Tera Arora Ae Riai Nakoia Aomata?

“Ane kam tangiria ba e na karaoaki nako imi irouia aomata, ao kam na karaoa naba arona nako ia.”​—RUKA 6:31.

1, 2. (a) Tera te Kabwarabwara i aon te Maunga? (b) Tera ae ti na noria n te kaongora aei ao are imwina?

BON te tia Reirei ae Kakannato Iesu Kristo. Ngke a kanakoaki mwaane irouia kairiribai man mataniwi n Aaro bwa a na taua Iesu, ao a bane n oki bureitiman ma tabonibaia ao a taku: “Bon akea te aomata ae taetae n te aro arei ma ngkoa.” (Ioane 7:32, 45, 46) Teuana mai buakon ana kabwarabwara Iesu aika anainano, bon te Kabwarabwara i aon te Maunga. E koreaki taekana n ana Euangkerio Mataio ni mwakoro 5 nakon 7, ao e taekinaki naba te rongorongo ae titeboo ma aei n Ruka 6:20-49.a

² Tao te rongorongo ae rangi n ataaki man te kabwarabwara anne, bon are e aki toki n aranaki bwa te Kibu ni Koora. E irekereke ma arora nakoia aomata nako. Bwa e kangai Iesu: “Ane kam tangiria ba e na karaoaki nako imi irouia aomata, ao kam na karaoa naba arona nako ia.” (Ruka 6:31) Ai raoiroira baike e karaoi ibukia aomata! E katoki aoraki ao e kautiia naba maate Iesu. Ma a a kakabwaiaki riki ngke a butimwaea te rongorongo ae raoiroi are e reireinia iai. (Wareka Ruka 7:20-22.) Kioina ngkai Ana Tia Kakoaua Iehova ngaira, ti rangi ni kukurei n uataboa te mwakuri ibukin tataekinan te Tautaeka n Uea n aron naba anne. (Mataio 24:14; 28:19, 20) N te kaongora aei ao are imwina ao ti na nori iai baike e taekin Iesu ni kaineti ma te mwakuri aei, ao ai uana naba ma reirei riki tabeua man te Kabwarabwara i aon te Maunga ake a irekereke ma arora ae riai nakoia aomata.

Bwaina te Nimamannei

3. Ko na kanga ni kabwarabwaraa te nimamannei?

³ E taku Iesu: “A a kabaia akana nimamanei, ba a na abana te aba.” (Mataio 5:5) Bon akea irekereken te nimamannei ma te mamaara ae kaotaki n te Baibara. Ma bon te akoi ae ti kaotiotia ae kaineti ma irakin nanon te Atua. E kaotiotaki te aroaro ni maiu aei ni baike ti karaoi nakoia raora. N te katoto, ti na “tai kaboa ana buakaka te aomata n te buakaka.”​—I-Rom 12:17-19.

4. Bukin tera ngkai a kabwaia akana nimamannei?

⁴ A kabwaia akana nimamannei bwa “a na abana te aba.” Iesu bon te aomata ae ‘nimamannei ao n nanorinano’ ao boni ngaia naba are e ‘motikaki bukina bwa te tia bwaibwai ni bwaai ni kabane,’ mangaia are bon te tia Bwaibwai naba ngaia n te aonnaba. (Mataio 11:29; Ebera 1:2; Taian Areru 2:8) E a kaman taekinaki bwa ae e na iai te koraki aika a na raona te Mesia ae “natin te aomata,” n tautaeka n te Tautaeka n Uea i karawa. (Taniera 7:13, 14, 21, 22, 27) Kioina ngkai bon “raoni Kristo ni baibai” te koraki aika kabiraki aika nimamannei, ake 144,000 mwaitiia, a riai ngkanne ni kaai ni bwaibwai ma Iesu n te aonnaba. (I-Rom 8:16, 17, BK; Te Kaotioti 14:1) A na kakabwaiaki naba aomata ake a nimamannei bwa a na anganaki te maiu are aki toki i aon te aba, i aan ana Tautaeka n Uea te Atua.​—Taian Areru 37:11.

