E Mwannanoia Ana Toro Aika Kara Iehova

“E aki ribuaka te Atua ni manuoki ami makuri ma ami tangira are kam kaotia nakon arana.”​—EBERA 6:10.

1, 2. (a) Tera ae ko uringnga ngkana ko nora te aomata ae iaia iran atuna? (b) Tera aron taraaia Kristian aika a kara iroun Iehova?

NGKANA ko noriia kaara n te ekaretia aika iaia iran atuia, ko kauringaki iai te karaki teuana mani bokin te Baibara ae Taniera ke ko aki? N te miitara are E angan Taniera te Atua, ao e kabotaua iai arona Iehova ae te Atua bwa kaanga e iaia iran atuna. E korea ae kangai Taniera: “I mataku ni karokoa kateani kaintokanuea, ao E tekateka temanna ae iai ma ngkoangkoa: e mainaina kunnikaina n ai aron te tinoo, ao iran atuna ai aroni buraen te tiibu ae itiaki.”​—Taniera 7:9.

² Bon teini buraen te tiibu bwa e mainaina n taai nako. Mangaia are te ira ae mainaina ao te ara ae “temanna ae iai ma ngkoangkoa” e kaira te iango nakon ana ririki te Atua ae a a rangi ni mwaiti, ao wanawanana ae korakora. N aroarona aika uoua aikai e a bon tau iai bwa ti na anganna te karineaki ae moan te korakora. Ma tera ngkanne aron taraaia unimwaane ao unnaine aika kakaonimaki aika a kara iroun Temanna ae iai Mangkoangkoa, ae Iehova? E taekinaki n Ana Taeka te Atua bwa “te baunuea ae tamaroa te atu ae iaia, e na reke i nanoni kawain te raoiroi.” (Taeka N Rabakau 16:31) Eng, ngkana e a moanna n iaia iran atun te Kristian ae kakaonimaki, boni moan te tamaroa taraana anne iroun te Atua. Ko taraia naba taari mwaane ao aine aika kara n aron taraiia iroun Iehova?

Bukin Tera Bwa A Rangi ni Kakawaki?

3. Bukin tera bwa a rangi ni kakawaki iroura raao n onimaki aika a kara?

³ Ibuakoia ana toro te Atua aika kara aika a rangi n tangiraki, boni kaain Aia Rabwata n Tautaeka Ana Tia Kakoaua Iehova ao mataniwi aika mwamwananga rimoa ao aika ngkai. Ao iai naba bwaiania aika ingainga nanoia, ao taan uarongorongoa te Tautaeka n Uea aika ikawai n te onimaki aika taari mwaane ao aine aika kakaonimaki ni beku n ara ekaretia. Tao ko boni bae ni kinaia tabeman aika a ingainga nanoia n tataekina te rongorongo ae raoiroi i nanon ririki aika bati. Ao a a tia ni kaungaki nanoia rooro n rikirake ao ni bitaki naba maiuiia n aia katoto aika raraoi. Tabeman raao n onimaki aika a kara a a tia n uotii uotaia aika rawawata ni mwiokoaia ao n tia naba n nanomwaaka i aan te bwainikirinaki ibukin te rongorongo ae raoiroi. E rangi ni kakawaki iroun Iehova ao “te toro ae kakaonimaki ae wanawana” aia ibuobuoki ni kabane nakon te mwakuri ibukin te Tautaeka n Uea n taai ake rimoa ao ngkai naba.​—Mataio 24:45.

4. Bukin tera bwa ti riai ni karineia ao n tataro ibukia Kristian aika a kara?

⁴ A bon tau ni kaitauaki ao ni karineaki kaara aika kakaonimaki irouia ana toro Iehova ae te Atua ake tabeman riki. Ni koauana, a irekereke Ana Tua te Atua Rinanoni Mote ibukin tabeakinaia ao karineaia kaara ma maakan Iehova. (Nakoaia Ibonga 19:32) Ti riai ni katoatai n tataro ibukia aika kakaonimaki aikai ao ni kaitaua te Atua n aia mwakuri korakora ibukin aia tangira. E tataro naba te abotoro Bauro ibukia raona ni mwakuri aika tangiraki irouna aika a ataei riki ao aika a kara naba.​—Wareka 1 Tetaronike 1:2, 3.

