Iehova Bon Te Atua Ae Kaotiota Kukureina Irouia Ana Aomata
“E aki ribuaka te Atua ni manuoki ami makuri ma ami tangira are kam kaotia nakon arana.”—EBERA 6:10.
1. E kanga Iehova ni kaota nanona ni kukurei iroun te I-Moaba ae Nei Ruta?
E RANGI ni kakawaki iroun Iehova aia kakorakora aomata aika ukoukora karaoan nanona ma nanoia ni koaua, ao e kabatiaa kabwaiaia. (Ebera 11:6) E ataa aroaron te Atua ae tamaroa aei te mwaane ae kakaonimaki ae Boati, bwa e kangai nakon te I-Moaba ae Ruta, ae te aine ae tatangira n tararuaa tinan buuna: “E na kaboa am makuri Iehova, ao ko na anganaki boona ae koro raoi mairoun Iehova.” (Ruta 2:12) E kakabwaiaki Ruta iroun te Atua? Eng! Bwa e koreaki naba taekana n te Baibara! Irarikin anne, e mare naba ma Boati ao e a riki bwa ana bakatibu te Uea ae Tawita ao Iesu Kristo. (Ruta 4:13, 17; Mataio 1:5, 6, 16) Anne bon teuana mai buakoni katoto aika bati n te Baibara, ae oti iai nanon Iehova ni kukurei irouia ana toro.
2, 3. (a) Tera ae kamimi iai kaotan ana kakaitau Iehova? (b) E aera ngkai e konaa Iehova ni kaotiota kukureina ni koaua? Kabwarabwaraa.
2 E iangoia Iehova bwa e aki raoiroi ngkana e kakeai bongaia aomata. E taku Ebera 6:10: “E aki ribuaka te Atua ni manuoki ami makuri ma ami tangira are kam kaotia nakon arana, ngke kam akoiia ake a itiaki, ao ngkai kam boni kume naba n akoiia.” Te bwai ae kamimi iai, bwa e kaotiota te kukurei te Atua nakoia aomata ake a tangiria, e ngae ngke taani bure ao a aki tau ibukin neboana.—I-Rom 3:23.
3 Ti kona n taku bwa a aikoa kakawaki ara mwakuri ake a kaineti ma tangiran te Atua, ao n aki tau ni karekea te kakabwaia mairouna, ibukin aki kororaoira. Ma e rangi ni mataata Iehova ni baika ti karaoi ao bukin karaoaia iroura, ao a kakawaki ni koaua irouna ara beku ake ti karaoi mai nanora. (Mataio 22:37) E kangai kabwarabwarana: E nora te bwaintangira nakoina te tina temanna, ae te mwae n roroa ae bebete boona i aon te taibora. E kona n iangoia bwa te bwaintangira ae uarereke manenana, ao e kona n rawa iai. Ma e oti man te reta are i rarikina bwa ana bwaintangira natina te aine ae uarereke, ao e kabanea iai ana mwane te tei aei ae e a tia ni kaikoikoa. E a iangoa ngkai te bwaintangira te tina aei n te itera are teuana. Tao e kona n rabwata natina aei ma rannimatana, ao ni kaotiota kukureina ni koaua irouna.
4, 5. E kanga Iesu ni katotonga Iehova ni kaotiota kukureina irouia Ana aomata?
4 E mataata Iehova ni baika ti karaoi ao bukin karaoaia iroura ao n tian naba ara konabwai, ao e rangi ni kukurei iroura ngkana ti karaoa ara kabanea ni konaa iai, e ngae ngke e uarereke ke e bati. E katotonga raoi Tamana Iesu ni kaineti ma aei. E kangai ae taekinaki n te Baibara ni kaineti ma ana bwaintangira te aine ae e a tia ni mate buuna. “E euti matana [Iesu], ao E noriia aomata aika kaubwai ba a nnei aia angabwai i nanon te ne ni mane. Ao E nora naba te aine temanna ae e mate buna ae aki kaubwai ba e nnei iai uoua te rebeta. Ao E taku, E koaua ae I a tuangngkami ba e nnei ni kamaiti riki te aine ane e mate buna anne nakoia akekei ni kabaneia: ba a bane uakanne ni nnei mani kaubwaiia i buakon angabwai akekei: ao neienne e kabanea roona are i rouna ni nneia man aki-kaubwaina.”—Ruka 21:1-4.
