Karikirakea te Nanoanga Ibukia “Aeka n Aomata Nako”

NGKE e reireinia taan rimwina Iesu aroia n tataekina te rongorongo ae raoiroi, e kaotia ae e na aki butimwaeaki n taai nako rongorongon te Tautaeka n Uea. (Ruka 10:3, 5, 6) N ara mwakuri ni minita, ti bae n aitara ma ribaakira irouia tabemwaang ke mwakuri n iowawa. Ibukin anne, e kona ni kangaanga kateimatoaan nanoangaaia naake ti uarongorongo nakoia.

Te aomata ae nanoanga e ataa te bwai ae a kainnanoia tabemwaang ao aia kangaanga, e ota n aia namakin, ao e kani buokiia. Ma ngkana ti aki nanoangaiia naake ti kaitiboo ma ngaiia n te mwakuri ni minita, e a kona ni moanna ni bua ingaingara ao ti a kabwarabae n ara mwakuri. N te itera are teuana, ngkana ti karikirakea ara nanoanga, ai aron ae ti iririba te ai ni kauramwakaa riki ke ti kateimatoa korakoran ingaingara n te mwakuri ni minita!—1Tet. 5:19.

Ti na kangaa ni karikirakea ara nanoanga e ngae ngkana e kangaanga karaoana? Ti na rinanoi katoto aika tenua aika ti riai ni kakairi iai, ae aia katoto Iehova, Iesu, ao te abotoro Bauro.

KAKAIRI N ANA NANOANGA IEHOVA

I nanoni nga ma nga te ririki, e a tia Iehova n nanomwaaka i aani kabuakakaan arana. Ma e ngae n anne, e teimatoa n “akoiia akana bangaomata ma akana buakaka.” (Ruka 6:35) E kaotaki ana akoi man ana taotaonakinnano. E tangiria Iehova bwa a na kamaiuaki “aeka n aomata nako.” (1Tim. 2:3, 4) E ngae ngke e ribaa te buakaka te Atua, ma e iangoiia aomata bwa a kakawaki ao e aki tangiria bwa e na bua maiun temanna.—2Bet. 3:9.

E ataia Iehova bwa e mwaatai Tatan ni kamataki nanoia aomata aika aki onimaki. (2Kor. 4:3, 4) A bati ake a a tia n reireinaki koaua ao aroaro aika kairua man uarerekeia ao e a kangaanga irouia butimwaean te koaua. E ingainga Iehova ni kani buokiia aeka n aomata akanne. Ti kangaa n ataia?

Iangoa ana taratara Iehova ibukia kaain Ninewe rimoa. E ngae ngke a rangi n iowawa, ma e taku Iehova nakon Iona: “Tiaki I riai naba n nanoangaa Ninewe ae te kaawa ae kakannato ae a mena iai aomata aika raka i aon 120,000 ake a aki naba ataa ae eti ao ae kairua?” (Iona 4:11) E iangoiia kaain Ninewe Iehova bwa a mamaara aia onimaki, ao e nanoangaiia ngke e mwiokoa Iona bwa e na anga te kauring nakoia.

N aron Iehova, ti iangoiia naba aomata bwa a kakawaki. Ti kona ni kakairi irouna ngkana ti ingainga ni kani buokiia akana tao a ongora ma bon akea nanoia iai.

KAKAIRI N ANA NANOANGA IESU

N aron Tamana, e kairaki Iesu bwa e na nanoangaiia aomata aika bwarua Ana Taeka te Atua. “Ngke e noriia te koraki ae bati ao e nanoangaiia ibukina bwa a karawawataaki ma ni kananoanga, ao a uamaenako n aroia tiibu aika akea te tia kawakinia.” (Mat. 9:36) E kona n nora ae bati riki Iesu, e ataia ae te koraki ake a roko n ongora ana reirei, a a tia n reireinaki baika kewe ao a aki tabeakinaki irouia mataniwi n aia Aro. E ngae ngke e ataia Iesu ae a bati aika a na kariaia bwaai n tutuki bwa a na tukaki iai mani butimwaean te rongorongo, ma e bon teimatoa naba n “reireinia baika bati.”—Mareko 4:1-9.

Ngkana a aki butimwaea ara rongorongo aomata, ti riai ni kinaia raoi ao n iangoia bwa e aera ngkai a karaoa anne. Tao tabeman iai aia iango aika kairua ibukin te Baibara ke te aroaro ni Kristian ibukin aia katoto ae buakaka aomata ake a taku bwa Kristian ngaiia. Tao tabeman a tuangaki baika kewe ibukin ara koaua. Ma iai tabeman ake tao a un kaain aia kaawa ke aia utu ngkana a butimwaeira.

Tabeman ake ti kaitiboo ma ngaiia n te mwakuri ni minita tao a aki butimwaeira raoi ibukin uruakin nanoia ni baika riki nakoia. E taku te mitinare ae Nei Kim: “N iteran ara aono teuana, a bati aika karawawataaki n te buaka bwa a bane ni bua aia bwai. Akea aia kantaninga ibukin taai aika a na roko. A bwara nanoia ao a aki onimakinia aomata. Ti katoatai ni kaitiboo ma naake a kaitaraa ara rongorongo n te aono aei. N te taina, I aitara ma te mwakuri n iowawa ngke I uarongorongo.”

