Ko Butimwaea Ana Ibuobuoki Iehova?

“Te tia buokai Iehova; N na aki maku.”​—EBERA 13:6.

1, 2. Bukin tera ngkai e kakawaki bwa ti butimwaea ana buoka Iehova ao ana kairiri i nanoni maiura?

IANGOIA bwa aongkoa ko a tabe n ririanna n te kawai ae reme i aon te maunga. Ma tiaki tii ngkoe bwa iai te tia iriko n te tai anne, ao moan te rabakau ni kaira kawaim. E rangi n rabakau ao ni marurung riki nakoim, ma e taotaona nanona n nakonako ni kaania ma ngkoe. E noria bwa ko tatanako n tabetai. Ma ibukin tabeakinam irouna, e arora nako baina ni buokiko n taabo ake a karuanikai. Ko na ribaa ana buoka? Ko na bon aki! E a boni karuanikai maium.

² Ngkai Kristian ngaira, ao iai te kawai ae karuanikai ae ti tabe n toutoua. Ti riai n nakonako n te kawai ae ribwaribwa anne n tii ngaira? (Mataio 7:14) Ti aki, bwa e kaotia te Baibara bwa te aomata ae te kabanea ni mwaatai ni Kairira, bon Iehova ae te Atua, are e kariaia aomata nako bwa a na nakonako ma ngaia. (Karikani Bwaai 5:24; 6:9) E boni buokiia ana toro Iehova n nakonakoia? E taku: “N na tau ataim, Ngai ae Iehova ae Atuam, ao N na kangai nako im, Tai maku; I a buokiko Ngai.” (Itaia 41:11) Iehova ai aron te tia kaira te kawai are e oti n ara kabotau, ae e akoi n arora baina n ibuobuoki ao n iraorao nakoia aomata aika a kan nakonako ma ngaia. Bon akea i buakora ae e na rawa nakon ana buoka!

3. Baikara titiraki aika ti na rinanoi i nanon tain maroroakinan te kaongora aei?

³ N te kaongora are imwaina, ti maroroakin iai aanga aika aua ike e buokiia iai ana aomata Iehova n taai ake rimoa. Te koaua bwa e buokiia naba ana aomata n te aro anne ni boong aikai? Ti na kanga ni kakoauaa raoi bwa ti boni butimwaai aanga n ibuobuoki aika tauraoi? Ti na rinanon titiraki akanne. Man karaoan anne, ti kona iai ni kakoauaa riki ae Iehova bon te tia Buokira ni koaua.​—Ebera 13:6.

Aia Buoka Anera

4. Bukin tera bwa a kona ana toro te Atua ni boong aikai, ni kakoauaa raoi aia buoka anera?

⁴ Te koaua bwa a buokiia ana toro Iehova anera ni boong aikai? Eng. A bon aki kaoti n te aro are a na noraki irouia taan taromauri ni koaua, bwa a na kamaiuiia man kangaanga aika karuanikai. N taai ake a karakinaki n te Baibara, e burenibwai irouia anera bwa a na karaoa aron anne. Angiin bwaai ake a karaoi a bon aki kona n noraki n te mata, n arona naba n taai aikai. Ma e ngae n anne, a namakinna ana toro te Atua rimoa bwa e kaunganano ataakin ae a tatauraoi anera ni boutokaiia. (2 Uea 6:14-​17) Iai bukina ae raoiroi iroura bwa ti na namakina naba aron anne.

5. E a kanga te Baibara ni kaotia bwa a irekereke naba anera n tataekinan te rongorongo ni boong aikai?

⁵ A rangi n ingainga nanoia anera n tabeakina te mwakuri ae okoro ae ti mwiokoaki iai. Tera te mwakuri anne? E kaekaki anne n Te Kaotioti 14:6: “I nora te anera temanna ba e kibakiba i nukani karawa, ao iai i rouna te euangkerio ae aki totoki ba e na taekinna nakoia ake a maeka i aon te aba, ao nakoia botanaomata ni kabaneia ma baronga ma taian taetae ma natanaomata.” E mataata bwa “te euangkerio ae aki totoki” aei, iai rekerekena ma “euangkerion uean te Atua” are e a kaman taekinna Iesu bwa “e na tataekinaki . . . i aonaba ni bane ba te bwai ni kaotioti nakoia botanaomata ni kabaneia,” imwain tokin te waaki i aon te aba. (Mataio 24:14) A bon aki tataekina te rongorongo anera n ai arora. Ma e angania aomata te mwioko ae kakawaki aei Iesu. (Mataio 28:19, 20) Tiaki te koaua bwa e raoiroi ataakin ae ngkai ti tabe ni kakororaoa nanon te tua anne, ao ti buokaki irouia anera aika tabu, aika wanawana ao ni korakora riki nakoira?

