa, akea uaaia ke a maaku ngkana a taetae ni kawai ma Iehova n te tataro. Ngkana ti aki kukurei i bon iroura, ke ti a taonakinako n ara kangaanga, ti bae n aki kan tataro nakon Iehova. N taai akanne ao e raoiroi riki bwa ti na ururingnga are Iehova, “E na nanoangaiia ana koraki aika karawawataki” ao e na “kabebetei nanoia akana nanorinano.” (Itaia 49:13; 2 I-Korinto 7:6) E rangi ni kakawaki bwa ti na aki maamaa ni kakaaea buokara mairoun Tamara are i karawa are ara tabo ni kamaiu, n taai ake ti rawawata ao n tabeaianga iai.

9. Tera kakawakin te onimaki ngkana ti taetae ni kawai ma te Atua n te tataro?

⁹ Ti riai n onimaki ni koaua bwa ti aonga ni kakabwaiaki man ara tataro. E taku te Baibara bwa “ngkana iai ae e kan nakon te Atua, ao e riai ni kakoaua ba iai te Atua, ae e karekea kaniwangaia akana a ukeria.” (Ebera 11:6, BK) E bati riki ae nanonaki n te onimaki nakon tii kakoauan ae “bon iai” te Atua. Te onimaki ni koaua e irekereke ma korakoran nanom ni kakoauaa bwa iai nanon te Atua ni kani kabooa mwin ongeabara nakoina ao iai naba ana konabwai ni kakororaoia. “A memena matan Iehova i aoia akana raoiroi ni kan akoiia, Ao a uki taningana nakon aia wewete.” (1 Betero 3:12) E na korakora riki nanon ara tataro ngkana ti aki toki n iaiangoa aron Iehova n tabeakinira ma te tangira.

10. Tera ae riai ni kaineti ma ara tataro, ngkana ti na karekea kamarurungan ara onimaki mairoun Iehova?

¹⁰ E ongora n ara tataro Iehova ngkana a nako mai nanora ni koaua. E korea ae kangai te tia areru: “I wewete n nanou ni kabanea; Iehova, Ko na ongo i rou.” (Taian Areru 119:145) A aki riki bwa bwaai ni kabwarabae ara tataro ao tiaki naba bwaai aika a aki nako raoi mai nanora, n aron aia tataro kaain Aaro aika bati are akea nanoia iai ma a karaoia ibukina bwa kanoan aia kaetieti. Ngkana ti tataro nakon Iehova ma ‘nanora ni kabane,’ nanona ngkanne bwa ara taeka a rangi n nanonaki raoi ao a kakawaki iroura. Imwin taian tataro akana nako man te nano akanne, ti a kona ngkanne n namakina te kabebeteaki ae reke man ‘kaakan rawawatara i aon Iehova.’ E a tia ni berita te Baibara bwa ‘E na buokira.’​—Taian Areru 55:22; 1 Betero 5:6, 7.

Te tia Buokira Taamnein te Atua

11. Tera te anga teuana ae e na kaekaira iai Iehova ngkana ti teimatoa ni “bubuti” ibukin buokara?

¹¹ Tiaki tii te tia Ongo tataro Iehova ma bon te tia Kaekai naba. (Taian Areru 65:2) E korea ae kangai Tawita: “N te bong ae e kai nanou iai ao I a weteiko, ba ane Ko na ongo i rou iai.” (Taian Areru 86:7) E kaungai nanoia taan rimwina Iesu bwa a na teimatoa ni “bubuti” ana ibuobuoki Iehova ibukina bwa te Tama “are i karawa” e na “anga te Tamnei are Raoiroi nakoia akana butiia.” (Ruka 11:9-13) Eng, e na reke mwaakan te Atua bwa aia tia ibuobuoki, ke kabebeteaia ana aomata.​—Ioane 14:16.

