Kawakina Tangirami Iroun Te Atua!
“Ngkami aika tangiraki, . . . kawakiningkami n tangirami iroun te Atua, . . . ba e aonga n reke te maiu are aki toki.”—IUTA 20, 21.
1, 2. Ko na kanga ni kateimatoaa tangiram iroun te Atua?
E RANGI ni korakora tangiraia aomata iroun Iehova, ngaia are e a anga Natina ae ana rikitemanna bwa a aonga ni karekea te maiu ae aki toki, naake a onimakinna. (Ioane 3:16) Ai kamimira te aeka n tangira aei! Ngkana ana toro Iehova ngkoe, ko na boni kan tangiraki n aki toki.
2 E kaota te aro ae ko kona iai n teimatoa n tangiraki iroun te Atua, te tia rimwin Kristo ae Iuta ni korean ae kangai: “Kam na kateimatoaingkami n ami onimaki ae moan te raoiroi, ao kam na tataro iroun te Tamnei are Raoiroi, ao kam na kawakiningkami n tangirami iroun te Atua, ao kam na kaantaninga nanoangami iroun ara Uea are Iesu Kristo, ba e aonga n reke te maiu are aki toki.” (Iuta 20, 21) Reiakinan Ana Taeka te Atua ao te uarongorongo, a na buokiko ni karikirakea am “onimaki ae moan te raoiroi,” ae te reirei ni Kristian. Ibukin kateimatoaan tangiram iroun te Atua, ko riai n tataro iroun “te Tamnei are Raoiroi,” are nanona ko kairaki iai. Ko riai naba ni kaotiota onimakinan ana karea ni kaboomwi Iesu Kristo, bwa ko aonga ni kakabwaiaki n anganaki te maiu are aki toki.—1 Ioane 4:10.
3. E aera ngkai ai tiaki Ana Tia Kakoaua Iehova aomata tabeman?
3 A aikoa teimatoa n tangiraki ngkai iroun te Atua, tabeman ake a onimakinna ngkoa. Ibukina bwa a motikia n aia iango bwa a na ukoukora te aroaro ni maiu ae aki riai, ai tiaki ngkai Ana Tia Kakoaua Iehova ngaiia. Ko na kanga n totokoa rikin aei nakoim? Ko kona ni buokaki n rarawa ni bure ao n teimatoa n tangiraki iroun te Atua, ni kananoan am iango i aoni baika a oti i nano.
Kaotiota Tangiran te Atua
4. Tera aroni kakawakin te ongeaba nakon te Atua?
4 Kaota am tangira n ongeabam iroun te Atua. (Mataio 22:37) E korea ae kangai te abotoro Ioane: “Bon tangiran te Atua te baei, ae tauan ana tua i roura: ao a aki rawawata ana tua.” (1 Ioane 5:3) E kona ni kakorakorako te taneiai n ongeaba nakon te Atua bwa ko na rarawa nakon te kaririaki ao n anganiko te kimwareirei. E taku te tia areru: “E a kabaia te aomata ae aki nakonako n aia taeka akana buakaka, . . . Ma bon iai ana kimareirei n ana tua Iehova.”—Taian Areru 1:1, 2.
5. E na kairiko tangiran Iehova bwa ko na karaoa tera?
5 E na kairiko tangiran Iehova bwa ko na kararoako man karaoan te bure ae kakaiaki, are e na kona ni kabuakakaki iai arana. E tataro ni kangai Akura: “Tai anganai te aki-kaubwai, ao tai anganai te kaubwai; kakaamarakeai n te amarake ae I a tau iai: Ba I kawa n rauaki ma ni kaakeako, ma n taku, Ai antai Iehova? Ao tiaki, bwa I kawa n akea au bwai, ma n ira, ma n atonga aran Atuau ni bakanrereia.” (Taeka N Rabakau 30:1, 8, 9) Motika nanom bwa ko na aki ‘kabuakakaa aran te Atua’ ao ni karekea kakanikoana. N onean mwin anne, kekeiaki n taai nako ni karaoi mwakuri aika eti ake E na neboaki iai.—Taian Areru 86:12.