5. Ti na kanga ni kona ni kakabwaiaki man ara iraorao ma taan taromauria Iehova aika a kara?

⁵ Irarikina, a kona ni kakabwaiaki kaain te ekaretia ni kabane man aia iraorao ma Kristian aika a kara. A a tia n ikoiko aia atatai aika rangi ni kakawaki taan taromauria Iehova aika kakaonimaki aika a kara rinanon aia reirei, mamatakuia ao baike a kaaitara ma ngaai. A ataia ae a bon riai ni bwaina te taotaonakinnano ao te atataiaomata, ao a rangi ni kimwareirei ao n raunnanoia ngkai a a manga reiakinia kanoaia baike a a tia n reiakini. (Taian Areru 71:18) Bwaina te wanawana ngkami rooro n rikirake, ao kam bia anaa wanawanami man nibwan te wanawana aei n aromi n itiia te ran man te mwanibwa ae nano.​—Taeka N Rabakau 20:5.

6. Ko na kanga ni kaotia nakoia aika a kara bwa a rangi ni kakawaki iroum?

⁶ Ko kaotiotia nakoia aika a kara bwa a rangi ni kakawaki iroum n ai aroni kakawakiia iroun Iehova? Te anga teuana ni karaoan aei, boni man tuangakiia ae e rangi ni korakora tangiraia iroum ibukini kakaonimakiia ao a rangi ni kakawaki aia iango iroum. Irarikina, ngkana ko iri nanon aia reirei ke aia iango, ko a kaotia iai bwa ko karineia ma nanom ni koaua. A mwaiti Kristian aika a kara ake a kona n tanrikaki n uringi reireiaia aika raraoi mairouia kaara ake a kakaonimaki ao aroia ni kakabwaiaki ngke a maiuakin n aia bong nako.a

Kaota te Nanoanga n Aanga Aika Manena

7. E angan antai te mwioko ae kakawaki Iehova ibukin tabeakinaia kaara?

⁷ Iai mwiokoaia ae kakawaki mairoun te Atua aia utu te koraki ake a a kara, bwa a na katauraoi baika a kainnanoi ibukini maiuiia. (Wareka 1 Timoteo 5:4, 8.) E rangi ni kukurei Iehova ngkana a kakororaoa mwiokoaia aei kaain utu aikai ibukia aia koraki aika a kara. Ao ibukin anne a a kaotia iai bwa a tabeakinia kaara n aron ae e kakaraoia te Atua. E boutokai utu aikai te Atua ao e kakabwaiaia ibukin aia kakorakora ao ibukin naba aroia n anga ngaiia n aei.b

8. E aera ngkai a riai ekaretia ni kaotiota tabeakinaia Kristian aika a kara?

⁸ N aron naba anne, e kukurei Iehova n ekaretia ake a anga aia ibuobuoki nakoia kaara aika kakaonimaki n aia ekaretia aika kainnanoi buokaia, ma akea aia utu aika kaain te onimaki ke aika a kukurei n tabeakiniia. (1 Timoteo 5:3, 5, 9, 10) Ngaia are ni karaoan aei, a a kaotia iai kaain te ekaretia bwa a ‘nanona te nano ae tii te arona, a atataiaomata, a tangiriia taari ao a nanoangaia’ kaara. (1 Betero 3:8) E kaikonakaki raoi aroia n tabeakinia kaara n aia ekaretia ngke e katerea raoi Bauro bwa ngkana e maraki bwain te rabwata teuana, ao a “a bane naba ni maraki bwain te rabata ma ngaia.” (1 I-Korinto 12:26) Karaoani mwakuri n nanoanga ibukia kaara, e a kaotiotaki iai te boto n reirei are e wai mai iai ana reirei Bauro ae kangai: “Kam na i buobuoki n uotami aika rawawata, ao kam na toua mwin ana tua Kristo iai.”​—I-Karatia 6:2.

