Kamaiuaki Tiaki Man Te Mwakuri N Tii Ngaia, Ma Man Ana Akoi Te Atua
“Kam kamaiuaki . . . i bukin te onimaki; . . . ao kam aki kamaiuaki n taiani makuri, ba e kawa ni kamoamoaa temanna.”—I-EBETO 2:8, 9.
1. A kanga Kristian ni kaokoro ma aomata nako ni kaineti ma baika a karaoi, ao bukin tera?
A KAINIKATONGA aomata ni boong aikai ibukin baika a boni karaoi n oin korakoraia, ao a kona naba ni waekoa ni kamoamoaia iai. Ma a kaokoro ma anne Kristian. A aki moanibwaia kaatuuan taekan baika a a tia ni karaoi i bon ibukiia, ao baika a karaoi ibukin te taromauri ae koaua. E ngae ngke a kimwareirei ni baika a karaoaki irouia ana aomata te Atua, ma a aki kamoamoai mwakuri ake a karaoi ngaiia n tatabemania nako. A kakoauaa bwa ni kaineti ma ana mwakuri Iehova, e aki kakawaki taekan mwakuri ake a karaoi aomata n tatabemania nako, ma e kakawaki riki karaoan ana mwakuri te Atua ma te nano ae riai. Te aomata are e nang anganaki te bwaintangira ae te maiu are aki toki, e na karekea anne tiaki man ana mwakuri, ma rinanon ana onimaki, ao man ana akoi te Atua.—Ruka 17:10; Ioane 3:16.
2, 3. Tera ae e kamoamoa iai Bauro ao bukin tera?
2 E ataa raoi te itera aei te abotoro Bauro. Ngke e a tia n tataro tenua te tai ibukin kabebetean nanona man ‘te bwai ni kateketeke n irikona’ ao e kaekaki iroun Iehova ni kangai: “E a tau au akoi i roum: ba e kakoroaki raoi mwakau n te mamara.” E nanorinano Bauro ni butimwaea ana moti Iehova ao e taku: “Ma ngaia ae moan te kukurei ngai ni kamoamoaai ni mamarau, ba e aonga ni memena mwakani Kristo i aou.” Nanorinanon Bauro bon te bwai ae ti riai ni kakairi iai.—2 I-Korinto 12:7-9.
3 E ngae ngke e rianako aron Bauro ni karaoi mwakuri ni Kristian, ma e ataia bwa e aki roko n tiia akanne n oin korakorana. E korea ae kangai ma te nanorinano: “I anganaki, ngai ae moan te mangori i buakoia ake a itiaki ni kabaneia, te akoaki aei, ae te tataekinna nakoia Tientaire bwaikorakini Kristo, ae aki konaki n ataki raoi.” (I-Ebeto 3:8) Akea te nano ni kainikatonga irouna ke ni kamoaa i bon irouna. “E rawa te Atua nakoia akana kainikatonga, ma E angania akana nanorinano te akoaki.” (Iakobo 4:6; 1 Betero 5:5) Ti kakairi n ana katoto Bauro, n nanorinano n iangoira bwa ti rinano riki nakoia tarira aika mangori?
“Atongia Raomi ba Aongkoa A Raoiroi Riki Nako Imi”
4. Bukin tera bwa e kona ni kangaanga iroura n tabetai bwa ti na iangoia tabemwaang bwa a raoiroi riki nakoira?
4 E reireinia Kristian te abotoro Bauro ni kangai: “Tai karaoa te bwai teuana ni kakarabakau ma ni kainikatonga, ma kam na nanorinano n atongia raomi ba aongkoa a raoiroi riki nako imi.” (I-Biribi 2:3) E kona ni kangaanga aei nakoira, ao riki ngkana iai mwiokoara. Tao e kona ni kangaanga bwainan te nanorinano ibukina bwa ti a tia n rotaki buaka n te nano ni kaiangatoa, are e taabangaki n te aonnaba ni boong aikai. Tao ngke ti ataei, ti reireiaki bwa ti na kaiangatoa, tao ma tarira ke mwanera ni mwengara, ke raora n reirei. Tao ti teimatoa ni kaungaaki bwa ti na karekea tiara ae te riki bwa te tia takaakaro ae tanoata taekana n te reirei ke ni momoanna n te reirei. Ni koauana, e tamaroa kabanean ara konaa ni mwakuri nako aika ti karaoi. Ma a aki riai Kristian ni karaoa anne ibukin te kan atongaki, ma ibukin kabwaiam iai ao tao ibukin kabwaiaia naba tabemwaang. Ma e kona ni karuanikai te kani kamoamoaki bwa te boto ngkoe. N te aro raa?
