Mwiokoani Maria n Ana Kantaninga te Atua

INANON ana mwakuri ni minita Iesu, e kanenea bwanaana te aine temanna i buakon aia karongoa te koraki ae uanao ao e takarua ni kangai: “E a kabaia te biroto are bungiko, ma mamma ake Ko mammai.” Ngke arona bwa e tangiria Iesu bwa e na karineaki tinana ao aio te tai ae e kona ni kamoamoaa iai. N oneani mwin anne, e kaeka ni kangai: ‘Tiaki ngaia anne ma a a kabwaia riki akana ongo ana taeka te Atua ma ni kawakinna.’​—Ruka 11:27, 28.

E aki angan tinana mwioko aika okoro Iesu bwa e na karineaki iai ao e aki naba tuangia taan rimwina bwa a na karaoa anne. E kanga ni boraoi te iango anne ma aroia taani kakoaua aika tatangira aika karinea Maria ao ni kamoamoaa? Ti na rinanoi taian reirei aika taabangaki ibukin tinan Iesu ni kaineti ma ae kaotaki n te Boki ae Tabu ae te Baibara.

“Ko Moa n Akoaki,” “Moan te Kabaia Ngkoe i Buakoia Aine”

E katanoataa te anera ae Kabiriera nakoni Maria aroni mwiokoana n ana kantaninga te Atua. N te tai anne, e kamauria n taku: “Ko na mauri, ngkoe ae ko moa n akoaki, E mena te Atua i roum.” (Ruka 1:28) E rairaki te taeka ni kamauri anne n te Baibara teuana ni kangai: “Ko na mauri, ngkoe ae moan te akoaki. E mena te Uea iroum.” Ai tibwa teutana imwin anne ao e kamaura Maria Eritabeta ni kangai: “Moan te kabaia ngkoe i buakoia aine, ao e a kabaia uaani birotom.” (Ruka 1:42) A kaotaki n taeka aikai bwa e tau ni karekea karineana ae okoro Maria?

Ni koauana, e aki. E ngae ngke taeka aikai boni kanoan aia tataro kaain te Aro ni Katorika nakoni Maria ma akea bukina n te Baibara bwa ti na tataro nakoni Maria. A uaia n taekinna Kabiriera ao Eritabeta taekan te mwioko ae rianako ae reke irouni Maria ae boni ngaia ae na bikoukoua te Mesia ma e a aikoa taekinaki n te Baibara bwa ti na tataro nakoina. Ni kaitaraan te tataro nakoni Maria e kaotia nakoia taan rimwina Iesu bwa tataro nako a na nakon Tamana, ngke a titirakinna bwa tera aroia n tataro. Ni koauana, ana tataro Iesu ae te banna ni katoto ae tanoata taekana, e moanaki ma taeka aikai: “Tamara are i karawa.”​—Mataio 6:9.

Temanna Mai Buakoia Taan Tautaeka

Te reirei teuana ae taabangaki ibukini Maria bwa ngaia “te Uea n Aine i Karawa” ngkai. Ma te Baibara e aki anganna te nakoa anne. Ma e kaotaki raoi bwa iai nnena ae okoro n ana botaki te Atua i karawa. Tera te tabo anne?

E kaotia Iesu bwa iai tabeman mai buakoia taan rimwina aika kakaonimaki ake a na uea ma ngaia n ana Tautaeka n Uea. (Ruka 22:28-30) E angania aika rineaki mwaakana Iesu bwa a na beku bwa “uean Atuara ma ana ibonga; ao a tauu taeka i aonaba.” (Te Kaotioti 5:10) E kairira raoi te Baibara nakoni kakoauaan ae Maria ngaia temanna mai buakoia te koraki aika a anganaki te mwioko ae rietata ae rine aei. Ti kanga n taku bwa e koaua aei?

Ko na uringnga bwa imwini maten Iesu ao Maria bon raoia naba ana reirei ao tarin Iesu ni “botumwaka n tataro.” A botaki naba tao 120 mwaitiia aomata ibukina bwa a na tataro n te tai anne n ikotaki ma “aine” tabeman. (Mwakuri 1:12-15) E taekinaki n te Baibara bwa ngke e waakinaki tain “te bong are Bentekota, ao a bane ni botaki n te tabo ae ti teuana” ngke a kaonaki n te taamnei ae raoiroi mairoun te Atua, ae e angania te kona n taetae n taetae aika kakaokoro.​—Mwakuri 2:1-4.

Ibukina bwa Maria temanna mai buakoia aine ake a kakabwaiaaki n te aro are a karekea te taamnei ae raoiroi, e kaotaki iai bwa ngaia ma aine aikai a bane n rineaki bwa ngaiia naba kaain Ana Tautaeka n Uea Iesu i karawa. Ngaia are, ti kakoauaa raoi bwa Maria e tekateka ngkai ma Iesu n te mimitong are i karawa. (I-Rom 8:14-17) Iangoi tabeua mwioko aika a na karekei neiei ma raon Iesu n tautaeka ni kabaneia ni kakororaoan ana kantaninga te Atua.

Tibwaani Kakabwaia Aika Rangi n Tamaroa

E taekinaki ni bokin te Baibara ae Te Kaotioti bwa a na kautaki nakon te mimitong are i karawa aomata aika 144,000 mwaitiia ike a na beku iai irarikin Iesu bwa ibonga, taani motikitaeka, ao ueea. (Te Kaotioti 14:1, 4; 20:4, 6) Ngkai ibonga ngaiia, a uataboa tibwaan uaan ana karea Iesu nakoia aomata aika ongeaba ni kabane ni karikirakeia nakon te kororaoi ni kaineti ma te onimaki, te aroaro ni maiu ae riai, ao rabwataia. (Te Kaotioti 21:1-4) Ai bon te kakabwaia tera ngkanne irouia taan taromauria Iehova ni kabane aika kakaonimaki ni koaua bwa a na nora te tai ae rangi n tamaroa aei!a

Iai mwiokoani Maria ngkoa ao ngkai ni boutokaa kakororaoan ana kantaninga Iehova. E tau n riki Maria bwa te banna ni katoto nakoira ibukin nanorinanona, ana onimaki, ongeabana, ao n rikina bwa te tina ae tauraoi n anga ngaia, n ikotaki naba ma nanomwaakana i aani kataakina. E bon riai n rangi ni karineaki ngkai e a tia ni bungia te Mesia ao ni boutokaa tibwaani kakabwaia aika teimatoa.

Ma e ngae n anne, e reke reireiara ae te kabanea ni kakawaki mairoun neiei n ikotaki naba ma ana toro te Atua aika kakaonimaki, bwa a taromauria Iehova n tii ngaia, ao a rawa n taromauria te atua temanna riki. A kaboo bwanaaia n takarua Maria ma raoni Kristo n tautaeka ni kabaneia ni kangai: “Ana bwai Teuare tekateka i aon te kaintokanuea [Iehova ae te Atua] ma te Tiibutetei [Iesu ae te Kristo] te karaoiroaki, ma te karineaki, ma te neboaki, ma te tau-taeka, n aki totoki.”​—Te Kaotioti 5:13; 19:10.

[Kabwarabwara ae nano]

[Kabwarabwaraan n iteraniba 10]

E tau n riki Maria bwa te banna ni katoto nakoira ibukin nanorinanona, ana onimaki, ao ongeabana