Rinea Te Toro Iroun Iehova Ngkai Te Roro N Rikirake Ngkoe
“Tai toki n tauu bukini baikana ko reireiaki, akana ko taku ba a koaua.”—2 TIMOTEO 3:14.
1. Tera ana iango Iehova ni kaineti ma aia beku rooro n rikirake aika taani Kakoaua?
E RANGI ni kakawaki aia beku rooro n rikirake iroun Iehova, ngaia are e a kaira korean te taetae ni burabeti ibukia ae aneneaki iroun te tia areru ni kangai: “A tauraoi am aomata ni iriko n am tai ni buaka, a na kawariko i aoni maunga aika a tabu am ataeinimane n ai aron aoin te karangaina.” (Taian Areru 110:3, BK) Eng, e iangoia rooro n rikirake Iehova aika kukurei ni beku ibukina, bwa a rangi ni kakawaki.
2. Baikara kariri ni kaineti ma te mwakuri ni kareketianti ibukin taai aika a na roko, aika a kaaitara ma ngaai rooro n rikirake ni boong aikai?
2 Ngkami aika rooro n rikirake n te ekaretia ni Kristian, kam a tia ni katabui maiumi nakon Iehova? A mwaiti rooro n rikirake aika kona n iangoia bwa e kangaanga motinnanoan te beku iroun te Atua ae koaua. A kaungaki rooro n rikirake nakoni uaiakinan tiia aika irekereke ma bwaikorakin te maiu aei, irouia taani kairiri ni bitineti, taan reirei ao n tabetai boni kaain aia utu ma raoraoia. Ngkana a uaiakin tiia aika kakukureia te Atua rooro n rikirake aikai, a a manga kakanikoaki irouia kaain te aonnaba. Ma ni koauana, te toro iroun te Atua ae koaua, bon te mwakuri ae te kabanea n tamaroa ae kam kona n uaiakinna. (Taian Areru 27:4) Ni kaineti ma aei, iangoi titiraki aika tenua: Bukin tera bwa ko riai ni beku iroun te Atua? Kam na kanga ni kona n tokanikai ni katabuani maiumi nakon te Atua, n aki ongeia bwa tera ae a taekinna aomata ibukimi ke ni karaoia? Baikara mwioko aika raraoi ni kaineti ma te beku iroun Iehova aika kona n tauraoi ibukimi?
Bon te Bwai ae Riai te Beku Iroun Iehova
3. Tera aron rotakira n ana karikibwai Iehova?
3 E aera ngkai ko riai ni beku iroun te Atua ae koaua ao ni maiu? E anga bukina ae kakawaki Te Kaotioti 4:11, (BK) ni kangai: “Ara Uea ae Atuara, ko bon tau n anganaki te nebonebo ma te karine ma te mwaaka, ba boni ngkoe are ko kariki bai ni kabane. Bon nanom ba a na riki, ao a karikaki.” Bon Iehova te tia Karikiriki ae tamaroa ae kariki bwaai ni kabane. Ai tamaroara te aonnaba aei! E a tia ni karikii bwaai ni kabane Iehova n aroni kaai, uee, maan, marawa, maunga ao ai bwaronran. E taekinaki ae kangai n Taian Areru 104:24: “A on aonaba n am bwai nako.” Ai korakorara nanora ni kakaitau, ngkai e a tia Iehova ni kaota ana tangira rinanon anganakira rabwatara, ao ara iango ake ti a kona iai ni kukurei n te aonnaba ao ni bwaai aika i aona! E riai ngkanne nanora ni kakaitau ibukin te karikibwai ae moan te tamaroa, ni kaumakira bwa ti na kani beku irouna.
4, 5. Tera ana mwakuri Iehova ake e a kairaki iai Iotua bwa e na kaan riki iai ma Ngaia?
4 E kona n noraki bukin te riai ni beku iroun Iehova ae teuana riki, n ana taeka te tia kairiia tibun Iteraera are Iotua. Ngke e a kaan toki maiun Iotua, ao e tuangia ana aomata te Atua ni kangai: “Kam ataia i nanomi ni kabane ao n tamneimi ni kabane, ba bon akea te bwai teuana ae bwaka mai buakoni bwaai aika raraoi ni kabane ake E taekiningkaimi iai Iehova ae Atuami; a bane ni koro bukiia nako imi.” E aera bwa e kona n taekina aei Iotua?—Iotua 23:14.