6, 7. (a) Tera ae e kaotia bwa a boutokaira anera n ara mwakuri n uarongorongo? (b) Ti na kanga ni kona ni karekea aia boutoka ana anera Iehova?

⁶ Iai riki rongorongo ni kakoaua ibukin aia boutoka anera ni kaineti ma ara mwakuri. N te katoto, ti aki toki n ongongo bwa n aia tai ni karaoa aia mwakuri ni minita Ana tia Kakoaua Iehova, ao a kaitiboo ma te aomata ae e a tibwa tia n tataro nakon te Atua ibukin buokana bwa e na kunea te koaua. Ti aki kona n taekinna bwa a a boni manennanti naba n riki baikai. Ibukin aia ibuobuoki anera, ao a bati riki aomata aika reiakina are e tataekinna ‘te anera ae kibakiba i nukani karawa’ are e kangai: “Kam na maka te Atua, ao kam na anganna te neboaki.”​—Te Kaotioti 14:7.

⁷ Ko kakariariaa aia boutoka ana anera Iehova aika korakora? Mangaia are karaoa am kabanea ni konaa bwa ko na kakorakorako n te mwakuri ni minita. (1 I-Korinto 15:58) Ngkai ti anga nanora n aki-kabooaki n te mwioko ae okoro aei are mairoun Iehova, ao ti kona ngkanne ni kakoauaa bwa ti na boni buokaki irouia anera.

Te Buoka Mairoun Mataniwiia Anera

8. Tera nakoan Iesu i karawa, ao bukin tera bwa e karau nanora ataakin anne?

⁸ E katauraoa naba buokara Iehova ae reke mairoun temanna riki te anera. E kabwarabwaraa Te Kaotioti 10:1 taekan “te anera temanna ae korakora” ae kamimi, are “moana kaanga ai aron taai.” Te anera ae noraki n te miitara aei, e kaota raoi bannan mimitongin Iesu Kristo ni mwaakana i karawa. (Te Kaotioti 1:13, 16) Bon te koaua bwa Iesu bon te anera? Eng, bon te anera naba ngaia, bwa e atongaki bwa te akanera. (1 I-Tetaronike 4:16, BK) Tera te akanera? Nanon te taeka anne “mataniwiia anera.” Iesu boni ngaia te kabanea ni kakannato i buakoia natin Iehova aika taian taamnei. E a tia Iehova ni mwiokoa Iesu ibukin kairaia Ana taanga n anera. Te akanera aei boni ngaia nibwan te buoka ni koaua. N te aro raa?

9, 10. (a) E a kanga n riki Iesu bwa te tia “buobuoki” ngkana ti bure? (b) Tera buokara ae e kona n reke man ana katoto Iesu?

⁹ E korea ae kangai te abotoro Ioane are e a kara: “Ngkana tao iai temanna ae e bure, ao boni iai ara Tia buobuoki iroun te Tama, ba Teuare e raoiroi ae Iesu Kristo.” (1 Ioane 2:1, BK) Bukin tera bwa e iangoia Ioane bwa bon ara tia “buobuoki” Iesu, ao riki ngkana ti “bure”? Ti boni bure ni katoa bong, ao te bure e karekea uaana ae te mate. (Te Minita 7:20; I-Rom 6:23) Ma e anga maiuna Iesu bwa te karea ibukin ara bure. Ao e a mena ngkai i rarikin Tamara ae nanoanga bwa e na bubutii ibukira. Ngaira n tatabemanira nako ti kainnanoa te aeka n ibuobuoki anne. Ti na kanga ni kona ni butimwaea te ibuobuoki ae tauraoi? Ti riai n raraoma man ara bure nako ao n ukoukora kabwaraan ara bure, ae boto i aon onimakinan ana karea ni kaboomwi Iesu. Ti riai ni kakorakoraira naba bwa ti na aki manga oki ni bure.

