Kabutaanako te Rongorongo ae Raoiroi ae Taekan te Akoi ae Rianako

1, 2. E kangaa ni kaotia te abotoro Bauro bwa e kakaitau n ana akoi ae rianako te Atua?

E BONI kona te abotoro Bauro n taekina aei: “E aki matebuaka ana akoi ae rianako te Atua nakoiu.” (Wareka 1 I-Korinto 15:9, 10.) E ataia raoi Bauro bwa e aki mwakuria ao e aki naba tau ni karekea ana nanoanga ae korakora te Atua, ngkai bon te tia bwainikirinia Kristian rimoa ngaia.

² Ngke e a uakaan tokini maiuni Bauro, e korea ae kangai nakon raona ni mwakuri ae Timoteo: “I kaitau nakoni Kristo Iesu ae ara Uea, are e kakorakoraai ibukina bwa e aranai bwa I kakaonimaki, ngkai e mwiokoai n te mwakuri ni minita.” (1Tim. 1:​12-​14) Tera te mwakuri ni minita anne? E tuangia Bauro unimwaane n te ekaretia i Ebeto te bae irekereke iai ni kangai: “I kakeaa bongani maiuu bwa I aonga ni katiaa mwiokoau ma te mwakuri ni minita are I karekea mairoun te Uea ae Iesu, bwa N na kakororaoa kaotiotan te rongorongo ae raoiroi ae taekan ana akoi ae rianako te Atua.”​—Mwa. 20:24.

3. Tera te mwakuri ni minita ae okoro are e anganaki Bauro? (Nora te taamnei ni moan te kaongora aei.)

³ Tera te “rongorongo ae raoiroi” are e tataekinna Bauro ae katuruturuaki iai ana akoi ae rianako Iehova? E tuangia Kristian ake i Ebeto ni kangai: “Kam a bon tia n ongo taekan te mwioko ae I anganaki ni kaineti ma ana akoi ae rianako te Atua ibukini kabwaiami.” (IEbe. 3:​1, 2) E a tia ni mwiokoaki Bauro bwa e na kabutaanako te rongorongo ae raoiroi nakoia aika tiaki I-Iutaia bwa a aonga ni mena naba i buakoia naake a weteaki bwa raoni Kristo n te Tautaeka n Uea Iroun te Mesia. (Wareka I-Ebeto 3:5-8.) Ibukin ingaingani Bauro n ana mwakuri ni minita, e a katea te katoto ae moan te tamaroa ibukia Kristian ni boong aikai, ike e a kaotia iai ae e aki “matebuaka” nakoina ana akoi ae rianako te Atua.

KO KAUNGAAKI N ANA AKOI AE RIANAKO TE ATUA?

4, 5. E aera bwa ti kona n taekinna ae te “rongorongo ae raoiroi ae taekan te Tautaeka n Uea” bon titeboo ma te rongorongo ae raoiroi ae taekan “ana akoi ae rianako te Atua”?

⁴ N tain te toki aei ao a a tia ni mwiokoaki ana aomata Iehova bwa a na tataekina “te rongorongo ae raoiroi aei ae taekan te Tautaeka n Uea, n te aonnaba ni kabutaa bwa te bwai ni kaotioti nakoia botannaomata ni kabane.” (Mat. 24:14) Te rongorongo naba ae ti tibwaia nako bon te “rongorongo ae raoiroi ae taekan ana akoi ae rianako te Atua,” ibukina bwa kakabwaia ni kabane ake ti kantaningai rekeia i aan ana kairiri te Tautaeka n Uea, a roko iroura rinanon ana akoi Iehova ae kaotaki rinanoni Kristo. (IEbe. 1:3) Ti kakairi ngaira n tatabemanira nako irouni Bauro ni kaota ara kakaitau ibukin ana akoi ae rianako Iehova, n arora n ingainga n uataboa te mwakuri ni minita?​—Wareka I-Rom 1:14-​16.

⁵ N te kaongora are imwaina ao ti reiakina iai arora ngaira aika taani bure ni kakabwaiaaki n aanga aika bati man ana akoi ae rianako Iehova. Ngaia are ti riai ni karaoa ara kabanea ni konaa n taekina nakoia aomata aron Iehova ni kaota ana tangira, ao aroia ni kona ni kakabwaiaaki iai. Baikara aanga tabeua ake a kaotaki iai ana akoi ae rianako te Atua ake ti riai ni buokiia aomata ni kakaitau iai?

