Te Bwai ae Kainnanoaki Ibukin Karekean te Kukurei

A ATATAI riki nakoia aomata nako, n taekan bwaai aika a na karekea te kukurei, Iehova ae “te Atua ae kukukurei,” ao Iesu Kristo ‘ae tii ngaia te tia Tautaeka ae kukukurei.’ (1 Timoteo 1:11, NW; 6:15, NW) Mangaia are ti aki rangi ni mimi ngkai e kuneaki kiingin te kakukurei i nanon ana Taeka te Atua, ae te Baibara.​—Te Kaotioti 1:3; 22:7, NW.

N ana Kabwarabwara i aon te Maunga ae tanoata taekana, ao Iesu e taekina iai te bwai ae kainnanoaki ibukin karekean te kukurei. E taku: “A a kabwaia [“kukurei,” NW] akana” (1)  a ataa kainnanoakin bwaai n taamnei irouia, (2) nanokawaki, (3)  nimamannei, (4) barua te raoiroi ma ni kanimoi iai, (5) nanoanga, (6) itiaki nanoia, (7) taan raoi, (8) bwainikirinaki ibukin te raoiroi, ao (9) kakanikoaki ao ni bwainikirinaki ibukina.​—Mataio 5:3-​11.a

A Koaua Ana Reirei Iesu?

E kai ota te aba n aron koauan ana taeka Iesu ake tabeua. Akea ae e na kakewea ae e na kukurei riki te aomata ae nimamannei, e rau, e nanoanga, ao e kairaki n nanona ae itiaki, nakon te aomata ae e unun, e banga ni kauntaeka, ao akea ana nanoanga?

Tao ti kona ni mimi bwa a na kanga n atongaki bwa a kukurei aomata aika barua te raoiroi ma ni kani moi iai, ke aika nanokawaki. Iai aia kaantaninga ae riai aeka n aomata aikai ni kaineti ma bwaai aika riiriki n te aonnaba. A “ikenrawa ma n tang i bukini bwaai ni kabane akana riai ni bati n ribaki” aika karaoaki n ara bong aikai. (Etekiera 9:4) A aki kukurei ni karaoan anne n tii ngaia. Ma, ngke a ataa ana kaantaninga te Atua are e na karokoa te raoiroi i aon te aba ao te kaeti-taeka ae riai nakoia aika karawawataki, e nang akea iai ngkanne tian kukureia.​—Itaia 11:4.

Tangiran te raoiroi irouia aomata e kairiia bwa a na nanokawaki ibukin kabwakaroroia ni karaoa ae e eti. Mangaia are a ataa kainnanoakin bwaai n taamnei irouiia. Aeka n aomata aikai, a kariaia kairaia iroun te Atua ibukina bwa a ataia bwa bon tii ngaia ae kona ni kaeta aron nakonakoia bwa a aonga n tokanikai i aoni mamaaraia.​—Taeka N Rabakau 16:3, 9; 20:24.

A ataa kakawakin te itoman ae raoiroi ma te tia Karikiriki, aomata aika a nanokawaki, aika a barua te raoiroi ma ni kani moi iai, ao aika a ataa kainnanoakin bwaai n taamnei irouiia. E karekea te kakukurei te itoman ae raoiroi ma aomata, ma ae moamoa riki bon te itoman ae raoiroi ma te Atua. Eng, aomata aika tangira te eti ma nanoia ni koaua, aika a kariaia kairaia iroun te Atua, a kona n taekinaki bwa aomata aika kukukurei ni koaua.

Ma e ngae n anne ao e na bon kangaanga iroum kakoauan ae e kukurei te aomata ae bwainikirinaki ao ni kakanikoaki. Ma e boni koaua aei, kioina ngke e bon taekinna Iesu. Ma a na kanga n ota aomata n ana taeka?

Te Kukurei E Ngae Ngke Iai te Bwainikirinaki​—E Kanga ni Kona n Riki Anne?

Taraia raoi bwa e aki taekinna Iesu ae e kona ni karekea te kakukurei te kakaniko ao te bwainikirinaki n tii ngaiia. E kamataataa n taekinna ni kangai: “A a kabaia [“kukurei,” NW] akana bainikirinaki i bukin te raoiroi . . . ngkana a taetaebuakaingkami aomata, ma ni bainikiriningkami . . . i bukiu.” (Mataio 5:10, 11) Mangaia are e reke te kakukurei tii ngkana e kakanikoaki te aomata ibukin rikina bwa te tia rimwin Kristo ao ibukin naba kaboraoan maiuna ma ana reirei Iesu aika raraoi.