¹⁰ I rarikin are e a tia ni mate ibukira Iesu, ao e katea naba te banna ni katoto ae moan te tamaroa are ti na kakairi iai. (1 Betero 2:21) Ti kairaki n ana katoto ao ni buokaki iai bwa ti na bairei raoi ara mwakuri nako, bwa ti aonga ni kararoai bure aika kakaiaki, ao ni kakukureia Iehova ae te Atua. Ti aki kukurei ngkai e reke iroura te aeka n buoka anne? E berita Iesu nakoia taan rimwina bwa e na katauraoa riki te buoka teuana.

Ana Buoka te Taamnei are Raoiroi

11, 12. Tera taamnein Iehova, tera aron korakorana, ao bukin tera bwa ti a kainnanoia ni boong aikai?

¹¹ E berita Iesu ni kangai: “N na butiia te Tama, ao Ngaia E na anganingkami te tia Buobuoki temanna, ba E na memena i roumi n aki toki, are te Tamnei ni koaua; are a aki konaki n anganaki akana ana bwai te aba.” (Ioane 14:16, 17) Bon tiaki te aomata te “Tamnei ni koaua” aei are te taamnei ae raoiroi, ma bon te mwaaka, ae korakoran Iehova ae kakammwakuri. Bon akea tian korakorana. Bon te mwaaka aei are e kabongana Iehova ni karikan bwaai ni kabane, ni karaoi kakai aika kamimi, ao ni katauraoan miitara aika kaotii baika nang riki aika kaineti ma nanona. Kioina ngke e aki kabongana taamneina Iehova n aaro akanne ni boong aikai, nanona ngkanne bwa ti aki kainnanoa taamneina?

¹² Tiaki ngaia anne! N “tai aika kamamate” aikai, ao ti a kainnanoa riki taamnein Iehova. (2 Timoteo 3:1) E kakorakoraira bwa ti na kaaitarai kataaki. E buokira ni karikirakei aroaro aika tamaroa ake ti a kaaniaki iai ma Iehova, ao tarira ma mwanera n te onimaki. (I-Karatia 5:22, 23) Ti na kanga ngkanne ni kakabwaiaki man te buoka ae kamimi aei mairoun Iehova?

13, 14. (a) Bukin tera bwa ti kona ni kakoauaa raoi bwa e tatauraoi Iehova n anga taamneina ae raoiroi nakoia ana aomata? (b) Te aeka ni mwakuri raa are ti kona ni kaotia iai bwa ti aki raoi butimwaea te bwaintangira ae te taamnei ae raoiroi?

¹³ Te moanibwai, ti riai n tataro ibukin te taamnei ae raoiroi. E taku Iesu: “Ma ngaia aei, ngkai kam ata te angania natimi baika raraoi, ngkami akana kam buakaka, ao tiaki e maiti riki iroun Tamami are i karawa te kan anga te Tamnei are Raoiroi nakoia akana butiia!” (Ruka 11:13) Eng, Iehova boni ngaia te Tama ae moan te raoiroi. Ngkana ti bubutii ma te onimaki ibukin anganakira te taamnei are raoiroi, bon akea te nanououa bwa e na anganira te bwaintangira anne. Te koaua bwa ti bon bubutii anganakira te bwaintangira anne? Ti bon riai ni bubutii anne ni katoa bong n ara tataro.

¹⁴ Te kauoua ni bwai, ti butimwaea te bwaintangira anne rinanon kaboraoan maiura ma ngaia. Ni kabwarabwarana: Aongkoa e kabokorakora te Kristian ma nanona ni kani matakuakini taamnei aika bwaitingako. E a tia n tataro ibukin te taamnei ae raoiroi bwa e na buokia n rawa nakon anuana ae kammaira aei. E a tia ni karekea buokana mairouia unimwaanen te Ekaretia, ao a tuangnga bwa e na kakorakoraa n totokoa arona anne, ma n rawa ni kaania ma bwaai aika kammaira. (Mataio 5:29) Tera ae e na riki ngkana e aki mutiakina reireiana ao e a manga kariaia naba bwa e na bwaka ni mamaarana anne? E karaoa ngkanne ae boraoi ma nanon ana tataro are e bubutii iai te taamnei ae raoiroi bwa e na buokia? Ke e a karawawata taamnein te Atua ao n aki karekea te bwaintangira anne? (I-Ebeto 4:30) Ni koauana, ngaira ni kabane ti riai ni karaoa are ti konaa ni kakoauaa raoi bwa ti teimatoa ni karerekea te buoka ae tamaroa aei mairoun Iehova.