KABUTAANAKO TE RONGORONGO AE RAOIROI AE TAEKAN TE KAREA NI KABOOMWI

6, 7. Ti kangaa ni kabutaanako te rongorongo ae raoiroi ae taekan ana akoi ae rianako te Atua ngkana ti kabwarabwaraa te kaboomwi nakoia aomata?

⁶ Ni boong aikai, a bati aika aki uringaaba ngkana a bure, ngaia are a aki ota bwa e aera ngkai e kainnanoaki te kaboomwi. Ma a ririkirake mwaitiia aomata aika ataia bwa akea kukureia ni koaua ae reke man aroaroni maiuia. Imwini maroroia ma Ana Tia Kakoaua Iehova, a bati aika a tibwa ataia bwa tera te bure, tera aron rotakira iai, ao tera ae ti kainnanoia ibukini kainaomataara man te tautoronaki n te bure. A kabebeteaki aomata aika raoiroi nanoia n ataakin ae ibukin ana tangira ae korakora Iehova ao ana akoi ae rianako, e a kanakoa Natina nako aon te aba ibukini kainaomataara man te bure ao mwina ae te mate.​—1Ioa. 4:​9, 10.

⁷ E korea ae kangai Bauro ngke e taekina Natin Iehova ae tangiria: “Ibukin teuaei [Iesu] ao e a reke iroura te kainaomataaki n te kaboomwi rinanon raraana, eng, ae kabwaraan ara bure ni kaineti ma korakoran ana akoi ae rianako te Atua.” (IEbe. 1:7) Ana karea ni kaboomwi Kristo bon te bwai ni kakoaua ae moan te tamaroa ibukin tangirara iroun te Atua ao kaotani korakoran Ana akoi ae rianako. Ai karaunanora ataakin ae ngkana ti onimakina raraan Iesu ae kawawaeaki, a na kabwaraaki ara bure ao ni kaitiakaki mataniwin nanora! (Ebera 9:​14) Bon aei te rongorongo ae raoiroi ae ti riai n tibwaia nakoia aomata!

BUOKIIA AOMATA NI KAREKEA AIA IRAORAO MA TE ATUA

8. E aera bwa a kainnanoa raoiakinaia ma te Atua aomata aika bubure?

⁸ Bon tabera kaongoaia raora n aomata ae a kona ni karekea aia iraorao ae kaan ma aia tia Karikiriki. E iangoiia aomata te Atua bwa taani kairiribai nakoina imwain ae a kaota onimakinan ana karea Iesu. E korea aei te abotoro Ioane: “Ane e onimakina te Nati ao e a reke irouna te maiu are aki toki, ma ane e aki ira nanon te Nati, e na aki reke irouna te maiu ma e na memena i aona unin te Atua.” (Ioa. 3:36) E kakukurei bwa e karekea raoiakinara ma te Atua ana karea Kristo. E taku Bauro: “Kam a tia ngkoa n ianena ma te Atua ao kam kairiribai nakoina, ibukina bwa kam kaatuui ami iango i aoni mwakuri aika bubuaka. E a tia ngkai te Atua ni karekea te raoi rinanon rabwatan teuaei ni matena.”​—IKoro. 1:21, 22.

9, 10. (a) Tera te mwioko are e angania tarina aika kabiraki Kristo? (b) A kangaa “tiibu tabemwaang” ni buokiia tariia aika kabiraki?

⁹ E a tia Kristo n angania tarina aika kabiraki i aon te aba te baere e atongnga Bauro bwa “te mwakuri ae kaineti ma raoiakinaia aomata.” Ni kabwarabwaraan aei, e korea ae kangai Bauro nakoia Kristian aika kabiraki n te moan tienture: “Baikai ni kabane boni mairoun te Atua are raoiakinira nakoina rinanoni Kristo, ao e anganira te mwakuri ae kaineti ma raoiakinaia aomata, bwa e raoiakinia kaain te aonnaba te Atua nakoina rinanoni Kristo n aki taui mwin aia bure, ao e mwiokoira ni kaotiotan taekan te mwakuri n raoiakinia aomata. Mangaia ae taan tei ngaira ibukini Kristo, kaanga ai aron ae e wewete te Atua rinanora. Ao kioina ngkai taan tei ibukini Kristo ngaira, ti onnonia aomata ni kangai: ‘Kam na raoiakinaki ma te Atua.’ ”​—2Kor. 5:18-​20.