9. Baikara irian te kara ae e kona ni karawawataaki iai te aomata?

⁹ Baikara uota aika rawawata aika kaaitara ma ngaai kaara? A mwaiti aika a kakai kua. Tao a kona naba n namakinna bwa a a bon riaon aia konabwai tii karaoan tabeia aika rangi ni kainnanoi riki n aroni kawaran te taokita, mwakuri aika irekereke ma kabwakan te mita ke nikiran reeta, kaitiakan te auti ao katauraoan te amwarake. Kioina ngkai irian te kara bwa e a kerikaki iai te kan amwarake ao te moi, tao a kona naba n iangoia bwa a aikoa riai ni kabatiaa kanaia ma nimaia n aron ae a bon riai ni karaoia. A kona naba n iangoa anne ni kaineti ma aia reirei i bon irouia n te Baibara ao irirakin bobotaki. E kona naba n riki bwa aia kangaanga te wareware ao te kakauongo n taai ni bobotaki ni Kristian ibukina bwa ngkai a a rikirake ni kara, a a boni kaa mataia ao ni moanna ni bono taningaia. Ao e kona naba ni kakua irouia tii katauraoaia nakoni bobotaki ni Kristian. Ma tera ngkanne ae a kona ni karaoia tabeman ibukia kaara?

Arom ni Kona n Ibuobuoki

10. Tera ae a kona ni karaoia unimwaane bwa a aonga n taraia raoi bwa a anganaki kaara baika kainnanoi?

¹⁰ N ekaretia aika mwaiti, ao a tararuaki raoi kaara n te aro ae moanibaan te tamaroa. A buokaki irouia taari mwaane ao aine aika tatangira ni kabooani bwaai ibukiia, te kuka ao te kaitiaki. A buokiia naba kaara n aia ukeuke i bon irouia, ni katauraoia nakoni bobotaki ao n iriri n te mwakuri ni minita ni katoatai. A kona naba n raonaki i aon te bwati irouia taani Kakoaua aika a ataei riki ke tao ni karekei baoia. Ngkana a aki kona n nakonako, a kona n ongora kanoani bobotaki i aon te tarebon ke e raweaki te kabwarabwara ibukiia. A riai unimwaane n taraia raoi bwa a na waakinaki aaro n ibuobuoki bwa e aonga ni kaitaraaki raoi te baere a kainnanoia kaara ake a mena n aia ekaretia.c

11. Karakina aroia kaain te utu teuana ni buoka temanna te tari te mwaane ae e a kara.

¹¹ A kona naba Kristian n tatabemania nako ni karaoi mwakuri n akoi ao n tituaraoi. Imwini mateni buun temanna te tari te mwaane ae e a kara, ao e a aki kona ni kabwakaa boon ana auti n ana mwane ni kara ae tii teuana. E a tia teuaei ma buuna n reirei n te Baibara ma taanga ao natiia aine aika uoman aika rooro n rikirake ae iai aia auti ae rangi ni bubura. Ao e a anganaki irouia taanga aikai uoua ruun aia auti bwa e na kamanenai. A uaia n amwamwarake, ni ngarengare ao ni kaai ni kaotiota te itangitangiri n taai aika bati i nanon 15 te ririki. A rangi ni bati kakabwaiaaia ake a ataei riki mani kakaonimakin ao ana atatai teuaei ake e karekei ngkoa mani baike e a tia ni kaaitarai. E kakabwaiaki naba teuaei man te iraorao ae rangi ni kakimwareirei. E maeka te unimwaane aei ma naakai ni karokoa matena ngke ai 89 ana ririki. A boni kaitaua naba ngkai te Atua te utu aei ibukini kakabwaiaaia aika bati ake a reke n aia tai n iraorao ma ngaia. A a tia n aki ‘kabuaa kaniwangaia’ te utu aei bwa a a tia ni buoka te rao ae te tia rimwin naba Iesu Kristo.​—Mataio 10:42.d

12. Tera ae ko kona ni karaoia ibukini kaotan am nanoanga nakoia taari mwaane ao aine aika a kara?

¹² Tao e kona n aki angaraoi karaoan ae a karaoia kaain te utu aei iroum, ma tao ko kona n ibuobuoki nakoia kaara bwa a na iriri ni bobotaki ao n te mwakuri ni minita. Ko kona ni kaoia nakon am auti ao ni kairiia ngkana ko nako ni bikiniki. Ko kona ni kawariia riki n taai ake a taonaki iai n te aoraki ke ngkana a a bwaka waeia. Irarikina, ko kona ao ko riai ni karineia n aroia ikawai. A riai naba ni kairaki Kristian aika a kara ibuakoni maroroakinani babaire ni kabane ibukiia, ngkana e bon teimatoa n raoiroi aia konabwai n iango. E ngae naba ngkana a a rangi ni mwamwaninga, ma a kona naba n namakina karinean rineia ngkai a a kara.

