Kaotiotan te Nanoanga n te Aonnaba ae Iowawa

E ITUAKI n te aoraki ae te maraeria n te aro ae kakaiaki temanna te mwaane i Burundi. E kainnanoa uotakina nakon te onnaoraki n te tai ae waekoa. Ma e na kanga n roko n te onnaoraki? Bon akea te ka teuana ae tauraoi ibukin uotakina. Ma a roko uoman raoraona aika e rangi ni kaan ma ngaiia ni buokia. A katokaa i aon te bwatika ao ni korakai ni katikitikia n te kawai ae kirimaungaunga i nanon nimaua te aoa. A nikiria n te bwati ike e a uotaki iai nakon te onnaoraki ae uakaan. Tabebong imwina ao e a moanna ni marurung.

N iteran te aonnaba are teuana, a urubekeaki taabo ake a uakaan ma taari i Amerika imwin te angibuaka ae te Katrina n Aokati 2005. A karina ni kunea te auti teuana ae bwakaraki ni kaai, taan ibuobuoki aika mwaane. A kabanea tebongina taan ibuobuoki aikai, aika bon akea kinaakia irouia kaain te auti aei, ni korei kaai ao aroka n te tao te iti. E taku te aine are ana auti aei, “I a bon kabi arou ni karabwaia [naakai].”

A kateretereaki n ribooti aika kamimi mairouia taan kanako rongorongo taekan mwakuri n iowawa. A taonaki nako mwakuri aika kaotiota te mwamwannano ao te akoi n te aroaro aei. Ma aio e aki bita te koaua are aomata n taabo nako a rangi ni kainnanoi aroaro aikai, aika te tangira, te mwamwannano, ao te nanoanga. Ti rangi ni kainnanoa te nanoanga! A taabangaki kabonganaan taeka aikai n tain te Kiritimati ae a mwaiti iai aika tataekinna ke n aneneia bwa “te raoi i aon te aba nakoia aomata.”—Ruka 2:14, BK.

Tao e na bae n aki bebete kaotiotan te nanoanga n te aonnaba aei, bwa angiia aomata iai a aki itangitangiri ao n iakoakoi. E taabangaki irouia aomata iangoan te iowawa bwa ngaia ae na kanakoraoa ke ni karekea te tokanikai n te maiu aei. N taraana a mwaiti aika maiuakina te koaua ae e raoiroi riki karaoan ae iowawa nakon ae te nanoanga. Te mataai ni kanibwaibwai ao te kainikatonga, boni ngaia aroaro aika kamaunanakoa te nanoanga.

N tokina, a mwaiti aika a karimoai tabeakinan kainnanoia n onean mwin ae a na tabeakina moa nanoia ke aia namakin aomata. A iangoaki naba mwaane aika taan takaakaro ao aekita, aika a aki kaotiota te tangira ao te mwamwannano bwa ngaiia “oi ni mwaane.” Bon aei naba aroaroia tabeman taan kairiri n te tautaeka.

Mangaia are ti wanawana ngkana ti titirakinira ni kangai: Bukin tera bwa I riai ni mwamwannanoia aomata? E koaua bwa e boni kona te nanoanga ni kairiia aomata nakon karaoan ae raoiroi? Ao tera ae na kona ni buokira ni kaotiota te nanoanga? A na maroroakinaki kaekaan titiraki aikai n te kaongora ae imwin aei.

[Te Bwaoki n te iteraniba 3]

•Te koaua bwa kaotiotan te nanoanga bon te mamaara?

•E koaua bwa e kona te nanoanga ni kairiia aomata nakon karaoan ae raoiroi?

•N aaro raa aika ko kona iai ni kaotiota mwamwannanoaia aomata?