5. Tera aron rotakin aroarora ngkana ti kakairi n aron Iesu n nimamannei?

⁵ A na boni bae n ribaira aomata ao n aki kani karenaira ngkana ti rangi n iowawa. Ma ngkana ti kaotiota te nimamannei are e kaotiotia naba Kristo, ti na tatangiraki ao n riki naba bwa taani kakorakoraa te onimaki n te ekaretia. Te nimamannei bon teuana mai buakon uaa ake e karikirakei i nanora mwaakan te Atua, ngkana ti ‘maiu ao n nakonako iroun te taamnei.’ (Wareka I-Karatia 5:22-25.) E boni koaua ae ti bane ni kani warekanaki i buakoia te koraki ake a nimamannei, ake a kairiraki n taamnein Iehova!

Ai Kabwaiara Akana Nanoanga!

6. Baikara aroaro aika rianako ake a reke irouia “akana nanoanga”?

⁶ E kangai Iesu n ana Kabwarabwara i aon te Maunga: “A a kabaia akana nanoanga, ba a na nanoangaki.” (Mataio 5:7) A mwamwannano “akana nanoanga” ao a kaotiota te akoi ao a uataboa naba rawawataia akana a mangori. E kabebeteia aomata aika karawawataaki Iesu n te aro ni kakai, ibukina bwa e “nanoangaiia” ke e ‘kairaki n te nanoanga.’ (Mataio 14:14; 20:34) Mangaia are uataboan nanokawakin te aomata iroura ao iaiangoan arona, e riai ni kairira bwa ti nanoangaiia aomata.​—Iakobo 2:13.

7. Tera are e kairaki iai Iesu man ana nanoanga bwa e na karaoia?

⁷ Ngke e nang rawea motirawana Iesu, ao e a noria naba aomata aika bati, ao e “nanoangaiia, ba ai aroia tiibu aika akea aia tia kawakinia.” Ai ngaia are e a “reireiia baika bati.” (Mareko 6:34) Ai kimwareireira ngaira ngkai ti a uataboa naba tataekinan rongorongon te Tautaeka n Uea nakoia aomata nako, ao n tuangia ana nanoanga ae korakora te Atua n aron naba are e karaoia Iesu!

8. Bukin tera ngkai a kabwaia akana a nanoanga?

⁸ A kabwaia akana nanoanga bwa ‘a na nanoangaki.’ Ngkana ti nanoangaia aomata, ao n angiin te tai a na manga boni karaoa naba ae ai aron anne. (Ruka 6:38) Ma irarikin anne, e a manga taku riki Iesu: “Ngkana kam kabara aia bure aomata mai rouia, ao E a kabara naba ami bure Tamami are i karawa.” (Mataio 6:14) Bon tii te koraki aika a nanoanga ake a na kona ni karekea kabwaraan aia bure ao akoaia iroun te Atua, ao anne are e a karekea kukureia.

Bukini Kabwaiaia “taan Raoi”

9. Tera ae ti na karaoia ngkana taan raoi ngaira?

⁹ E taekina ae kangai Iesu ike e a kaota iai te anga teuana ibukin reken te kabwaia: “A a kabaia taan raoi, ba a na atongaki ba natin te Atua.” (Mataio 5:9) Te taetae ni Kuriiti ae rairaki ikai bwa “taan raoi” e nanonaki raoi iai bwa “taan raoiakina te aba.” Ngkana taan raoiakina te aba ngaira, ti aki riai ni karaoi ke n irekereke ma mwakuri nako aika bubuaka, n aron te uarao are e kona ni “karaureia aika i raorao.” (Taeka N Rabakau 16:28) Man ara taetae ao ara mwakuri, ti na uaiakina iai reken te rau i nanon te ekaretia ni Kristian ao itinanikuna naba. (Ebera 12:14) Ma e kakawaki riki bwa ti na kabanea ara konaa n uaiakina reken te rau ma Iehova ae te Atua.​—Wareka 1 Betero 3:10-12.