5 E bae n tia n atai ana berita te Atua Iotua are e na angania tibun Iteraera te aba teuana bwa oin abaia, kioina ngke e kaikawaaki i Aikubita. (Karikani Bwaai 12:7; 50:24, 25; Te Otinako 3:8) Imwina riki, e nora naba moani kakoroan nanon te berita iroun Iehova rinanon Rekenikai ake Tebwina, ake a roko i aon Aikubita ao kairoroan Barao are te eti matoa bwa e na kariaia nakoia kaain Iteraera. Boni ngaia naba temanna mai buakoia ake a kamaiuaki rinanon Taari ae Uraura ao e matakuakina naba kabwautaia Barao ma ana taanga ni buaka n taari. I nanoni mwanangaia n “te rereua ae ababaki ae kakamaku” ae Tinai, ao e nora naba aron Iehova Iotua ni katauraoi bwaai ni kabane aika a kainnanoi tibun Iteraera. Bon akea temanna ae mate ibukin te taka ke te baki. (Te Tua-Kaua 8:3-5, 14-16; Iotua 24:5-7) Ngke e a roko aia tai ni buaka tibun Iteraera ma kaain Kanaan aika kokorakora ao n taua te Aba ni Berita bwa abaia, e a nora aroni boutokaaia Iotua iroun te Atua are e tataromauria ma kaain Iteraera ake tabeman riki.—Iotua 10:14, 42.
6. Tera ae e na buokiko ni karikirakea nanom ni kani beku ibukin te Atua?
6 E ataia Iotua bwa e boni kaakakoroi bukin Ana berita Iehova. Mangaia are e taku Iotua: “Ngai ma kaaini batau, ti na toro iroun Iehova.” (Iotua 24:15) Ao ngkoe tera arom? Ngkana ko iangoi ana berita nako te Atua aika koaua, ake e a tia ni kakoroi nanoia ao ake e nang kakoroi nanoia, e aki ngkanne kaungaki nanom bwa ko na beku ibukina n aron Iotua?
7. E aera ngkai e rangi ni kakawaki karaoan te mwaneka ae te bwabetito n te ran?
7 Ngkana ko neneri raoi ana karikibwai Iehova ao n iaiangoi ana berita aika kamimi ao ni manena, ko a riai ngkanne ni kaumakaki tiaki tii nakoni katabuani maium nakon Iehova ma nakon naba kaotan am katabu anne ni bwabetitoakim n te ran. Te bwabetito bon te mwaneka teuana ae kakawaki ae a riai ni karaoia ake a kani beku iroun te Atua. E kamatataaki aei iroun Teuare e karaoa te banna ni katoto ibukira, ae Iesu. E nako ni kawara Ioane are te tia Bwabetito Iesu, bwa e na bwabetitoaki imwain moanakin ana mwakuri are e nang riki iai bwa te Mesia. E aera ngke e karaoa te mwaneka anne Iesu? E taku imwina riki: “I ruo mai karawa, tiaki i bukin te karaoa oin nanou, ma bon i bukin te karaoa nanon Teuare kanakomaiai.” (Ioane 6:38) E kaotia Iesu bwa e anga boni ngaia ni karaoan nanon Tamana, ngke e bwabetitoaki.—Mataio 3:13-17.
8. Bukin tera bwa e motinnanoia Timoteo bwa e na taromauria te Atua, ao tera ae ko riai ni karaoia?
8 Iangoa rongorongon te roro n rikirake ae te Kristian ae Timoteo, are e mwiokoaki iroun Iehova ni baika bati imwin tabeua te tai. Bukin tera bwa e motinnanoia Timoteo bwa e na taromauria te Atua ae koaua? E taekinaki n te Baibara bwa ‘e a tia n reiakinaki iai ao ni kaungaaki bwa e na kakoauai.’ (2 Timoteo 3:14, NW) Ngkana ko a tia n reiakina Ana Taeka te Atua, ao ni kaungaaki naba bwa ko na kakoauaa ae a koaua ana reirei, ai bon titeboo ngkanne arom ma Timoteo. Ko a riai ni karaoa am motinnano ngkai. E aera bwa ko aki maroroakina te bwai ae ko kani karaoia ma am karo? A na buokiko am karo n ikotaki ma unimwaanen te ekaretia, bwa ko na ota raoi ni baika a kainnanoaki n te Baibara ibukin te bwabetito.—Wareka Mwakuri 8:12.