5. Ngkana e aki taobaraaki te nano ni kaiangatoa, tera ae e kona ni kauekea?
5 Ngkana e aki taobaraaki te nano ni kaiangatoa, ao e kona ni kaira te aomata bwa e na aki karinerine ao ni kainikatonga. E kona ni bakantang n aia konabwai tabemwaang ao ni mwiokoaia ake a anganaki. E taku Taeka N Rabakau 28:22 (BK): “E kani waetata ni kaubai te aomata ae e kanibaibai, ao e aki ataia ba e nangi bakaria te rongo.” E kona ni kainikatonga ni kan uaiakin mwioko aika e aki katauaki nako iai. Ibukin karekean angana iai, e kona ni moanna ni ngurengure ao ni kabuakakaia tabemwaang, ae te nano ae a aki riai ni karaoia Kristian. (Iakobo 3:14-16) N aki ongeia bwa tera aia iango iai tabemwaang, e a moanna ni karikirakea te anua ae karuanikai are ai ngaia naba n taai nako.
6. E a kanga ni kauringira te Baibara ibukin te nano ni kaiangatoa?
6 Ma e kaumakiia Kristian te Baibara ni kangai: “Ti na tai riki ni kainikatonga, ti na tai i babakantang.” (I-Karatia 5:26) E taekina raona ni Kristian Ioane, are e a tia ni mwane n te aeka n aroaro aei ngke e taku: “I koroboki teutana nakon te ekaretia: ma Rioterebe are kani kakanato i buakoia, e rawa ni kakoaua nakoau. Ma ngaia aei, ngkana tao I roko i roumi, ao I a kauring ana makuri ake e karaoi ni wibuakaira n taeka aika bubuaka.” Ai kananokawaki ra ngkana e mwane n te aeka n aroaro anne te Kristian!—3 Ioane 9, 10.
7. Tera ae e na tangiria ni kararoaa te Kristian, n ana mwakuri ni kareke-tianti, kioina ngkai e a korakora te kaiangatoa?
7 Ni koauana, e aki koaua bwa ti na iangoa ae e kona te Kristian ni kararoaa ni kabane te nano ni kaiangatoa ni bwaai nako. N te katoto, n ana mwakuri ni kareketianti, e kona iai ni kaiangatoa ma tabeman ke botaki ni bitineti tabeua, aika e tiiteboo ana waaki ni karaobwai ke ni mwakuri ma aia waaki. Ma ni waaki aikai, e riai naba te Kristian ni karaoa ana bitineti ma te nano ni karinerine, te tangira, ao n tabeakinia aomata. E na rawa nakon waaki aika aki-eti i aan te tua ke a aki boraoi ma te waaki ni Kristian. E na rawa n riki bwa te aomata ae e tanoata ibukin nanona ni kani kakaiangatoa, ae te nano ae e tii tabeakinna i bon irouna. E na aki iangoia bwa e rangi ni kakawaki ni maiuna bwa e na riki bwa te boto n taai nako ni baike e karaoi. Ngkana e koaua anne ni kaineti ma mwakuri ni kareke-tianti, e na mwaitira riki ngkanne kakawakina ni kaineti ma te taromauri ni koaua!
“Tiaki n te Kabotaua ma Temanna”
8, 9. (a) Bukin tera bwa akea bukina ae a na kaiangatoa i marenaia unimwaanen te ekaretia? (b) Bukin tera bwa e kaineti te 1 Betero 4:10 nakoia ana toro ni kabane te Atua?
