E Bia Kaiririko “Tuan te Akoi”

E TAKU Lisa: “Te bwai ae rangi n ringaki riki nanou iai, bon aia akoi taari.”a E nanona neiei te bwai are e moan atikaki iai nanona nakon te koaua. Tii te arona naba ma Anne are kangai: “E rotaki riki nanou n aia akoi, nakon aia reirei.” A a uaia ni kukurei ni wareka te Baibara ngkai, taari aine aika uoman aikai, ao ni kananoa aia iango iai. Ma te bwai ae a rotaki riki iai bon te akoi.

Ti na kangaa ni kaotiota te akoi ae a na ringaki iai nanoia aomata aika i rarikira? Ti na maroroakin ngkai aanga aika uoua: n newera ao n ara mwakuri. Imwina, ti na maroroakina ae antai aika ti riai ni kaotiota te akoi nakoia.

E MENA “TUAN TE AKOI” I AON NEWEM

E kabwarabwaraaki te aine ae wanawana n Taeka N Rabakau mwakoro 31 bwa e mena “tuan te akoi” i aon newena. (TaeRab. 31:26) E kariaia neiei “te tua” aei bwa e na taua aroni bwanaana ao ana taetaenikawai. E riai naba n iai “te tua” aei i aon neweia kaaro. A a ataia angia kaaro bwa e na maraki natiia ngkana a taetae ma te iowawa, ao e na bae n aki kakauongo n te baere a taekinna. Ngkana a taetae kaaro ma te akoi, e na bebete riki irouia natiia bwa a na kakauongo ao n ongeaba.

E ngae ngkana te karo ngkoe ke tiaki, ma ko na kangaa n reireiniko te taetae ma te akoi? E kaekaaki anne ni moan iteran Taeka N Rabakau 31:26 ae kangai: “E kaurea wina ma te wanawana.” E irekereke anne ma rinean ara taeka ao tangini bwanaara n te aro ae wanawana. N angiin te tai, ti buokaki riki ngkana ti titirakinira ni kangai: ‘E na kauekea te un te bwai ae N nang taekinna, ke e na karekea te rau?’ (TaeRab. 15:1) Eng, ti wanawana ngkana ti iango moa imwain taetaera.

E kangai te taeka n rabakau riki teuana: “Te taetaenikawai ae aki iangoaki raoi kaanga ai aron te ewa n te kabaang.” (TaeRab. 12:18) Ngkana ti iaiangoa raoi aron rotakia tabemwaang n ara taetae ao n tangini bwanaara, ti na kaungaaki riki iai bwa ti na kanakoraoa ara taetaenikawai. Eng, ngkana ti maiuakina “tuan te akoi” ti na buokaki iai bwa ti na taubaang ni kaineti ma kamanenaan taeka aika kammaraki ao te bwanaa n ribuaka. (IEbe. 4:31, 32) Ti na boni kaaki iai iango aika bubuaka ao ni kamanenai taeka aika akoi, a tatangira, ao te bwanaa n akoi. E katea te katoto ni kaineti ma aei Iehova, ngke e karaua nanon ana toro ae maaku are Eria. E taetae n “te bwanaa ae maraara,” te anera are tei ibukin lehova. (1Uea. 19:12) Ma e bati riki ae kainnanoaki ni bwainan te akoi, nakon tii te taetae ma te akoi. Ti riai ni karaoi naba mwakuri n akoi. N te aro raa?

A KAUNGAAKI AOMATA N TE MWAKURI N AKOI

Ti kakairi iroun Iehova ngkana ti taetae ma te akoi ao ni karaoi naba mwakuri n akoi. (IEbe. 4:32; 5:1, 2) E kabwarabwaraa Lisa are taekinaki mai moa, te akoi are a kaotiotia taani Kakoaua ni kangai: “Ngke a kairoroaki kaain ara utu bwa a na waekoa ni mwaing i nanon te tai ae kimototo, a a bon anaa naba aia motirawa man aia mwakuri ni kareketianti, uataanga man te ekaretia, bwa a na buokira ni botuai ara bwai. N te tai anne, I bon tuai n reirei n te Baibara!” E boni kaungaaki Lisa n te mwakuri n akoi anne bwa e na nenera raoi te koaua.

E kakaitau naba Anne, are taekinaki mai moa, ibukin te akoi are a kaotiotia taani Kakoaua nakoina. Ibukina bwa e kakaraoaki ae aki riai nakon neiei, irouia aomata ake a aki beku ibukin Iehova, e a kangaanga irouna bwa e na onimakinia aomata. E taku: “E kangaanga irou kakoauaaia aomata.” E taku riki: “Ngke I a kaitiboo ma taani Kakoaua, I bon aki kakoauaia naba. I iango ao I taku, ‘E aera ngkai a tabeakinai?’ Ma ibukin ana akoi neiere e reirei ma ngai n te Baibara, I a kaungaaki bwa N na onimakinna.” Tera uaana? “Imwina riki, I a bon iaiangoi raoi baike I reiakin.”