10. E aera bwa a kabwaia “taan raoi”?

¹⁰ E taku Iesu bwa a kabwaia “taan raoi ba a na atongaki ba natin te Atua.” Kioina ngkai a kaotiota onimakinan Iesu bwa te Mesia Kristian aika kabiraki, a karekea iai “te kona n riki ba natin te Atua.” (Ioane 1:12, BK; 1 Betero 2:24) Tera aroia ana taan raoi Iesu ake “tiibu tabemang”? E na riki Iesu bwa “Te Tama ae Akea-tokina” nakoia, i aan ana Tautaeka ae Manna Tenga te Ririki ma raona n tautaeka. (Ioane 10:14, 16; Itaia 9:6; Te Kaotioti 20:6) N tokin te Tautaeka anne ae Manna Tenga te Ririki, a nang bon riki raoi iai ngkanne taan raoiakina te aba aikai bwa natin te Atua i aon te aba.​—1 I-Korinto 15:27, 28.

11. E na tera arora nakoia aomata nako ngkana ti kairiraki n “te rabakau are mai eta”?

¹¹ Ngkana ti kani karekea ara iraorao ae kaan ma Iehova, ae “te Atua are e reke te rau mai Rouna” ao ti riai ni kakairi n aroarona nako, n ikotaki naba ma te rau. (I-Biribi 4:9) Ngkana ti kariaia kairirara n “te rabakau are mai eta,” ti a kona ngkanne iai ni karekea te rau ma aomata nako. (Iakobo 3:17) Eng, bon taan raoi ngaira aika ti na kakabwaiaki.

“Kaoti ami Ota”

12. (a) Tera ae e taekinna Iesu ni kaineti ma ootan te koaua? (b) Ti na kanga ni karakaa nako ara oota?

¹² Teuana te anga ae rangi n tamaroa ao n angaraoi ibukini kaotiotan te aroaro ae riai nakoia aomata, boni man buokaia bwa a na karekea ootan te koaua mairoun te Atua. (Taian Areru 43:3) E taekiniia taan rimwina Iesu bwa “ootan te aba” ngaiia, ao e kaumakiia bwa a na kaotaa nako aia oota nakoia aomata, bwa a aonga ni kona aomata n nori aia “makuri aika raraoi” ke baika a raraoi ake a karaoi nakoia tabemwaang. E nanonna raoi ikai Iesu aroia taan rimwina ni kaotiota te koaua “i mataia aomata,” ke ibukini kabwaiaia te botannaomata. (Wareka Mataio 5:14-16.) Ni boong aikai, ti a kaotaa nako ara oota n arora ni kakaraoa ae riai nakoia raora ao ni boutokaa tataekinan te rongorongo ae raoiroi “i aonaba ni bane,” are nanona “nakoia botanaomata ni kabaneia.” (Mataio 26:13; Mareko 13:10) Ai kakawakira te mwioko aei!

13. Ti kanga n rangi ni kai kinaaki?

¹³ E taku Iesu: “E aki konaki ni karabaki te kawa ngkana e mena i aon te maunga.” E rangi ni kai noraki te kawa ae mena i aon te maunga. N aron naba anne, ti a rangi ni kai kinaaki n ara mwakuri aika raraoi ake ti kaotiotii, n aron uarongorongoan te Tautaeka n Uea ao aroaro aika riai ao aika itiaki.​—Tito 2:1-14.

14. (a) Ko na kanga ni kabwarabwaraa te taura are n te moan tienture? (b) N te aro raa ae ti aki karabaa iai ootan te koaua i aan te “baketi”?