E na Bon Aki Mwanuokin Ami Mwakuri Iehova

13. Bukin tera bwa e kakawaki kaotiotan tabeakinan aia namakin Kristian aika a kara?

¹³ E kakawaki kaotiotan tabeakinan aia namakin kaara. Bon te bwai ae nonoraki irouia kaara bwa a rangi n nananokawaki ibukina ngkai a aikoa kona ni kakororaoi baike a a tia ngkoa ni kona ni karaoi n aia tai ni kairake ao ni marurung riki. N te katoto, iai temanna te tari te aine ae te regular bwaiania ae kakaonimaki ni beku ibukin Iehova i nanon tao 50 tabun te ririki ae ituaki n te aoraki ae kakaiaki. Ibukin aei e a ririkirake mamaarana iai ao n tokina e a rangi ni kangaanga irouna kakaaeani bobotaki. E aki toki n tatang neiei ni kabotauan ana mwakuri ni minita are rimoa ma baika a tiatiana ana mwakuri ngkai. E kabaraka atuna n tang ao e taku, “Ai bon akea bongau.”

14. Tera te kaungaunga ae a kona ni karekea ana toro Iehova aika a kara man taian areru?

¹⁴ Ngkana tao ko a kara, ko a tia n namakini aeka n namakin aika kammaraki aikai? Ke iai taai aika ko namakinna bwa e a kitaniko Iehova? Tao e a tia n namakina aekan anne te tia areru ngke e a kara naba, bwa e bubutiia Iehova ni kangai: “Tai teweai nako n au bongi ni kara; tai kitanai ngkana e a toki korakorau . . . Ngkana I a kara ma n iaia, te Atua, ao tai kitanai naba.” (Taian Areru 71:9, 18) Ni koauana, e na aki kitana teuare e otea te areru aei Iehova, ao E na bon aki kitaniko naba. N te areru riki teuana, ao e kaota iai onimakinan ana boutoka te Atua Tawita. (Wareka Taian Areru 68:19.) Onimakinna raoi bwa ngkana te Kristian ngkoe ae ko kakaonimaki ao ko a kara, bon raom Iehova ao e na teimatoa ni boutokaiko ni katoa bong.

15. Tera ae e kona ni buokiia kaara bwa a na teimatoa n iaiangoi baika kaunganano?

¹⁵ E uringi n taai nako ami mwakuri ni kabane ngkami taani Kakoaua ibukin Iehova aika kam a kara ake kam a tia ni karaoi ao aika kam tabe naba ni karaoi ibukin neboana. E taekina ae kangai te Baibara: “E aki ribuaka te Atua ni manuoki ami makuri ma ami tangira are kam kaotia nakon arana.” (Ebera 6:10) Mangaia are rarawa ni karikirakei iango aika aki raraoi, n iangoan ae kairua bwa ko a taku bwa ai akea riki bongam ibukin Iehova ngkai ko a kara. Kekeiaki n onea mwin te rawawatannano ao te bwarannano, n iango aika kaungaunga. Kimwareirei ibukini kakabwaiam ao am kaantaninga ae raoiroi ibukin taai aika imwaim! Iai ara ‘kaantaninga ibukin taai aika imwaira,’ aika bwaai aika a kabanea n tamaroa ao a beritanaki iroun ara tia Karikiriki. (Ieremia 29:11, 12; Mwakuri 17:31; 1 Timoteo 6:19) Iaiangoi baika ko kaantaningai, kataia n iangoia bwa aongkoa ko a boni kakairake nako naba, ao tai iangoia bwa e karako am ibuobuoki ni menam i buakoia kaain te ekaretia!e

16. E aera ngke e a iangoia temanna te unimwaane n te ekaretia ae e a kara bwa e a riai ni kerikaki man ana beku aei, ma e kanga te rabwata n unimwaane ni kaungaa?

