Karekea te Atatai ae Eti Ibukin te Atua

“Aio te maiu are aki toki, te ataiko ae te Atua ae ti temanna ae koaua.”​—Ioane 17:3.

TERA TE KANGAANGA? A taku tabeman bwa bon akea te Atua. A teimatoa ni kakoauaa tabeman riki bwa tiaki te aomata te Atua ma bon tii te mwaaka ae rangi ni korakora. Ma te koraki ake a kakoauaa bwa bon te aomata ni koaua te Atua, a a manga tataekini reirei aika kauntaba ibukina n aron ae antai ngaia ao aroarona aika e kaotiotii.

KO NA KANGA N TOKANIKAI I AON TE KANGAANGA? Te anga teuana ibukini karekean te atatai ae eti ibukin te Atua boni man taraakini baika e a tia ni karaoi. E taku te abotoro Bauro: “Ana bwai [te Atua] ake a aki nonoraki ao a bon noraki raoi ma ngke a moa ni karikaki aonaba, n ataki ni baike a karaoaki, are mwakana ae akea moana ma tokina, ma arona n Atua.” (I-Rom 1:20) Ko kona n reiakina ae bati ni kaineti ma wanawanan ao mwaakan ara tia Karikiriki ngkana ko karauko raoi n neneri baika a karikaki.​—Taian Areru 104:24; Itaia 40:26.

Ma ibukini karekean te atatai ae eti n aron ae te aekaki n atua raa Ngaia, a riai ngkanne aomata n tatabemania nako ni kauka Ana Taeka te Atua ae te Baibara ao n neneria i bon ibukia. Tai kariaia bwa a na tuangko ae ko riai n iangoia aomata tabeman. N oneani mwin anne, kakairi n ana reirei te Baibara aei: “Tai katotonga aron aon te aba: ma kam na onikaki n onean nanomi, ba kam na riki n ata Nanon te Atua, are raoiroi, are kakukurei, are koro-raoi [i bon iroumi].” (I-Rom 12:2) N te katoto, iangoi koaua aika mai nano aika a kaotaki n te Baibara ibukin te Atua.

Iai aran te Atua. E moani kaoti aran te Atua nga ma nga te tai i nanon te Baibara. A bati rairai aika karinna n te kibu ae Taian Areru 83:18, ni kangai: “A aonga ni kona n ataiko aomata ae bon tii ngkoe n aram ae Iehova, ao ngkoe teuare moan te rietata i aonnaba ni bane.”​—King James Version.

Iai ana namakin Iehova ae te Atua ake a kona n rotaki n aia mwakuri aomata. Imwini kainaomataaia I-Iteraera man tautoronakia i Aikubita iroun Iehova, a a manga kakeai n taai tabetai bonganan ana reirei aika kawanawanaia. A “kamaraka nanona” n aroia ni karitei ni maiuia. A “karawawata Teuare e tabu ae Atuaia Iteraera” n aia mwakuri.​—Taian Areru 78:40, 41, BK.

E mwannanoira Iehova n tatabemanira nako. E taku Iesu ngke e kataetaeia taan rimwina: “Tiaki a kaboaki uoman te tibaaro n te aba-bene? Ao e bon aki bwaka i aontano temanna n aikai ngkana e aki ataki iroun Tamami: ma a bane naba ni warekaki iranatumi. Ma ngaia ae kam na tai maku; ba kam bongana riki nakoia tibaaro aika bati.”​—Mataio 10:29-31.

E aki akoa riki temanna ibukin ana reeti ke abana te Atua nakoia ake tabeman. E tuangia kaaini Kuriiti ake i Atenai te abotoro Bauro bwa te Atua e “karaoiia botanaomata ni kabaneia n te raraa ae ti teuana, ba a na maeka i aonaba ni kabane.” E taekinna naba bwa “E aki raroa mai roura n tatabemanira nako” te Atua. (Mwakuri 17:26, 27) E taekina ae kangai te abotoro Betero: “E bon aki nanonano [te Atua] n tarakin aroia aomata; ma e tangiraki i Rouna ane makua, ma ni karaoa te raoiroi, i buakoia botanaomata ni kabaneia.”​—Mwakuri 10:34, 35.

TERA UAANA? Iai tabeman aika iai “tangiran te Atua ae korakora i rouia, ma tiaki aron te atatai.” (I-Rom 10:2) Ngkana ko ataa ana reirei ni koaua te Baibara ibukin te Atua, ko na bon rarawa ni burebureaki ao ko a kona iai ni “kaania te Atua.”​—Iakobo 4:8.

Ibukin rongorongona riki tabeua nora te boki ae Tera Ana Reirei ni Koaua te Baibara?a mwakoro 1, i aan te atu ae “Baikara Reirei Aika Koaua Ibukin te Atua?”

[Kabwarabwara ae nano]

[Taamnei n iteraniba 6]

Te anga teuana ibukini karekean te atatai ae eti ibukin te Atua boni man taraakin baika e a tia ni karaoi