5 E mataata Iesu ni kakawakin ana angabwai neiei, bwa e ataa arona ae e a tia ni mate buuna ao e raarikin, ao e ringaki nanona iai. Ai bon tii te arona naba ma Iehova. (Ioane 14:9) E aki ngkanne kaunganano ataakin ae n aki ongea ae ko mangori ke ko aki, ma ko kona n akoaki iroun Atuara ae kaotiota kukureina ma Natina irouia ana aomata?
E Kakabwaiaa te I-Itiobia ae Mamaaka te Atua Iehova
6, 7. E kanga Iehova ni kaota ana kakaitau nakon Ebeta-mereka ao bukin tera?
6 E okioki taekan Iehova n te Baibara bwa e kaotiota kukureina n arona ni kabooi mwin aia mwakuri ana toro ake a karaoa nanona. Iangoa reitakina ma te I-Itiobia ae mamaakua ae Ebeta-mereka, ae maiu n ana tai Ieremia ao te toro ni batan te Uea ae aki-kakaonimaki ae Tetekia i Iuta. E a kunea Ebeta-mereka bwa a ribuaka ni motika taekan te burabeti ae Ieremia naati n uea i Iuta ni bukinna bwa e kaitaraa te tautaeka, ao a karenakoa i nanon te kinono ae nnen te ran, bwa e na mate iai n akean kanana. (Ieremia 38:1-7) E ataia Ebeta-mereka bwa e korakora ribaakin Ieremia ibukin te rongorongo are e tataekinna, ma e aki tabe ma ruanikain maiuna ao e bubutia te uea. E ninikoria te I-Itiobia aei ni kangai: “Au toka ae te uea, a karaoa ae buakaka aomata akanne ni bwaai ni kabane ake a karaoi nakon Ieremia are te burabeti, are a tewea nako nanon te kinono ni kaikain; ao e a kani mate n te tabo are e mena iai i bukin te roongo.” Ni kaineti ma te baere e tua te uea, e a kairiia mwaane aika 30 Ebeta-mereka bwa a na kamaiua ana burabeti te Atua.—Ieremia 38:8-13.
7 E noria Iehova bwa e onimaki Ebeta-mereka, ngaia are e a buokaki iai bwa e na tokanikai i aoni maakuna ni baike e karaoi. Mangaia are e kaota kukurein nanona iai Iehova ao e taku nakon Ebeta-mereka, rinanon Ieremia: “N na karekea te kabuanibai ao tiaki te kabaia nakon te kawa aei . . . Ma N na kamaiuko . . . ko na aki reke irouia aomata akana ko makuia. N na boni kamaiuko, kioina ngkai ko onimakinai.” (Ieremia 39:16-18, BK) Eng, e kamaiua Ebeta-mereka Iehova ao Ieremia naba, mairouia naati n uea i Iuta ake a buakaka, ao rimwi riki mairouia kaain Baburon ake a urubekea Ierutarem. E taku Taian Areru 97:10: “E kakawakin tamneiia ana aomata [Iehova] aika itiaki; E kamaiuia mai nanoni baiia akana buakaka.”
“E na Anganiko Am Bwai Tamam ae Nora ae Raba”
8, 9. Aeka n tataro raa ake e rotaki iai Iehova, ae katereterea Iesu?
8 Te bwai riki teuana ae kakoauaki iai bwa e kakawaki iroun Iehova arora ni kaota tangirana iroura, e noraki ni kibun te Baibara ae kaineti ma te tataro. E taku te tia rabakau: “Te bwai ae tangiraki i Rouna [te Atua] aia tataro akana raoiroi.” (Taeka N Rabakau 15:8) Ngke e mena i aon te aba Iesu ao a bati mataniwin te Aro ake a tatataro i mataia aomata ma e aki nako raoi mai nanoia, ma a kan anai nanoia aomata. E taku Iesu nakoia taan rimwina n reireinia: “E a tia n reke i rouia booia. Ao ngkoe, ngkana ko tataro, ao ko na rin n am ru, ao ngkana ko a tia ni bonota am mataroa, ao ko na tataro nakon Tamam ae raba, ao E na anganiko am bwai Tamam ae nora ae raba.”—Mataio 6:5, 6.