¹⁰ A iangoia “tiibu tabemwaang” bwa bon te kakabwaia nakoia buokaia tariia aika kabiraki n te mwakuri aei. (Ioa. 10:16) Ngkai a beku bwa taan tei ibukini Kristo, a a karaoa iteran te mwakuri n uarongorongo ae te kabanea ni bubura, ae reiakinaia aomata te koaua ao buokaia ni karekea aia iraorao ae kaan ma Iehova. Aio iteran te mwakuri ae kakawaki ni kakororaoan tataekinan te rongorongo ae raoiroi ae taekan ana akoi ae rianako te Atua.

TIBWAANAKO TE RONGORONGO AE RAOIROI AE E ONGORAEI TATARO TE ATUA

11, 12. E aera ngkai bon te rongorongo ae raoiroi nakoia aomata ataakin ae a kona n tataro nakon Iehova?

¹¹ A bati aika tataro ibukina bwa a karauaki nanoia iai, ma a aki kakoauaa raoi ae e ongoraei aia tataro te Atua. A riai n ataia ae Iehova bon “te tia Ongo te tataro.” E korea aei te tia areru ae Tawita: “Ngkoe ae te tia Ongo te tataro, a na kawariko aomata n aekaia nako. A a taonainako au kairua. Ma ko rabuni ara bure.”​—TaiAre. 65:2, 3.

¹² E taku Iesu nakoia taan rimwina: “Ngkana kam bubutii te bwai teuana n arau, ao N na karaoia.” (Ioa. 14:14) Nanon aei bwa ti kona n tataro ibukin “te bwai teuana” ae boraoi ma nanon Iehova. E karaui nanora Ioane ni kangai: “Ti aki nanokokoraki iroun te Atua n aei, bwa ngkana ti bubutiia te bwai teuana ae boraoi ma nanona ao e bon ongo iroura.” (1Ioa. 5:​14) Ai tamaroara reiakinaia aomata bwa a na ataia ae e kakawaki riki te tataro nakon ae tii karauan nanoia, ma bon te anga naba teuana ibukini kaanian ana “kaintokanuea [Iehova] are reke iai te akoi ae rianako”! (Ebera 4:16) Ngkana ti reireinia aroia n tataro ae eti, te Aomata ae a riai n tataro nakoina, ao baika a riai n tataroi, ti a kona iai ni buokiia bwa a na kaania Iehova ao ni kabebeteaki n taai ni karawawata.​—TaiAre. 4:1; 145:18.

TE AKOI AE RIANAKO N TE WAAKI AE BOOU

13, 14. (a) Baikara mwioko aika tamaroa ake a na reke irouia taani kabiraki n taai aika imwaira? (b) Tera aia mwakuri ae tamaroa taani kabiraki ae a na karaoia ibukia aomata?

¹³ E na kabatiaa riki kaotiotan ana akoi ae rianako Iehova n “rokon taiani waaki i aon te aba.” Ni kaineti ma te mwioko ae rianako are e a tia te Atua n angania naake 144,000, ake a weteaki bwa a na uea ma Kristo n ana Tautaeka n Uea ae bwaini karawa, e a korea aei Bauro: “Te Atua are moan te nanoanga, ibukin ana tangira ae korakora are e tangirira iai, e anganira te maiu ao e katiteuanaira ma te Kristo, e ngae ngke ti mate n ara bure​—n te akoi ae rianako are kam kamaiuaki iai. Ao e kautiira ao e katekatekaira ma Kristo Iesu i karawa kioina ngkai taan rimwina ngaira. Bwa n rokon taiani waaki i aon te aba, ao te Atua e nang kaota korakoran ana akoi ae rianako rinanon ana atataiaomata nakoira ngkai taan rimwini Kristo Iesu ngaira.”​—IEbe. 2:4-7.

¹⁴ E kangaanga otara ni baika rangi n tamaroa ake e katauraoi Iehova ibukia Kristian aika kabiraki ngkana a tekateka i aoni kaintokanuea ao n tautaeka ma Kristo i karawa. (Ruka 22:28-​30; IBir. 3:20, 21; 1Ioa. 3:2) Ao Iehova e nang “kaota korakoran ana akoi ae rianako” riki nakoia. A na riki bwa “te Ierutarem ae Boou,” ae te tia mare te aine ae buuni Kristo. (TeKao. 3:12; 17:14; 21:2, 9, 10) A na kaai ni mwakuri ma Iesu ni ‘bwainnaorakia natannaomata,’ ni kairiia aika ongeaba bwa a na kainaomataaki mani karawawatan te bure ao te mate, ao ni kairiia nakon te kororaoi.​—Wareka Te Kaotioti 22:1, 2, 17.

15, 16. E na kangaa Iehova ni kaota ana akoi ae rianako nakoia “tiibu tabemwaang” n taai aika imwaira?

