2 E Aki Tabeakinira te Atua e Koaua Anne?

Tao ko a tia n ongongo aei: “Ngkana e bon tabeakina te botannaomata te Atua, e na bae ni kamauna te buakaka ao te rawawata ni kabane man te aonnaba. Ao ngkana e tabeakina te botannaomata, I aki kakoaua ae e tabeakinai.”

Ana reirei te Baibara: E aki karika te buakaka Iehova ae te Atua. (Iakobo 1:13) E ngae ngke e kona ni kamauna te buakaka, ma e kariaia bwa e na teimatoa te botannaomata ae buakaka bwa a aonga ni kaekaaki titiraki aika kakawaki, ni kaineti ma baika riai ao ni bure ake a tabekaki ni moani karikaia aomata. N tokina, e na karaoa te mwakuri ibukini buokan te botannaomata ao kaetani kangaanga ni kabane aika a karaoaki irouia te koraki aika a rarawa nakon ana tautaeka.—Karikani Bwaai 3:1-6; Itaia 65:17.a

Irarikin tabeakinan te botannaomata iroun te Atua, e bon tabeakinia naba aomata n tatabemania nako. E kaotaki ni Mataio 10:29-31 bwa e nori baika ti aki atai ibukira n aron ae kangai: “Tiaki a kabooaki uoman mannikiba aika tibaaro n te maibibi ni mwane ae uarereke? Ma bon akea temanna i buakoia ae na bwaka i aontano n aki ataaki iroun Tamami. A bane ni warekaki naba irannatumi. Mangaia ae tai maaku, bwa kam kakawaki riki nakoia tibaaro aika mwaiti.”

Buokam n ataan te koaua: N angiin te tai, ti kararoaira mairouia aomata aika iowawa ke aika a aki tabeakinira. E aki kamimi ngkanne ngkai a rawa ni karekea ataakin te Atua aomata aika bati ibukin te kewe are aongkoa e aki tabeakinia, ke a tii kawaria ngkana akea riki aia aanga. Ma ataakin ae e tabeakiniko Iehova ae te Atua, ko a kairaki iai bwa ko na kani kabatiaa riki reiakinan arona ao ni karikirakea am iraorao ma ngaia.

N te katoto, tao ko a tia n tataro nakon te Atua ma ko aki ataia raoi bwa tao e kakauongo ke e na kaekako. Ma e kakoauaaki nakoira n te Baibara bwa e tauraoi n taai nako ‘te tia Ongo tataro’ ni butimwaeia akana a kaania ma nanoia ni koaua.—Taian Areru 65:2 BG.

E kaoingkami te Atua bwa kam na “kabanei ami iango n raraoma ni kaaki i aona bwa e mumutiakiningkami.” (1 Betero 5:7) Ti kona n onimakinna bwa e na tabeakinira n taai aika bati karawawata iai, bwa e kangai ana Taeka: “E a kaan Iehova ma akana a uruaki nanoia, Ao E kamaiuia akana a raraoma taamneia.”—Taian Areru 34:18 BG.

[Kabwarabwara ae nano]

[Kabwarabwaraan n iteraniba 5]

Bukin tera bwa e kaoira te Atua bwa ti na tataro nakoina ngkana e aki tabeakinira?