12. E kanga ni kona ni buokira taamnein te Atua ngkana ti a taonakinako n ara kangaanga?

¹² E na boni kakorakoraira taamnein te Atua n “te mwaka ae moan te korakora,” ngkana ti a kaaitara ma kataakira. (2 I-Korinto 4:7) E taetae ni kangai te abotoro Bauro ma nanona ni koaua, are e nanomwaaka ngkoa i aan karawawatana aika mwaiti: “I boni konai bwaai ni kabane ni karaoi iroun Teuare kakorakoraai.” (I-Biribi 4:13) N aron anne a bati Kristian ni boong aikai ake a a tia n namakina kaboouan korakoran nanoia ao kakorakoran aia onimaki, ni kaekaan aia tataro n onnon. N taai aika mwaiti ao ti aki kona n taonakinako n ara kangaanga aika karawawata, imwin reken ana ibuobuoki taamnein te Atua. Ibukina bwa ti a kakorakoraki mairoun te Atua, ti a kona ngkanne n taekina naba are e taekinna te abotoro ni kangai: “Ti taotaonaki n aeka n rawawata nako, ma ti aki konaki; ti tabeaianga, ma a aki bara nanora; ti babainikirinaki, ma ti aki kitanaki iroun te Atua; ti okaki nako, ma ti aki kamaunaki.”​—2 I-Korinto 4:8, 9, BK.

13, 14. (a) E kanga Iehova ni kakoauaa rinanon ana Taeka bwa boni ngaia ara tabo ni kamaiu? (b) E kanga ni buokiko kamanenan ana kaetieti te Baibara?

¹³ E a tia ni kaira korean ana Taeka te Atua te taamnei ae raoiroi ao e kawakinna naba ibukin kabwaiara. E kanga Iehova ni kakoauaa rinanon ana Taeka bwa boni ngaia ara tabo ni kamaiu n taai ni karawawata? Te anga teuana boni man anganakira te wanawana ao te rabakau n iango. (Taeka N Rabakau 3:21-24) E kataneiaira te Baibara n arora n iaiango ao e katamaroaa arora ni kona ni kamanenaa raoi. (I-Rom 12:1) Ngkana ti katoatai ni wareware n ana Taeka te Atua ao n reirei iai i bon iroura, ao ni kamanenaa raoi i nanoni maiura, ti kona ni “kataneiaki ni wanawana n ata te raoiroi ma te buakaka.” (Ebera 5:14) Ko na boni bae n tia n nori aroni kaetieti n te Baibara ni buokiko bwa ko na wanawana ni karaoa am motinnano ngkana ko kaaitara ma kangaanga. E anganira te nanowanawana te Baibara are e na kona ni buokira ni kakaaei tokin kangaanga aika karawawata.​—Taeka N Rabakau 1:4.

¹⁴ E anganira naba te kakorakora teuana ana Taeka te Atua ae taekan kaantaningan te kamaiuaki. (I-Rom 15:4) E taku te Baibara bwa a na aki teimatoa n riiriki mwakuri aika bubuaka. Karawawatakira aika ti ririnanoi boni baika a na aki teimatoa. (2 I-Korinto 4:16-18) Iai iroura “kaantaningan te maiu are aki toki, are E taku te Atua, ae aki kona te kewe, ngke a tuai ni karikaki bwaai, ba E na angan te aba.” (Tito 1:2) Ngkana ti kimwareirei n te kaantaninga anne, ma n aki toki n iaiangoa te tai ae na roko ae kakukurei are e beritanna Iehova, ao ti kona n nanomwaaka iai i aan te karawawataki.​—I-Rom 12:12; 1 Tetaronike 1:3.

