Kukurei E Ngae Ngkana Ko Bwainikirinaki

“Kam a kabaia [“kukurei,” NW], ngkana a taetaebuakaingkami aomata, ma ni bainikiriningkami, ma n atonga te taetae ae buakaka ni kabanea, n uaraoingkami, i bukiu.”​—MATAIO 5:11.

1. Tera te karaunano are e angania taan rimwina Iesu, ni kaineti ma te kakukurei ao te bwainikirinaki?

N TE moan tai are e kanakoia iai ana abotoro Iesu bwa a na tataekina euangkerion te Tautaeka n Uea, e kauringia iai bwa a na kaaitara ma te nano ni karitei. E taku: “Ane kam na ribaki irouia aomata ni kabaneia i bukin arau.” (Mataio 10:​5-18, 22) Ma, e a bon tia n angania ana abotoro ao tabeman riki te karaunano n ana Kabwarabwara i aon te Maunga, are e na bon aki bua te kukurei ae korakora, are a a tia n namakinna, e ngae ngkana a bwainikirinaki. Ni koauana, e kairekerekea te kukurei Iesu ma bwainikirinaia Kristian! E na kanga ni karekea te kakukurei te bwainikirinaki?

Te Kammarakaki Ibukin te Raoiroi

2. Te aeka ni kammaraki raa ae karekea te kakukurei ni kaineti ma are e taekinna Iesu ao te abotoro Betero?

² E taekina ae kangai Iesu ibukin te kawanua ni kakukurei: “A a kabaia [“kukurei,” NW] akana bainikirinaki i bukin te raoiroi: ba aia bwai uean te Atua.” Tiaki nanon aei bwa te bwainikirinaki e karekea kamoamoan te aomata. E korea ae kangai te abotoro Betero: “Te kamoamoaki ra ngkana kam bure, ma n oreaki iai, ao kam taotaon naba nanomi? Ma ngkana kam karaoa ae raoiroi, ni kamarakaki iai, ngkana kam taotaon naba nanomi, ao kam na karaoiroaki iai iroun te Atua.” E manga reitia ni kangai: “Ba e na tai maraki temanna i buakomi n ai aron te tia kamatea te aomata, ke te tia ira, ke te tia karaoa ae buakaka, ke te tia kanrabakauakin aia bwai aomata tabemang n te aro ae aki riai. Ma ngkana tao e maraki temanna ngkai te Kristian, ao e na tai maamaa; ma e na neboa te Atua i bukin te ara aei.” (1 Betero 2:20; 4:15, 16) Ni kaineti ma ana taeka Iesu, e reke te kakukurei man te kammarakaki, tii ngkana e rinanoaki ibukin te raoiroi.

3. (a) Tera ae nanonaki n te bwainikirinaki ibukin te raoiroi? (b) Tera uaan te bwainikirinaki nakoia Kristian ake rimoa?

³ E ataaki te aomata bwa e raoiroi man arona ni kaakaraoa nanon te Atua ao ana tua nako. Mangaia are, te kammarakaki ibukin te raoiroi, e nanonaki iai ngkanne te kammarakaki ibukin te rawa n urua ana tua ao ana kaetieti te Atua. A bwainikirinaki naba abotoro irouia taani kairiri i Iutaia kioina ngke a rawa ni katoka tataekinan aran Iesu. (Mwakuri 4:18-​20; 5:27-​29, 40) E uruaka kukureia te aro aei ao e katoka aia uarongorongo? E bon aki! “A nako mai matan te Tanirim, ni kimareirei ngke a atongaki ba a riai ni kamaamaaeaki i bukin te Ara arei. Ao a aki toki n reirei, ma n atoatonga Iesu ba te Kristo n te bong ae koraki n te maneaba, ao n aia auti.” (Mwakuri 5:41, 42) E boni karekea kukureia bwainikirinaia aei, ao e kakorakoraki naba iai ingaingan nanoia n uarongorongo. Imwina riki, a bwainikirinaki Kristian ake rimoa irouia kaain Rom ibukina bwa a rawa n taromauria te embera.

4. Taekin tabeua bukin bwainikirinaia Kristian?

⁴ N taai aikai, ao a a tia naba ni bwainikirinaki Ana tia Kakoaua Iehova kioina ngkai a rawa ni katoka tataekinan “euangkerion uean te Atua.” (Mataio 24:14) Ngke a katabuaki Kristian ni bobotaki, a kukurei riki ni kaitaraa te kammarakaki, nakon are a nang aki bobotaki n aron are e tua te Baibara. (Ebera 10:24, 25) A a tia naba ni bwainikirinaki ibukin teia i nuka ao ibukin aaro riki tabeua n aron rawaia nakon te raraa. (Ioane 17:14; Mwakuri 15:28, 29) Ma, aroia n tei ibukin te raoiroi, e a karekea te raunnano ao te kakukurei nakoia ana aomata te Atua ni boong aikai.​—1 Betero 3:14.