9 E koaua bwa e aki kabuakakaa te tataro i mataia aomata Iesu, bwa e kaakaraoia naba n tabetai. (Ruka 9:16) E korakora riki rotakin nanon Iehova ngkana ti tataro nakoina ma nanora ni koaua, n aki kan anai nanoia aomata. Ni koauana a riki ara tataro aika raba bwa kaotan korakoran nanora n tangira te Atua ao n onimakinna. Maroaka ae e aki toki n noraki Iesu ni kakaaei taabo aika akea kaaia bwa e na tataro iai. N te taina ao e karaoa aei n te karangaina “ngke e kiriaria te ngaina.” N te taina naba ao “E ararake n te maunga ni kaokoroa n tataro” iai. Ao imwain rineaia ana abotoro ake 12, e kangaina Iesu n tataro n tii ngaia.—Mareko 1:35; Mataio 14:23; Ruka 6:12, 13.
10. Tera ae ti kona ni koaua iai ngkana e oti korakoran nanora n ara tataro?
10 Iangoa aron Iehova ni kakauongo raoi nakon ana tataro Natina ni bunran nanona! Ni koauana, e tataro Iesu n taai tabetai “ma te tang ae korakora ma rannimatana, ao E ongo te Atua i Rouna i bukini makan te Atua i Rouna.” (Ebera 5:7; Ruka 22:41-44) Ngkana ti tataro naba n aekakin te korakora n nano anne, ti kona ni koaua iai bwa e kakauongo raoi Tamara are i karawa. Eng, “e a kaan Iehova nakoia akana weteia ni kabaneia . . . n te koaua.”—Taian Areru 145:18.
11. Tera ana namakin Iehova ni kaineti ma baike ti karaoi n te aro ae raba?
11 Ngkana ngaia bwa e kakawaki iroun Iehova ara tataro nakoina n te tabo ae raba, ai batira riki korakoran rotakin nanona n ongeabara irouna n te aro ae raba! Eng, e bon ataa te bwai ae ti karaoia Iehova e ngae ngke e raba. (1 Betero 3:12) Ni koauana, ara kakaonimaki ma ongeabara e ngae ngke a raba, e oti iai bwa iai iroura “te nano ae moan te raoiroi” nakon Iehova, ae itiaki ma n teimatoa n te eti. (1 Rongorongo 28:9) Ai kukureira nanon Iehova n aroaro akanne!—Taeka N Rabakau 27:11; 1 Ioane 3:22.
12, 13. Ti na kanga ni kawakin ara iango ao nanora, ao ni katotonga te tia rimwin Kristo ae kakaonimaki ae Natanaera?
12 Ibukin anne, a kararoaia Kristian aika kakaonimaki man buure aika kona ni karaoi ni karaba, ake a kabuakakaa te iango ao te nano, n aron matakuakinan te bwaitingako ma mwakuri n iowawa. E ngae ngke a kona ni karabaaki buure tabeua mairouia aomata, ma ti ataia bwa “a bane bwaai ni kakiaki rabunaia ma ni kaotaki raoi i matan Teuare ti nangi taekin arora nako Ina.” (Ebera 4:13; Ruka 8:17) N ara kakorakora ni kararoai baika a aki kakukureia Iehova, ti kateimatoaa iai itiakin mataniwin nanora, ao ti kimwareirei i aan te kaantaninga are ti ataia bwa e kukurei Iehova iroura. Eng, akea te nanououa bwa e kukurei ni koaua Iehova iroun te aomata are e “nakonako n aki bure, ma ni karaoa ae raoiroi, ma n atonga te koaua i nanona.”—Taian Areru 15:1, 2.
13 Ti na kanga ni kawakin ara iango ma nanora n te aonnaba ae e a taabangaki te buakaka iai? (Taeka N Rabakau 4:23; I-Ebeto 2:2) N reitaki ma butimwaean baike e anganira Iehova ibukin buokan ara onimaki, ti riai ni kakorakoraira bwa ti na rawa ni karaoa ae buakaka ao ti na kaakaraoa ae raoiroi, ni waekoa ni karaoia bwa ti aonga n aki kabatiaa iangoan ae aki riai ma ni kairaki nakon karaoan te bure. (Iakobo 1:14, 15) Iangoa kukureim ngkana e a taekiniko Iesu n aron are e taekina iai Natanaera ni kangai: “Noria, bon te [mwaane] ae akea te uarao i rouna!” (Ioane 1:47) Aran naba Natanaera teuana boni Baretoromaio, ao e a kakabwaiaki imwina n rikina bwa temanna mai buakoia ana abotoro Iesu ake 12.—Mareko 3:16-19.