Te Ekaretia Boni Kaotan Ana Tangira te Atua

15. A na kanga ni kona n riki Kristian bwa taan ibuobuoki i marenaia?

¹⁵ Te bwai naba teuana ae ti karekea mairoun Iehova ae e kona ni buokira n taai ni karawawata, bon ara itamwaomwao ae kakukureira n te ekaretia ni Kristian. E taku te Baibara: “E tangira te aomata raona n te bong ae koraki, ao e bungiaki te tari ba katokani kain tarina.” (Taeka N Rabakau 17:17) A kaungaki aomata nako n te ekaretia n ana Taeka te Atua bwa a na bwaina te ikarinerine ao te itangitangiri i marenaia. (I-Rom 12:10) E korea ae kangai te abotoro Bauro; “Ke e na aki ukoukora ana bwai te aomata i bon i bukina, ma e na ukoukora ae e na kabaia iai raona.” (1 I-Korinto 10:24) Bwainakin te aeka n aroaro anne, e kona ni buokira bwa ti na iangoi bwaai aika a kainnanoi raora ma tiaki tii kainnanora. Ngkana ti anga nanora n tabeakinia tabemwaang, ti buokiia ao ti buokira naba bwa ti na kukurei iai, ao e na reke naba iroura te raunnano ae kona ni kabebetea riki uotara.​—Mwakuri 20:35.

16. A na kanga ni kona ni kaungaunga Kristian n tatabemania nako?

¹⁶ Mwaane ma aine aika ikawai n te onimaki a kona ni karaoa te mwakuri ae kakawaki ae kakorakoraia tabemwaang. Ni karaoan anne, a na karikiia moa bwa aomata aika a kai kawaraki ao a na tatauraoi n taai nako ni butimwaeia aomata. (2 I-Korinto 6:11-13) E kakabwaiaki ni koaua te ekaretia ngkana a bane kaaina ni karerekei aia tai ni kamoamoaia te koraki ake a ataei riki, a na kakorakoraia taan onimaki aika boou, ao a na kaungaia te koraki ake a rawawata nanoia. (I-Rom 15:7) E na buokira te itangitangiri n tari n totokoa te nano n aki onimakina temanna ma temanna i marenara. Ti aki riai ni waekoa n iangoia bwa kangaanga tabeua ake e rotaki iai temanna boni kanikinaean mamaaran te aomata arei n te onimaki. E kaumakiia Kristian Bauro bwa a na “kabebeteia akana a kai toki nanoia.” (1 I-Tetaronike 5:14) E kaotia te Baibara bwa a boni boo naba ma te karawawataki Kristian aika kakaonimaki.​—Mwakuri 14:15.

17. Baikara taai ake e kona n reke, ibukin kakorakoran te itangitangiri n tari ni Kristian?

¹⁷ Te bobotaki n taromauri ni Kristian ngaia te waaki ae rangi n tamaroa, ae rereke iai ara tai ni kabebeteia tarira ao ni kaungaia naba. (Ebera 10:24, 25) E aki tii rereke te mwakuri n tangira aei ni bobotakin te ekaretia, ma a karerekei naba aia tai ana aomata te Atua n iraorao n uaia ni kaungai nanoia i tinanikun tain te taromauri. Ngkana a riki kangaanga aika karawawata ao ti na bae n tauraoi n ibuobuoki i marenara, ibukina bwa ti a tia ni kamani karekea te itangitangiri i marenara. E korea ae kangai te abotoro Bauro: “E na aki riki te raure n te rabata; ma a na i akoakoi bwain nako te rabata n ti te arona. Ao ngkana e maraki bwain te rabata teuana, ao a bane naba ni maraki bwain te rabata ma ngaia. Ao ngkana e karineaki bwain te rabata teuana, ao a bane naba ni kimareirei bwain te rabata ma ngaia.”​—1 I-Korinto 12:25, 26.