9. Tera aron rotakia aomata ngkana ko a toua te mwaneka ae te bwabetito?
9 Ngkana ko a bwabetitoaki, ao bon aei te moani waaki ae moan te tamaroa n te beku iroun te Atua ae koaua. Ni karaoan te mwaneka aei, ko a rin iai n te kabobirimwaaka ae rangi n abwabwaki, are te kaniwanga iai bon te maiu n aki toki ao ai te kimwareirei ae reke mani karaoan nanon te Atua. (Ebera 12:2, 3) Ane ko na kakukureiia naba kaain am utu ake a kaman ira te kabobirimwaaka aei ao raoraom i nanon te ekaretia ni Kristian. Ma ae kakawaki riki i buakon baikai ni kabane, ko na boni kakimwareireia nanon Iehova. (Wareka Taeka N Rabakau 23:15.) E koaua bwa tao tabeman a na aki kona n ota bwa e aera ngkai ko motinnanoa taromaurian Iehova, ao tao a na nanokokoraki n am motinnano. Tao a kona naba n riribaiko. Ma ko na bon tokanikai i aoni kangaanga aikai.
Te Nanokokoraki ke Ribaakim Irouia Tabeman
10, 11. (a) Baikara titiraki aika kona n titirakiningkami iai aomata ni kaineti ma ami motinnano ae te beku iroun te Atua? (b) Tera reireiam man aron Iesu ni kaekai titiraki ibukin te taromauri ae koaua?
10 A kona n aki mataata raoi n am motinnano ibukin te beku iroun Iehova, raoraom n reirei, kaain rarikim ao am koraki. Tao a kona n titiraki bwa bukin tera bwa ko a tia ni motikia bwa ko na karaoa aei ao n nanokokoraki ibukin baika ko kakoauai. E na tera arom iai? Ni koauana, ko riai n rinanoi raoi am iango ao am namakin n te aro are ko na kona iai ni kabwarabwaraa bukin am motinnano. Iai riki te katoto ae tamaroa nakon ana katoto Iesu aika ko kona ni kakairi iai ngkana ko kaekai titiraki ni kaineti ma baika ko kakoauai?
11 E kairi aia iango mataniwi n te Aro n I-Iutaia Iesu nakon kiibu aika a tuai ma n nonoria mai mwaina, ngke a kauataoi aia titiraki nakoina ibukin te mangauti. (Te Otinako 3:6; Mataio 22:23, 31-33) Ngke e titirakinna te tia koroboki temanna bwa e ngaa te tua ae te kabanea ni kakannato, ao Iesu e mwanewei kibun te Baibara aika kaineti raoi ma aei nakoina. E rangi ni kakaitau te mwaane anne nakon Iesu ibukin te kaeka anne. (Nakoaia Ibonga 19:18; Te Tua-Kaua 6:5; Mareko 12:28-34) E a karekea te “raure irouia aomata,” aron Iesu ni kamanena te Baibara ao arona n taetae ao a aki kona ana kairiribai ni kammarakia. (Ioane 7:32-46) Kabongana te Baibara ngkana ko kaekai titiraki ibukin am onimaki ao kaeka “ma te nimamanei ma te maku.” (1 Betero 3:15) Ngkana ko aki ataa kaekaan te titiraki teuana, kaotia bwa ko aki tauraoi ni kaekaa ma ko na karaoa moa am kakaae iai. Imwina, nenera te titiraki anne ni kamanenan te Watch Tower Publications Index ke te Watchtower Library on CD-ROM ngkana e a tauraoi n am taetae. Ane kam na “ata te aro ae riai ba kam na kaekaia aomata,” iai man ami katauraoi raoi.—I-Korote 4:6.
12. E aera ngkai ko aki riai ni kariaia kabwaraan nanom n te bwainikirinaki?
12 Ko kona naba ni kaaitara ma titiraki aika bati riki ibukin am motinnano ni kani beku iroun te Atua ao baika ko kakoauai. Ni koauana, e taua ngkai taekan te aonnaba ana kairiribai te Atua ae Tatan te Riaboro. (Wareka 1 Ioane 5:19.) Ti bon aki kona ni kaantaningaia bwa a na bane aomata ni kamoamoaira ke n tatangirira, ao ko na boni bae ni kaaitara ma te riribai. Tabeman, a kona n ‘taetaebuakaiko,’ ao a kona n teimatoa ni kakaraoia. (1 Betero 4:4) Ma uringnga, bon tiaki tii ngkoe ae riki anne nakoim. E a tia naba Iesu Kristo ni kaaitara ma te bwainikirinaki. E a tia naba te abotoro Betero ni bwainikirinaki ao e korea ae kangai: “Ngkami aika kam tangiraki, kam na tai mimi n te bwai ni kamaraki ae nang kataingkami, ngke kaanga e ituingkami te bwai teuana ae kamimi. Ma ngkai kam buokanibwai ni marakini Kristo, ao kam na kimareirei.”—1 Betero 4:12, 13.