E kaotaki aei n te bwai are e riki nakoia Kristian ake rimoa. A ‘weteaki taan tuatua, ao a kataereaki, ao a tuangaki ba a na aki reirei n aran Iesu, ao a kanakoaki,’ irouia kaain te Tanirim, ae aia boowi ae rietata Iutaia. Tera aroia taan tuatua iai? “Ao uakekei, a nako mai matan te Tanirim, ni kimareirei ngke a atongaki ba a riai ni kamaamaaeaki i bukin te Ara arei. Ao a aki toki n reirei, ma n atoatonga Iesu ba te Kristo n te bong ae koraki n te maneaba, ao n aia auti.”​—Mwakuri 5:40-​42; 13:50-​52.

E anga naba te kamataata i aon aei te abotoro Betero n aron irekereken te kakanikoaki ma te kakukurei. E korea ae kangai: “Ngkana kam taetaebuakaki i bukin arani Kristo, ao kam a kabaia [“kukurei,” NW]; ba E mena i aomi Tamnein te neboaki ma Tamnein te Atua.” (1 Betero 4:14) Eng, e karekea te kakukurei ataakin ae e buokira taamnein te Atua, ngkana ti kaaitara ma karawawatara ibukin karaoan ae eti ngkai Kristian ngaira, e ngae ngkana karawawata aikai a kananokawaki. E kanga n irekereke taamnein te Atua ma te kakukurei?

Ana Mwakuri te Rabwata ke Uaan te Taamnei?

E mena taamnein te Atua tii i aoia te koraki ake a ira nanon te Atua ae te tia tautaeka. (Mwakuri 5:32) E aki anga taamneina Iehova nakoia te koraki ake a kaakaraoi “ana mwakuri nako te rabata.” Mwakuri akanne bon te “wene ni bure, te kamaira, te kaitaataan, te karea te boua, te tabunea, taian riribai, te kauntaeka, taian tauanen, taian un, taiani kakarabakau, taiani raure, taiani katei, taiani bakantang, te mamanging, taiani maie, ma baika aroni baikai naba.” (I-Karatia 5:19-​21) Te koaua bwa a rangi n nonoraki “ana mwakuri nako te rabata” ni boong aikai. Ma e ngae n anne, ao te koraki ake a kaakaraoi mwakuri aikai, a aki kona ni karekea te kakukurei ni koaua ae akea tokina. Kaakaraoan bwaai aikai e uruaki iai aia itoman aika raoiroi ma kaain aia utu ao raoraoia. Irarikin naba anne, e taekinaki n ana Taeka te Atua bwa “a aki kona ni karekea uean te Atua akana karaoi baikai.”

Ni kaitaraan aei, e anga taamneina te Atua nakoia te koraki ake a karikirakea “uaan te Taamnei.” Uaan te taamnei aikai bon “te tangira, te kimareirei, te rau, te taotaonaki n nano, te atataiaomata, te raoiroi, te kakaonimaki, te nimamanei, te tau-baang.” (I-Karatia 5:22, 23) Ngkana ti karikirakei aroaro aikai, ti karekea iai ngkanne te iraorao ae rau ma aomata ao te Atua, ao baikai a karika te kakukurei ni koaua. (Nora te bwaoki.) Ma ae kakawaki riki, ti boni kakukureia Iehova ngkana ti kaotiota te tangira, te atataiaomata, te raoiroi ao aroaro riki tabeua aika reke mairoun te Atua ao ti na karekea naba te kaantaninga ae raoiroi ibukin te maiu n aki toki n ana aonnaba te Atua ae boou ae na mena iai te raoiroi.

