Taetae ni Burabeti Ibukin te Mesia

A A KAMANI kariariaa rokon te Mesia te natannaomata ae Iutaia, ibukina bwa a ataa are a koreia Itaia ma burabeti riki ake tabeman. Ni koauana, n ana bong Iesu ao a mwaiti I-Iutaia ake “a kaantaninga” kaotin te Mesia are e a uakaan. (Ruka 3:15) E kakawaki ataan ae a taekinaki naba n te Baibara rongorongon te Mesia aika kamimi. Akea te aomata temanna ae kona ni kaman taekini baika a na riki ke ni baireia bwa e na aitara Iesu ma baikai.

Rongorongoni Bungiakin te Mesia. E taetae ni burabeti Itaia bwa e na bungiaki te Mesia, ke te Kristo, iroun te teinnaine. E korea ae kangai te abotoro Mataio imwini kabwarabwaraani kakai ni kaineti ma bungiakin Iesu: “Ao a roko baikai ni kabane, ba e na kakoauaaki ana taeka te Atua are iroun te burabeti, ngke e kangai, Noria, ane e na kariki te kibono, ao e na bungia te nati te mwane.” (Mataio 1:22, 23; Itaia 7:14) E taetae ni burabetinna naba Itaia bwa e na kaoti Kristo mani kanoan Tawita ao e katerea raoi taman Tawita ae Iete. E boni koaua bwa boni kanoan Tawita Iesu. (Mataio 1:6, 16; Ruka 3:23, 31, 32) Ngaia are, imwaini bungian Iesu, ao e tuanga tinan Iesu ae Maria te anera ae Kabiriera ni kangai: ‘E na anganna te Atua are te Uea, ana kaintokanuea tamana are Tawita.’— Ruka 1:32, 33; Itaia 11:1-5, 10; I-Rom 15:12.

Rongorongoni Maiun Iesu. Ngke e a ikawai Iesu ao e wareka ana taetae ni burabeti Itaia ni kabaibati n te tinakoka are i Natareta, n ikotaki naba ma taeka aikai: “E mena Tamnein Iehova i aou, ba E kabirai ba N na tataekina te euangkerio nakoia akana aki kaubwai.” E kaineta te taetae ni burabeti aei Iesu nakoina ao e taku: “N te bong aei e a kakoroaki bukin ana taeka te Baibara aei i nanon taningami.” (Ruka 4:17-21; Itaia 61:1, 2) E taetae ni burabetina naba aron Iesu Itaia bwa e na akoi ao e na nimamannei nakoia akana kainnanoi kamarurungaia. E korea ae kangai Mataio: “A iria aomata aika uanao; ao E kamaiuia ni kabaneia, ao E tuangia ba a na aki kaotia: ba e na kakoauaki are atongaki iroun Itaia are te burabeti . . . E na aki mwamwangaingai, ao E na aki tatakarua . . . E na aki otea te maunei ae manamana.”—Mataio 8:16, 17; 12:10-21; Itaia 42:1-4; 53:4, 5.

Rongorongon Rawawatan te Mesia. E taetae ni burabetinna Itaia bwa e na aki butimwaeaki te Mesia irouia angia kaain Iteraera ma e na riki bwa “te atibu ni katatatata” nakoia. (1 Betero 2:6-8; Itaia 8:14, 15) Ni koauana, n aki ongei ana kakai Iesu aika bati, ma aomata a “aki onimakinna: ba e na kakoauaki ana taeka Itaia are te burabeti, are e atongnga ni kangai, Te Atua, ai antai ae ira nanon ara rongorongo?” (Ioane 12:37, 38; Itaia 53:1) Teuana riki bukina ngkai a aki onimakina Iesu bwa te Mesia, kioina bwa e a taabangaki te koaua ae kairua. Bwa a kakoauaa ae e na waekoa te Mesia ni kainaomataa te natannaomata ae Iutaia man tautoronakina n te tautaeka n Rom. Ao e na manga katea te tautaeka ae inaomata are e beritanaki nakoni kanoan Tawita i aon te aba. Ibukina bwa e karawawataaki Iesu ao ni mate, a aikoa kona angia I-Iutaia ni butimwaeia bwa te Mesia. Ma ni koauana, e bon taetae ni burabetinna Itaia bwa e na aitara ma te rawawata te Mesia imwain rikina bwa te Uea.