13. E aera ngkai a kona ni kimwareirei Kristian ngkana a bwainikirinaki?
13 Te nanomwaaka i aan te bwainikirinaki ke te riribai ibukina bwa te Kristian ngkoe, e boni karika te kimwareirei. Bukin tera? Ibukina bwa ngkana e tatangiriko te aonnaba, e kaotaki iai ngkanne bwa ko maiuakina ae boraoi ma ana kaetieti Tatan, ao tiaki te Atua. E kauring ni kangai Iesu: “A na reke kaimi, ngkana a bane ni kamoamoaingkami aomata! ba a karaoa aron aei aia bakatibu nakoia burabeti ni kewe.” (Ruka 6:26) E kaotiotaki n te bwainikirinaki, unin Tatan ma kaain ana waaki ibukina bwa ko beku iroun Iehova. (Wareka Mataio 5:11, 12.) Ao bon te bwai ni kakimwareirei “ngkana kam taetaebuakaki i bukin arani Kristo.”—1 Betero 4:14.
14. Baikara uaa aika raraoi man te teimatoa ni kakaonimaki nakon Iehova n aki ongea te bwainikirinaki?
14 Ngkana ko teimatoa ni kakaonimaki nakon Iehova n aki ongea te riribai, iai kakabwaiam aika aua aika a kona n reke iroum. Ko a uarongorongo iai ibukin te Atua ao Natina. A kaungaki tarim n te onimaki n arom ni kakaonimaki ao n nanomwaaka. A kona ni kaungaki taani mamataku tabeman aika tuai n ataa Iehova, bwa a na ukoukoria. (Wareka I-Biribi 1:12-14.) Ao ngkai ko namakina aron Iehova n anganga te kakorakora ibukin te nanomwaaka i aani kataaki, e a rikirake iai tangirana iroum.
E Uki Nakoim “te Mataroa ae Warebwe”
15. Tera te “mataroa ae warebwe” ae uki nakon te abotoro Bauro?
15 E korea ae kangai te abotoro Bauro ni kaineti ma ana mwakuri ni minita i Ebeto: “E uki nako iu te mataroa ae warebwe ae kamateraoi.” (1 I-Korinto 16:8, 9) Bon te mataroa ae nakon te mwakuri ae bati ibukin tataekinan te rongorongo ae raoiroi ao karekeaia taan rimwini Kristo n te kaawa anne. Ni butimwaean te mwioko anne, e a buokiia iai aomata aika mwaiti Bauro bwa a na ataa Iehova ao n taromauriia naba.
16. A kanga n rin n “te mataroa ae uki” kaain te nikira aika kabiraki n 1919?
16 N 1919 ao Iesu Kristo ae neboaki e kaaki “te mataroa ae uki” i mataia nikiraia taani kabiraki. (Te Kaotioti 3:8) A rinanon te mataroa anne ao a a moanna n tataekina te rongorongo ae raoiroi ao n reirei ana koaua te Baibara ma te ingaingannano ae korakora riki nakon are mai mwaina. Tera uaan aia mwakuri ni minita? E a tia ngkai n roko te rongorongo ae raoiroi nako tabon aonnaba, ao ai itua tabun te mirion aomata aika a a tia ni karekea te kaantaninga ibukin te maiu n aki toki n te waaki ae boou i aon te aba.
17. Ko na kanga ni kona n rin n “te mataroa ae warebwe ae kamateraoi”?
17 E teimatoa n uki “te mataroa ae warebwe ae kamateraoi” nakoia ana toro Iehova ni kabane. A namakina te kimwareirei ao te raunnano te koraki ake a rinanon te mataroa aei, kioina ngkai e a korakora riki ae a karaoia n te mwakuri n tataekina te rongorongo ae raoiroi. Tera aron kakawakin te mwioko ae akea kabotauana, ni kaineti ma buokaia aomata nako bwa a na “ira nanon te euangkerio,” iroumi ngkami aika rooro n rikirake aika ana toro Iehova? (Mareko 1:14, 15) Ko a tia n iangoia bwa ko na regular ke n auxiliary bwaiania? Te mwakuri ni kateitei ibukin te Tabo n Taromauri, te mwakuri n te Betaera ao te mwakuri ni mitinare, boni mwioko aika kona n uki nakoia aika mwaiti mai buakomi. Kioina ngkai e a kani bane ana waaki Tatan ae buakaka i aon te aonnaba, uataboan ngkanne te mwakuri ibukin te Tautaeka n Uea aikai, a a rikirake riki kaumakaia ni katoabong. Ko na rinanon te “mataroa ae warebwe” ngkai iai am tai?
