Rooro N Rikirake—Kakorakorai Nanomi Ni Kani Beku Ibukin Iehova
“Ururinga naba te tia Karaoiko n am bong n ataei.”—TE MINITA 12:1, BG.
1. Tera te kakao ae a anganaki ataein Iteraera?
INANON 3,500 tabun te ririki n nako, ao e tua ae kangai nakoia ibonga ma unimwaanen Iteraera ana burabeti Iehova ae Mote: “Ikotiia aomata, ake mwaane, ma aine, ma ataei . . . , ba a aonga n ongo, ao ba a aonga n reirei, ma ni maka Iehova ae Atuam, ma ni kawakin touani mwin taekan te tua aei ni kabane.” (Te Tua-Kaua 31:12, BG) Noria bwa te koraki ake a anganaki te kaetieti bwa a na kaei botaki n taromauri, boni mwaane, aine ao ataei. Eng, a mena naba rooro n rikirake i buakoia aomata ake a tuangaki bwa a na ongora ao n reirei, ao n tou mwin ana kairiri Iehova.
2. E kanga Iehova ni kaota mutiakinaia rooro n rikirake n te ekaretia ni Kristian rimoa?
2 E teimatoa naba Iehova n te moan tienture ni kaota mutiakinaia rooro n rikirake ake a tangira te Atua. N te katoto, e kaira te abotoro Bauro rinanon taamneina bwa e na karini kaetieti aika kaineti nakoia ataei, i nanon ana reta tabeua ake e kanakoi nakon ekaretia. (Wareka I-Ebeto 6:1; I-Korote 3:20.) E a rikirake aia kakaitau ibukin Tamaia are i karawa ae tatangira, rooro n rikirake aika Kristian ake a kamanena te reirei aei, ao a karekei kakabwaia mairouna.
3. A kanga rooro n rikirake ni boong aikai ni kaotii nanoia ni kani beku ibukin te Atua?
3 A kaoaki naba rooro n rikirake ni boong aikai bwa a na botaki n taromauria Iehova? Eng! Bon nibwani kimwareireia ana aomata nako te Atua noran ae a rangi ni bati rooro n rikirake aika a toro iroun te Atua ni katobibia te aonnaba, aika a mutiakina ana kaungaunga Bauro ae kangai: “Ti na iaiangoira i marenara ni kaungaira nakon te tangira ma mwakuri aika raraoi, ao ti na aki kaaka arora ni bobotaki, n aron ae a taneiai iai tabemwaang, ma ti na kaungaira i marenara, ni kakorakoraira riki iai ngkai ti a nora te bong arei bwa e a kaan.” (I-Ebera 10:24, 25) Irarikina, a bati naba ataei ake a airi ma aia karo n tataekina te rongorongo ae raoiroi ae taekan Ana Tautaeka n Uea te Atua. (Mataio 24:14) A bwabetitoaki nga ma nga rooro n rikirake ni katoa ririki ibukini kaotan tangiran Iehova irouia ae nako mai nanoia, ao a karekei kakabwaiaaia ngkai a a riki bwa taan rimwini Kristo.—Mataio 16:24; Mareko 10:29, 30.
Butimwaea te Kakao Ngkai
4. N ningai ae a kona iai rooro n rikirake ni butimwaea ana kakao te Atua bwa a na beku ibukina?
4 E koreaki ae kangai n Te Minita 12:1, BG: “Uururinga naba te tia Karaoiko n am bong n ataei.” Iraua ami ririki ngkami rooro n rikirake ae kam na kona iai ni butimwaea te kakao ae tatangira ibukin taromaurian Iehova ao te beku irouna? Akea te ririki ae katereaki n te Baibara. Ngaia are tai kerikaaki ao n iangoia bwa ko rangi n uarereke n ongora iroun Iehova ao ni beku ibukina. Ko a kaungaaki bwa ko na aki tabwara ni butimwaea te kakao aei n aki ongeia bwa iraua am ririki.