8 Aroaroia Kristian ni kaineti ma aia taromauri, e taekinaki n taeka aika kairaki koreaia aikai: “A na kata oin aia makuri aomata n tatabemania nako ba e uara, ao ane e reke iroun te aomata kamoamoana n are bon oin ana bwai, ao tiaki n te kabotaua ma temanna.” (I-Karatia 6:4) Unimwaanen te ekaretia, a ataia ae a aki riai ni kaiangatoa i marenaia, ai ngaia are a kaai ni mwakuri i marenaia kaanga aron te rabwata ae tii teuana. A kimwareirei n ana boutoka raoia are e kona ni karaoia ibukin mweeraoin te ekaretia. A rawa ni kaiangatoa, ae te nano ae urubwai, ma a katea te banna ni katoto ae tamaroa ibukin te katiteuanaki, ae a kona ni kakairi iai kaain te ekaretia.
9 Ibukin roroia, maanin aia tai ni beku, ke aia konabwai, tabeman unimwaanen te ekaretia a kona n rabakau riki ni babaire nakoia ake tabeman, ke a kona n ataibwai riki. Ibukin anne, a kakaokoro mwiokoaia unimwaane i nanon ana botaki Iehova. N onean mwin are a na kakabotauia ma ake tabeman, ao a ururinga te reirei aei: “Bwaai n tituaraoi aika kam anganaki, kam na manga angania raomi nako n akoiia iai, n ai aroia touati aika raoiroi aika ana touati ana akoi te Atua.” (1 Betero 4:10) Ni koauana, e kaineti te kibu aei nakoia ana toro ni kabane Iehova, bwa a bane n reke tibwangaia n te bwai n tituaraoi ae te atatai ae eti, ao a bane ni kona ni karaoa te mwakuri ni minita ni Kristian.
10. E na butimwaeaki ara beku ni karaoa nanon te Atua, tii ngkana e aanaki ara mwakuri i aon tera?
10 Ara beku boni kakukureian Iehova, ao e riki anne tii ngkana ti karaoia ma te tangira ao te nano ni koaua, tiaki ibukin kani karietatakira nakoia ake tabeman. Mangaia are e kakawaki bwainakin te kaantaninga ae riai n ara mwakuri ni boutokaa te taromauri ni koaua. E ngae ngkai akea temanna ae e kona raoi n ataa ana iango temanna ma temanna, ma “e atai nano ni kabane” Iehova. (Taeka N Rabakau 24:12, BK; 1 Tamuera 16:7) Mangaia are e raoiroi bwa ti na aki toki n titirakinira ni kangai: ‘Tera ae e aana nanou ni karaoan te mwakuri ibukin Iehova?’—Taian Areru 24:3, 4; Mataio 5:8.
Te Kaantaninga ae Riai Ibukin Ara Mwakuri
11. Baikara titiraki ni kaineti ma ara mwakuri ni minita aika kona naba n iangoaki ngkai?
11 Ngkana e kakawaki riki te nano ae aana te mwakuri ae karaoaki, ni kaineti ma karekean akoara mairoun Iehova, ti riai ngkanne n tabe ma karaoan mwakuri aika irekereke ma te onimaki ke e kanga? Ngkana ti karaoa ara mwakuri ni minita ma te nano ae eti, e riai ngkanne bwa ti na tau mwin baika ti karaoi ke mwaitin ae ti karaoia? Aikai bon titiraki aika riai, kioina ngke ti aki tangiria ni moanibwai waare nakon mwakuri aika irekereke ma te onimaki ke ni karika te ribooti ae raoiroi bwa te bwai ae kakawaki riki n ara mwakuri ni Kristian.
12, 13. (a) Baikara bukina tabeua ngkai ti kawakin mwin ara mwakuri n uarongorongo? (b) Baikara bukin kimwareireira ngkana ti nora te ikota ni ware n te ribooti ibukin ara mwakuri n uarongorongo?
