Butimwaeia ma te Kakaitau Anga ma Nanom ni Kabane
E MWAMWANNANOIRA Tamara are i karawa ae tatangira ae Iehova. E karaunanora Ana Taeka te Atua bwa e boni mumutiakinia ana toro. (1 Betero 5:7) E kaotiota ana mwamwannano Iehova n te aro teuana, rinanoni katauraoan aanga n ibuobuoki aika kakaokoro bwa ti aonga ni beku irouna ma te kakaonimaki. (Itaia 48:17) E tangirira Iehova bwa ti na karekei kakabwaiara man ana ibuobuoki are e katauraoi, ai moarara riki ngkana ti kaaitarai kangaanga aika karawawata. E kamatataaki raoi te koaua anne n te Tua Rinanoni Mote.
E katauraoi ibuobuoki aika tatangira Iehova i aan te Tua Rinanoni Mote ibukia “akana aki kaubwai,” n aron ane e mate ana karo, te aine ae mate buuna ao ai iruwa. (Nakoaia Ibonga 19:9, 10; Te Tua-Kaua 14:29) E ataia bwa iai tabeman mai buakoia ana toro aika kona ni kainnanoa te ibuobuoki mairouia raoia n te onimaki. (Iakobo 1:27) Mangaia are, akea mai buakoia ana toro aika a riai n tabwarabwara ni butimwaea te ibuobuoki mairouia te koraki ake a kairaki iroun Iehova bwa a na anga te aeka n ibuobuoki anne. Ma e ngae n anne, ngkana ti butimwaea te ibuobuoki, ti tangiria naba ni butimwaeia ma te nano ae riai.
Ma e katuruturuaki n Ana Taeka te Atua bwa bon iai naba aia tai n anga ana aomata te Atua. Iaiangoa rongorongon “te aine temanna ae e mate buuna ae aki kaubwai” are e noria Iesu n te tembora i Ierutarem. (Ruka 21:1-4) E taraa n ae e kakabwaiaaki neiei mani bwaai n tituaraoi ake e katauraoi Iehova ibukia aine aika mate buuia, n aron are taekinaki n te Tua. Ma e ngae ngke e aki kaubwai te aine ae mate buuna aei, e bon uringaki tiaki n ai aron temanna ae e anganganaki ma bon temanna ae e anganga nako. E bae ni karekea te kimwareirei n arona n anganga, bwa n aron ae taekinna Iesu, “E kakabaia riki te anga nakon te anganaki.” (Mwakuri 20:35) N iangoan te koaua anne, ko na kanga ngkoe n “anganga” ao n namakina mwina ae kakimwareirei?—Ruka 6:38.
“Tera ae N na Manga Angan Iehova?”
E iango ni kangai te tia areru: “Tera ae N na manga angan Iehova Ba boon ana akoi ni kabane nako iu?” (Taian Areru 116:12) Baikara kakabwaia ake e a tia ni karekei? E a tia Iehova ni boutokaia ngke e taonaki n te “rawawata ma te nanokawaki.” Irarikin anne, e a tia naba Iehova ni ‘kamaiua taamneina man te mate.’ Ngkai e a kani “manga angan” Iehova booni mwin ana akoi n aaro tabeua. Tera ae e kona ni karaoia te tia areru? E taku: “N na angan Iehova ana bwai ake I tuangnga ni bau.” (Taian Areru 116:3, 4, 8, 10-14) E motinnanoia te tia areru bwa e na kawakin ana berita ni kabane ake e a tia ni karaoi nakon Iehova ao ni kakoroi nanon nako ana taeka ni bau nakoina.
Ko boni kona naba ni karaoa aekan anne. N te aro raa? N touani mwin te aroaro ni maiu ae boraoi ma ana tua nako te Atua ao ana boto n reirei n taai nako. Mangaia are, ko riai n taraia raoi n taai nako bwa taromaurian Iehova iroum, e na teimatoa n riki bwa te bwai ae te kabanea ni kakawaki ni maium ao ni kariaia taamnein te Atua bwa e na kaiririko ni bwaai ni kabane ake ko karaoi. (Te Minita 12:13; I-Karatia 5:16-18) Ni koauana, ko bon aki kona ni manga kabooi mwini bwaai ni kabane ake e a tia Iehova ni karaoi ibukim. Ma e boni ‘kakukureia nanon Iehova’ noran ae ko anga nanom ni kabane bwa ko na beku ibukina. (Taeka N Rabakau 27:11) Ai bon rinera te mwioko ae kakukureian nanon Iehova n te aro aei!