5. A na kanga kaaro ni buokiia natiia bwa a na rikirake aia onimaki?
5 A bati i buakomi aika buokaki bwa a na rikirake n te onimaki irouia aia karo ae tii temanna ke ni kauoman. N te aro aei, titeboo ngkanne ngkoe ma Timoteo are e maiu n taai ake a karakinaki n te Baibara. E reireinaki taekan te koroboki ae tabu ngke te merimeri ngaia, iroun tinana ae Eunike ao tibuna ae Nei Roiti. (2 Timoteo 3:14, 15) Tao a kataneiako naba am karo n aron anne n aroia n reireiniko man te Baibara, n tataro ma ngkoe, ni kairiko nakoni bobotaki n te ekaretia ao aia botaki aika bubura riki ana aomata te Atua, ao n airi ma ngkoe n te mwakuri ni minita. Ni koauana, reiakinam kawain te Atua boni mwiokoaia ae moan te kakawaki am karo mairoun Iehova. Ko kakaitau ibukin tangiram ao tabeakinam irouia?—Taeka N Rabakau 23:22.
6. (a) Ni kaineti ma Taian Areru 110:3, tera te aeka n taromauri ae e kukurei iai Iehova? (b) Tera ae ti na rinanona ngkai?
6 Mangaia are ngkai kam a tabe n ikawai ngkami rooro n rikirake, e tangiringkami Iehova bwa kam na “kakoauaa raoi bwa tera nanon te Atua ae raoiroi ma n riai ao ni kororaoi,” n aron are e karaoia Timoteo. (I-Rom 12:2) Ngkana kam karaoa anne, kam nang uataboi iai waaki ni kabane n te ekaretia, tiaki ibukina bwa a tangiringkami ami karo bwa kam na karaoi, ma bon ibukin nanomi ni kani karaoa nanon te Atua. E na kukurei Iehova ngkana ko beku ibukina ma nanom ni kani karaoia. (Taian Areru 110:3) Ko na kanga ngkanne ni kaotia bwa ko kani kakorakoraa riki nanom ni kan ongora iroun Iehova ao n tou mwin ana kairiri? Ti na rinanoi ngkai tenua aanga aika kakawaki ake ko kona ni karaoi iai. A boto i aon te ukeuke n reirei, te tataro, ao te aroaro ni maiu. Ti na nenera ngkai teuana imwin teuana.
Kinaa Iehova n Aron ae Bon te Aomata
7. E kanga Iesu ni katea te katoto n arona n reiakina te Koroboki ae Tabu, ao tera ae e buokia ni karaoan aei?
7 Te moanibwai, ko kaotia bwa ko kani kakorakoraa nanom ni beku ibukin Iehova rinanon te wareware n te Baibara ni katoabong. Ko kona ni karekei baika ko na rauaki iai n am onimaki ao ni karekea am atatai ae kakawaki man te Baibara, n arom ni katoatai ni wareka Ana Taeka te Atua. (Mataio 5:3) E katea te katoto n aei Iesu. N te taina ngke 12 ana ririki, a a kunea ana karo n te tembora “n tekateka i buakoia taan reirei ma n ongora irouia ao n titirakinia.” (Ruka 2:44-46) E a kamani karikirakea tangiran te Koroboki ae Tabu Iesu ao otana iai, ngke te teei ngaia. Tera ae e buokia ni karaoa aei? Akea te nanououa bwa a karaoa tabeia ae kakawaki tinana ae Maria ao tamana are e kaikawaia ae Ioteba. Bon ana toro te Atua ngaiia ake a reireina Iesu mangke te merimeri taekan te Atua.—Mataio 1:18-20; Ruka 2:41, 51.
8. (a) N ningai ae a riai iai kaaro ni moana karinan tangiran Ana Taeka te Atua i nanoia natiia? (b) Karakina te rongorongo ae kakoauaaki iai kakawakini kataneiaakia ataei mangke a merimeri.
8 N aron anne, kaaro ni boong aikai aika mamaaka te Atua a ataa kakawakin karinan tangiran ana koaua te Baibara i nanoia natiia mangke a merimeri. (Te Tua-Kaua 6:6-9) Anne are e waekoa ni karaoia te tari te aine ae te Kristian ae Rubi, imwini bungian ana moan nati te mwaane ae Joseph. E wareware nakoina ni katoabong man te boki ae Karaki Man te Baibara. Ngke e a ikawai riki, e a buoka natina aei ni kamatenanoi kiibu tabeua. E kakabwaiaaki Joseph man te reirei ni kataneiai aei? Eng, e a kona ni karakini karaki aika bati man te Baibara n oin ana taeka ngke e a rabakau n taetae. Ao ngke ai nimaua ana ririki, e a anga ana moan reirei n te Kuura ni Kataneiai Ibukia Taan Uarongorongo.
