Tai Kakerikaka Nanom Ni Kani Kakaitau
“Ai kakawaki ra i rou nanom nako, te Atua! Ai ewa ra maitiia!”—TAIAN ARERU 139:17.
1, 2. E aera ngkai ti riai ni kakaitau n Ana Taeka te Atua, ao e kanga ni kaota ana kakaitau te tia areru?
AI KAMIRA te bwai ae kuneaki! Ngke e tabe ni karaoaki te onobwai n ana tembora Iehova i Ierutarem, ao e a “kunea te boki are ana tua Iehova are reke mairouni Mote,” te Ibonga ae Rietata ae Irekia, ao akea te nanououa bwa bon te boki ae koreaki 800 te ririki n nako! Ko kona n iangoa aron te Uea ae mamaaka te Atua ae Iotia, ngke e a kamenaki te boki i matana? E bon rangi ni kakawaki irouna ao e ienikuri n tuanga Tiaban ae te tia koroboki bwa e na warekia ni kabaibati.—2 Rongorongo 34:14-18.
2 Ni boong aikai, e a kona ni warekaki Ana Taeka te Atua ae tabwanin ke iterana, irouia aomata aika birion ma birion mwaitiia. Ma nanon anne bwa e a karako iai manenan te Baibara ma kakawakina? Tiaki ngaia anne! A koreaki i nanona ana iango Teuare moan te mwaaka, ibukin kabwaiara. (2 Timoteo 3:16) E kamataataa ana namakin te tia areru ae Tawita ni kaineti ma Ana Taeka te Atua ni kangai: “Ai kakawaki ra i rou nanom nako, te Atua! Ai ewa ra maitiia!”—Taian Areru 139:17.
3. Tera ae oti iai bwa Tawita bon te mwaane ae kakawaki irouna ana iraorao ma te Atua?
3 E aki kona ni kerikaki ana kakaitau Tawita nakon Iehova, ana Taeka, ao ana babaire ibukin te taromauri ae itiaki. E kaotiotaki ana namakin Tawita ni baike e korei n areru aika bati aika rangi n raraoi. N te katoto e taekinaki ae kangai n Taian Areru 27:4: “Teuana te bwai ae I butia Iehova, ao boni ngaia ae N na ukoukoria; ba N na maeka i nanoni maneaban Iehova n uaa tokin au bongi ni maiu, ba N na tarataraa tamaroan Iehova, ma n ukeuke i nanoni maneabana.” Nanon te taeka n Ebera ae rairaki bwa “ukeuke,” bon te teimatoa n iaiangoia, n neneria raoi, n noria ma te kukurei, ni kimwareirei iai, ao ni mataaiakinna. E teretere bwa e kakawaki iroun Tawita ana iraorao ma te Atua, bwa e kukurei ni baika katauraoaki iroun Iehova ibukin kakorakoran ana onimaki, ao e kimwareirei ni katong amwarake n taamnei ni kabane ake e kaotii Iehova. Ti riai ni katotonga arona ni kakaitau.—Taian Areru 19:7-11.
Kakaitau n Ataakin te Koaua Man te Baibara
4. Tera ae kaira Iesu bwa e na ‘kimwareirei iroun te taamnei ae raoiroi’?
4 E aki boto reken te atatai n Ana Taeka te Atua i aon te wanawana ke reirein te aonnaba, aika kauekea te nanorieta. Ma e boto i aon ana akoi Iehova are e karababaa nakoia aika nanorinano ao aika raoiroi nanoia ake a tabeakin aia iraorao ma te Atua. (Mataio 5:3; 1 Ioane 5:20) Ngke e kananoa ana iango Iesu i aon te koaua are a koreaki araia tabeman aomata e ngae ngke a aki kororaoi bwa a na nako karawa, “ao E kimareirei Iesu iroun te Tamnei are Raoiroi, ao E kangai, I karaoiroiko, Tamau, ae Ueani karawa ma aonaba, ba Ko karaba baikai nakoia akana rabakau ma akana wanawana, ao Ko kaotioti nakoia merimeri.”—Ruka 10:17-21.
5. E aera ngkai a aki riai taan rimwin Iesu ni kamemerea kakawakin te koaua ibukin te Tautaeka n Uea, are e kaotaki nakoia?