6. Tera ae kona n riki ngkana bon nanom ni kani karaoa te bure?
6 Tataro ni katoatai nakon Tamam ae tatangira are i karawa, bwa e na buokiko n rarawa nakon te kaririaki ae na kairiko nakon karaoan te bure. (Mataio 6:13; I-Rom 12:12) Teimatoa n tou mwin ana reirei te Atua bwa a aonga n aki tutukaki ami tataro. (1 Betero 3:7) Ngkana bon nanom ni kani karaoa te bure, ko na bae ni kariaa ngkanne mwina ae kananokawaki, bwa e kona ni bonota kawaia taani karitei Iehova n arona n rabunna n te nang n te aro ni kaikonaki, bwa a aonga n aki roko aia tataro irouna. (Baebaeti 3:42-44) Mangaia are kaotiota te nanorinano, ao tataro bwa e na buokiko bwa ko na aki karaoa te bwai teuana ae na kona n tuka kawaran te Atua iroum n te tataro.—2 I-Korinto 13:7.
Kaota Tangiran Natin te Atua
7, 8. E na kanga mutiakinan ana reirei Iesu ni buokira n rarawa nakon karaoan te bure?
7 Kaotiota tangiran Iesu Kristo n ongeabam nakon ana tua, ao ko na buokaki iai n rarawa nakon karaoan te bure. E taku Iesu: “Ngkana kam kawakin au tua, ao kam maeka n tangirau; n ai arou ngkai I kawakin ana tua Tamau, ao I maeka n tangirana.” (Ioane 15:10) E na kanga ni buokiko maiuakinan ana taeka Iesu bwa ko na teimatoa n tangiraki iroun te Atua?
8 E kona ni kateimatoako mutiakinan ana taeka Iesu bwa ko na nimti booto n reirei ni kaineti ma te aroaro ni maiu ae raoiroi. E kangai Ana Tua te Atua nakoia I-Iteraera: “Ko na tai wene ni bure.” (Te Otinako 20:14) Ma e kaota te boto n reirei Iesu i tinanikun te tua anne ni kangai: “Ane tarataraa te aine ba e na kaitaataan nako ina, ao e a tia ni wene ni bure ma ngaia i nanona.” (Mataio 5:27, 28) E taku te abotoro Betero bwa iai tabeman n te ekaretia n te moan tienture, aika a “mamauaine aika a aki totoki nanoia ni kani bure” ao a “mamanaia aomata aika a mamara.” (2 Betero 2:14, BK) Ko kona n rawa ni katotongia ma n rarawa nakon te wene ni bure ngkana ko tangira te Atua ao Kristo ao n ongeaba irouia, ao ni kamatoaa nanom ni kan teimatoa n iraorao ma ngaiia.
Kariaia Kairam Iroun Taamnein Iehova
9. Ni kaineti ma te taamnei are raoiroi, tera ae kona n riki ngkana e teimatoa te aomata ni kaakaraoa ae bure?
9 Tataro ibukin taamnein te Atua ao butimwaea kairam irouna. (Ruka 11:13; I-Karatia 5:19-25) Ngkana ko teimatoa ni kaakaraoa te bure, ao e kona n anaa taamneina te Atua mairoum. E bubutiia te Atua Tawita imwin karaoan te bure ma Bata-teba ni kangai: “Tai teweai nako mai matam; ao tai kaira nako Tamneim are Raoiroi mai rou.” (Taian Areru 51:11) E kitana te Uea ae Tauro taamnein te Atua ibukina bwa bon te tia bure ngaia ae aki raraoma. E bure Tauro ngke e karaoa te angakarea ae kabuekaki ao ibukina naba bwa e aki tiringi aia nanai n tiibu ao ni kooti tibun Amareka ni kabane ao aia uea. Imwin anne, e a anaa taamneina Iehova mairouna.—1 Tamuera 13:1-14; 15:1-35; 16:14-23.
10. E aera ngkai ti riai n rarawa nakon iaiangoan karaoan te bure?
10 Rarawa nakon iaiangoan karaoan te bure. E korea ae kangai te abotoro Bauro: “Ngkana ti bure ni kani bure i mwin reken atakin te koaua i roura, ao bon akea riki te karea teuana i bukini buure.” (Ebera 10:26-31) Ai kananokawakira ngkana ko a boni bubure nako naba ni karokoa te tai arei!
Kaota te Tangira ni Koaua Nakoia Aomata
11, 12. N aaro raa, are e na kona iai te tangira ao te karinerine n tuka temanna man kaakaraoan te wene ni bure?