12 Noria bwa tera ae e taekinna te boki ae Organized to Do Jehovah’s Will: “Taan rimwin ngkoa Iesu Kristo, a tabeakin ribooti aika kaineti ma waakin te mwakuri n uarongorongo. (Mareko 6:30) E taekinaki ni bokin te Baibara ae Mwakuri, taekaia taan rimwin Kristo aika 120 mwaitiia, ake a bobotaki ngke e kabwaroaki te taamnei ae raoiroi i aoia n tain te Bentekota. E waekoa n rikirake mwaitiia taan rimwin Iesu nakon 3,000 ao imwina 5,000. . . . (Mwakuri 1:15; 2:5-11, 41, 47; 4:4; 6:7) Ai unga ra nanoia taan rimwin Kristo ngke a ongo rongorongon te rikirake aei!” Ibukin naba anne, a botumwaaka Ana tia Kakoaua Iehova ni boong aikai, ni kawakina mwin te mwakuri ni katobibia te aonnaba, are a a tia ni karaoia ni kakoroan nanon ana taeka Iesu aikai: “Ane e na tataekinaki euangkerion uean te Atua aei i aonaba ni bane ba te bwai ni kaotioti nakoia botanaomata ni kabaneia; ao ngkanne e na roko naba iai te toki.” (Mataio 24:14) Ribooti aikai, a kaota raoi aron waakin te mwakuri ni katobibia te aonnaba. A katereterei taabo aika kainnanoa riki te ibuobuoki, ao baikara booki aika kainnanoaki ibukin karikirakean te mwakuri n uarongorongo, ao mwaitira ae kainnanoaki.
13 Mangaia are ribootinakin mwin ara mwakuri n uarongorongo, e buokira bwa ti na karaoa mwiokoara ae tataekinan te rongorongo ae raoiroi ibukin te Tautaeka n Uea n te aro ae uaana. Irarikin anne, tiaki te koaua bwa ti kaungaki ngkana ti ongo taekan te mwakuri ae a tabe ni karaoia tarira n iteran nako te aonnaba? Rongorongon te rikirake ao kabutaan te aonnaba n te rongorongo, e kakimwareireira ao e kairira bwa ti na kabatiaa riki ara mwakuri, ma ni karau nanora ae e na kakabwaiaira Iehova. Ao ai kakaitau ra ngaira n ataakin ae ara ribooti e mena naba i buakon te ribooti ibukin te mwakuri ni katobibia te aonnaba! E uarereke mwaitin ara mwakuri ni kabotauaki ma te ikota ni ware ni katobibia te aonnaba, ma e bon noraki naba anne iroun Iehova. (Mareko 12:42, 43) Uringnga bwa n akean am ribooti, e na aki tabwanin te ikota ni ware ibukin te ribooti.
14. Irarikin te uarongorongo ao te angareirei, tera riki ae e irekereke ma taromauriakin Iehova?
14 Ni koauana, a aki oti angiin baike e karaoi te tia Kakoaua ae e a tia ni katabua maiuna, n ana beku ibukin Iehova. N te katoto, e aki kaotaki taekan ana katoatai n ukeuke n reirei n te Baibara i bon irouna, rokona ni bobotaki ni Kristian ao ana tai ni kaekaeka iai, mwiokoana n te ekaretia ae e karaoi, ana ibuobuoki nakoia tarina n onimaki aika kainnanoa buokaia, ana boutoka te mwane nakon te mwakuri ibukin te Tautaeka n Uea ni katobibia te aonnaba, ao a a bati riki. E ngae ngkai e manena ara ribooti ibukin te mwakuri n uarongorongo, bwa e buokira ni kateimatoaa ingaingan nanora ao e kakorakoraira ni mwakuri, ma ti riai naba n iangoia n te aro ae riai. E aki riai n iangoaki bwa aongkoa te beeba ni kariaia ke te bwatiboti n taamnei ae e na katauira nakon te maiu are aki toki.
“Kani Karaoi Makuri Aika Raraoi”
15. E ngae ngke ti aki kona ni kamaiuaki n taiani mwakuri n tii ngaai, ma bukin tera bwa a kakawaki?
15 E teretere bwa e ngae ngke ti aki kona ni kamaiuaki n taiani mwakuri n tii ngaai, ma a boni kakawaki naba. Anne bukina ae a aranaki iai Kristian bwa “ana botanaomata, aika bati ni kani karaoi makuri aika raraoi,” ao bukina naba ngkai a kaungaki bwa a na ‘iangoi aroia ni keiakinia ni karika te tangira ma mwakuri aika raraoi.’ (Tito 2:14; Ebera 10:24) Ni katuruturuan riki anne, e taekina aei te tia korea te Baibara temanna riki ae Iakobo: “Aron te rabata ba e mate ngkana akea tamneina, ao ai aron naba te onimaki ba e mate ngkana akea ana makuri.”—Iakobo 2:26.