¹⁴ E taekinna Iesu bwa e aki riai ni kaakaki te taura ae e ura i aan te bwaketi ma e riai n katokaaki ni nnena bwa e aonga ni kona n oota nakoia aomata nako ake n te auti. N te moan tienture ao e rangi n taabangaki kamanenaan te taura te kaatibu, ae iai wiikina are e na kona n temekaarake te oera bwa e aonga ni kona n ura iai. E aki toki ni kaakaki i aon nnena ae te kai ae ananau bwa e aonga ni kona n oota “nakoia aomata ni kabaneia ake n te auti.” Bon akea te aomata ae e kona ni kaura ana taura ao ni kaaki i aan te “baketi” ae rangi ni bubura. E aki naba tangiria taan rimwina Iesu bwa a na kaaki aia oota i aan te bwaketi ni kaikonaki. Ai ngaia are ti riai ni kaotaa nako ara oota, ma n aki kariai taian totoko ke bwainikirinaki bwa a na tukira man tibwatibwakin ana koaua te Baibara ke n taua i bon iroura.

15. A kanga n rotaki aomata tabeman n ara “makuri aika raraoi”?

¹⁵ Imwin taekinan te taura ae e ootanako iroun Iesu, ao e a tuangiia taan rimwina ni kangai: “Kam na kaoti ami ota i mataia aomata n ai aron aikai, ba a na nori ami makuri aika raraoi, ao a na neboa Tamami are i karawa iai.” Man ara “makuri aika raraoi” are e a kairia tabeman bwa a na “neboa” te Atua, n aroia n riki bwa ana toro. Ai kaungananora aei nakoira bwa ti na teimatoa n “oota kaanga itoi i aon te aba”!​—I-Biribi 2:15.

16. Tera riki ae kainnanoaki mairoura ngkana ti na riki bwa “ootan te aba”?

¹⁶ Ngkana ti kan riki bwa “ootan te aba” ngaira, e kainnanoaki naba bwa ti na uataboa tataekinan te Tautaeka n Uea ao te mwakuri ni karekeia taan rimwin Kristo. Ma iai te bwai riki ae kainnanoaki mairoura. E korea ae kangai te abotoro Bauro: “Kam na nakonako n ai aroia natin te oota ba uaan te oota te atataiaomata ni kabanea ma te raoiroi ma te koaua.” (I-Ebeto 5:8, 9) Ti riai ni maiuakina ae boraoi ma ae e tangiria te Atua. Ti bon riai ni mutiakina ana reirei ni kauring te abotoro Betero are e kangai: “Kam na maeka n te aro ae raoiroi i buakoia Tientaire; ba, n te baere a bukiningkami iai ba kaanga aongkoa aomata akana kam kakaraoa ae buakaka ngkami, ao ngkai a nori ami makuri aika raraoi, ao a na neboa te Atua iai n ana bongi ni kawaria aomata.” (1 Betero 2:12) Ma tera ae riai ni karaoaki ngkana iai te kangaanga i marenaia raao n onimaki?

“Raoiakina Tarim”

17-19. (a) Tera te “karea” are e mwaneweaki ni Mataio 5:23, 24? (b) N te aro raa ae rangi ni kakawaki iai raoiakinam ma tarim, ao e kanga Iesu ni kabwarabwaraa anne?

¹⁷ E kauringiia taan rimwina Iesu n ana Kabwarabwara i aon te Maunga, bwa a na aki kaikoi uniia ao n riribaia tariia. Ma a riai ni waekoa ni kaea te rau ma tariia are e un irouia. (Wareka Mataio 5:21-25.) Karaua raoi iangoa ana reirei ni kauring Iesu. Ngkana ko uota am karea nakon te baonikarea, ao ngkana tao ko uringa tarim, bwa iai te bwai ae e un iai iroum, tera ae ko na karaoia? Ko na kitana am karea i rarikin te baonikarea ao ko na nako moa n raoiakinna. Imwin karaoan anne, ko a tibwa kona n oki ao n anga am karea.

¹⁸ Te “karea” bon te bwai ae anga te aomata n ana tembora Iehova ibukini kabwaraan te bure. A rangi ni kakawaki angakarea aika maan, kioina ngkai a kabaeaki iai tibun Iteraera iroun te Atua i aan te Tua Rinanon Mote, bwa iteran naba aia taromauri. Ma ngkana ko a uringnga bwa iai itabararam ma tarim, e rangi ni kakawaki riki raoiakinana moa nakon am angakarea. Bwa e kangai Iesu: “Kitana am karea iai i rarikin te baonikarea, naako moa, raoiakina tarim, ao rimwi ko na oki n anga am karea.” E rangi ni kakawaki riki raoiakinan tarim nakoni baike ko na karaoi ake ko kabaeaki iai i aan te Tua.