Taetaebuakaki Ibukin Kristo

5. Tera raoi bukin bwainikirinaia ana aomata Iehova ni boong aikai?

⁵ E kaineti te karuaiwa ni kakukurei, are e maroroakinna Iesu n ana Kabwarabwara i aon te Maunga, ma aron rikin te bwainikirinaki. E taku: “Kam a kabaia [“kukurei,” NW] ngkana a taetaebuakaingkami aomata, ma ni bainikiriningkami, ma n atonga te taetae ae buakaka ni kabanea, n uaraoingkami, i bukiu.” (Mataio 5:11) Bukin raoi bwainikirinaia ana aomata Iehova bon ibukina ngkai a aki ira buakon te waaki ae buakaka ae ngkai. E tua ae kangai Iesu nakoia taan rimwina: “Ngkana tao ana bwai te aba ngkami, ao e bon tangiriia ana bwai: ma e ribaingkami te aba ba tiaki ana bwai te aba ngkami, ma I rineingkami mai buakon te aba.” (Ioane 15:19) N aron naba anne, e taku te abotoro Betero: “A mimi ngkai kam aki biribiri ma ngaiia ni kabatia te maie, ao a taetaebuakaingkami.”​—1 Betero 4:4.

6. (a) Tera bukin taetaebuakaia ao bwainikirinaia taian nikira ma raoia? (b) Te koaua bwa e kakerikaka kukureira bwaai aikai?

⁶ Ti a tia n ataia bwa a bwainikirinaki Kristian ake rimoa ibukina bwa a rawa ni katoka tataekinan aran Iesu. E anga ana kaetieti Kristo nakoia taan rimwina ae kangai: “Kam na riki ba taani kaotioti i bukiu . . . ni karokoa tabon aonaba.” (Mwakuri 1:8) A a tia nikiraia tarin Kristo aika kabiraki ni karaoa mwiokoaia anne ma te ingaingannano, ao a raonaki irouia raoia aika kakaonimaki ae te “koraki ae uanao.” (Te Kaotioti 7:9) Mangaia are Tatan e buakania nikiraia “natina ake tabemang [ana kariki te “aine” are e tei ibukin ana botaki te Atua i karawa], ake a kakawakin ana tua te Atua, ma n taua kaotiotan Iesu.” (Te Kaotioti 12:9, 17) Ngkai Ana tia Kakoaua Iehova ngaira, ti boni kaotioti ibukin Iesu, are e a tautaeka ngkai n te Tautaeka n Uea, are e nang urui aia tautaeka aomata, bwa e aonga ni karokoaki ana aonnaba te Atua ae boou man raoiroi. (Taniera 2:44; 2 Betero 3:13) Ti taetaebuakaki ao ni bwainikirinaki ibukin aei, ao ti kukurei ni maraki ibukin aran Kristo.​—1 Betero 4:14.

7, 8. Tera aia taeka n uarao taani karitei, ibukia Kristian ake rimoa?

⁷ E taekinna Iesu bwa a riai n iangoia taan rimwina bwa a boni kukurei, e ngae ngkana a ‘atonga te taetae ae buakaka ni kabanea, n uaraoiia’ i bukina. (Mataio 5:11) E bon riki aei nakoia Kristian ake rimoa. Ngke e kairoroaki te abotoro Bauro bwa e na tiku i Rom tao n 59-61 C.E., ao a taku taani kairiri i Iutaia nakoia Kristian: “Ti ata te Aro aei ba e kabuakakaki n taabo nako.” (Mwakuri 28:22) A bukinaki Bauro ma Tira bwa a a tia ni “kakiriweia kaain aonaba,” kioina ngke a “ri aon ana taeka Kaitara.”​—Mwakuri 17:6, 7.