18. Tera ae ti aki riai ni karaoia ngkana ti namakina te rawawatannano?

¹⁸ N taai tabetai, ti bae n namakina te rawawatannano n te aro are ti a aki kan ira buakon te kakukurei ma raao ni Kristian. Ti riai ni buakana te aeka n nano anne bwa ti aonga n aki katibanakoa kabebeteara ma buokara are e kona n reke mairouia raora n onimaki. E kauringira ni kangai te Baibara: “Ane raure ma aomata ao e ukoukora ae tangiraki irouna, ao e un nakon te rabakau ni kabanea.” (Taeka N Rabakau 18:1) Tarira n te onimaki boni kaotan tabeakinara iroun te Atua. Ngkana ti mataata raoi n anne, ti na boni karekea iai te kabebeteaki n taai ni karawawata.

Kateimatoaa te Iango ae Kaungaunga

19, 20. E kanga te Baibara ni buokira bwa ti na kararoai iangoan baika a kabwaranano?

¹⁹ Ngkana e roko te bwarannano ao te nanokawaki, a rangi ni kai iaiangoaki ngkanne baika a karawawataira. N te katoto, ngkana a rinanon te rawawata tabeman, a kona n iangoia bwa a mamaara n te onimaki, ni motikia i bon irouia bwa aio boni kanikinaean raoi ae e a aki kukurei irouia te Atua. Uringnga are e aki kakaririi Iehova “ni baika bubuaka.” (Iakobo 1:13) E taku te Baibara; “E bon aki kani karawawata te aba, ao E aki kananokawakiia naba natiia aomata.” (Baebaeti 3:33) Ni kaitaraan anne, e bon rangi n nanokawaki Iehova ngkana e taonaki ana toro n te rawawata.​—Itaia 63:8, 9; Tekaria 2:8.

²⁰ Iehova bon “te Tama ae nanoangaea te aba, ae te Atua ae te tia karika kabebetean te nano ni kabanea.” (2 I-Korinto 1:3) E tabeakinira ao e na karietataira n te tai ae riai. (1 Betero 5:6, 7) Ururingan ana tangira te Atua n taai nako ibukira, e na buokira bwa ti na kateimatoaa te iango ae kaungaunga, ao ti na kukurei naba. E korea ae kangai Iakobo: “Tariu, ngkana kam taonaki n aeka ni kataaki nako, ao butimai ba tekeraoimi [“kakimwareireiami,” NW] .” (Iakobo 1:2, BK) Bukin tera? E kaeka ni kangai: “Ba ngkana e a tia ni kataki, ao e na reke i rouna te bau are te maiu, are E atongnga te Uea ba aia bwai akana tangiria.”​—Iakobo 1:12.

21. N aki ongei kangaanga aika ti kaaitarai, ma tera te berita are e anga te Atua nakoia te koraki ake a kakaonimaki nakoina?

²¹ N aron are e a tia ni kauringira Iesu ao e na boni bae n rotira te karawawataki n te aonnaba. (Ioane 16:33) Ma e berita te Baibara bwa “te rawawata, ke te maraki, ke te bainikirinaki, ke te rongo, ke te aki-kunnikaiaki, ke te anangani-mate,” a na bon aki karaureira man ana tangira Iehova ma Natina. (I-Rom 8:35, 39) Ai karaunano ra ataakin ae ngaia karawawata nako boni baika a aki teimatoa! Mangkai ni karokoa te tai are e nang toki iai karawawatakia aomata, ao e na bon tabeakinira Tamara ae tatangira ae Iehova. Ngkana ti biri nakoina ibukin kamanoara, ao e na boni kakoauaki bwa “te ne ni kamaiu ae rietata Iehova, ae nen ane e kai nanona, te ne ni kamaiu ae rietata ni bongin te rawawata.”​—Taian Areru 9:9.

Tera Reireiara?

• Tera ae a riai ni kariai Kristian ngkai a maeka n te aonnaba ae buakaka?

• A na kanga ni kakorakoraira ara tataro n onimaki ngkana ti kaaitara ma kataaki?

• E kanga n riki taamnein te Atua bwa te tia buokira?

• Tera ae ti kona ni karaoia bwa ti aonga n ibuobuoki i marenara?