¹⁹ E aki tii kaineta ana maroro aei Iesu nakon aeka n angakarea tabeua ke bure tabeua. Mangaia are a bane n riai angakarea nako n taonaki ngkana arona bwa ko uringnga ae iai unin tarim iroum. Ngkana te karea anne te man ae maiu, e riai ngkanne ni katukaki moa “i rarikin te baonikarea” are e na karaoaki iai te angakarea, n ana tabo te ibonga n te tembora. Imwin reken te raoi, e a kona ngkanne n oki te tia bure ao n anga ana karea.

20. Bukin tera ngkai ti riai ni waekoa n raoiakina te kangaanga, ngkana iai unra iroun tarira?

²⁰ E iangoia te Atua bwa reitakira ma tarira, bon iteran naba ara taromauri ni koaua ae kakawaki. E na bon akea nanon aia man are a anga bwa aia karea nakon Iehova, ngkana a aki moa karaoa ae riai nakoia raoia. (Mika 6:6-8) Mangaia are e kaumakiia taan rimwina Iesu bwa a na ‘barekiia ni karekea te raoi.’ (Mataio 5:25) N aron naba anne, e korea ae kangai Bauro: “Kam na un, ao tai bure iai: e na tai bungi taai i aon unimi: ao kam na tai angan te riaboro te tabo teuana.” (I-Ebeto 4:26, 27) Ngkana e riai unra, ti riai naba ni manga raoiakinna n te tai ae waekoa bwa ti aonga n aki kaikoa unra, ao ni karekea angan te Riaboro n tokanikai i aora.​—Ruka 17:3, 4.

Teimatoa ni Karineia Aomata Nako

21, 22. (a) Ti na kanga ni kona ni maiuakin ana reirei ni kauring Iesu aika ti a tibwa rinanoi? (b) Tera ae ti na rinanona n te kaongora ae imwin aei?

²¹ Iaiangoan baike e mwanewei Iesu n ana Kabwarabwara i aon te Maunga, e na kona ni buokira ni kaotiota akoaia ao karineaia aomata. E ngae ngke ti bane n aki kororaoi, ma ti boni bane ni kona ni maiuakin ana reirei ni kauring Iesu, ibukina bwa e aki kaantaningaa ae e riaon ara konaa, ao ai uana naba ma Tamara are i karawa. E kona n reke iroura te nimamannei, te nanoanga ao te rau, rinanon te tataro, te kakorakora ae bati ao te ibuobuoki mairoun te Atua ae Iehova. Ti kona ni kaotiota ootan te koaua are e oota mani mimitongin Iehova. Moarara riki, ti a kona ni karekea te rau ma tarira n taai aika riai.

²² Butimwaean ara taromauri iroun Iehova, e irekereke ma karaoan ae riai nakoia raora. (Mareko 12:31) N te kaongora ae imwin aei, ti na rinanoi iai taeka tabeua ake a taekinaki n te Kabwarabwara i aon te Maunga, ake a na kona ni buokira ni kakaraoan ae riai nakoia raora. Imwin kananoan ara iango i aoni booto n reirei ake a reke man ana kabwarabwara Iesu ae akea n ai arona, ti a kona ngkanne n titirakinira i bon iroura ni kangai, ‘Tera arou nakoia aomata?’

[Kabwarabwara ae nano]

Ko na Kanga ni Kaeka?

• Tera ae nanonaki n te nimamannei?

• Bukin tera ngkai a kabwaia “akana nanoanga”?

• Ti na kanga ni kaotaa nako ara oota?

• Bukin tera ngkai ti riai ni waekoa n ‘raoiakina tarira’?

[Taamnei n iteraniba 10]

Tataekinan rongorongon te Tautaeka n Uea bon te anga teuana ae kakawaki ibukini karababan ara oota