Boutokaa Nakoraoin te Ekaretia
Ko na bon aki nanououa bwa ko a tia ni kakabwaiaaki man te ekaretia ni Kristian n aaro aika bati. E a tia Iehova ni katauraoi amwarake n taamnei aika rangi ni mwaiti i nanon te ekaretia. E a reke iroum te koaua ae kainaomatako mani kairuaia Aaro ao te rotongitong ni bwaai n taamnei. (Ioane 8:32) Ko a karekea te atatai ae kairiko nakon te maiu n aki toki n te bwaretaiti i aon te aba are akea iai te maraki ao te rawawata, rinanoni bobotakin te ekaretia, ruunga ao bwabwaro ake a baireaki iroun “te toro ae kakaonimaki ae wanawana.” (Mataio 24:45-47) Ko kona ni wareki mwaitini kakabwaia ni kabane aika ko a tia ni karekei ao aika ko na karekei n ana ekaretia te Atua? Tao tera ngkanne ae ko kona n angan te ekaretia bwa booni mwin anne?
E korea ae kangai te abotoro Bauro: “Te rabata ae banin, are e tomatomaki ma n reireitaki ni kaboraoaki ngkae e nim n iterana nako ma oini maiuna, e karekea mai Rouna te kona n rikirake n ai aroni korakorana n iterana nako; ao e rikirake ni kateaki i bon i rouna n te tangira.” (I-Ebeto 4:15, 16) E ngae ngke e boni kaineti riki te kibu anne nakon te rabwata ae kaainaki irouia Kristian aika kabiraki, ma e kona naba ni kaineti te reirei are iai nakoia Kristian ni kabane ni boong aikai. Eng, a kona kaain te ekaretia n tatabemania nako ni boutokaa nakoraoin ao rikiraken te ekaretia. N aaro raa?
Ti kona ni karaoa aei ngkana ti kakorakoraira n taai nako n riki bwa nibwan te kaungaunga ao kakorakoraan aia onimaki raora. (I-Rom 14:19) Ti kona naba ni boutokaa ‘rikiraken te rabwata’ ni karikirakean uaan taamnein te Atua n arora nakoia tarira ao mwanera n te ekaretia. (I-Karatia 5:22, 23) Irarikin anne , ti kona ni kakaaei aanga bwa ti aonga ni “kakaraoa ae raoiroi nakoia aomata ni kabaneia, . . . ao e na kamaitaki riki nakoia kaain te onimaki.” (I-Karatia 6:10; Ebera 13:16) A kona kaain te ekaretia ni bane aika taari mwaane ma aine, ataei ao kaara n uataboa ‘karikirakean te rabwata n te tangira.’
N ikotaki ma anne, ti kona ni kamanenai ara tarena, korakorara ao kaubwaira n uataboan te mwakuri ni kakamaiu ae waakinaki i nanon te ekaretia. E taku Iesu Kristo: “Kam aki kaboa are kam anganaki.” Tera ngkanne arora? E a manga taku riki: “Anga naba n aki kaboaki.” (Mataio 10:8, BK) Mangaia are, kabanea am kona n uataboi mwakuri aika kakawaki aika uarongorongoan te Tautaeka n Uea ao karekeaia taan rimwini Kristo. (Mataio 24:14; 28:19, 20) E tiatianaki am konabwai ni karaoan aei? Uringa te aine are e mate buuna ae aki kaubwai are e kabwarabwaraa taekana Iesu. E ngae ngke e rangi ni karako te bwai are e anga ma e taku Iesu bwa e karaoa ae bati riki nakoia aomata nako. E anga neiei n aron ana kabanea ni kona.—2 I-Korinto 8:1-5, 12.
Butimwaeia ma te Nano ae Riai
Ma e ngae n anne, tao iai taai aika ko kona iai ni kainnanoa boutokaam man te ekaretia. Tai tabwarabwara ni butimwaei ibuobuoki ni kabane aika kona n reke man te ekaretia ngkana ko kabokorakora n tokanikai i aoni kangaanga n te waaki ae ngkai. E a tia Iehova ni katauraoiia mwaane aika mwamwannano bwa a na ‘kawakina te ekaretia’ ibukini buokam ngkana ko aitara ma kataaki ao karawawata. (Mwakuri 20:28) A tangiria unimwaane ao tabemwaang n te ekaretia ni karaua nanom, ni boutokaiko ao ni kamanoko i nanon taai aika karawawata.—I-Karatia 6:2; 1 I-Tetaronike 5:14.