11 Ko na tukaki ni karaoa te wene ni bure, man tangiraia raom nako. (Mataio 22:39) E na kaumakiko te aeka n tangira anne, bwa ko na kawakina nanom n te aro ae e na aki kaririko bwa ko na anaa nanon buun temanna. Ngkana e kaririko nanom n te aro anne, e kona naba ni kairiko nakon te wene ni bure. (Taeka N Rabakau 4:23; Ieremia 4:14; 17:9, 10) Kakairi n aron Iobi ni kaakaraoa ae eti, are e aki kariaia bwa e na tarataraa temanna riki te aine i rarikini buuna.—Iobi 31:1.
12 E kona n tukiko man te bure ae kakaiaki ataakin tabun te mare. E kaantaningaa te mare ae karineaki te Atua ao te wene n taanga bwa e na karekea te kawai ibukin karikaia aomata aika bati. (Karikani Bwaai 1:26-28) Uringnga bwa iai irekereken aia bwai ni kariki aomata ma te maiu, ae tabu. A aki ongeaba iroun te Atua taani wene ni bure ao taani wene ni kimoa, ngkai a kabuakakaa te wene n taanga, a aki karinea iai tabun te mare, ao a bure iai nakon rabwataia. (1 I-Korinto 6:18) Ma tangiran te Atua ao raora n ikotaki naba ma te ongeaba irouna, a na tuka te aomata man karaoan aroaro aika kona ni karika kabaneana man te ekaretia ni Kristian.
13. N te aro raa, ae e “bakataei ana bwai” iai te aomata ae buakaka aroaroni maiuna?
13 Ti riai ni kaki iango aika bure bwa ti aonga n aki kammarakia aomata aika tangiraki iroura. E taekinaki ae kangai n Taeka N Rabakau 29:3: “Ane i raorao ma aine aika buakaka ao e bakataei ana bwai.” E urua ana iraorao ma te Atua te tia wene ni bure ae aki raraoma, ao ana itoman ae kaan ma ana utu. Iai bukina ae riai bwa e na buu-raure te buu-te-aine. (Mataio 19:9) Ngkana tao te tia bure te buu-te-mwaane ke te buu-te-aine, e a kona ngkanne te raure anne ni karawawataa te buu are akea ana bure, natiia ao tabeman riki. Ko kakoauaa naba ae ataakin ruanikain te wene ni bure, e riai ni kairira bwa ti na rarawa ni kataaki iai?
14. Tera reireiara man Taeka N Rabakau 6:30-35 ni kaineti ma karaoan te bure?
14 Ataakin ae e aki kona ni kabwaraaki mwin te urubwai ae nako man te wene ni bure, e riai ni kairira bwa ti na rarawa nakon te mwakuri ae bangaaomata aei. E kaotaki n Taeka N Rabakau 6:30-35 (BK), bwa e ngae ngke a kona n nanoangaea te tia iraa ae kimoa ibukini bakina, ma a ribaa te tia wene ni kimoa ibukin aroarona aika bubuaka. E bon “urua oin arona” iai ke maiuna. I aan te Tua Rinanon Mote, e na bae ni kamateaki. (Nakoaia Ibonga 20:10) Ngkana iai ae karaoa te wene ni kimoa, e kammarakia iai aomata tii ibukin nanona ni kaibwabwaru. Te tia wene ni kimoa ae aki raraoma, e aki teimatoa n tangiraki iroun te Atua, ma e kabaneaki mai nanon te ekaretia ni Kristian ae itiaki.
Kateimatoan Itiakin Mataniwin Nanom
15. Tera aron mataniwin te nano ae “kataneaki ni mwin te biti ae kabuebue”?
15 Ngkana ti kan teimatoa n tangiraki iroun te Atua, ti aki kona ni kariaia bwa e na aki namakinaaba mataniwin nanora n te bure. Ti aki riai n toua mwin te aroaro ni maiu ae buakaka ae bwabwainaki irouia kaain te aonnaba, ao ti riai n taratara raoi ibukin ara motinnano ni kaineti ma raoraora, baika ti wawareki ao arora ni kakibotu. E kauring Bauro ni kangai: “Ane a nang kitana te onimaki tabemang ni boong aika kaitira, ngkai a iri nanoia tamnei aika bureburea te aba ma aia reirei taimonio, n aia mamana-te-aba taani kewe, aika a mamate mataniwin nanoia ba kaanga a kataneaki ni mwin te biti ae kabuebue.” (1 Timoteo 4:1, 2) Titeboo mataniwin te nano ae “kataneaki ni mwin te biti ae kabuebue” ma te iriko ae bue ao e rabunaki n te mwaka ao e a aki namakinaaba. E nang aki manga kona ni kauringira te aeka ni mataniwinnano anne, riaira ni kararoaira mairouia taani kabwaouaa te koaua ao man aaro ake a kona ni kairira bwa ti na kitana iai te onimaki.