9. E aera ngkai e kakawaki te wareware n te Baibara ao kananoan am iango i aon ane ko warekia?
9 Ngkami rooro n rikirake, kam riai ni karika te wareware n te Baibara ni katoabong bwa anuami ae kam teimatoa iai man ami bongi n ataei ni karokoa ikawaimi, bwa kam aonga n rikirake n te onimaki. (Taian Areru 71:17) E aera ngkai e na buoka rikiraken am onimaki te wareware n te Baibara? Nora ana taeka Iesu n ana tataro nakon Tamana: “Ibukini karekean te maiu are aki toki, a riai n ataiko ae tii ngkoe te Atua ae koaua.” (Ioane 17:3) Ni koauana, ngkana ko kabatiaa riki am atatai ibukin Iehova, ko nang iangoia riki bwa kaanga te Aomata ni koaua ao ni kakorakoraa riki tangirana. (I-Ebera 11:27) Ngaia are ni warekani mwakoron te Baibara n taai nako, kabongana am tai anne n reiakina riki iai taekan Iehova. Titirakiniko ni kangai: ‘Tera reireiau man te rongorongo aei ibukin Iehova n aron ae kaanga bon te Aomata? E kanga kibun te Baibara aei ni kaota tangirau ao mutiakinau iroun te Atua?’ Karekean am tai ni kananoa am iango i aon titiraki aikai, e na buokiko n ota n ana iango Iehova ao ana namakin ao baika e tangiri mairoum. (Wareka Taeka N Rabakau 2:1-5.) N aron te teinimwaane ae Timoteo, e na ‘anaaki nanom bwa ko na kakoauai’ baika ko reiakin man te Baibara, ao ko na kairaki iai bwa ko na taromauria Iehova ma nanom ni koaua.—2 Timoteo 3:14.
Kakorakoraan Tangiran Iehova Iroum n te Tataro
10, 11. E kanga te tataro ni buokiko ni kakorakoraa nanom ni kani beku ibukin te Atua?
10 Te kauoua ni bwai ae ko kona iai ni kakorakoraa nanom ni kani beku ibukin Iehova ma nanom ni kabane, boni man am tataro. Ti wareka ae kangai n Taian Areru 65:2, BK: “Ko ongo te tataro. A kona ni kawariko aomata nako.” A kona iruwa ake a roko n ana tembora Iehova ni kawaria n te tataro, n te tai naba are a riki iai I-Iteraera bwa aomata aika iai ana berita te Atua irouia. (1 Uea 8:41, 42) E aki inanonano te Atua. A karauaki nanoia ake a kawakin ana tua, bwa e na bon ongo irouia. (Taeka N Rabakau 15:8) Ni koauana, te taeka ae “aomata nako” nanona boni ngkami naba rooro n rikirake.
11 Ko ataia bwa e boto te iraorao ni koaua n te mamaroro ae raoiroi. Ko bae ni kukurei ni kaotii am iango, tabeaiangam, ao am namakin nakon raoraom ni kaan. N aron anne, ko uaia ni maroro ma am tia Karikiriki ae Kakannato ngkana ko tataro mai nanom ni koaua nakoina. (I-Biribi 4:6, 7) Taetae nakon Iehova n aron ae kaanga ko bunra nanom nakon am karo ae tatangira ke raoraom ni kaan. Ni koauana, e rangi n irekereke arom n tataro ma am namakin ibukin Iehova. Ane ko na noria bwa ngkana e a nene riki am iraorao ma Iehova ao a na raraoi riki kanoan am tataro.
12. (a) E aera ngkai e bati riki ae kainnanoaki n te tataro ae raoiroi nakon ae tii te taetaenikawai? (b) Tera ae na buokiko n ataia ae e kaan Iehova ma ngkoe?