5 Imwin ana tataro Iesu ae korakora mai nanona, ao e a tuangia taan rimwina ni kangai: “A kabaia maata aika nori baika kam nori: ba I taku nako imi ba a bati burabeti ma uea ake a kan nori baika kam nori, ao a aki nori; ao a kan ongo baika kam ongo, ao a aki ongo.” Eng, e kaungaia taan rimwina aika kakaonimaki Iesu bwa a na aki kamemerea kakawakin te koaua ibukin te Tautaeka n Uea, are e kaotaki nakoia. E aki kaotaki te koaua nakoia kaain te roro rimoa ake ana toro te Atua, ao e aki kaotaki naba “nakoia akana rabakau ma akana wanawana” ni menan Iesu i aon te aba!—Ruka 10:23, 24.
6, 7. (a) Bukin tera ngkai ti riai ni kakaitau ibukin te koaua ae mairoun te Atua? (b) Tera te kaokoro ae noraki ni boong aikai, i marenan te Aro ae koaua ao ae kewe??
6 N ara bong aikai, ti riai ni kakaitau riki n te koaua, ibukina bwa e kabongana “te toro ae kakaonimaki ae wanawana” Iehova, n angania ana aomata te atatai ae nano riki n Ana Taeka. (Mataio 24:45; Taniera 12:10) E korea ae kangai te burabeti ae Taniera ni kaineti ma tain te toki: “A na maiti aika a na tiotio nako, ao e na rikirake te ataibai.” (Taniera 12:4, BK) Ko kakoauaa ae e a “rikirake” ni boong aikai te ataibwai i aon taekan te Atua, ao a nuai raoi ana toro Iehova n te amwarake n taamnei?
7 Ai kaokorora mweeraoin aia onimaki ana aomata te Atua, ma te mangaongao ae noraki irouia Aaro aika kaaini Baburon ae Kakannato! Uaan anne, a bati aomata ake a un ma n ribai Aaro aika kewe, ao a rairaki nakon te taromauri ae koaua. Kaanga ai aroia tiibu aika rawa ni “buokanibwai ma ngaia [Baburon ae Kakannato] n ana bure” ke a aki kani karekea irouia “bwaai ni kamamate ake kaina.” A kaoaki aekaki n aomata aikai ni kabane iroun Iehova ao ana toro, bwa a na rin n te ekaretia ni Kristian ae koaua.—Te Kaotioti 18:2-4; 22:17.
A Baneakina te Atua Ake A Kakaitau
8, 9. E kanga ni kakoroaki bukin are e taekinaki n Akai 2:7 ni boong aikai?
8 E taetae ni burabeti Iehova ni kaineti ma ana tembora n taamnei ni kangai: “N na ioioiia botanaomata ni kabaneia, ao a na roko bwaai aika tatangiraki aika aia bwai botanaomata ni kabaneia, ao N na kaona te maneaba aei n te mimitong.” (Akai 2:7) Iai kakoroan bukin te taetae ni burabeti ae kamimi aei n ana tai Akai ngke a a manga katea te tembora i Ierutarem nikiraia ana aomata te Atua ake man te taenikai. Ni boong aikai ao a kakoroaki naba bukin ana taeka Akai aikai ni kaineti ma ana tembora n taamnei Iehova.
9 Mirion ma mirion aomata ngkai aika baneakina te tembora n taamnei bwa a na taromauria te Atua “n te tamnei ma te koaua,” ao e raka i aon uabubua te ngaa ni katoa ririki “bwaai aika tatangiraki aika aia bwai botanaomata ni kabaneia” aika teimatoa n uarurung n rin. (Ioane 4:23, 24) N te katoto, te ribooti ni kabutaa te aonnaba ibukin te ririki ni mwakuri ae 2006, e oti iai bwa 248,327 aika bwabetitoaki ae kanikinaean katabuani maiuia nakon Iehova. E tei anne ibukin te mwaiti ae 680 aomata aika boou ni katoabong! E oti bwa a atikaki iroun te Atua man aroia n tangira te koaua ao nanoia ni kani beku iroun Iehova n tataekina rongorongon te Tautaeka n Uea.—Ioane 6:44, 65.
10, 11. Taekina te rongorongo ae kaota aroia aomata ni butimwaea te koaua man te Baibara?
10 A bati i buakoia aomata aika raoiroi nanoia aikai ake a anaaki nanoia n te koaua, ibukina bwa a nora te kaokoro i marenan “ae raoiroi ma ae buakaka, ma n ata ae toro iroun te Atua ma ae aki toro i Rouna.” (Maraki 3:18) Iangoa karakinaia Wayne ao Virginia, ae te taanga ae kaain te Aro ni Borotetanti, aika bati aia titiraki aika tuai n reke kaekaaia. A ribaa te buaka ao a aki ota ao n aki rau nanoia n noraia mataniwin Aaro ni kakabwaiaiia tautia ma bwaai ni buaka. N rikirakeia ni kara te taanga aei, a a namakina aki-kubarakiia irouia kaain aia Aro, e ngae ngke te tia reirei Virginia n te reirei n Taabati i nanon ririki aika bati. A taku: “Akea ae kakawarira ke ni kaota nanona ni kaineti ma ara onimaki. E taraa n ae akea te bwai ae kainnanoia te Aro mairoura bwa tii ara mwane. E a mino ara iango iai.” A a maraki riki nanoia ngke e a uki n aia Aro te wene ni bure irouia aomata aika titeboo aroia ni mwaane ke n aine.