“Kata Iehova ma n Noria ba E Raoiroi”
18, 19. (a) Tera are e buoka Tawita bwa e na korakora nanona ni kani beku iroun Iehova? (b) E oti man tera bwa e aki roko n te uringaaba Tawita ngkai e beku iroun te Atua?
18 E kaungaia aomata nako te tia areru ae kairaki iroun te taamnei bwa a na “kata Iehova ma n noria ba E raoiroi.” (Taian Areru 34:8) Ngke te tia kawakin tiibu Uean Iteraera ngkoa are Tawita, ao e kamaiua Iehova man kaaitarana irouia maan aika tiritiri. E boutokaia te Atua ngke e aitara n un ma Koria ao e kamaiua naba man taiani kabuanibwai aika bati riki. (1 Tamuera 17:32-51; Taian Areru 18, atun te areru) E kairaki Tawita bwa e na korea ae kangai ibukin ana akoi te Atua ae korakora: “Iehova, a bati am makuri aika kamimi aika Ko karaoi, ma nanom aika kaeti nako ira. A aki konaki ni baireaki ni warekaki nako Im.”—Taian Areru 40:5.
19 E rikirake ni korakora tangiran Iehova iroun Tawita ao e kani kamoamoaa ma nanona ni kabane ao ana iango ni kabane. (Wareka Taian Areru 40:8-10.) Ni waakinakon te ririki, e aki roko n te uringaaba Tawita ni kabanean maiuna n taromaurian te Atua ae koaua. Ibukina bwa e maiuakina tangiran te Atua, te bwai ae moan te kakawaki ngkanne irouna bon nibwan te kakukurei ae akea n ai arona. E taku Tawita ngke e a kara: “Bon au kaantaninga Ngkoe, te Uea ae Iehova: Bon au mwioko Ngkoe ma ngke te tei ngai. Ao ngkana I a kara ma n iaia, te Atua, ao tai kitanai naba.” (Taian Areru 71:5, 18) E a rikirake ni korakora onimakinan Iehova iroun Tawita ao ana iraorao ma Ngaia, e ngae naba ngke e a rikirake ni mamaara rabwatana.
20. Bukin tera ngkai te beku iroun te Atua bon te mwakuri ae te kabanea n tamaroa ae ko riai ni kabanea maium iai?
20 E kakoauaki ni maiun Iotua, Tawita, ao Timoteo bwa te beku iroun Iehova bon te mwakuri ae te kabanea n tamaroa ae ko riai ni kabanea maium iai. Uaiakinan te mwakuri ni kareketianti ae aki teimaan, e aki kona ni boraoi ma te kakabwaia ae teimaan are ko karekei man ‘te toro iroun Iehova n nanom ma taamneim ni kabane.’ (Iotua 22:5) Ngkana ko tuai ni katabua maium nakon Iehova n te tataro, ao titirakiniko ni kangai, ‘Tera ae tukai man rikiu bwa temanna Ana Tia Kakoaua Iehova?’ Ngkana te tia taromauria Iehova ngkoe ae ko a tia ni bwabetitoaki, ko tangiria ni karikirakea kimwareireim i nanoni maium? Ngkanne kamwaita riki am mwakuri ni beku iroun Iehova, ao teimatoa ni karikirakeko ngkai te Kristian ngkoe. Te kaongora ae imwina, e na kaotia nakoim bwa ko na kanga ni karikirakeko n aanga aikai rinanon ana katoto te abotoro Bauro.
Ko na Kanga ni Kaeka?
• Anga bukina aika uoua ae ti riai iai ni beku iroun te Atua.
• Tera are e buoka Timoteo ni motinnanoia bwa e na beku iroun te Atua?
• E aera ngkai ti riai n teimatoa n aki kaingingaki ngkana ti kaaitara ma te bwainikirinaki?
• Baikara mwioko ibukin te beku aika tauraoi ibukim?
[Taamnei n iteraniba 23]
Te beku iroun Iehova bon te mwakuri ae te kabanea n tamaroa ni maiura