12 Ururinga are e bati riki ae kainnanoaki n te tataro ae raoiroi riki nakon ae tii te taetaenikawai, bwa e irekereke ma am namakin nako. Kaotiota am tangira, am karinerine ae korakora ao onimakinan raoi Iehova n am tataro. Ngkana ko a ota n aron Iehova ni kaekai am tataro, ko nang ataia raoi iai n aron ae ko tuai n ataia mai mwaina bwa “e a kaan Iehova nakoia akana weteia ni kabaneia.” (Taian Areru 145:18, BG) Eng, e na kaaniko Iehova ao e na kakorakorako bwa ko na rarawa nakon te Riaboro, ao ni karaoi motinnano aika eti ni maium.—Wareka Iakobo 4:7, 8.
13. (a) E kanga ni buokaki te tari te aine temanna n ana iraorao ma te Atua? (b) E na kanga am iraorao ma te Atua ni buokiko ni kaaitarai aia kariri tabonrorom?
13 Iangoa aron Cherie ni karekea korakorana man ana iraorao ae kaan ma Iehova. Ngke e mena n te kauarinan neiei, e a reke kaniwangana ibukin ana kekeiaki ae raoiroi n te reirei ao rianakona naba n te takaakaro. Ngke e a bane ana reirei, e a kariaiakaki reireina n te kuura ae rietata ike e na kona iai ni karekea ana reirei ae rietata riki. E taku Cherie, “I kaririaki iai ao a kakorakoraia n anaa nanou raou n reirei ao taan reirei n te takaakaro bwa N na butimwaeia.” Ma e ataia neiei bwa kabuburaan riki ana reirei, e na kainnanoaki iai kabanean angiin ana tai n te kamatebwai ao te katauraoi nakon taian takaakaro, ao ai tii teutana nikiran ana tai are e na beku iai ibukin Iehova. Tera ae karaoia Cherie? E taku, “Imwin au tataro nakon Iehova, I a aki butimwaea kaniwangau are kariaiakau n rin n te kuura ae rietata, ao I a moana au mwakuri n regular bwaiania.” Man te tai anne ni karokoa ngkai, e a tia ni bwaiania neiei i nanon nimaua te ririki. E taku neiei, “I aki uringaaba teutana. I rangi ni kukurei n ataakin ae I motinnanoia bwa N na kakukureia Iehova. Ni koauana, ngkana ko moanibwaia Ana Tautaeka n Uea te Atua, ao a na karekeaki bwaai ni kabane nakoim.”—Mataio 6:33.
E Kaotiotaki ‘Nanom ae Itiaki’ Man Aroarom ae Raoiroi
14. E aera ngkai e kakawaki aroarom ae raoiroi i matan Iehova?
14 Te katenua ni bwai ae ko kona iai ni kaotia bwa ko beku ibukin Iehova ma nanom ni kani karaoia, boni man aroarom. E kakabwaiaia Iehova rooro n rikirake aika teimatoa n te aroaro ni maiu ae riai. (Wareka Taian Areru 24:3-5, BG.) E rawa te roro n rikirake ae Tamuera ni kakairi n aroia ni wewene ni bure natin te Ibonga ae Rietata ae Eri ake mwaane. A ataaki raoi aroaron Tamuera aika raraoi. E taekinaki ae kangai n te Baibara: “E rikirake n ikawai te tei are Tamuera, ao e riki tangirana iroun Iehova ao irouia naba aomata.”—1 Tamuera 2:26, BG.
15. Baikara bukina tabeua aika ko kateimatoa iai aroarom ae raoiroi?
15 Ti a maeka ngkai n te aonnaba ae kaonaki irouia aomata aika tangiriia i bon irouia, a nanorieta, a aki ongeaba irouia aia karo, a bangaomata, a aki kakaonimaki, a iowawa, a kainikatonga, ao a tangira riki kakukurein te rabwata nakon tangiran te Atua, aikai bon tii tabeua mai buakon aroaro ake e karinani Bauro. (2 Timoteo 3:1-5) Mangaia are e kona n rangi ni kangaanga iroum kateimatoaan aroarom ae moanibaan te raoiroi ngkai ko a otabwaniniaki n te waaki ae buakaka. Ma e ngae n anne, ni katoatai are ko karaoa iai ae eti ao n rawa nakon te aroaro ae buakaka, ko a kaotia iai bwa ko tei n ana itera Iehova ni kaineti ma mwaakana n tautaeka i aoni bwaai ni kabane. (Iobi 2:3, 4) E rau naba nanom n ataakin ae ko butimwaea ana bubutii Iehova ae kaotaki iai ana tangira, are kangai: “Natiu, ko na wanawana, ao kakukureia nanou, Ba I aonga ni kaeka ane kakanikoai.” (Taeka N Rabakau 27:11, BG) Irarikina, e na kakorakoraaki nanom ni kani beku ibukin Iehova n ataakin ae ko akoaki irouna.
