Aomata Ake A Tau Ni Kairaki Nakoni Koburaken Raan Aika Kamaiu
“Ao te Tibutetei E na riki ba aia Tia Kawakin-tiibu, ao E na kairiia nakoni koburaken raan aika kamaiu.” —TE KAOTIOTI 7:17.
1. E kanga ana Taeka te Atua ni kabwarabwaraia Kristian aika kabiraki, ao tera te mwioko are e anganiia Iesu?
A TAEKINAKI n Ana Taeka te Atua Kristian aika kabiraki ake a tararuai ana bwai Kristo i aon te aba, bwa “te toro ae kakaonimaki ae wanawana.” Ngke e tuoia te “toro” Kristo n te ririki 1918, ao e kunea bwa a rangi ni kakaonimaki taani kabiraki ake i aon te aba n anganga ‘te amwarake n te tai ae riai’ ibukin te onimaki. Ibukin anne, e rangi ni kukurei aia Toka ae Iesu, n te aro are e a rineia bwa “mataniwin ana bwai nako.” (Wareka Mataio 24:45-47.) N aroia aei, a a beku iai taani kabiraki aikai ibukia taan taromauria Iehova aika n te aonnaba, imwain ae a karekea kaniwangaia i karawa.
2. Kabwarabwarai ana bwai Iesu.
2 Iai mwakan te toka ni kabonganai ana bwai nako, ke kaubwaina n aron are e tangiria. A irekereke ana bwai Iesu Kristo, ae te Uea n ana kaintokanuea Iehova, ma bwaai ni kabane ake a irekereke ma te Tautaeka n Uea ao baike a tautaekanaki aon te aba. E nanonaki naba n anne “te koraki ae uanao” ake e noriia te abotoro Ioane n ana miitara. E kabwarabwaraia te koraki ae uanao Ioane ni kangai: “Noria, te koraki ae uanao, ae e aki kona temanna ni warekia, mai buakoia botanaomata ni kabaneia, ma baronga ma natanaomata ma taian taetae ni bane, a tei i nanoaan te kaintokanuea, ao i matan te Tiibutetei, ao a kunnikaiia n ninira aika mainaina, ao baani baam i nanoni baiia.”—Te Kaotioti 7:9.
3, 4. A kanga n rangi ni kakabwaiaki te koraki ae uanao?
3 A mena naba te koraki ae uanao i buakoia te koraki ake e arania Iesu bwa ana “tiibu tabemang.” (Ioane 10:16) A kaantaningaa te maiu n aki toki n te aonnaba ae te baretaiti. A bon kakoaua raoi bwa “e na kairiia [Iesu] nakoni koburaken raan aika kamaiu: ao te Atua E na kaoi rannimataia ni kabane mai mataia.” Ni kaantaningaan anne irouia, a a “teboki niniraia, ao a kamainainai n raraan te Tiibutetei.” (Te Kaotioti 7:14, 17) A karekei ‘niniraia aika mainaina’ i matan te Atua ibukin onimakinan ana karea ni kaboomwi Iesu. A karaoiroaki ao n riki bwa raoraon te Atua n ai aron Aberaam.
4 Irarikin anne, ngkai a a taraaki iroun te Atua te koraki ae uanao ae tabe n rikirake mwaitiia aika tiibu tabemwaang, bwa a raoiroi, a kona ngkanne iai ni kamaiuaki man kamaunaakin te waaki ae ngkai n “te rawawata are korakora.” (Iakobo 2:23-26) A kona ni kaaniaki riki ma Iehova bwa kaanga te botaki teuana, ao ni karekea naba kaantaningaan te kamaiuaki n Aremaketon. (Iakobo 4:8; Te Kaotioti 7:15) A aki kan inaomata i bon irouia ma a kukurei ni beku i aan ana kairiri Uean karawa ao tarina aika kabiraki ake a mena i aon te aba.