Ma ko riai ni kakoauaa raoi bwa ngkana ko karekei aaro n ibuobuoki tabeua aika ko kainnanoi, butimwaei ma te nano ae riai. Butimwaei n taai nako boutoka akana ko karekei ma te nano ni kakaitau. Iaiangoi aeka n ibuobuoki aika ko anganaki mairouia raom n te onimaki bwa boni kaotiotan ana akoi ae rianako te Atua. (1 Betero 4:10) E aera ngkai e kakawaki anne? Ibukina bwa ti aki kani butimwaei baikai n aroia aomata aika bati n te aonnaba aika akea nanoia ni kakaitau.
Bwaina te Riai ao te Iangoraoi
E korea ae kangai Bauro n ana reta nakon te ekaretia i Biribi ni kaineti ma Timoteo: “Akea raou temanna ae ai arona, ae na taratarai raoi aromi.” Ma imwin anne, e a manga kangai Bauro ibukia tabemwaang riki: “A bane n ukoukori aia bwai, ao a aki ukoukori ana bwai Iesu Kristo.” (I-Biribi 2:20, 21) Ti na kanga ngaira ni boong aikai n rarawa ni kaatuua iaiangoan ‘oin ara bwai’ ngkana ti karauira raoi ni mutiakina ana iango ae kakawaki Bauro?
Ti riai n aki kairoroia tabemwaang n te ekaretia ni butiia aia tai bwa a na buokira n ara kangaanga. Bukin tera bwa ti na aki? Ao bon iangoa aei: Akea te nanououa bwa ti na bon rangi ni kakaitau ngkana e anganira te tari temanna bwaai tabeua aika ti kainnanoi n tain te kabuanibwai ae karina. Ma te koaua bwa ti na kairoroi aeka n ibuobuoki akanne mairouna? Ni koauana ti na bon aki. N te aro naba anne, ngkai a tatauraoi n taai nako tarira ni buokira, ti riai ngkanne ni bwaina te riai ao te iangoraoi ni baika ti kantaningai bwa a na anganira ni kaineti ma mwawan aia tai. Mangaia are, n aki ongeia bwa tera buokara n tokanikai i aoni kangaanga mairouia raora n te onimaki, ti na bon tangiria bwa a na karaoia ma te nano n ingainga.
Akea te nanououa bwa a na tauraoi ao n ingainga ni buokiko n taai nako tarim ma mwaanem ni Kristian. Ma n taai tabetai, a na bon aki kona ni karaoi baika ko kainnanoi ni kabane. Ngkana e riki anne nakoim, ko riai ni kakoauaa raoi bwa e na bon teimatoa ni boutokaiko Iehova ni kataaki nako aika ko kona ni kaaitara ma ngaai, n aron naba are e karaoia nakon te tia areru.—Taian Areru 116:1, 2; I-Biribi 4:10-13.
Ngaia are tai tabwarabwara ni butimwaei ma te kakaitau baika e katauraoi Iehova ibukim ao e a moamoa riki n taai aika karawawata ao ni kangaanga. (Taian Areru 55:22) E bon tangiriko Iehova bwa ko na karaoa anne. Ma e ngae n anne, e bon tangiriko naba bwa ko na riki bwa “te aomata ae e anga ma kukurein nanona.” N te aro aei, ko riai ni kakorakorako ‘n anga ma nanom ni koaua’ ni kaineti ma am kona ibukini boutokaan te taromauri ae koaua. (2 I-Korinto 9:6, 7, BK) Ni karaoan anne ko a kona iai ni karaoi baika uoua aikai, ko a butimwaeia ma te kakaitau ao anga ma nanom ni kabane.
[Te Bwaoki/Taamnei n iteraniba 32]
“Tera ae N na manga angan Iehova Ba boon ana akoi ni kabane nako iu?”—Taian Areru 116:12
▪ Karekea ami tai ni “kakaraoa ae raoiroi nakoia aomata ni kabaneia”
▪ Riki bwa nibwan te kaungaunga ao kakorakoraan aia onimaki tabemwaang
▪ Uataboa te mwakuri ni karekeia taan rimwini Kristo ni karababaa nako n ai aron am kona