¹⁶ Iangoa Johan ae ai 80 ana ririki are e rangi ni kakaonimaki ni kabanea ana tai n tabeakina raoi buuna are e a kakaiaki aorakina ae Nei Sannie.f A uatei n tiku irarikin neiei taari aine bwa e aonga ni kona n iri bobotaki Johan ao te mwakuri ni minita naba. Ma n taai aika tibwa nako, ao e namakinna teuaei bwa e a rangi ni kua ao e a moanna n iangoia bwa e a riai ni kerikaki mani mwiokoana ae te unimwaane n te ekaretia. E titirakinia raona n unimwaane Johan ma rannimatana aika waanako ni kangai: “Tera bongau n riki bwa te unimwaane ngkai I aki kona ni karaoi mwakuri aika manena n te ekaretia?” A karaua nanona raona n unimwaane bwa e rangi ni kakawaki rabakauna ao ana iango. A kaungaa bwa e na teimatoa ni beku bwa te unimwaane, e ngae ngkai e a tiatianaki ana mwakuri. E a rangi ni kaungaki Johan ao e a teimatoa ni beku bwa te unimwaane ao e a kakabwaiaki iai te ekaretia.

E Tabeakiniia Raoi Iehova

17. Baikara karaunano aika a anganaki Kristian aika kara man te Baibara?

¹⁷ E kateretereaki n te Baibara bwa a kona kaara n teimatoa ni kariki uaa n aia beku ibukin Iehova, e ngae naba ngkana a taonaki ni kangaanga aika irian te kara. E taku te tia areru: “Akana unikaki n uman Iehova . . . A na bon uaa nako naba ngkana a boni kara; a na ranran ao a na mawawa ni maiu.” (Taian Areru 92:13, 14) E ‘aki roko n te bwara nanon’ te abotoro Bauro are tao e a tia n aitara naba ma te aoraki, ‘e ngae ngke e a kume ni kara aomatana ae i ao.’​—Wareka 2 I-Korinto 4:16-18.

18. Bukin tera bwa a kainnanoa te ibuobuoki mairouia aomata raao n onimaki aika a kara ao taan tabeakiniia?

¹⁸ A mwaiti katoto ni boong aikai aika kakoauaki iai bwa a “bon uaa nako naba” kaara. Ma e kona naba ni katabeaianga kangaangan te aoraki ao te kara, nakoia ake iai kaain aia utu aika a kabanei aia tai n tabeakiniia. A kona naba n namakina te kua ae korakora taan tabeakiniia. Iai naba mwiokoan te ekaretia bwa a a kakabwaiaki ni kammwakuran aia tangira ibukia ake a a kara ao te koraki ake a tabeakiniia. (I-Karatia 6:10) E kaotaki n aeka n ibuobuoki akanne bwa ti aki tii kangai nakoia naakai, “kam na aang, ao kam na nuai” ma ti bon anga ara ibuobuoki ni karaoan mwakuri aika manena ibukiia.​—Iakobo 2:15-17.

19. Bukin tera bwa akea te bwai ae a nanououa iai Kristian aika kakaonimaki aika a kara n iaiangoan taai aika imwaia?

¹⁹ A kona ni bitaki baika e kona ni karaoi te Kristian ngkana e a rikirake ni kara, ma maanin te tai e bon aki kona ni kauarerekea ana tangira Iehova ibukia ana toro aika kakaonimaki ni koaua aika a kara. Ni kaitaran anne, a bane ni kakawaki i matan Iehova Kristian aika kakaonimaki aika a kara ni kabane, ao e na bon aki kitania. (Taian Areru 37:28; Itaia 46:4) E na boni kateimatoaia ao ni kaiririia Iehova rinanon aia tai ni kara.​—Taian Areru 48:14.

[Kabwarabwara ae nano]

Ko na Kanga ni Kaeka?

• E aera ngkai a kakawaki iroumi Kristian aika a kara aika kakaonimaki?

• Ti na kanga ni kaota ara nanoanga ibukia raora n taromauri aika a kara?

• Tera ae e kona ni buokiia ana toro Iehova aika a kara bwa a na iaiangoi baika kaunganano?

[Taamnei n iteraniba 23]

A rangi ni karineia kaara kaain te ekaretia