Te Manga Bungiaki—Tera ae Kakororaoaki Iai?
BUKIN tera bwa Iesu e kabongana te taeka ae ‘bungiaki n te taamnei’ ngke e taekina te bwabetito n te taamnei ae raoiroi? (Ioane 3:5) Ngkana e kabonganaaki n te aro ni kaikonaki te taeka ae “bungiakin,” e nanonaki iai “moanakin” n aron te taeka ae “moanakini bungiakin te natannaomata.” Ngkanne, te taeka ae “manga bungiaki” e kaotia bwa e na iai “moanakin te waaki ae boou.” Ngaia are a katereterea taeka ni kaikonaki aika “bungiaki” ao “manga bungiaki,” bwa iai moanakin te waaki ae boou n te itoman i marenan te Atua ma te koraki ake a bwabetitoaki n te taamnei ae raoiroi. E na kanga n riki te bitaki ae tabwanin raoi n te itoman anne?
E kabongana te kaikonaki ni kaineti ma te maiu n te utu te abotoro Bauro ni kabwarabwaraa aron te Atua ni katauraoiia aomata bwa a na riki bwa taan tautaeka i karawa. E koroboki nakoia Kristian n ana bong Bauro bwa a na rinanon te “natinaki” ao n irekereke ma te Atua “ba kaanga natina.” (I-Karatia 4:5; Ebera 12:7) Iangoa riki te kaikonaki ni kaineti ma te teinimwaane ae kan rin n te tabo n reirei ibukia ataein te reirei aika kaain te aba anne, bwa ti aonga ni kamataataa te banna ni katoto ni kaineti ma te natinaki, ao e na buokira n ota n aron te bitaki ae riki ni bwabetitoan te aomata n te taamnei ae raoiroi.
Te Bitaki ae Riki n te Natinaki
N te kaikonaki aei ao e aki kona n rin n te tabo n reirei anne te teinimwaane arei ibukina bwa tiaki kaain te aba anne. Iangoia ngkai bwa n te bongina ao e a riki te bitaki ae bubura. E a natinaki i aan te tua te teinimwaane aei iroun te karo ae kaain te aba. E a kanga n rotaki iai te teinimwaane anne? Ibukina bwa e a natinaki, e a bae n iai inaomatana ngkai n aroia ataei aika kaain te aba n ikotaki naba ma riaina n rin n te tabo n reirei anne. E a rangi ni bitaki ngkai ana kantaninga ibukina bwa e a natinaki.
E kamatataaki raoi aei n te aro ae rangi ni kakawaki riki ni kaineti ma te baere riki nakoia ake a rinanon te manga bungiaki. Iangoi baika titeboo iai. E kona n rin n te tabo n reirei te teinimwaane ae n te kaikonaki aei tii ngkana e ira nanon te kaetieti are e na kona ni butimwaeaki iai, are e na riki raoi bwa kaain te aba. Ma e bon aki kona ni kakoroa nanon te kaetieti anne i bon irouna. N te aro naba anne, a na karekea aia tabo n Ana Tautaeka n Uea te Atua ke te tautaeka i karawa aomata tabeman, ma tii ngkana a karaoa nanon te kaetieti bwa a na rin iai ae a na “manga bungiaki.” Ma e ngae n anne, a bon aki kona ni kakoroa nanon te kaetieti anne i bon irouia ibukina bwa bon tii mairoun te Atua te manga bungiaki.
Tera ae bita aron te teinimwaane anne? E a natinaki i aan te tua. Ni koauana e aki bitaki aroaron te teinimwaane anne ngke e natinaki i aan te tua, bwa imwin natinakina ao bon titeboo naba arona. Ma e a karekea ngkai nakoina teina ae boou ibukini kakoroan nanoni kaetieti ake i aan te tua ni kaineti ma natinakina. Ni koauana e rinanoni moanakin te waaki ae boou ke ae kaanga te manga bungiaki. E a natinaki raoi iroun te karo are e kona n anganna te kariaia ibukini kaean te tabo n reirei ao n riki bwa kaain ana utu te karo are natinna.
N aron naba anne, e a bita aroia Iehova te koraki n aomata aika aki kororaoi rinanoni moanakin te waaki n tua ni kaineti ma natinakia irouna. E koroboki te abotoro Bauro, are kaain naba te koraki anne, nakoia raona n te onimaki ni kangai: “Kam anganaki te Tamnei ae e natinaki te aba i Rouna, ae ti tataro i Rouna ni kangai, Aba, Tamara. Ao te Tamnei aei E buobuoki ma tamneira ni kaotiotira ba natin te Atua ngaira.” (I-Rom 8:15, 16) Eng, a a tia n riki Kristian aikai bwa kaain ana utu te Atua ke “natin te Atua” rinanon te waaki are a natinaki iai.—1 Ioane 3:1; 2 I-Korinto 6:18.
E koaua bwa e aki bitaki aroia ake a natinaki iroun te Atua ibukina bwa a teimatoa n aki kororaoi. (1 Ioane 1:8) Ma e ngae n anne, imwini kakoroani kaetieti ake a kainnanoaki ibukin te natinaki, e a reke iai teia ae boou n aron ae e a tia ni kabwarabwaraa riki Bauro. N te tai naba anne, e unikaki taamnein te Atua i nanoia te koraki ake a natinaki bwa a na kakoauaa raoi ae a na boni maeka ma Kristo i karawa. (1 Ioane 3:2) Kakoauaan raoi anne irouia are e reke rinanon te taamnei ae raoiroi, e angania aia kantaninga ae boou ni maiuia. (2 I-Korinto 1:21, 22) Eng, a rinanoni moanakin te waaki ae boou ae kaanga te manga bungiaki.
E taekinaki n te Baibara ae kangai ibukia ake a natinaki iroun te Atua: “A na riki ba ana ibonga te Atua ma Kristo, ao a na uea ma Ngaia tenga te ririki.” (Te Kaotioti 20:6) A na kaueaaki ake a natinaki iroun te Atua ma Kristo n Ana Tautaeka n Uea te Atua ke te tautaeka i karawa. E tuangia raona n te onimaki te abotoro Betero bwa a na karekea ‘te bwai ae aki kona ni mka, ae aki kamwara, ae aki kona n rai, ae kawakinaki i karawa’ ibukia. (1 Betero 1:3, 4) Ai boni kakawakira te tibwanga arei!
Ma e a karioa te titiraki teuana te tautaeka aei ae kangai, Ngkana ngaia bwa a na uea i karawa te koraki ake e reke irouia te manga bungiaki, ai antai ngkanne aika a na tautaekania? E na rinanoaki te titiraki anne n te kaongora ae imwina.
[Taamnei n iteraniba 10]
Tera ae taekinna Bauro ibukin te natinaki?