Titiraki Mairouia Taani Wareware
Bon Te Aomata Ni Koaua Te Riaboro?
Eng, e reirei te Baibara bwa bon te aomata ni koaua Tatan te Riaboro. Ma a bwainingarea te iango ae bon te aomata ni koaua te Riaboro taan tiriburea te Baibara. A taku bwa e bon tii tei Tatan ibukin te buakaka ae memena i nanoia aomata.
Ti riai ni mimi ni mangaongaon otaia aomata bwa antai raoi Tatan? Ti bon aki. E kaikonakaki ni kangai: Tao e kona ni kamauna tanen tabonibaina te tia kamwarua n te tabo are e karaoa iai te mwakuri ni kakeru, bwa e aonga n aki kinaaki ao n teimatoa ni waakina ana mwakuri n ururui tuua ao e aki rereke. N aron naba anne, bon te tia kamwarua Tatan ae karaua raoi ni bairea ana mwakuri n iowawa n akea ataakina irouia aomata, ni karikirakea te aroaro ni maiu ae buakaka. E kaotaki raoi Tatan iroun Iesu bwa boni ngaia ae kairiia botannaomata nakon te aroaro ae buakaka. E aranaki Tatan iroun Iesu bwa “uean aonaba.”—Ioane 12:31.
E riki mai ia te Riaboro? E kororaoi te anera ae karitei aei ngke e moani karikaki i karawa, ma e karikia i bon irouna bwa te Riaboro ngke e a taonakinako n tangiran te kan taromauriaki irouia aomata, n oneani mwin ae e na taromauriaki te Atua. E koreaki n te Baibara taekan te maroro i aon te aba i marenan Tatan ma Iesu, ike e a kaota iai te Riaboro te nano ni kani kakannato ae boto i aon te bangaomata. E kataia Tatan ni kabwakaa Iesu bwa e na ‘katorobubua ni bobaraaki n taromauria.’—Mataio 4:8, 9.
E kaota naba nanona Tatan n ana maroro ma te Atua ae koreaki n te boki ae Iobi. E aki kona ni katokaki mani kaririaia aomata bwa a na kakeaa te Atua.—Iobi 1:13-19; 2:7, 8.
Iangoa aei: Ngkana ngaia bwa a a tia ni maroro Tatan ma Iehova ae te Atua ao Iesu Kristo, e na kanga ngkanne n taekinaki Tatan bwa bon tii te buakaka ae mena i nanoia aomata? Bon akea te buakaka i nanon te Atua ke Natina! E teretere ngkanne bwa bon te aomata raoi Tatan, ae te anera ae buakaka ae akea irouna karinean Iehova ao Iesu.
E kaotaki koauan ae bon te aomata ni koaua te Riaboro man aroaroia aika bubuaka botannaomata. A nonoraki aaba n te aonnaba aei bwa a kataonabai tataran amwarake, ma a a mate ni baki aia botannaomata. A kakawakini bwaai ni buaka ibukini kamaunaaia i marenaia ao a kabarekaa te otabwanin. Ma e ngae n anne, angia aomata a aki ataa bukin rikin te riribai aei, ae te aroaro ae kona ni kamaunaia i bon irouia. Bukin tera?
E kaotaki n te Baibara bwa e ‘kamataki nanoia aomata aika aki onimaki’ Tatan. (2 I-Korinto 4:4) E kammwakura ana botaki Tatan ae aki kona n noraki bwa e aonga ni burebureiia aomata. Bon “aia uea taimonio” ngaia. (Mataio 12:24) N aron te mataniwi n te botaki ae baireaki iai te mwakuri ni kakeru, ae e kaira te waaki ni kakeru ae riaon te tua ma e aki kinaaki irouia te koraki ake a rotaki n ana mwakuri, ao ai aron naba Tatan bwa e kabongana ana botaki ae aki ataaki, ae kaaina anera aika buakaka bwa a na taui aroia aomata aika mwaiti ake a teimatoa n aki ataa ana mwakuri ke ana kariri.
Ai kakaitaura ngaira ngkai e kaotaraeaki n te Baibara, te Riaboro ma ana botaki! Ti a kona ngkanne ni karaoi mwaneka ake ti na tuki iai ana kariri te Riaboro. E kaungaira te Baibara ni kangai: “Kam na irira nanon te Atua; ma kam na rarawa nakon te riaboro, ao ane e na biri nako mai roumi iai.”—Iakobo 4:7.