E Koaua Bwa E Beritanna te Atua Bwa Ko na Kaubwai?

‘E tangiriko te Atua bwa ko na kaubwai, e na iai tabeua am kaa ma am bitineti ae ko kaumwane iai. Bon tii onimakinna, ao anganna am mwane ni kabane n aron am kona.’

ANNE te aeka n rongorongo are e a ueke mairouia kurubu n Aro tabeua i aon Brazil, n aron ae taekinaki n te nuutibeeba teuana are boreetiaki ikekei. Anne te rongorongo ae e rangi ni kakoauaaki irouia aomata aika mwaiti. Ni kaineti ma te kakaae teuana ae karaoaki n te United States i aoia aomata ake a taku bwa Kristian ngaiia ao e ribootinaki n te Time maekatin ae kangai: “Mwaitiia ake a kakoauaa ae e tangiriia aomata te Atua bwa a na kaubwai bon 61%. Ao 31% . . . a boraoi n iango n are ngkana ko angan te Atua am mwane, ao e na manga kakabwaiako ni kabatiaa riki am mwane.”

A aki toki n atongaki aeka ni koaua aikai bwa reirein Aaro ni kaineti ma kabatiaan te kaubwai, ai moarara riki n aban nako Amerika Maiaki n aron Brazil, ao a uanao aomata ake a raanga nakoia Aaro ake a beritanna ae boni mairoun te Atua te kaubwai n rabwata. Ma e koaua bwa e boni beritana te kaubwai te Atua nakoia ake a beku irouna? E koaua bwa a maiu ni kaubwai ana toro te Atua ni kabane ake rimoa?

E boni koaua bwa ti aki toki n noria n te Koroboki ae Tabu n te Taetae n Ebera bwa a raonaki ana kakabwaia Iehova ni kaubwai n rabwata. N te katoto, ti wareka ae kangai n Te Tua-Kaua 8:​18: “Ko na ururinga Iehova ae Atuam, ba boni Ngaia ae anganiko te kokona ni kareke bwaai [ke “te maiu ni kaubwai,” NW].” A karauaki nanoia tibun Iteraera n aei bwa ngkana a ongeaba nakon te Atua, ao e na boni karikiia bwa te natannaomata ae kaubwai.

Ma tera aroia ana toro te Atua n tatabemania nako? E rianako kaubwain te aomata ae kakaonimaki ae Iobi, ao imwini kabuaani kaubwaina iroun Tatan ao Iehova e a manga kaoka kaubwain Iobi ‘ni kauouaa te tai mwaitina.’ (Iobi 1:3; 42:​10, BK) E rangi ni kaubwai naba Aberaam. E taekinaki ni Karikani Bwaai 13:2 bwa e “bati ni kau kao, ma ni kau tireba, ma ni kau koora.” Ngke a botaki aia taanga ni buaka ueani Maiaki n taua ai natin Aberaam are Rota, ao Aberaam e “kairiia nako ana aomata aika reireiaki te aro ni buaka aika bungiaki i nanon ana auti, ba tenibubua ao tengaun ma waniman.” (Karikani Bwaai 14:14) Ngkai iai 318 “aomata aika reireiaki” raoi ma ni mwaatai ni kamanenaani bwaai ni buaka, e bae ngkanne n rangi ni buburakaei ana utu Aberaam. Bon te aomata ae maiu ni kaubwai Aberaam ao a mwaiti ana nanai n tiibu ao ni kao ao e teretere ngkanne man te koaua aei bwa e kona ni kamaiua te utu ae buburakaei.

Eng, a bati ana toro te Atua aika kakaonimaki rimoa aika a kaubwai naba n aroia tabeman mai buakoia aika Aberaam, Itaaka, Iakoba, Tawita ao ai Toromon. Ma e nanonaki ngkanne n aei bwa e na karekei kaubwaia aomata ni kabane ake a toro irouna te Atua? N te itera teuana, e koaua naba ae ngkana e maiu ni kainnano te aomata e oti iai ngkanne bwa e aki tangiraki iroun te Atua? A na maroroakinaki kaekaan titiraki aikai n te kaongora ae imwina.