Te Buoka man Ana Taeka te Atua

15. Ti kanga ni kaotia bwa ti aki iangoa te Baibara bwa te boki n aki akaka?

¹⁵ E bon teimatoa naba te Baibara n riki bwa nibwan te buoka nakoia ana toro Iehova aika kakaonimaki i nanon tienture aika bati. Ti riai n ururingnga bwa bon nibwan buokara te Baibara, ao ti aki riai n iangoia bwa te boki n aki akaka. E kainnanoaki te kakorakora ngkana ti na karekea buokara mai iai. Ti riai ni karika te wareware n te Baibara bwa kanoan ara babaire i nanon maiura.

16, 17. (a) E a kanga Taian Areru 1:2, 3 ni kabwarabwarai kakabwaia aika reke man warekan ana tua te Atua? (b) E a kanga Taian Areru 1:3 ni kaota bannan te mwakuri korakora?

¹⁶ E taku Taian Areru 1:2, 3 ibukin te aomata ae kakukureia te Atua: “Bon iai ana kimareirei n ana tua Iehova; ao e ururinga ana tua ni ngaina ao ni bong. Ao e na katotonga aron te kai ae unikaki i rarikini karangan raan; ae kariki uaana ni bongina, ao e aki rai naba bana; ao a na kakabaia bwaai ni kabane akana e karaoi.” Ko nora te iango ae rangi ni kakawaki ae oti n te rongorongo anne? E bebete warekan taeka akanne ao n iangoia bwa a kaota bannan te tabo ae rau, ae oti n te kai ni katantan ae e mena i rarikin te karanga. Ai kakukurei ra ngkanne rawean te matu teutana n te bwakantaai n te tabo anne! Ma e ngae n anne, e aki tuangira te areru bwa ti na iangoa te motirawa. E kaota iai te banna ae kaokoro, ae taekan te mwakuri korakora. N te aro raa?

¹⁷ Noria bwa te aroka ae e taekinaki ikai, bon tiaki te kai ni katantan, are e a bon rikirake naba i bon irouna i rarikin te karanga. Bon te kai ae karikiuaa ae “unikaki” n te tabo are e karauaki raoi n rineaki bwa, “rarikin karangan raan.” E na kanga te kai ae tii te kaina n rikirake i rarikin karaanga aika bati? E teretere bwa ni nnen aroka aika karikiuaa, ao e kona te aomata ane arokana akanne ni kena aontano ibukin karokoan te ran nakon waakan arokana aika kakawaki irouna. Aa, e a teretere ikai ngkanne te reirei ae kakawaki! Ni kaineti ma te onimaki, ti rikirake n ai aron te kai, ibukin te mwakuri korakora are e karaoaki nakoira. Ti a ikoikotaki i nanon te botaki are e uota te ran ae itiaki nakoira ae ranin te koaua, ma ti bon riai naba ni karaoa tabera iai. Ti riai ni karekea angara bwa ti aonga ni boni kakabwaiaki man te ran ae kakawaki aei, ma ni kaiangomwaakaira ao n ukeuke riki bwa ti aonga ni karina koauan ana Taeka te Atua n ara iango ao i nanora. N te aro anne, ti na karikii uaara aika raraoi.