5. A kanga te koraki ae uanao ni boutokaia tarin Kristo aika kabiraki?
5 A a tia Kristian aika kabiraki ni boo ma kangaanga aika karuanikai i nanon ana waaki Tatan ao a na bon teimatoa naba ngkai ni kaaitarai. Ma e ngae n anne, a kona n onimakina aia boutoka raoia ake te koraki ae uanao. Ngkai e tabe ni kekerikaki mwaitiia Kristian aika kabiraki, ao mwaitiia te koraki ae uanao e tabe ni kekerake ni katoa ririki n te mwaiti ae ngaa ma ngaa. A aki kona taani kabiraki ni katoai ekaretia ni Kristian aika te 100,000 mwaitiia n tararuai ni katobibia te aonnaba. Mangaia are te boutoka naba teuana ae a karekea taani kabiraki mairouia te koraki ae uanao, bon man aia beku mwaane aika tau ake a a riki bwa unimwaanen te ekaretia, aika kaain te koraki ae uanao. A ibuobuoki naba n tararuaia Kristian aika mirion ma mirion mwaitiia ake a tararuaki iroun te “toro ae kakaonimaki ae wanawana.”
6. E kanga n taetae ni burabetinaki boutokaaia Kristian aika kabiraki irouia raoia ake tiibu tabemwaang?
6 E taetae ni burabetina te nano ni kan ibuobuoki anne te burabeti are Itaia, are a karekea Kristian aika kabiraki mairouia raoia ake tiibu tabemwaang. E korea ae kangai: “Aei ana taeka Iawe nakon ana botanaomata; a na riki ba am bai kaubain Aikubita ma Itiobia; a na riki ba am tabonibai aomatan Teba aika ababaki; a na rimuim.” (Itaia 45:14, BK) N te aro ni kaikonaki, ao ni boong aikai a ririmwiaki kaain te koraki n toro aika kabiraki ao kaain te Rabwata n Tautaeka irouia Kristian aika kaantaningaa te maiu i aon te aonnaba. N ai aroia “tabonibai,” a kukurei ma nanoia ni koaua tiibu tabemwaang ni kabanei korakoraia ao kaubwaia ni boutokaa te mwakuri n uarongorongo ni katobibia te aonnaba, are e mwiokoia iai taan rimwina Kristo aika kabiraki aika i aon te aba.—Mwakuri 1:8; Te Kaotioti 12:17.
7. A kataneiaki ibukin te mwioko raa te koraki ae uanao?
7 A kataneiaki te koraki ae uanao aroaroia aika riai ngke a boutokaia tariia aika kabiraki, bwa a aonga ni kona n riki bwa aan te waaki ae boou i aon te aonnaba are e na karaoaki i mwin Aremaketon. Ma e riai n nene ao ni matoatoa aan te waaki anne, ao kaaina a riai ni bane n tauraoi ibukin karaoan ana kaetieti te Toka. A anganaki Kristian n tatabemania nako aia tai ni kaotiota ae a bon rangi ni manena iroun Kristo Iesu ae te Uea. Man ana kakaonimaki ae boto i aon te tangira ngkai, e kaotia iai ngkanne bwa e a tauraoi ni butimwaea ana kairiri te Uea ngkana e a roko te waaki ae boou n te aonnaba.
A Kaotiota Koauan Aia Onimaki te Koraki ae Uanao
8, 9. A kanga te koraki ae uanao ni kaotiota aia onimaki?
8 A kaotiota koauan aia onimaki n aanga aika kakaokoro tiibu tabemwaang, aika raoia kaain te ekaretia ni Kristian aika kabiraki. Te moan, a boutokaia taani kabiraki n aroia n uataboa tataekinan te rongorongo ae raoiroi ibukin ana Tautaeka n Uea te Atua. (Mataio 24:14; 28:19, 20) Te kauoua, n aroia ni kukurei n aantaeka nakon ana kairiri te Rabwata n Tautaeka.—Ebera 13:17; wareka Tekaria 8:23.