16. Bukin tera ngkai e kakawaki mataniwin te nano ae raoiroi?
16 E boto kamaiuara ni mataniwin nanora aika raraoi. (1 Betero 3:21) E kaitiakaki mataniwin nanora man mwakuri aika mate rinanon onimakinan raraan Iesu are e kawawaeaki, ‘bwa ti aonga n toro iroun te Atua ae maiu.’ (Ebera 9:13, 14) Ngkana ti bure ni kani bure, e na kabarekaki ngkanne mataniwin nanora ao ti a aki manga riki bwa aomata aika itiaki aika tau ibukin karaoan ana mwakuri te Atua. (Tito 1:15) Ma e kona n reke mataniwin nanora ae raoiroi man ana ibuobuoki Iehova.
Aanga Tabeua Ibukin Totokoan te Buakaka
17. Tera te kakabwaia ae na reke ngkana ti ‘kabanei nanora n ira Iehova’?
17 ‘Kabanea nanom n ira Iehova’ n aroni Kareba are kaain Iteraera rimoa. (Te Tua-Kaua 1:34-36) Karaoa ae tangiria te Atua, ao tai iangoa ae ko na amwarake n “aia taibora taimonio.” (1 I-Korinto 10:21) Rarawa nakoni kabwaouan te koaua. Katoong amwarake n taamnei man ana taibora Iehova ma te nano ni kakaitau, ao ane ko na aki mwamwanaki iai irouia taan reirei ni kewe ke mwaakaia taimonio. (I-Ebeto 6:12; Iuta 3, 4) Kaatuui iaiangoan baika kaineti ma te onimaki n aron reiakinan te Baibara, kaean bobotaki, ao te mwakuri ni minita. Ane ko na kukurei ngkana ko kabanea nanom n irira Iehova ao ngkana ko kabatiaa am mwakuri ibukin te Uea.—1 I-Korinto 15:58.
18. E na kanga n rotaki aroarom ni maakakin Iehova?
18 Kananomatoako bwa ko na “toro iroun te Atua ni kakukureia ni karinea ma ni makua.” (Ebera 12:28) E na kairiko maakakin Iehova bwa ko na rarawa n toua te kawai ae buakaka. E na buokiko naba ni maiuakina ana reirei Betero nakoia raona ni kabiraki ae kangai: “Ngkana kam atonga Teuare motiki-taekaia aomata nako ba Tamami, are motikia n ai aron ana makuri te aomata n aki nanonano, ao kam na kabane bongini maekami i aon te aba ni maku.”—1 Betero 1:17.
19. E aera ngkai ko riai ni kaakaraoi baika ko reiakini man Ana Taeka te Atua?
19 Teimatoa ni kaakaraoa ae ko reiakinna man Ana Taeka te Atua. Ni karaoan aei, ko na buokaki iai ni kararoaa te bure ae kakaiaki, ibukina bwa ko kaota koauan ae ko mena i buakoia “akana a kataneiaki ni wanawana n ata te raoiroi ma te buakaka.” (Ebera 5:14) Taratara raoi ni ‘kabo am tai ni kawakin’ ni boong aika bubuaka aikai bwa ko aonga n nakonako n aron te aomata ae wanawana, n onean mwin are ko na taetae ke ni karaoa te bwai teuana n aki iango moa. “Kam na ata ae tangiraki iroun te Uea ba e na karaoaki,” ao teimatoa ni karaoia.—I-Ebeto 5:15-17; 2 Betero 3:17.
20. Bukin tera bwa ti riai n rarawa nakon te kanibwaibwai?
20 Rarawa nakon te kanibwaibwai ae mataiakinan aia bwai aomata. E kangai te tua teuana man Tuua Ake Tebwina: “Ko na tai mataiakina ana auti raom, ko na tai mataiakina bun raom, ao ana toro te mwane, ao ana toro te aine, ao ana kao, ao ana aati, ao te bwai teuana ae ana bwai raom.” (Te Otinako 20:17) N te tua aei, ao e a kamanoaki iai ana auti te aomata, buuna, ana toro, ana man, ao bwaai riki tabeua n aron aikai. Ma ae kakawaki riki, bon ana taeka Iesu are e kamwaraea te aomata te kanibwaibwai.—Mareko 7:20-23.