E kangaa Kim ni kateimatoa ana nanoanga n aki ongea te mwakuri n iowawa? E taku: “Ngkana I bwainikirinaki, I kataia n ururinga Taeka N Rabakau 19:11, ae kangai: “Ana ataibwai te aomata e boni kakerikaaka unna.” Ngkana I ururinga rikiaia aomata aika n ara aono, I a buokaki iai ni karikirakea nanoangaaia. Ao a aki kairiribai aomata ni kabane ake ti kaitiboo ma ngaiia. N te aono anne, iai naba aika ti okiokiriia.”

Ti kona n titirakinira ni kangai, ‘Tera arou ni butimwaea rongorongon te Tautaeka n Uea ngke arona bwa ngai ae I kawaraki?’ N te katoto, tera ae ti na karaoia ngkana ti okioki n tuangaki baika kewe ibukia Ana Tia Kakoaua Iehova? Tao ti na aki butimwaea te rongorongo ao ti kainnanoa nanoangaara. Ngkana ti uringa ana tua Iesu are ti na karaoa nakoia aomata te bwai ae ti tangiria bwa a na karaoia nakoira, ti a kaungaaki iai bwa ti na nanoangaiia aomata e ngae naba ngkana e kangaanga karaoana.—Mat. 7:12.

KAKAIRI N ANA NANOANGA BAURO

E kaota te nanoanga te abotoro Bauro nakoia naba taani kakaaitara aika iowawa. Bukin tera? E ururinga arona rimoa. E taku: “Boni ngai ngkoa te tia taetae ni kamatauningaa te Atua ao te tia bwainikirina te aba, ao te aomata ae I kainikatonga. Ma I nanoangaaki ibukina bwa I ronnano ngkoa ao akea au onimaki.” (1Tim. 1:13) E ataia ae e a tia Iehova ao Iesu ni kaota nanoangaana ae bati. Tao e nora arona rimoa irouia tabeman ake e uarongorongo nakoia.

N tabetai, e aitara Bauro ma aomata ake a nene wakaani koaua aika kewe i nanoia. Tera arona iai? E taekinaki ni Mwakuri 17:16 bwa ni menani Bauro i Atenai, “e maraki nanona ngke e nora te kaawa bwa e buta n taiani bouannanti.” Ma e kamanenai Bauro baike e maraki nanona iai bwa aan ana uarongorongo. (Mwa. 17:22, 23) E kaangaraoi ana anga n uarongorongo nakon rikiaia aomata n aekaia nako bwa e aonga ni “kabonganai aanga nako ni kamaiuia tabeman iai.”—1Kor. 9:20-23.

Ti kona ni kakairi irouni Bauro ngkana ti aki waekoa ni kabuakakai iango aika kairua ke koaua aika kewe ake a taekin, ao imwina ti maroroakina “te rongorongo ae raoiroi ae taekan te bwai ae raoiroi riki.” (Ita. 52:7) E taku te tari te aine ae Dorothy: “A bati kaain ara aono aika reireinaki bwa e iowawa te Atua ao e ribuaka n ana motikitaeka. I kamoamoaia aomata akanne ngkai a kakoauaa te Atua ao imwina I a kairi aia iango nakon ana taeka te Baibara ibukin aroaron Iehova ae tatangira ao ana berita ibukin taai aika a na roko.”

“TEIMATOA NI KATAENIKAIA TE BUAKAKA N TE RAOIROI”

Ngkai ti a mena n raabaneni “kabaneani boong,” ti kona ni kantaningaia bwa a na “ririkirake riki ni buakaka” aroaroia naake ti uarongorongo nakoia. (2Tim. 3:1, 13) Ma ti aki riai ni kariaia anne bwa e na kakerikaaka ara nanoanga ke ni kabuaa kimwareireira. E kona Iehova n anganira te korakora bwa ti aonga n “teimatoa ni kataenikaia te buakaka n te raoiroi.” (IRom 12:21) E taku te bwaiania ae Jessica: “N angiin te tai, I kaitiboo ma aomata aika kamoamoa ao aika a kakeai bongara ma ara rongorongo. E kona ni maraki nanou iai. Ngkana I moana au maroro, I tataro i nanou nakon Iehova ni butiia buokau bwa N na taraiia aomata n aron ana taratara. Ni karaoan aei, e a toki iai kaatuuan au iango i aon au namakin ao I a iangoa arou ni buoka te aomata anne.”

Ti riai n iangoa naba arora ni kaungaia raora ni mwakuri. E taku Jessica: “Ngkana iai i buakora ae e taekinna bwa e aitara ma te ribuaka n ana uarongorongo, I kataia n aki iaiangoia. Ma I bita te maroro nakon ae kaungaunga, n aron te bwai ae raoiroi ae kakororaoaki n ara mwakuri ni minita n aki ongea rawaia tabeman ni butimwaeira.”

E bon atai Iehova kangaanga aika ti kaaitarai n te mwakuri ni minita. Ai kukureira ngaia ngkai ti kakairi n ana nanoanga! (Ruka 6:36) Ni koauana, e na aki teimatoa ni kaota te nanoanga Iehova. Ti kona ni kakoauaa bwa e ataa raoi te tai ae riai ae e na kamauna iai te waaki ae ngkai i aon te aba. Ma e kaumakaki ara uarongorongo ni karokoa te tai anne. (2Tim. 4:2) Ti bia teimatoa ni karaoa mwiokoara ma te ingainga ao te nanoanga nakoia “aeka n aomata nako.”