9 Te katenua, a boutokaia tariia ake a kabiraki te koraki ae uanao n aroia ni maiuakina ae boraoi ma ana kaetieti Iehova. A kataia ni karikirakea “te tangira, te kimareirei, te rau, te taotaonaki n nano, te atataiaomata, te raoiroi, te kakaonimaki, te nimamanei, te tau-baang.” (I-Karatia 5:22, 23) Bon tiaki te bwai ae rangi n tangiraki irouia aomata ni boong aikai bwainakin aroaro aikai, ngkai e a taotira riki karikirakean “ana makuri nako te rabata.” Ma e ngae n anne, a bon kakorakoraia naba te koraki ae uanao n rawa nakon “te wene ni bure, te kamaira, te kaitaataan, te karea te boua, te tabunea, taian riribai, te kauntaeka, taian tauanen, taian un, taiani kakarabakau, taiani raure, taiani katei, taiani bakantang, te mamanging, taiani maie, ma baika aroni baikai naba.”—I-Karatia 5:19-21.
10. Tera ae a kakorakoraia ni karaoia te koraki ae uanao?
10 Kioina ngkai ti aki kororaoi, e kona n rangi ni kangaanga iroura karikirakean aroaro ni Kristian, kararoakira ma ana mwakuri nako te rabwata, ao te rawa nakon te kariri man ana waaki Tatan. Ma e ngae anne, ti bia kakorakoraira bwa ti na aki kariaia te bwarannano i bukin mamaarara, kabwakara ni katotonga Iesu, ke aki konabwain rabwatara bwa e na rota buaka ara onimaki ke e na kauarerekea tangiran Iehova. Ti kakoauaa bwa Iehova e na bon karaoa aron are e a tia ni beritanna are e na kamaiuia te koraki ae uanao rinanon te rawawata ae korakora.
11. Tera ana kunemwaan Tatan are e a kakorakoraa ngkai ni kabongana ibukin kamamaraan aia onimaki Kristian?
11 Ma e ngae ngke e koaua aei, ma ti bon teimatoa naba n tantani kioina ngkai ti ataia bwa ara kairiribai are te Riaboro, e bon aki kai bwara nanona. (Wareka 1 Betero 5:8.) E a tia naba ni kabonganaia taani kabwaouaa te koaua ao tabemwaang riki bwa a na kairira bwa ti na kakoauaa ae a kairua baike ti reiakin. Ma n angiin te tai, e aki toki ni matebuaka ana mwakuri anne. N aron naba anne, e kona n riki te bwainikirinaki bwa kamemerean ara mwakuri n uarongorongo, ma n angiin te tai e aki toki n riki bwa kakorakoran aia onimaki akana bwainikirinaki. Ibukin anne, e a rangi ni kabatiaa ana kunemwaan Tatan ake e taraa n nakoraoi ibukin kamamaraan ara onimaki. E kabongana ngkai namakin te bwarannano. A kauringaki Kristian ake n te moan tienture ni kaineti ma te kangaanga aei ngke a tuangaki ni kangai: “Iangoa [Kristo]ma arona n taotaona nanona ngke e kakeweaki irouia tani bure.” Bukin tera? “Ao tai kataua te kua ma te barannano.”—Ebera 12:3, BK.