16. Tera ae kakawaki riki nakon taiani mwakuri, ma tera ae ti riai n tarataraira iai?
16 E ngae ngkai a kakawaki mwakuri aika raraoi, ma a kakawaki riki naano aika aana karaoan mwakuri aikai. Mangaia are e kakawaki ibukira bwa ti na tuoi nanora n taai tabetai. Kioina ngke akea te aomata ae e kona raoi n atai nanoia aomata, ma ti riai n tarataraira man motikan taekaia aomata. “Antai ngkoe ae ko kabuakaka ana toro te aomata temanna?” Ti titirakinaki anne ao aei kaekana: “E tei iroun oin ana toka, ao e bwaka i rouna.” (I-Rom 14:4) Iehova ae ara Mataniwi, ao ana tia moti are Kristo Iesu, a na motiki taekara tiaki tii n ara mwakuri, ma ibukin naba nanora ake aana karaoan ara mwakuri, ara tai ake ti kamanenai, ara tangira, ao aron ara taromauri. Tii Iehova ao Kristo Iesu ae a kona raoi ni motikia bwa ti karaoi baike a kaumakaki Kristian bwa a na karaoi ke e kanga, n aron ana taeka te abotoro Bauro aikai: “Kakorakorako ni kani kaotiko nakon te Atua ba ko ataki ba ko raoiroi ngkai ko a tia ni kataki, ae te tia makuri ae ko aki riai ni maamaa, ae ko bairea raoi taekan te koaua.”—2 Timoteo 2:15; 2 Betero 1:10; 3:14.
17. Bukin tera bwa ti riai n ururinga Iakobo 3:17, ngkai ti kataia ni karaoa ara kabanea ni konaa?
17 E aki kaantaningai baika riaon ae riai Iehova mairoura. Ni kaineti ma Iakobo 3:17, ao e taekinaki “te wanawana are mai eta” bwa “e nanoanga [“karaoa ae riai,” NW].” Tiaki te koaua bwa ti na wanawana ma ni kona ni karaoi mwakuri aika raraoi ni koaua, ngkana ti katotonga aroaron te Atua? Mangaia are ti aki riai ni katei tiia aika aki-riai ao aika aki kona ni karekeaki iroura ao irouia naba tarira.
18. Tera ae ti kona ni kakaantaningaia ngkana ti na bwaina te kaantaninga ae riai ibukin ara mwakuri ao ana akoi Iehova?
18 Ngkana ti teimatoa ni kawakina te kaantaninga ae riai ni kaineti ma ara beku ibukin Iehova ma ana akoi, ao ti na kateimatoaa te kimwareirei, are kanikinaeaia ana toro ni koaua Iehova. (Itaia 65:13, 14) Ti kona ni kimwareirei n taiani kakabwaia ake e karokoi Iehova nakoia ana aomata ni kabane, n aki ongeia bwa mwaiti raa ae ti kona ni karaoia. Te teimatoa n “tataro ma te bubuti ma te katituaraoi,” ti onnonia iai te Atua bwa e na buokira ni karaoan ara kabanea ni konaa. N akea te nanokokoraki, “te rau are mairoun te Atua, are te rau are aki konaki n ataki teutana, e na kawakin nanomi ao aia iango nanomi i nanoni Kristo Iesu.” (I-Biribi 4:4-7) Eng, ti kona ni karekea te kabebeteaki ao te kaunganano man ataakin ae ti kona ni kamaiuaki tiaki n tii taiani mwakuri ma rinanon naba ana akoi Iehova!
Ko Kona ni Kabwarabwaraa Bwa Bukin Tera Ngkai Kristian
• a rawa ni kamoamoaia ibukin mwakuri ake a karaoi?
• a rawa ni kaota te nano ni kaiangatoa?
• a ribootina mwin aia mwakuri ni minita ni Kristian?
• a rawa ni motika taekaia raoia ni Kristian?
[Taamnei n iteraniba 29]
“E a tau au akoi i roum”
[Taamnei n iteraniba 31]
A kimwareirei unimwaane n ana boutoka raoia are e kona ni karaoia ibukin mweeraoin te ekaretia