¹⁵ N I-Ebeto 2:7, ti wareka iai ae e na kaotiota ana akoi ae rianako te Atua n “rokon taiani waaki i aon te aba.” N te tai anne, a nangi bane aomata i aon te aba n nora “korakoran ana akoi ae rianako.” (Ruka 18:29, 30) Te anga teuana naba ae moan te kakawaki ae e na kaotaki iai i aon te aba ana akoi ae moan te kamimi Iehova, boni kautakia aomata man “te Ruanimate.” (Iobi 14:13-​15; Ioa. 5:28, 29) A na kautaki bwa a na waakinaanako aia beku ibukin Iehova mwaane ao aine ake a kakaonimaki rimoa ake a mate imwaini mateni Kristo bwa te karea, ao “tiibu tabemwaang” ake a kakaonimaki ao a mate i nanoni kabaneani boong.

¹⁶ A na kautaki naba mirion ma mirion aomata aika mate ao a aki ataa te Atua. A na anganaki aia tai n aantaeka nakon riaini mwaakan Iehova n tautaeka. E korea aei Ioane: “I noriia maate aika kakannato ao aika mangori, n tei i matan te kaintokanuea, ao a kaukaki nira ni boki. Ma e a manga kaukaki te nira ni boki riki teuana, ae te boki ni kamaiu. A motikaki taekaia maate mani baike a koreaki n taian nira ni boki ni kaineti ma aia mwakuri. Ao marawa, e anga maate ake i nanona, ao te mate ma te Ruanimate, a anga maate ake i nanoia, ao a motikaki taekaia n tatabemania nako ni kaineti ma aia mwakuri.” (TeKao. 20:12, 13) A riai naake a kautaki n reiakina aroia ni maiuakin ana boto n reirei te Atua aika n te Baibara. Irarikina, a riai n tou mwini kaetieti aika boou aika manena aika a na kaotaki n “nira ni boki,” aika koreaki iai ana tua Iehova ibukin te maiu n te waaki ae boou. Kaotani kanoan nira ni boki aikai bon te anga teuana riki ae kaotiotaki iai ana akoi ae rianako Iehova.

TEIMATOA NI KABUTAANAKO TE RONGORONGO AE RAOIROI

17. Tera ae ti riai n teimatoa n uringnga ngkana ti uarongorongo?

¹⁷ E a rangi ni kakawaki riki mwiokoara ae tataekinan te rongorongo ae raoiroi ae taekan te Tautaeka n Uea, ngkai e a kaan te toki! (Mareko 13:10) E boni katuruturuaki n te rongorongo ae raoiroi taekan ana akoi ae rianako Iehova. Ti riai n teimatoa n uringa aei ngkana ti uarongorongo. Tiara ngkana ti uarongorongo boni karinean Iehova. Ti kona ni karaoa aei ngkana ti kaotia nakoia aomata bwa berita nako ibukini kakabwaia n te waaki ae boou i aon te aba, boni kaotan ana akoi ae moan te tamaroa Iehova.

18, 19. Ti na kangaa ni kamoamoaa ana akoi ae rianako Iehova?

¹⁸ Ngkai ti uarongorongo nakoia aomata, ti kona ni kabwarabwaraa ae i aan ana Tautaeka n Uea Kristo, a na karekei kakabwaia ni kabane aomata man te kaboomwi ao n ririkirake ni kororaoi teutana imwin teutana. E taekinaki aei n te Baibara: “A na manga kainaomataaki baika karikaki man te tautoronaki i aan te mka, ma ni karekea te inaomata ae rianako arona ae reke irouia natin te Atua.” (IRom 8:21) E tii kona n reke aei rinanon ana akoi ae rianako Iehova.

¹⁹ Ti mwiokoaki bwa ti na kaongoia aomata nako ake a kan ongora, te berita ae kaingaingaa te nano ae n Te Kaotioti 21:4, 5 ae kangai: “E na kaoa te rannimata ni kabane mai mataia [te Atua], ao e nang akea riki te mate, ke te nanokawaki ke te tang ke te maraki. A a mauna bwaai rimoa.” Ao e taku Iehova are teuare tekateka i aon te kaintokanuea: “Noria! I a kabooui bwaai ni kabane.” E taku naba: “Korei, bwa a kakaonimaki taeka aikai ao a koaua.” Ngkana ti ingainga n tataekina te rongorongo ae raoiroi aei nakoia aomata, ti a kamoamoaa raoi iai ana akoi ae rianako Iehova!