‘Mataniwia Ibonga ae Nanoanga ma ni Kakaonimaki’
14. Tera aron Iesu n te baere e karaoia Maria, ni kabotauaki ma are a taekinna tabemwaang?
14 E teimatoa Iesu ni katotonga raoi Tamana ngkai “boni katotongan te Atua ae aki nonoraki” ae Iehova, n arona ni kaotiota kukureina irouia aomata ake a toro iroun te Atua ma nanoia ae itiaki. (I-Korote 1:15) N te katoto, nimabong imwain ae anga maiuna Iesu, ao e riki bwa te iruwa ma taan rimwina tabeman n ana auti Timon i Betania. N te tairiki anne, ao e “anaa teuana te rawawata ni kabira, ae te naro ni koaua, ae e bati boona” Maria are mwanen Rataro ao tarin Mareta, ao e kabwaroa i atun Iesu ma waena. (Katautauan boona tao e nakon mwaitin te bwakabwai n te ririki). (Ioane 12:3) A taku tabeman: “Tera bukin te bakatae aei?” Ma e taraa te bwai ae karaoia Maria Iesu n te aro ae kaokoro. E taraia bwa te mwakuri n rangi n akoi ao e korakora ae nanonaki iai ni kaineti ma matena ao taunakina ae nang roko. Mangaia are e aki kabuakakaa Maria Iesu, ma e karinea. E taku: “N tabo nako ike e na katanoataki iai te Rongorongo ae Raoiroi aei i aonaba ni kabutaa, ao e na tataekinaki naba iai ana makuri neiei ba kanuringana.”—Mataio 26:6-13, BK.
15, 16. Ti kanga ni kakabwaiaki man aron Iesu n riki n aomata ao n toro iroun te Atua?
15 Ai kabwaiara ngaira ngkai e tituaraoi ara tia Kairiri ae Iesu! Ni koauana, e a tauraoi Iesu man maiuna n aomata nakon te mwakuri are e katauraoia Iehova, ae te riki n Ibonga ae Rietata ao n Uea moa i aoia ake a kabiraki ao imwina i aoia aomata ni kabane.—I-Korote 1:13; Ebera 7:26; Te Kaotioti 11:15.
16 Imwain rokon Iesu i aon te aba, ao e a kaman tabeakinia aomata ma n tangiriia. (Taeka N Rabakau 8:31) Kioina ngkai e a tia n riki n aomata, e a mataata riki ni kaineti ma baika ti karawawataki iai n ara beku iroun te Atua. E korea ae kangai te abotoro Bauro: “E riai i Rouna [Iesu] ba E na karaoaki n ai aroia tarina ni bwaai ni kabane, ba E na riki iai ba mataniwiia ibonga ae nanoanga ae kakaonimaki . . . E a tia ni maraki Ngaia ngke E kaririaki, ao E boni kona ni buokia akana kaririaki.” E kona Iesu n “nanoangaira i bukini mamarara” ibukina bwa e a tia ni “kaririaki ni bwaai ni kabane n ai arora, ma E aki bure.”—Ebera 2:17, 18; 4:15, 16.
17, 18. (a) Tera ae koreaki n reeta nakoia ekaretia ake itua i Asia Minor, ae oti iai korakoran kukurein nanon Iesu irouia? (b) A tabe ni katauraoaki Kristian aika kabiraki akekei nakon tera?
17 Imwin manga-utin Iesu e a mataata riki korakoran rotakin nanona ni kaineti ma kataakia taan rimwina. Iangoi ana reta nakoia ekaretia ake itua i Asia Minor, ake a koreaki iroun te abotoro Ioane. E taku Iesu nakon te ekaretia i Temurena: “I ata rawawatam ma aki-kaubwaim.” Ai aron ae e kangai Iesu ikai, ‘I rangi ni mataata n ami kangaanga; I atai raoi baika kam rinanoi.’ Ibukina bwa e a tia naba Iesu ni karawawataki ni karokoa matena, e a kakorakoraa ni kaungaunga ma te nanoanga ni kangai: “Kakaonimaki ni karokoa matem, ao N na anganiko te bau are te maiu.”—Te Kaotioti 2:8-10.
