Te Manga Bungiaki—Te Kawai Nakon te Kamaiuaki?

KO NA kanga ni kaekaa te titiraki ae, “Ko a manga bungiaki?” A na kaekaa ma nanoia ni koaua taani kakoaua aika mirion ma mirion mwaitiia ni katobibia te aonnaba n “Eng!” A kakoauaa bwa te manga bungiaki bon te kanikina ibukia Kristian ni koaua ni kabane ao tii ngaia kawain te kamaiuaki. A taekina naba aia iango mataniwi n Aaro taani kakoaua, n aron te tia rabakau n te Baibara temanna ae Robert C. Sproul ae korea ae kangai: “Ngkana e aki manga bungiaki te aomata temanna, . . . ngkanne bon tiaki te Kristian ngaia.”

Ko mena naba ngkoe i buakoia te koraki aika a kakoauaa bwa ngkana ko a manga bungiaki ao ko a kairaki ngkanne nakoni kawain te kamaiuaki? Ngkana ngaia anne, akea te nanououa bwa ko kani buokiia am koraki ao raoraom bwa a na kunea te kawai anne ao ni moanna n nakonako i aona. Ma ni karaoan anne irouia, a riai n ota n te kaokoro i marenan te aomata ae manga bungiaki ao te aomata ae aki. Ko na kanga ni kabwarabwaraa nakoia bwa tera ae nanonaki n te manga bungiaki?

A kakoauaa aomata aika mwaiti bwa te taeka ae te “manga bungiaki” e irekereke ma te aomata ae berita ma nanona ni koaua bwa e na beku iroun te Atua ao Kristo ao ibukin anne, e a bitaki arona are akea ngkoa ana itoman ma te Atua bwa e a manga reke ngkai. Ni koauana, e kabwarabwaraaki n te rikitinare ae kabonganaaki ngkai bwa te aomata ae manga bungiaki bon “te aomata ae te Kristian ae e a tia ni kabooua ke ni kamatoaa ana berita ibukin ana onimaki ao e a moamoa riki, imwin rinanoan te bwai ae riki nakoina ae korakora rotakina iai ae irekereke ma ana Aro.”​—Merriam-Webster’s Collegiate Dictionary​—Eleventh Edition.

Ko na aki mimi n reiakinan ae e bon aki boraoi nanon te taeka anne ma te Baibara? Ko kan ataia bwa tera raoi ae reiakinaki n Ana Taeka te Atua ni kaineti ma te manga bungiaki? Ko na bon rangi ni kakabwaiaaki n neneran raoi te taeka aei. Bukin tera? Ibukina bwa te ota ae eti raoi ni kaineti ma te manga bungiaki e na bon rota maium ao am kantaninga nakon taai aika a na roko.

Tera Ana Reirei te Baibara?

E kona ni kuneaki te taeka ae te “manga bungiaki” n te Baibara n Ioane 3:1-12, ike e a kabwarabwaraaki iai te maroro ae moan te kaunga ae riki i Ierutarem i marenan Iesu ao mataniwin te Aro temanna. Nora rongorongon te Baibara ni kiibu aikai ae bwanin raoi mwaneweakina n te bwaoki ae n tokin te kaongora aei. Ti kaungako bwa ko na karaurau ni warekia raoi.

N te rongorongo anne, e katuruturui iai itera tabeua Iesu ni kaineti ma te “manga bungiaki.” Ni koauana, e buokira ana kabwarabwara Iesu aei ni kaekai titiraki aika nimaua aika kakawaki aika i nano:

◼ Tera kakawakin te manga bungiaki?

◼ E koaua bwa ti kona ni motinnanoia i bon iroura bwa ti na rinanon te manga bungiaki?

◼ Tera raoi te kantaninga iai?

◼ N te aro raa ae e riki iai anne?

◼ Tera te bitaki nakon te itoman ae e na reke man te manga bungiaki?

Ti na rinanoi ngkai titiraki aikai teuana imwin teuana.

[Te Bwaoki/​Taamnei n iteraniba 4]

“E Riai ba Kam na Manga Bungiaki”

“Ao temanna te aomata ae raoia Baritaio, ae arana Nikotemo, ae aia tia tau-taeka I-Iutaia temanna: e nako n Iesu e bong, ao e taku nako Ina, Rabi, ti ataiko ba te tia reirei ae Ko nako mai mairoun te Atua: ba e aki kona te aomata ni karaoi kakai aika Ko karaoi, ngkana E aki mena te Atua i rouna. E kaekaa Iesu ao E taku nako ina, E boni koaua ae I a tuangko ba ngkana e aki manga bungiaki te aomata, ao e aki kona n nora uean te Atua. E taku Nikotemo nako Ina, E na iranaki ni manga moa ni bungiaki te aomata ngkana e a unimwane? e kona ni manga rin i nanoni biroton tinana, ni bungiaki? E taku Iesu, E boni koaua ae I a tuangko, ba ngkana e aki bungiaki te aomata n te ran ma te Tamnei, ao e aki kona n rin n uean te Atua. Ane bungiaki n te iriko ao bon te iriko; ao ane bungiaki iroun te Tamnei ao bon te tamnei. Tai mimi n au taeka nako im are kangai, E riai ba kam na manga bungiaki. Bon ane n te ang, ba ike e kani wai nako iai, ao e wai, ao ko ongo neaana, ma ko aki ataia ba e nako maia, ao e nakea: ao ai aroia naba aomata ni kabaneia aika bungiaki iroun te Tamnei. E kaekaa Nikotemo ao e taku nako Ina, A iranaki ni konaki baikanne? E kaekaa Iesu ao E taku nako ina, Aia tia reirei Iteraera ngkoe, ao ko aki atai naba baikai? E boni koaua ae I a tuangko ba ti taekina ae ti ataia, ao ti kaota ae ti noria; ao kam aki kaki i nanomi ara kaotioti. Ngkana I tuangngkami bwain aon te aba, ao ngkana kam aki kakoauaai iai, ao kam na iranna ni kakoauaai ngkana I tuangngkami bwaini karawa?”​—Ioane 3:1-12.