⁸ E taku ana taeka te tia koro-rongorongo ae K. S. Latourett, are e korea rongorongoia Kristian n ana tai te Embwaea n Rom: “A mwaiti bukibuki ni kewe aika kakaokoro. A bukinaki Kristian aikai bwa a kakeaa te Atua kioina ngke a rawa ni boutokai taromauri ni bekan. Ibukin naba rawaia n ira te kaotinano n aia botaki ke aaro ni kakukurei irouia bekan . . . a bwainingareaki ao a atongaki bwa a ribaia aomata. . . . E taekinaki naba bwa a kakaitiboo n te tairiki mwaane ao aine aika Kristian . . . ao imwina a wene ni bure. . . . Ibukin te koaua are e kaakaraoaki [Kauringan maten Iesu] tii ibukia kaain te onimaki, e a reke mai iai moan taekinan te rongorongo ae akea koauana, are aongkoa a aki toki Kristian ni kareana te merimeri, ma ni kana raraana ao irikona.” Irarikin anne, a bukinaki naba Kristian ake rimoa bwa a kairiribai ma te Tautaeka, kioina ngke a rawa n taromauria te embera.

9. Tera aroaroia Kristian ake n te moan tienture ni kaineti ma bukinaia ni bukibuki aika kewe, ao tera ae riiriki naba ni boong aikai?

⁹ Bon akea tukaia Kristian ake rimoa n tataekinan rongorongon te Tautaeka n Uea, n taeka n uarao aikai. E reke ana tai Bauro n 60-​61 C.E. n tataekina te “euangkerio” are tabe n ‘uaa ma n rikirake i aonnaba ni kabane’ ao are e “taekinaki i aonaba ni kabane aika i aani karawa.” (I-Korote 1:5, 6, 23) Tii te arona anne ma ae riki ni boong aikai. A uaraoaki Ana tia Kakoaua Iehova n ai aroia naba Kristian ake n te moan tienture. Ma e ngae n anne, e a rikirake riki uarongorongoan te Tautaeka n Uea ni boong aikai, ao a karekea te kakukurei ae bati mai iai te koraki ake a buoka tibwatibwana.

Kukurei ni Bwainikirinaki n Aroia Burabeti

10, 11. (a) Tera aron Iesu ni motika ana maroro i aon te karuaiwa ni kakukurei? (b) E aera ngke a bwainikirinaki burabeti? Anga katoto tabeua.

¹⁰ E motika ana maroro Iesu i aon te karuaiwa ni kakukurei ni kangai: “Kam na kakatonga, . . .  ba ai aron naba bainikirinaia burabeti ake i mwaimi i rouia.” (Mataio 5:12) A kamatoai roroaia tibun Iteraera nakoia burabeti ake e kanakoia Iehova, ao a aki toki ni bwainikirinia naba. (Ieremia 7:25, 26) E kaota koauan aei te abotoro Bauro ngke e korea ae kangai: “Tera ae N na atongnga riki? ba e na bane au tai ngkana tao I taekinia . . . taiani burabeti: ake a katae aia kai uea n te onimaki, . . . a kataki tabemang ni kakanikoaia ao ni kataereaia, ao ni kabaeaia ao ni kainakiia.”​—Ebera 11:32-​38.

¹¹ A mwaiti ana burabeti Iehova aika tiringaki n te kabaang n ana tai n tautaeka te Uea are buakaka ae Aaba, ma buuna ae Ietebera. (1 Uea 18:4, 13; 19:10) E karinaki te burabeti are Ieremia i nanon te kai ni kabae wae, ao imwina a karenakoa nako nanon te kinono ni kaikain ae bokaboka. (Ieremia 20:1, 2; 38:6) E teweaki nako nanon te oo-n-raian te burabeti are Taniera. (Taniera 6:16, 17) A bane ni bwainikirinaki burabeti ake a maiu imwain aia tai Kristian, kioina ngke a tei ibukin taromaurian Iehova ae itiaki. A mwaiti naba burabeti aika bwainikirinaki irouia mataniwin te Aro n Iutaia. E taekinia taani koroboki ao Baritaio aikai Iesu bwa “natiia ake a kamateia burabeti.”​—Mataio 23:31.

12. E aera ngkai ti iangoia ngaira aika Ana tia Kakoaua Iehova, bwa bon te kakabwaia nakoira bwainikirinara n aroia burabeti ake rimoa?

¹² Ti aki toki ni bwainikirinaki ni boong aikai, ngaira aika Ana tia Kakoaua Iehova, kioina ngkai ti tataekina euangkerion te Tautaeka n Uea ma te ingaingannano. A bukinira kairiribai bwa ti karaoa te “mwakuri n anai nano ae iowawa,” ma n aron ae ataaki iroura, a boni kabuakakaki naba taan taromauria Iehova aika kakaonimaki ake imwaira n aron aei. (Ieremia 11:21; 20:8, 11) Ti iaiangoia bwa bon te kakabwaia nakoira kammarakara n aroia naba burabeti ake rimoa. E korea ae kangai te tia rimwin Kristo ae Iakobo: “Taari, kam na ururingia burabeti, ake a taetae n aran te Uea, ba kam na kakairi i rouia ni kataua te maraki ma ni botumwaka n taotaona te nano. Noria, ti taku ba a kabaia [“kukurei,” NW] ake a nanomwaka.”​—Iakobo 5:10, 11.