E taetae ni burabetinaki te Mesia n te boki ae Itaia ni kangai: “I anga akuu nakoia taan ororo . . . I aki karaba matau nakon te kamaamaaeaki ma te bawareaki.” E taekina te bwai are e riki Mataio ngke e kataaki Iesu ni kangai: “A bawarea moana, ao a oroia n timoinibaiia: ao tabemang a oroia n nanoni baiia.” (Itaia 50:6; Mataio 26:67) E korea ae kangai Itaia: “E kananorinanoa i bon i Rouna, ao E aki kaurea wina.” Ngaia are ngke e titirakina Iesu Birato ibukin aia bukibuki I-Iutaia ao Iesu “E aki taetae teutana nako ina; ma ngaia are e bati ni mimi iai te tia tau-taeka.”—Itaia 53:7; Mataio 27:12-14; Mwakuri 8:28, 32-35.

Rongorongoni Maten te Mesia. E waakinako kakoroani bukin ana taetae ni burabeti Itaia ni maten Iesu ao n taai ake imwina naba. E taetae ni burabeti Itaia ni kangai: “E taunaki i buakoia akana a buakaka ao i rarikia akana a kaubai.” (Itaia 53:9, BK) E na kanga ni kakoroaki nanon te taetae ni burabeti ae taraa ni kauntaba nanona aei? Ni maten Iesu, ao e tauraki i marenaia uoman taani kamwarua. (Mataio 27:38) Ma imwina riki, ao e a kawenea rabwatan Iesu n ana ruanimate ae e ekea i nanon te bwaa ae tuai ni kamanenaaki, te aomata ae kaubwai ae Ioteba ae te I-Arimataia. (Mataio 27:57-60) N tokina, e a kakoroaki iai bukin teuana te bwai ae moan te kakawaki man ana taetae ni burabeti Itaia ni maten Iesu. E taekina ae kangai Itaia ibukin te Mesia: “E na karaoiroiia aomata aika bati au tia makuri ae raoiroi, ao E na uouoti aia buakaka.” E boni katauraoa te karea ni kaboomwi maten Iesu bwa a aonga ni kainaomataaki man te karawawataaki n te bure aomata ni kabane aika kakaonimaki.—Itaia 53:8, 11; I-Rom 4:25.

Taetae ni Burabeti Aika A na Boni Kakoroaki Bukia

Ibukini kakoauaan raoi kinaakin te Mesia n aron ae taekinaki n te Baibara, a a kabatiaa riki aia tai abotoro ao Iesu ni mwanewei ana taetae ni burabeti Itaia nakoni bokin te Baibara ake tabeua. Ma tiaki tii te boki ae Itaia ae e taetae ni burabetin taai aika imwaira. A mwaiti naba taetae ni burabeti n te Baibara n Ebera aika kakoroaki bukia iroun Iesu, ana Tautaeka n Uea ao baika raraoi ake e na kakororaoi n taai aika imwaira.a (Mwakuri 28:23; Te Kaotioti 19:10) E na kanga ngkanne ni kakoauaaki raoi bwa a na kakoroaki bukin taetae ni burabeti aikai? E tuangia Iesu I-Iutaia ake a ongora irouna ni kangai: “Tai taku i nanomi ba I roko ba N na kaki te tua ma burabeti [ae bon te Baibara n Ebera]: I aki roko ba N na kaki, ma I roko ba N na kakoroa bukina. Ba e koaua ae I a tuangngkami ba ngkae e tuai ni mauna karawa ma aonaba, ao e bon aki mauna te taurouro teuana ke te tamruru teuana man te tua, ngkai a tuai n roko bwaai ni kabane.”—Mataio 5:17, 18.

E katerea naba Iesu kakoroani bukin taetae ni burabeti n te Baibara ni kaineti ma baike a a tia n riki n ana tai ao baika a na bon riki. (Taniera 9:27; Mataio 15:7-9; 24:15) Irarikina, a bon taetae ni burabetini baika a na riki imwin aia bong Iesu ao taan rimwina, n ikotaki naba ma aika mwaiti aika ti a tia n nori ni boong aikai. N te kaongora ae imwina ao a na maroroakinaki iai baikai ao kakoroani bukin taetae ni burabeti tabeua riki aika tuai n riki aika n te Baibara.

[Kabwarabwara ae nano]

[Taamnei n iteraniba 4]

‘Ane e na bungia te nati te mwaane te teinnaine’

[Taamnei n iteraniba 5]

“I aki karaba matau nakon te kamaamaaeaki”