11 N te tai anne ao e a riki tibuia te aine Wayne ao Virginia bwa Ana Tia Kakoaua Iehova, ao imwina ai manga natia te aine. E ngae ngke e maraki nanoia Wayne ao Virginia iai n te moantai, ma e a manga bitaki aia iango rimwi riki, ao a a butimwaea te reirei n te Baibara. E taku Wayne: “Tii i nanon tenua namwakaina ao e a reke naba ara atatai man te Baibara ae bati riki nakon are ti reiakinna i nanon 70 te ririki aika nako! Ti aki ataia ae Iehova aran te Atua, ao akea naba ara atatai i aon te Tautaeka n Uea ao te Baretaiti i aon te aba.” E aki rangi ni maan, ao a a moana naba irakin botaki ni Kristian taanga aika korakora nanoia aikai, ao ni buoka naba te mwakuri ni minita. E taku Virginia: “Ti kani kaongoia aomata nako taekan te koaua.” A uaia ni bwabetitoaki n 2005, n aia ka-80 tabun n ririki. A taku: “Ti a kunea raoi te botaki ni Kristian ni koaua.”
Kakaitau ni ‘Kataean Nangim Nakoni Mwakuri Nako Aika Raraoi’
12. Tera ae e aki toki ni katauraoia Iehova ibukia ana toro, ao tera ae ti riai ni karaoia bwa ti aonga ni kakabwaiaki iai?
12 E aki toki Iehova ni buokiia ana toro bwa a na karaoa nanona. N te katoto, e karekea te kaetieti Noa ae okoro ma ni mataata ni kaineti ma kabaan te aake, ae te mwakuri ae e a tibwa waboboaki ma e riai n eti raoi karaoana! Ao e bon riki anne. Bukin tera? Ibukina bwa Noa “e toua mwin aron are E tuangnga te Atua ni kabane.” (Karikani Bwaai 6:14-22) Ni boong aikai, e reireinia naba ana toro Iehova bwa a aonga ni mwaatai ni karaoan nanona. E koaua bwa ara mwakuri ae moanibwaiaki riki bon tataekinan te rongorongo ae raoiroi ae taekan tein Ana Tautaeka te Atua, ao buokaia aika raoiroi bwa a na riki bwa taan rimwin Iesu Kristo. Ao n aron ae riki nakon Noa, e boboto tokanikaira i aon ongeabara. Ti riai n ira raoi te kaetieti are e baireia Iehova rinanon ana Taeka ao ana botaki.—Mataio 24:14; 28:19, 20.
13. E kataneiaira Iehova n te aro raa?
13 Ibukin katiaan te mwakuri anne, ti riai n reireinira bwa ti na “bairea raoi” nibwan ara bwai ni mwakuri ae Ana Taeka te Atua, ae “e manena nakon te reirei, ao nakoni kaotan ana buakaka te aomata nako ina, ao nakoni manga-kaetana, ao nakoni kawanawanana n te raoiroi: ba e aonga ni moan te raoiroi ana aomata te Atua, ao e na kabaneaki ni kataeaki nangina nakoni makuri aika raraoi ni bane.” (2 Timoteo 2:15; 3:16, 17) E kataneiaira Iehova rinanon te ekaretia ni Kristian, n aron are n te moan tienture. Ni boong aikai, e a kaakaraoaki Te Kuura ni Kataneiai Ibukia Taan Uarongorongo ao Te Botaki Ibukin te Uarongorongo ni katoa wiki n ekaretia ni katobibia te aonnaba aika 99,770 mwaitiia, bwa ti na buokaki iai n te mwakuri ni minita. Ko kaotiota te kakaitau ni botaki aika kakawaki aikai, rinanon rorokom ni katoatai iai ao maiuakinan baike ko reiakin?—Ebera 10:24, 25.
14. A kanga ni kaotiota aia kakaitau ana toro Iehova ni kakabwaiakia ae te toro iroun te Atua? (Taekini naba rongorongo ake n te taibora n iteraniba 29-32.)