Rinea te Kakukurei

Ngke a moana aia reirei n te Baibara ma nanoia ni koaua taangan Wolfgang ao Brigitte aika a mena n te aba ae Tiaman, ao a boni mwaiti irouia kaubwaia, ake a taku aomata bwa a kainnanoaki ibukin karekean te kukurei. Bon taanga n ataei naakai ao a rangi n marurung raoi. A kunnikainia ni kunnikai aika bobuaka, a maeka n te auti ae moan te tamaroa, ao iai aia bitineti ae bubura. A kabanei angiin aia tai ni kakaaea kaubwain te maiu aei aika bati riki, ma bon akea te kakukurei ni koaua ae reke mai iai. Ma tabeua te tai imwina, a motinnanoia Wofgang ao Brigitte bwa a nang rinea te bwai teuana ae kakawaki. A moanna ni kabanei riki aia tai ao korakoraia i aoni bwaai n taamnei ao ni kakaaei aanga aika a na kona ni kaaniaki riki iai ma Iehova. A kairaki man aia motinnano aei bwa a na biti aroaroia n te tai ae waekoa, ike a nora iai riain kabebetean riki maiuiia ao e a reke aia iango bwa a na karaoa te mwakuri ni bwaiania, are a kabwanina aia tai n tataekina euangkerion te Tautaeka n Uea. Ni boong aikai, a a mwakuri te taanga aei n aki kabooaki ni mwaangan te aobiti n tararua ibukia Ana tia Kakoaua Iehova i Tiaman. Irarikin naba anne, a reirei te taetae n Atia teuana, bwa a aonga ni kona ni buokia ianena bwa a na reiakina te koaua ae mena n ana Taeka te Atua, ae te Baibara.

Te koaua bwa e reke irouia te taanga aei te kakukurei ni koaua? E taku Wolfgang: “Ni moa man te tai are ti a moanna n tabeakin riki bwaai n taamnei, ti a rangi ni kukurei riki ao ti a namakina te raunnano ae bati. E a tia naba ni kakorakoraa ara itoman n ara mare te beku iroun Iehova ma nanora ni koaua. Ti boni kukurei naba n ara mare mai mwaina, ma iai katabeara ao bwaai aika ti tangiri ake a kairira nakon tiia aika kaokoro, ma ngkai ti a katiteuanaki nakon te tia ae tii teuana.”

Tera ae Kona ni Karekea te Kukurei?

N taeka aika kimototo: Kararoaa “ana makuri nako te rabata” ao karikirakea ‘uaan taamnein te Atua.’ Ibukin karekean te kukurei, e riai te aomata n ingainga nanona ni kani karekea te iraorao ae kaan ma te Atua. E botau te aomata ae kakorakoraa ni karekea aei irouna, ma ana kabwarabwara Iesu ibukin te aomata ae kukurei.

Mangaia are tai taku bwa e aki kona n reke iroum te kakukurei. E koaua bwa tao ngkai ko kona n namakina te aki marurung raoi, ke e kona naba n iai am kangaanga ma raom ni mare. Tao akea natim ao e a bwaka nako am tai ni kariki, ke tao ko bon tabe naba ngkai ni korakai ni kakaaea nakoam ae bubura. Tao e aki kona n on am bwauti ni mwane n aron are mai mwaina. Ma e ngae n anne, tai kabwaraa nanom, bon akea bukina ae riai bwa ko na bwarannano! A na bane ni katokaki kangaanga aikai n ana Tautaeka n Uea te Atua n ikotaki naba ma ake bubua ma bubua riki. Te koaua bwa n te tai ae waekoa ao e nang kakororaoa ana berita Iehova ae te Atua are e taekinna te tia areru ni kangai: “Bon te uea ae akea tokina ueam . . . Ko kaurea baim, ao Ko kabaneia akana maiu ni kanuaiia n te bwai ae a tangiria.” (Taian Areru 145:13, 16) Mirion ma mirion mwaitiia ana toro Iehova ni katobibia te aonnaba ni boong aikai, a boni kakoaua bwa uringan ana berita Iehova ae karaunano aei e kona ni buoka aron karekean te kakukurei ae bati iroum ngkai.​—Te Kaotioti 21:3.

[Kabwarabwara ae nano]

[Te Bwaoki/Taamnei n iteraniba 6]

Bwaai Aika Karekea te Kakukurei

Te tangira e kairiia aomata bwa a na kabooa am tangira n te tangira.

Te kimwareirei e anganiko te korakora ni kaaitarai kangaanga.

Te rau e buoka kararoaan rikin te kauntaeka n am iraorao.

Te taotaonakinnano e kateimatoaa kukureim, e ngae ngkana ko a kaaitara ma kataaki.

Te akoi e kairiia aomata bwa a na kaaniko.

Te raoiroi ae ko kaotiotia e na kairiia aomata bwa a na manga kani buokiko ngkana iai am kangaanga.

Am onimaki e na kakoauaa nakoim bwa e tabe te Atua ni kairiko n te tangira.

Te nimamannei e na karaua nanom, am iango, ao ai rabwatam.

Te taubaang e na kauarerekei mwaitin am kairua.

[Taamnei n iteraniba 7]

Ngkana ko kani kukurei, ko riai ni karekei baika ko kainnanoi ibukin am onimaki