21, 22. Baikara katauraoi ake e kona ni karaoi te Kristian, bwa e aonga ni kararoaaki iai man te bure?
21 Kataea nangim n te aro ae e na aki kona ni kairiko nanom nakon karaoan ae buakaka. E korea ae kangai te tia rimwin Kristo ae Iakobo: “E kaririaki te aomata ngkana e kairaki n ana kaibabaru ni mamanaki iai. Ao te kaibabaru, ngkana e bikoukou, ao e bungia te bure: ao te bure, ngkana e ikawai, ao e bungia te mate.” (Iakobo 1:14, 15) N te katoto, ngkana iai ana kangaanga rimoa temanna ibukin kabatiaan te moi manging, e kona ni motinnanoia bwa e na akea te aeka ni kamanging teuana ni mwengana. Ibukin totokoan te kariri nakon te Kristian ae irekereke ma te aomata ae kaokoro arona ma ngaia bwa tao te mwaane ke te aine, tao e riai ni bita ana mwakuri ke ana tabo ni mwakuri.—Taeka N Rabakau 6:23-28.
22 Tai toua te mwaneka teuana ae na kairiko nakon te bure. Te winikamwarane ao iango aika bubuaka a kona ni kairiri nakon te wene ni bure ke te wene ni kimoa. Taekinan keewe aika uarereke a kona ni kaungaa te aomata bwa e na taekini keewe aika kammaraki, ao e kona n riki bwa anuani maiuna kaakaraoan te bure ni kewe. Kimoaan baika aki kakawaki, e kona ni kamatentena mataniwin nanon te aomata ni karokoa ae e a kimoai baika kakawaki riki. Iaiangoan te reirei teuana ae bwaoua e kona ni kairiri nakon kakeaan ao kabwaouan te koaua ae tabwanin.—Taeka N Rabakau 11:9; Te Kaotioti 21:8.
Tera Arom Ngkana Ko a Tia ni Bure?
23, 24. Tera te kabebetenano ae kona n reke man 2 Rongorongo 6:29, 30 ao Taeka N Rabakau 28:13?
23 A bane n aki kororaoi aomata. (Te Minita 7:20) Ma ngkana ko a tia ni karaoa te bure ae kakaiaki, ko kona ni karekea kabebetean nanom man ana tataro te Uea are Toromon nakon te Atua, ibukin katabuan ana tembora Iehova ae kangai: “Ngkana tao e tataroaki te tataro teuana ma te bubuti teuana iroun te aomata temanna, ke irouia am aomata aika Iteraera ni kabaneia, aika a na bane nako n atai kain nanoia ma rawawataia, ma n arori baiia nakon te maneaba aei: ao Ko na ongo mai karawa are nem ni maeka, ao Ko na kabara buure, ao Ko na angania aomata nako n aron aroia nako, aika Ko atai nanoia nako; (ba bon Ngkoe, ae ti Ngkoe, ae Ko atai nanoia natiia aomata).”—2 Rongorongo 6:29, 30.
24 Eng, e nora te nano te Atua ao e kabwarai buure. E taekinaki ae kangai n Taeka N Rabakau 28:13: “Ane karaba ana bure nako ao e na aki kabaia: Ma ane kaotioti ma ni kitan ao e na nanoangaki.” Ngkana e raraoma temanna, ao ni kaotii ana bure ma ni kitan, e a kona ngkanne n nanoangaki iroun te Atua. Ma ngkana e a mamaara am onimaki, tera riki ae na buokiko bwa ko aonga n teimatoa n tangiraki iroun te Atua?
Tera Am Kaeka?
• Ti na kanga n teimatoa n tangiraki iroun te Atua?
• E na kanga tangiran te Atua ao Kristo ni buokira bwa ti na rarawa nakon te aroaro ni maiu ae bure?
• Bukin tera ngkai e tukira tangiraia raora, bwa ti na aki wene ni bure?
• Baikara aanga tabeua ake ti kona iai n totokoi aroaro aika bure?