18 A on reeta nakoia ekaretia aika itua aikai ni baika kaota aron Iesu ni mataata raoi ni kataakia taan rimwina, ao ni kukureina ni koaua ibukin aia kakaonimaki ake a kaotia ni maiuia. (Te Kaotioti 2:1–3:22) Uringnga are te koraki ake e taetae nakoia Iesu boni Kristian aika kabiraki ake a kaantaningaa te tautaeka i rarikina i karawa. A katotonga aia Uea n tauraoi naba ibukin tabeia ae kakannato ae te kaai n ibuobuoki ma teuare moanibaan te nanoanga ae Kristo ae karekea kabwaiaia te botannaomata man ana karea ni kaboomwi.—Te Kaotioti 5:9, 10; 22:1-5.
19, 20. A kanga ni kaota aia kakaitau kaain te “koraki ae uanao” nakon Iehova ao Natina?
19 E aki onoti ana tangira Iesu nakoia tii taan rimwina aika kabiraki, ma nakoia naba ana “tiibu tabemang” aika kakaonimaki ae mirion ma mirion mwaitiia, aika a a riki bwa “te koraki ae uanao, . . . mai buakoia botanaomata ni kabaneia,” aika a na kamaiuaki n rokon “te rawawata are korakora.” (Ioane 10:16; Te Kaotioti 7:9, 14) A a baneakina ngkai Iesu te koraki aei, ibukina bwa e korakora nanoia ni kakaitau n ana karea ni kaboomwi, ao ibukin kaantaningan te maiu n aki toki irouia. A kanga ni kaotiota aia kakaitau? N aroia n “toro i Rouna [te Atua] ni ngaina ao ni bong.”—Te Kaotioti 7:15-17.
20 Te ribooti ni kabutaa te aonnaba ibukin te ririki ni mwakuri ae 2006, ae karinanaki n iteraniba 29 nakon 32, e kateretereaki iai bwa a toro ni koaua iroun Iehova ana minita aika kakaonimaki aikai “ni ngaina ao ni bong.” I nanon te ririki anne, a reitaki ma Kristian ake a kabiraki ake nikira aika karako mwaitiia, ni kabanea te mwaiti n aoa ae 1,333,966,199 ni karaoa aia mwakuri ni minita iai, ae mwaitin te aoa iai e boraoi ma 152,283 te ririki!
Teimatoa ni Kaota te Kakaitau!
21, 22. (a) Ni kaineti ma kaotiotan te kakaitau, e aera ngkai a riai ni kawakinia raoi Kristian ni boong aikai? (b) Tera ae na maroroakinaki n te kaongora ae imwina?
21 N reitakia Iehova ao Iesu ma aomata, e kamimi iai aroia ni kaota korakoran kukureia irouia, e ngae ngke a aki kororaoi. Ma e kananokawaki bwa angiia aomata a aki bati n tabe ma te Atua, ma a kaatuui riki aia iango i aoni baike a tangiri. E kabwarabwaraia aomata aika maeka “ni boong aika kaitira” Bauro ni kangai: “A na tii tabe ma nanoia aomata, a na kani mwanemwane . . . A na aki kani kaitau naba teutana.” (2 Timoteo 3:1-5, Phillips) Ai kaokorora aomata aikai ma Kristian ni koaua ake a tatataro ma nanoia ni koaua, a ongeaba ao a kabanea korakoraia ni mwakuri ni kaotiota aia kakaitau ni bwaai nako ake e a tia te Atua ni karaoi ibukia!—Taian Areru 62:8; Mareko 12:30; 1 Ioane 5:3.
22 N te kaongora ae imwina, ti na kauringi iai tabeua mai buakon kakabwaia n te onimaki aika bati ake e a tia ni kaangaraoi Iehova nakoira ma te tangira. N iangoan “angabwai aika raraoi” aikai, e bia ririkirake riki iai nanora ni kakaitau.—Iakobo 1:17.
Ko na Kanga ni Kaeka?
• E kanga Iehova ni kaotiota kukureina irouia ana aomata?
• Tera aroni kakukureian Iehova iroura ni karaoan ara mwakuri n te aro ae raba?
• N aaro raa ae e kaotiota iai kukureina Iesu irouia aomata?
• E kanga Iesu ni buokaki n rikina n aomata bwa e na riki bwa te tia tautaeka ae nanoanga, ae kaotiota kukureina irouia aomata?
[Taamnei n iteraniba 20]
N aron te karo ae e moan te kukurei iroun Natina ae kaota nanona n ana mwakuri ae uarereke, e kukurei naba Iehova ngkana ti karaoa ara kabanea n raoiroi ibukina