18. Tera ae e kainnanoaki ibukin karekean kaekan ara titiraki man te Baibara?

¹⁸ Akea manenan te Baibara ngkana e a bon titiku naba n te kabwate n aki kaukaki. Te Baibara tiaki aron te koratabuki are ti na kaina matara nako iai, ao ni kariaia bwa e na katangainaa baana i bon irouna, ma ni kaantaningaia bwa e na kaotii kaekan ara titiraki. Ngkana ti kaaitara ma karaoan motinnano, ao ti bon riai ni keniken ibukin “atakin te Atua,” kaanga ai aron te kaubwai ae taunaki. (Taeka N Rabakau 2:1-5) E aki toki ni kainnanoaki te botumwaaka ao te ukeuke n reirei ae karaoaki raoi, bwa ti aonga ni karekei reirei man te Baibara ake a kaineti ma kainnanora. Iai iroura booki aika bati aika kabotoaki i aon te Baibara aika kona ni buokira n ara ukeuke n reirei. Ngkai ti kabonganai booki aikai ni keniken ma te ingaingannano ibukin bwaai aika kakawaki, aika a kaineti ma te rabakau ae mena n ana Taeka te Atua, ti a boni kabongana ngkanne iai ana buoka Iehova.

Te Buoka Rinanoia Raora n Onimaki

19. (a) Bukin tera bwa a kona n iangoaki kaongora aika n Te Taua-n-Tantani ao te Awake! bwa bwaai n ibuobuoki aika katauraoaki rinanoia raora n onimaki? (b) Ko a kanga n tia ni buokaki man te kaongora teuana ae mena n ara boki ake a boretiaki?

¹⁹ A aki toki n riki ana toro Iehova bwa nibwan te buoka nakoia raoia n tatabemania nako. E a tia ni bitaki Iehova? E bon tuai. Akea te nanokokoraki bwa ngaira n tatabemanira nako, ti kona n iangoi aanga ake ti karerekea iai te buoka n taina ae riai mairouia raora n onimaki. N aron anne, ko kona n uring tabeua kaongora aika mena n Te Taua-n-Tantani ke te Awake! ake a karaua nanom n te tai are ko kainnanoa iai raunnanom, ke ibukin buokam ni kaeta am kangaanga ke kataakin am onimaki? E karokoa te buoka nakoim Iehova rinanon “te toro ae kakaonimaki ae wanawana” are e katabeaki ibukin katauraoan ‘te amwarake n taina ae riai.’​—Mataio 24:45-47.

20. Baikara aanga ake a kaotiia iai unimwaanen te ekaretia bwa ngaiia “bwaai n tituaraoi aika mwaane”?

²⁰ Ma a bati taai ake ti a boni buokaki iai irouia raora n onimaki. Tao e anga ana kabwarabwara ae rota nanora te unimwaane n te ekaretia, ke e kawarira ni kaungai nanora ma ni buokira n ara kangaanga ae korakora, ke e anga ana reirei ma te akoi are ti a buokaki iai n nori mamaarara, ao arora ni kona n tokanikai iai. E korea ae kangai te Kristian temanna ae kakaitau ibukin te buoka are e karekea mairoun te unimwaane temanna: “E kaungaai bwa N na kaotii au iango ngke I airi ma ngaia n te mwakuri ni minita. N te tairiki are imwaina, ao I tataro nakon Iehova ni butiia bwa e na karekea temanna ae I kona ni maroro ma ngaia. N te bong are imwina, ao e taetae nakoiu te tari te mwaane aei ma te bwanaa n akoi. E buokai bwa N na nora aron Iehova n tia ni buokai i nanon ririki aika bati. I kakaitau nakon Iehova ibukin karokoan te unimwaane aei nakoiu.” N aanga aikai, a a tia unimwaanen te ekaretia ni kaotiia iai bwa ngaiia “bwaai n tituaraoi aika mwaane,” ake a katauraoaki iroun Iehova rinanon Iesu Kristo bwa a na buokira n nanomwaaka i aoni kawaira nakon te maiu.​—I-Ebeto 4:8, NW.

21, 22. (a) Baikara uaa aika a kona n reke ngkana a maiuakina nanon te reirei are e kuneaki n I-Biribi 2:4 kaain te ekaretia? (b) Bukin tera bwa e kakawaki naba karaoan te ibuobuoki ae uarereke?