14 A kakorakoraia n te mwakuri ni minita aomata aika mirion ma mirion mwaitiia ni katobibia te aonnaba ngkai, ao a kaotiota iai nanoia ni kakaitau ibukin kataneiaaia. N te katoto, n te ririki ni mwakuri ae 2006, iai taan tataekina te Tautaeka n Uea aika 6,741,444 mwaitiia aika kabanea te mwaiti n aoa ae 1,333,966,199 ni karaoa iteran nako te mwakuri, n ikotaki naba ma reiakinaia aomata aika 6,286,618 n te Baibara. Aikai tabeua waare aika kaungaunga man te ribooti ni katobibia te aonnaba. Ti kaungako bwa ko na nenera te ribooti aei, ao ni karekea ungan nanom iai, n aroia tarira n te moan tienture ake a karekei ungan nanoia ae bati man ribootin karababaan riki te mwakuri n uarongorongo n aia tai.—Mwakuri 1:15; 2:5-11, 41, 47; 4:4; 6:7.
15. E aera ngkai e aki riai ni bwara nanoia te koraki ake a toro ma nanoia ni koaua iroun Iehova?
15 Korakoran neboan te Atua ae aetorake nakoina ni katoa ririki, e kaotaki iai aia kakaitau ae korakora ana toro Iehova, ngkai a a kinaa ao ngkai a a riki bwa taani kakoaua. (Itaia 43:10) Aia karea n nebonebo ake a anga tabeman taari n aroia kaara, aoraki, ke ake a aki konamaki, e kona ni kabotauaki ma karakon ana karea te aine are e a tia ni mate buuna. Ma ti aki riai ni mwaninga ae a rangi ni kukurei Iehova ao Natina, irouia aomata nako ake a toro iroun te Atua ma nanoia ni koaua, ni karaoani baike a kona ni karaoi.—Ruka 21:1-4; I-Karatia 6:4.
16. Baikara bwaai ni mwakuri n angareirei, ake e katauraoi te Atua n taai aika tibwa nako?
16 Irarikin kataneiakira ibukin te mwakuri ni minita, e buokira naba Iehova rinanon ana botaki n anganira bwaai ni mwakuri aika moanibaa n raoiroi. I nanon tatabebwi te ririki aika tibwa nako, e a kaatiiaki riki ara bwai ni mwakuri ni booki aika The Truth That Leads to Eternal Life, Ko Kona Ni Maiu n Aki Toki n Te Baretaiti i aon Te Aonnaba, Knowledge That Leads to Everlasting Life, ao ae boou ngkai ae Tera Ana Reirei ni Koaua te Baibara? A kabonganai raoi baikai n aia mwakuri ni minita te koraki ake a kakaitau ni koaua.
Kabongana Raoi te Boki ae Ana Reirei te Baibara
17, 18. (a) Mwakoron te boki ae Ana Reirei te Baibara raa, ae ko kaakabongana n am mwakuri ni minita? (b) Tera ae taku temanna te mataniwi ibukin te aono ae uarereke, ni kaineti ma te boki ae Ana Reirei te Baibara?
17 E kakoauaki te boki ae Tera Ana Reirei ni Koaua te Baibara? bwa te kakabwaia nakon te mwakuri ni minita ibukina bwa e mataata kanoana, a bebete taeka ake a kabonganaki ni mwakorona aika 19, ao iai te bukinibaa ae bwarabwara raoi. N te katoto, e maroroakinaki ni mwakoro 12 te atu n reirei ae “Maiuakina ae E Kukurei Iai te Atua.” E kabwarabwaraki te kaongora aei nakon are e reirei, arona ae riai bwa e aonga n riki bwa raoraon te Atua, ae te bwai ae a aki iaiangoia aomata aika bati ke n iangoia bwa e kona n riki. (Iakobo 2:23) Tera uaan kabonganan te boki ae buoka aron reiakinan te Baibara aei?
18 E ribootinna te mataniwi ibukin te aono ae uarereke i Aotiteria, bwa a “kai anaaki nanoia aomata bwa a na kani maroro” n te boki ae Ana Reirei te Baibara. E reitia n taku bwa e rangi ni bebete kabonganan te boki aei, n te aro are “e a kabooui nanoia taan uarongorongo aika bati ao e kakimwareireiia n te mwakuri ni minita. Maroaka ae a taekina te boki aei tabeman bwa te Mwakoro ni Koora!”
19-21. Karakini rongorongo tabeua aika katereterea kakawakin te boki ae Ana Reirei te Baibara.