Bukin Riaira ni Kukurei

13. (a) Bukin tera ngkai a aki bwara nanora n te bwainikirinaki? (b) Tera ae kakorakoraira n tei n aki kaingingaki, ao tera ae kakoauaki man aei?

¹³ E kangaanga reken te bwarannano iroura ibukin te bwainikirinaki, kioina ngkai a kabebeteaki nanora n te iango ae ti tou mwin mwanekaia burabeti, Kristian ake rimoa, ao bon Iesu Kristo naba. (1 Betero 2:21) E korakora karauan nanora man te Baibara, n taeka aika ai aron are e taekinna te abotoro Betero: “Ngkami aika kam tangiraki, kam na tai mimi n te bwai ni kamaraki ae nang kataingkami, ngke kaanga e ituingkami te bwai teuana ae kamimi. Ngkana kam taetaebuakaki i bukin arani Kristo, ao kam a kabaia [“kukurei,” NW]; ba E mena i aomi Tamnein te neboaki ma Tamnein te Atua.” (1 Betero 4:12, 14) Ti ataia raoi man baika a tia n riki nakoira, bwa ti boni kona n tei n aki kaingingaki e ngae ngkana ti kaaitara ma te bwainikirinaki, tii ngkana e mena i aora taamnein Iehova ni kakorakoraira. Boutokara iroun te taamnei ae raoiroi, e kaotaki raoi iai koauan ana kakabwaia Iehova i aora, ao mai ikai are ti a karekea iai te kakukurei ae bati.​—Taian Areru 5:12; I-Biribi 1:27-​29.

14. Tera bukina ngkai ti riai ni kakatonga ngkana ti bwainikirinaki ibukin te raoiroi?

¹⁴ Bukin kukureira riki teuana ngkana ti ribaaki ao ni bwainikirinaki ibukin te raoiroi, bwa e kakoauaki iai ae ti kaakaraoa aroia Kristian ao ti maiuakina tangiran te Atua. E korea ae kangai te abotoro Bauro: “A na bane ni bainikirinaki naba akana kani kabane aia bongi ni maiu n tangiran te Atua i nanoni Kristo Iesu.” (2 Timoteo 3:12) Ti rangi ni kimwareirei n te iango ae ngkana ti teimatoa ni kakaonimaki i aan kataaki aika riki nakoira, ti a manga karekea riki kaekaan ana kakaniko Tatan are e taku bwa a toro aomata iroun Iehova ibukina bwa e karekei aia bwai. (Iobi 1:9-​11; 2:3, 4) Ti kakatonga ngkai ti kona ni boutokaa riain Iehova n tautaeka, e ngae ngke e uarereke ara ibuobuoki iai.​—Taeka N Rabakau 27:11.

Kimwareirei n te Kaantaninga

15, 16. (a) Tera bukin ‘kakatongara ao kimwareireira’ are e a tia n taekinna Iesu ibukira? (b) Tera te kaniwanga ae kawakinaki i karawa ibukia Kristian aika kabiraki, ao a na kakabwaiaki raoia aika “tiibu tabemang” n te aro raa?

¹⁵ E a manga raona riki ana taeka Iesu ibukin rikin te kakukurei i aan te kabuakakaki ao te bwainikirinaki n aroia burabeti ake rimoa. Ngke e nang bane ana maroro i aon te karuaiwa ni kakukurei, ao e taku: “Kam na kakatonga, ao kimwareirei: ba a bati ami bwai i karawa.” (Mataio 5:12) E korea ae kangai te abotoro Bauro: “Boon te bure te mate; ma ana bwai n tituaraoi te Atua te maiu are aki toki i nanoni Kristo Iesu are ara Uea.” (I-Rom 6:23) Eng, ara ‘bwai aika bati’ aika a na reke iroura, bon taekan te maiu ae aki kona ni kabooaki n ara mwakuri. Bon te bwaintangira ae akea boona. E taekinna Iesu bwa e mena te kaniwanga aei “i karawa,” kioina ngkai e bon roko mairoun Iehova.