16. E kanga te tari te aine temanna ni kakukureia nanon Iehova?
16 Ngke e mena n te reirei te tari te aine ae Carol ngke tebwi tabun ana ririki, e teimatoa n nimti ana boto n reirei te Baibara ao e ataaki raoi aroarona ae raoiroi. Tera ae riki? E bwainingareaki Carol irouia raona n reirei ibukina bwa e kairaki ni mataniwin nanona ae kataneiaaki n te Baibara, bwa e na aki uataboi bukamaruani boong ni motirawa ao botaki aika boutokaa te nanonnaba. E a reke ana tai neiei n taai akanne ni kabwarabwarai ana koaua nakoia tabemwaang. Imwin ririki aika bati, e a roko ana reta Carol mairoun raona n reirei ngkoa ae kangai kanoana: “I aki toki n iangoia bwa N na reitaki ma ngkoe ao ni karabwako. Tiaki n ae e aki noraki aroarom ae raoiroi ao am katoto ngke te roro n rikirake ngkoe ae te Kristian, n ikotaki naba ma ninikoriam n tei ibukin am onimaki ni kaineti ma boong ni motirawa. Boni ngkoe te moan aomata ae I kaitiboo ma ngaia ae Ana Tia Kakoaua Iehova.” E rangi n rotaki nanon raoraon Carol n reirei n ana katoto, n te aro are e a moana reireina n te Baibara rimwi riki. E kaotia neiei n ana reta nakoni Carol bwa e a tia n riki bwa te tia Kakoaua ngaia ae e a tia ni bwabetitoaki n te maan ae raka i aon 40 te ririki! Ngkami rooro n rikirake ni boong aikai aika kam ninikoria n nimti ana boto n reirei te Baibara, kam kona naba ni kairiia aomata aika raoiroi nanoia bwa a na ataa Iehova, n aroni Carol.
Rooro n Rikirake Aika A Kamoamoaa Iehova
17, 18. (a) Tera ami namakin ibukia rooro n rikirake n ami ekaretia? (b) Tera ae mena imwaia rooro n rikirake aika mamaaka te Atua?
17 Ngaira ni kabane aika ti mena n ana botaki Iehova ni katobibia te aonnaba, ti kimwareirei n noriia nga ma nga rooro n rikirake aika ingainga nanoia ni uataboa te taromauri ae koaua! A kakorakorai nanoia ni kan taromauria Iehova rooro n rikirake aikai, n aroia ni wareware n te Baibara ni katoabong, n tatataro, ao ni kaboraoa aroaroia ma nanon te Atua. Bon nibwani kimwareireia aia karo ao ana aomata nako Iehova rooro n rikirake aika moanibaa n raoiroi aroia aikai.—Taeka N Rabakau 23:24, 25.
18 A na mena rooro n rikirake aika kakaonimaki n te tai ae imwaira i buakoia ake a na maiu ao n rin i nanon te waaki ae boou i aon te aba are e beritanna te Atua. (Te Kaotioti 7:9, 14) A na karekei ikanne kakabwaia aika bati aika kamimi ngkai a teimatoa n rikirake nanoia ni kakaitau nakon Iehova, ao a na kona ni kamoamoaa n aki toki.—Taian Areru 148:12, 13.
Ko Kona ni Kabwarabwaraa?
• A na kanga rooro n rikirake n uataboa te taromauri ae koaua ni boong aikai?
• E aera ngkai e kakawaki kananoan am iango ibukini karekean kakabwaiaam man te wareware n te Baibara?
• E kanga te tataro ni buokiko ni kaania Iehova?
• Tera ae kakororaoaki n aroaron te Kristian ae raoiroi?
[Taamnei n iteraniba 14]
Bon anuam te wareware n te Baibara ni katoabong?