²¹ Irarikia unimwaane, Kristian naba n tatabemania nako aika kakaonimaki, a tangiria ni maiuakina te tua mairoun te Atua, ae ‘a na tai mutiakin oin aia bwai ma a na mutiakin naba aia bwai raoia.’ (I-Biribi 2:4) Ngkana a maiuakina nanon anne kaain te ekaretia ni Kristian, e na reke iai ngkanne te mwakuri n akoi ae kakukurei. N te katoto, e kaaitara te utu teuana ma te kabuanibwai ae karina ma ni kananokawaki. Imwain rikin anne, ao e kaira natina ae te ateiaine te karo nakon te titooa. I aoni kawaia n okira mwengaia ao a a kurati naba. E mate natina ao e kakaiaki ikoakin teuare te karo. Ngke e a kaotinakoaki te karo anne man te oo-n-aoraki, ao e a boni mwauku n te aro are akea te bwai ae e kona ni karaoia i bon irouna. E rangi n rotaki buaka neiere te buu ibukin tabeakinana n tii ngaia. Mangaia are iai tabeman n te ekaretia ake a buokiia te taanga ae a rawawata aikai ni mwengaia, i nanon tabeua te wiki.

²² Ni koauana, a aki karaoaki mwakuri n akoi tii ngkana iai te kabuanibwai ae kananokawaki n aron anne. Ti karekei tabeua buoka ni bwaai aika uarereke. Ma n aki ongei uarereken mwakuri n akoi ake a karaoaki nakoira, ti kakaitau iai tiaki ngaia anne? Ko kona n iangoi taai ake e taekin iai taeka n akoi ke ni karaoi mwakuri n akoi nakoim te tari te mwaane ke te aine, n te tai are ko kainnanoia iai? E aki toki Iehova n tabeakinira n aaro aikai.​—Taeka N Rabakau 17:17; 18:24.

23. Tera aron ana iango Iehova ngkana ti botumwaaka ni kaai n ibuobuoki i marenara?

²³ Ko tangira Iehova bwa e na kabonganako bwa buokaia tabemwaang? E uki nakoim te mwioko ane okoro anne. Ni koauana, a kakawaki iroun Iehova mwakuri n ibuobuoki ake ko karaoi n aron akanne. E taku ana Taeka: “Ane nanoangaea te aomata ae akea ana bwai ao e angan Iehova, ao ana makuri ae raoiroi aei E na manga kaboa.” (Taeka N Rabakau 19:17) E reke te kimwareirei ae korakora ngkana ti anga ara ibuobuoki nakoia tarira ao mwanera. (Mwakuri 20:35) E aki kona n reke te kimwareirei ngkana ko anga te buoka n aron aikai, ke te kaunganano nakoia te koraki ake a kaokoroia i bon irouia. (Taeka N Rabakau 18:1) Mangaia are ti bia kakaonimaki ni kaakaei bobotaki ni Kristian, bwa ti aonga ni kaungaira i marenara.​—Ebera 10:24, 25.

24. Bukin tera bwa ti aki riai n namakinna bwa aongkoa ti aki tabeakinaki ibukina bwa ti aki nori ana kakai aika kamimi Iehova ake e karaoi ngkoa?

²⁴ Tiaki te koaua bwa e kakukurei iaiangoan aanga ake e buokira iai Iehova? E ngae ngke ti aki maeka n te tai are e karaoi iai kakai Iehova aika kamimi ibukin karaoan nanon ana kaantaninga, ma ti aki riai n namakinna bwa aongkoa ti aki tabeakinaki. Te bwai ae kakawaki, bon aron Iehova n anganira te buoka ni kabane are ti kainnanoia bwa ti aonga n teimatoa ni kakaonimaki. Ao ngkana ti kaai n nanomwaaka n te onimaki, ti na maeka n te tai are ti na nora iai kamimin ana mwakuri Iehova ma mimitongina ake a noraki n taai ake ngkoa! Ti na nanomwaaka ni butimwaea ao ni kabongana raoi ana buoka Iehova ae tatangira, bwa ti aonga ni kona n uringa taekan ara kibu ibukin te ririki 2005 ae kangai: “E reke buokau mairoun Iehova.”​—Taian Areru 121:2.

Tera Am Iango?

E a kanga Iehova ni katauraoa te buoka are ti kainnanoia ni boong aikai—

• rinanoia anera?

• rinanon te taamnei ae raoiroi?

• rinanon ana Taeka ae kairaki koreana?

• rinanoia raora n onimaki?