12. E kanga ana reirei te Baibara ni kaungaia akana a bwara nanoia?
12 Ko a tia n namakina te bwarannano ao iangoan te kan kerikaki man am beku ibukin Iehova? Ko a tia n iaiangoia n taai tabetai bwa ko rangi ni kabwakaroro? Ngkana ko a tia, tai kariaia Tatan bwa e na manga kabonganai riki aekan namakin akanne bwa e na tinewangaa am beku iroun Iehova. E na kona ni buokira te reirei n te Baibara, te tataro ma nanora ni koaua, kakaaean bobotaki ao te itamwaomwao ma raora ni Kristian, ni kakorakoraa riki ara onimaki ao ni buokira bwa e na aki ‘bwara nanora.’ E a tia ni beritanna Iehova bwa e na angania akana a toro irouna te korakora, ao ti bon kona n onimakina ana berita anne. (Wareka Itaia 40:30, 31.) Kabotoa am iango i aon te mwakuri ni Kristian. Raawa nakon baika a na kabanea te tai ae bati ao kabotoa am iango i aon karaoan ae kakawaki riki. N te aro anne, ko na kona iai ni kakorakoraki bwa ko na nanomwaaka n aki ongea te bwarannano.—I-Karatia 6:1, 2.
Te Kamaiuaki Man te Rawawata Nakon te Waaki ae Boou
13. Tera te mwakuri ae mena imwaia ake a kamaiuaki n Aremaketon?
13 Imwin Aremaketon, ao a na kainnanoa kairiraia ni kawain Iehova aomata aika kautaki aika aki raoiroi aika mwaiti kurikuri. (Mwakuri 24:15) A riai n ota n ana karea ni kaboomwi Iesu; ao irarikin anne, a riai n reireiaki aroia n onimakina te karea anne bwa a aonga ni kakabwaiaki. A riai ni kanakoi koaua man aia Aaro aika kewe ake a kakoauai ngkoa, ao ni kitan maiuiia ake rimoa. A riai naba n rabakau aroia ni karina te aomata nabangkai ae kanikinaeaia Kristian ni koaua. (I-Ebeto 4:22-24; I-Korote 3:9, 10) E na rangi ni bati aia mwakuri tiibu tabemwaang aika maiu ni karokoa Aremaketon. Ai kakimwareireira karaoan te aeka ni beku anne ibukin Iehova, ngkana ai akea iai kangaanga ao bwaai ni katikitiki aika ririki n te waaki ae buakaka ae ngkai!
14, 15. Kabwarabwaraa te maroro ae e na karaoaki i marenaia aomata ake a na kamaiuaki rinanon te rawawata ae korakora ma te koraki ake a raoiroi ake a na kautaki.
14 A na bati naba bwaai ake a na reiakin ana toro Iehova aika kakaonimaki ake a mate imwain karaoan ana mwakuri ni minita Iesu i aon te aba n te tai anne. A nang kona ni kinaa te Mesia are beritanaki, are a a ngae ni kakaantaningaia ma a aki noria. A a kaman kaotia ni maiuia rimoa, bwa a kukurei ni kairaki iroun Iehova. N te katoto, iangoia bwa a na tera aron te kimwareirei ao te kabwaia, ngkana a a buokaki bwa a na kabwarabwaraa nakon Taniera kakoroan bukin taetae ni burabeti ake e korei ma e aki ota iai!—Taniera 12:8, 9.
15 Ni koauana, e ngae ngkana e bati ae a na reiakinna mairoura te koraki ake a kautaki, ma a na bon bati naba ara titiraki nakoia. A kona ni kabwarabwarai raoi nakoira baike a riki ake a taekinaki n te Baibara ma a aki bwarabwara raoi. Iangoa aron kakukurein reiakinan rongorongon Iesu aika kabwarabwaraki raoi mairoun ai tarina ae Ioane are te tia Bwabetito! E na korakora riki otara nakon ae ngkai n Ana Taeka te Atua, ma ni baika ti na atai mairouia taani kakoaua aika kakaonimaki aikai. E na reke “te manga-uti are raoiroi riki” irouia ana toro Iehova aika kakaonimaki n ikotaki ma kaain te koraki ae uanao ake a mate n tain te toki. A moana aia beku te koraki aei ibukin Iehova n te aonnaba are e tautaekanaki iroun Tatan. Ai te kukurei tera ngkana a waakina aia beku n te waaki ae boou are e a nakoraoi riki iai te mwakuri!—Ebera 11:35; 1 Ioane 5:19.