Noria bwa e korakora ringan nanoia Lisa ma Anne, n te mwakuri n akoi mairouia kaain te ekaretia n tatabemania nako. Ao man te akoi anne, a a kan reiakina te koaua. Eng, e kaukaki nanoia n te akoi ae kaotiotaki n te ekaretia, ao a a onimakina Iehova ma ana aomata.

KAOTIOTA ANA AKOI TE ATUA NAKOIA TABEMWAANG

Tabeman, a kaungaaki bwa a na taetae ma te akoi ao n wingare, man aroia ni kaikawaaki. E raoiroi bwa iai tabeman aika kairaki bwa a na ataa te riai man aia katei ke bon anuaia. Ma ngkana ti kairaki ni karaoa anne tii man ara katei ao anuara, ti kona ngkanne n aki kaotiota ana akoi te Atua.—Kabotaua ma Mwakuri 28:2.

Ni koauana, ana akoi ae rianako te Atua bon uaan naba te taamnei ae raoiroi are mairoun te Atua. (IKar. 5:22, 23) Ngaia are e nanonaki n aei bwa ti kainnanoa taamnein te Atua bwa e na buokira, bwa ti aonga ni kona ni kaotiota te akoi ni koaua. Ni karaoan anne, ti a kakairi iai iroun Iehova ao Iesu. Ao ngkai Kristian ngaira, ti katotonga Iesu n tangiriia naba aomata. Ngaia are ti a kairaki bwa ti na karaoa anne man tangiran Iehova ae te Atua ao raora n aomata. E riai n riki ara mwakuri n akoi bwa te aroaro ae anainano ae nako mai nanora, ao anne ae e kukurei iai te Atua.

ANTAI AIKA TI RIAI NI KAOTIOTA TE AKOI NAKOIA?

E kona ni bebete kaotan te akoi nakoia naake a a tia ni kaota naba te akoi nakoira ke naake ti kinaia. (2Tam. 2:6) Te anga teuana iai, ti boni karabwaia. (IKoro. 3:15) Ma tera ae na riki ngkana ti namakinna bwa iai temanna ae aki riai ni kaotaki te akoi nakoina?

Iangoa aei: E katea te katoto ae rianako Iehova ngke e kaotiota te akoi ae rianako, ao e tuangira n ana Taeka taekan te reirei ae kakawaki ibukini kaotiotan te aroaro aei. Te taeka ae te “akoi ae rianako” e rangi ni bati kamanenaakina n te Koroboki ae Tabu n te Taetae ni Kuriiti. Tera aron te Atua ni kaotiota te akoi nakoira?

Iangoia mirion ma mirion aomata ake e a tia Iehova ni kaotiota te akoi nakoia, ngke e angania baika a kainnanoi ibukin teimatoani maiuia. (Mat. 5:45) Ni koauana, imwain ae ti ataa Iehova, e a boni kamani kaotiota te akoi nakoira. (IEbe. 2:4, 5, 8) N te katoto, e anga Natina ae ana rikitemanna ibukia aomata ni kabane. E koreia naba te abotoro Bauro bwa e katauraoa te kaboomwi Iehova “ni kaineti ma korakoran ana akoi ae rianako.” (IEbe. 1:7) Ma irarikina, e ngae ngke taani bure ngaira, ao ti kona ni kauna Iehova, ma e bon teimatoa naba ni kairirira ao n reireinira. Bon ai aron “te maatim ni karau,” ana kaetieti ao ana taeka. (TuaKau. 32:2) E boni kangaanga iroura kabooani mwin ana akoi ni kabane ake e kaotiotii nakoira. Ao ti ataia bwa ngkana e aki kaotiota te akoi nakoira Iehova, ti na bon aki karekea te kantaninga ibukin taai aika a na roko.—Kabotaua ma 1 Betero 1:13.

Akea te nanououa bwa e rangi n anainano ao ni kaunganano ana akoi Iehova. Ao ibukin anne, ti a aikoa beerinoa ae ti na kaota te akoi nakoina, ma ti a kakorakoraira ni kakairi iroun Iehova ni kaotiota te akoi nakoia aomata n taai nako. (1Tet. 5:15) Ngkana ti teimatoa ni kaotiota te akoi, ti a riki iai bwa kaanga te ai ae abue n te bong ae mwaitoro. Ti riki naba bwa taani kabebeteia ara utu, raora n taromauri, raora ni mwakuri, raora n reirei, ao raora n aomata.

Iangoia kaain am utu ke kaain te ekaretia ake a na kakabwaiaaki n am taeka, ao am mwakuri aika irianaki n te akoi. E boni bae n iai temanna n am ekaretia, ae kainnanoa riki buokana ni mwengana ao ana onnaroka, ke baika a kainnanoaki ni katoabong n aron te boobwai. Irarikin anne, ngkana ko kaitiboo ma temanna n am mwakuri ni minita ae kainnanoa buokana, ko kona ni buokia n aanga tabeua aika manena?

Ngkana ti na katotonga Iehova, a bia kairaki ara taeka ma ara mwakuri n “tuan te akoi.”