¹⁶ A anganaki taani kabiraki “te bau are te maiu,” are nanona bwa a na anganaki te aki-mamate ma Kristo i karawa. (Iakobo 1:12, 17) A ingainga nanoia te koraki ake e reke irouia kaantaningan te maiu n te aonnaba, aika “tiibu tabemang,” nakon te maiu n aki toki n te baretaiti i aon te aonnaba. (Ioane 10:16; Te Kaotioti 21:3-5) A bon aki kona ni kabooa te “bwai” are e na reke irouia koraki aika uakoraki aikai. A na uaia ni karekei kaniwangaia taani kabiraki ao “tiibu tabemang” man ana ‘akoi te Atua ae bati,’ are e a tia ni kaira te abotoro Bauro bwa e na taekinna ni kangai: “E na katituaraoaki te Atua i bukin ana bwai n tituaraoi are aki konaki n taekinaki arona.”​—2 I-Korinto 9:14, 15.

17. Bukin tera ngkai ti kona ni kukurei i aan te bwainikirinaki ao ni “kimwareirei” n te aro ni kaikonaki?

¹⁷ E korea ae kangai te abotoro Bauro nakoia Kristian, ake tabeman mai buakoia a nang bwainikirinaki n te aro ae iowawa iroun te Embera ae Nero: “Ti kimareirei naba n taian rawawata: ngkai ti ata te rawawata ba e karika taotaonan te nano; ao taotaonan te nano e karika te kataki; ao te kataki e karika te kaantaninga: ao te kaantaninga e aki kamaamaaea te aba.” E manga taku riki: “Kimareirei n te kaantaninga; taotaon nanomi i buakon te rawawata.” (I-Rom 5:3-5; 12:12) Ngkana ti kaantaningaa te nako karawa ke te tiku i aon te aba, ma e na bon reke ngkanne kaniwangara ibukin te kakaonimaki i aan kataakira ae riao nakon ae ti riai n anganaki. Akea tian kimwareireira ngkai ti kakaantaningaa te maiu are aki toki i aan ana kairiri te Uea ae Iesu Kristo, ae ti kona iai ni beku iroun Tamara ae tatangira ae Iehova, ma ni karaoiroia. Ti “kimwareirei” n te aro ni kaikonaki.

18. Tera ae kaantaningaki bwa a na karaoia botannaomata ngkai e a uakaan rokon te toki, ao tera ae e na karaoia Iehova?

¹⁸ A a tia ni bwainikirinaki Ana tia Kakoaua Iehova n aaba tabeua ao iai aika a bon teimatoa naba ni bwainikirinaki n taai aikai. E kauringia Kristian ni koaua Iesu n ana taetae ni burabeti ibukin tokin te waaki i aon te aba, ni kangai: “Ane kam na ribaki irouia botanaomata ni kabaneia i bukin arau.” (Mataio 24:9) E na kaungaia botannaomata Tatan bwa a na kaotiota ribakiia ana aomata Iehova, ngkai e a uakaan te toki. (Etekiera 38:10-​12, 14-​16) Aio boni kanikinaean ana tai ni mwakuri Iehova. “N na neboai, ma n tabuai, ma ni kaotai raoi i mataia botanaomata aika bati; ao a na ataai ba bon Iehova Ngai.” (Etekiera 38:23) Mangaia are e na katabua arana ae kakannato Iehova ao e na kamaiuia ana aomata man te bwainikirinaki. Mangaia are, “e a kabaia [“kukurei,” NW] te aomata ae teimatoa i buakon te kaririaki.”​—Iakobo 1:12.

19. Tera ae ti riai ni karaoia ngkai ti tabe ni kariariaa ‘ana bong Iehova’ ae kakannato?

¹⁹ Ngkai e a kaan roko ‘ana bong Iehova’ ae kakannato, ti riai ni kakatonga ngkai ti ‘atongaki bwa ti riai ni kamaamaeaki’ i bukin aran Iesu. (2 Betero 3:10-​13; Mwakuri 5:41) Ti bia riki n aroia Kristian ake rimoa aika teimatoa ni “kaotiota te Rongorongo ae e Raoiroi ae taekani Iesu” ma ana Tautaeka n Uea, ngkai ti tabe ni kariariaa kaniwangara n ana aonnaba Iehova ae boou man raoiroi.​—Mwakuri 5:42, BK; Iakobo 5:11.

Te Kauring

• Tera ae nanonaki n te kammarakaki ibukin te raoiroi?

• Tera uaan te bwainikirinaki are reke nakoia Kristian ake rimoa?

• Bukin tera bwa e kona n taekinaki ae a bwainikirinaki Ana tia Kakoaua Iehova n aroia burabeti ake rimoa?

• E aera ngkai ti kona ni ‘kakatonga ao ni kimwareirei’ i aan te bwainikirinaki?