16. E na kanga ni waakinaki te Bong ni Motikitaeka ni kaineti ma ae e taetae ni burabetinaki?
16 N te tai teuana i nanon te Bong ni Motikitaeka, ao a na kaukaki iai nira ni boki. A nang riki iai bwa aan motikan taekaia aomata n ikotaki ma te Baibara, bwa a tau ke a aki n anganaki te maiu ae aki toki. (Wareka Te Kaotioti 20:12, 13.) A na bane aomata n anganaki aia tai ae tau ni kaotia bwa a boutokaa riain Iehova n tautaeka i aon bwaai ni kabane ke a aki, ni karokoa tokin te Bong ni Motikitaeka. Te koaua bwa e na aantaeka te aomata anne nakon te babaire man te Tautaeka n Uea ao ni kariaia te Tiibutetei bwa e na kairia nakoni “koburaken raan aika kamaiu”? Ke tao e na totokoia n te aro are e rawa iai n aantaeka nakon Ana Tautaeka n Uea te Atua? (Te Kaotioti 7:17; Itaia 65:20) A nang riai n tia n reke aia tai aomata ni kabane aika i aon te aba n te tai aei, ni karaoi oin aia motinnano aika akea waewaeaia n te bure are rikiaia ke mairouia kaain rarikia aika buakaka. Akea ae e na manga nanououa n riain Iehova ni motikitaeka ae te kabanea aei. Tii aomata aika buakaka aika a na kamaunaki n aki toki.—Te Kaotioti 20:14, 15.
17, 18. Tera aron kimwareireia Kristian aika kabiraki ao tiibu tabemwaang n iangoan te Bong ni Motikitaeka?
17 E a tia ni kakoauaki bwa Kristian aika kabiraki ni boong aikai a bon tau n anganaki te Tautaeka n Uea, ao a ingainga ni kariariaa te tai are a na tautaeka iai n tain te Bong ni Motikitaeka. Ai tamaroara kakabwaiaaia te koraki aikai! A kaungaki nanoia n te kaantaninga anne, bwa a na tou mwin ana reirei Betero ake e angania tariia ake n te moan tienture aika kangai: “Kakorakoraingkami ba kam na kakoauai weteami ma rineami: ba ngkana kam karaoi baikai, ao kam bon aki bwaka: ba e na kabatiaki n te aro aei karekean rinimi i nanon uean ara Uea ao ara tia Kamaiu are Iesu Kristo, are ueana are aki toki.”—2 Betero 1:10, 11.
18 A kaai ni kimwareirei tiibu tabemwaang ma tariia aika kabiraki. A matoa nanoia ni kan boutokaia. Ngkai raoraon te Atua ngaiia ni boong aikai, a a kaungaki nanoia bwa a na karaoa aia kabanea n tamaroa n aia beku ibukina. N tain te Bong ni Motikitaeka, ao a na rangi ni kukurei ni boutokai ana babaire te Atua ma nanoia ni kabane, ngkai e kairiia Iesu nakon te koburake n ran ibukin te maiu are e aki toki. Ao n tokina a nang kakoauaki bwa a tau n riki bwa ana toro Iehova i aon te aba n aki toki!—I-Rom 8:20, 21; Te Kaotioti 21:1-7.
Ko Uringnga?
• Baikara ana bwai Iesu?
• A kanga te koraki ae uanao ni boutokaia tariia aika kabiraki?
• Baikara mwioko aika okoro ao kaantaninga aika reke irouia te koraki ae uanao?
• Tera am iango ibukin te Bong ni Motikitaeka?
[Taamnei n iteraniba 26]
A a tia te koraki ae uanao n teboki niniraia ao ni kamainainai n raraan te Tiibutetei
[Taamnei n iteraniba 27]
Tera ae ko kan ataia mairouia te koraki ake a kakaonimaki ake a na kautaki?