19 E taku temanna te aine i Guyana nakon te bwaiania ae roko n ana auti: “Bon te Atua ae kanakomaiko.” E a bon tibwa kitanaki neiei ma natina uoman aika uarereke iroun raona. E kauka te boki ae Ana Reirei te Baibara te bwaiania aei nakon mwakoro 1 ao e wareka barakirabe 11 ni kabaibati, i aan te atu ae “Tera Ana Iango te Atua n Ribuaka Aika Ti Kaaitarai?” E taku te bwaiania aei: “E rangi n teke nanona n reirei aikai. E teirake ao e nako buuki, n tang i nanon ana titooa.” E kariaia te aine aei ana anganano te tari te aine ae kaain te aono anne ibukin te reirei n te Baibara ma ngaia, ao e teimatoa n rikirake.
20 E mate buun José ae maeka i Tibein n te kabuanibwai n te kawai. E ukoukora karauan nanona ni kabonganan taian drug, ao e karekea naba buokana ni kawara taokitan te iango. Ma iai ana titiraki Jose ae korakora riki uruakin ana iango iai, ae aki kona ni kaekaki iroun te tia bwainnaorakia te iango, ae kangai: “E aera ngkai e kariaia te Atua bwa e na mate buu?” N te bong teuana ao e kaitiboo José ma Francesc, ae raona ni mwakuri. E baireia Francesc bwa a na maroroakina mwakoro 11 n te boki ae Ana Reirei te Baibara, ae atuna “E Aera Ngkai E a Aki Katoka te Rawawata te Atua?” Moan te rotaki nanon Jose n te kabwarabwara man te Baibara ao n te kabotau i aon te tia reirei ma ana ataei. E a moana ana reirei ma nanona ae korakora iai, e kaea te runga, ao ngkai e a kaakaei botaki aika karaoaki n te Tabo n Taromauri n ana aono.
21 E aki toki ni karinea Ana Taeka te Atua Roman ae te tia bitineti i Poland ae 40 ana ririki. Ma e uarereke rikirakena n ana reirei n te Baibara ibukina bwa e rangi ni kaatuua taekan ana mwakuri. Ma e ngae n anne, e kaea te bwabwaro teuaei ao e karekea iai te boki ae Ana Reirei te Baibara. Imwina ao e a noraki bwa iai rikirakena. E taku: “A bane booto n reirei man te Baibara ni katomatomaki bwa kaanga te taamnei ae e a tabwanin raoi, n te boki aei. E a katoatai ngkai n reirei Roman n te Baibara, ao e a korakora rikirakena iai.
Teimatoa ni Karikirakea te Kakaitau
22, 23. Ti na kanga ni kateimatoaa ara kakaitau ibukin te kaantaninga ae imwaira?
22 N aron ae kabwarabwaraki n te Bwabwaro ae “E a Kaan te Kamaiuaki!” ae rangi ni kakukurei, a a ingainga Kristian ibukin ‘kamaiuaia ae aki totoki’ are ana berita te Atua, ao ibukin kakororaoana e a kawawaeaki iai raraan Iesu Kristo. Akea riki te kawai ae ti na kakaitau iai n te kaantaninga ae kakawaki aei, ma tii kateimatoan kaitiakara ‘man mwakuri aika mate bwa ti aonga n toro iroun te Atua ae maiu.’—Ebera 9:12, 14.
23 Eng, bon te kamimi ngkai iai taan uarongorongoa te Tautaeka n Uea aika raka i aon onoua te mirion, aika kakaonimaki ni beku iroun te Atua e ngae ngke angiia aomata a tii tabe ma oin aroia. E kakoauaki naba iai bwa a taku ana toro Iehova bwa a rangi ni kakaitau ngkai a kona ni beku iroun te Atua, ao a ataia bwa aia mwakuri “e aki matebuaka iroun te Uea.” E bia aki toki rikiraken te kakaitau anne!—1 I-Korinto 15:58; Taian Areru 110:3.
Ko na Kanga ni Kaeka?
• Tera ae e reireinira te tia areru ni kaineti ma ara kakaitau nakon te Atua, ao ibukin naba katauraoan bwaai n taamnei irouna aika ti kainnanoi?
• A kanga ni kakoroaki bukin taeka ake n Akai 2:7 ni boong aikai?
• E kanga Iehova ni kataubobongaia ana toro bwa e na uaana aia beku irouna?
• Tera arom ni kakaitau ibukin raoiroin Iehova?
[Taamnei n iteraniba 27]
E buokira Iehova bwa a na tae nangira ni kaakaraoa nanona
[Taamnei n iteraniba 27]
Tera Ana Reirei ni Koaua Te Baibara?