Rooro-n-rikirake, Kam Tabe Ngkai Ni Kawenei Aami Ibukin Taai Aika A Na Roko?
“I ata te baire ae I a tia ni iangoia i bukimi: . . . karekean te rau nakoimi ao tiaki te kabuanibai, ba e aonga n reke iroumi te kantaninga n te tai ae e na roko.”—Ieremia 29:11, BK.
1, 2. Taekin iango aika kakaokoro ni kaineti ma boong n ataei?
ANGIIA aomata aika ikawai, a iaiangoa aia bong n ataei bwa te tai ae moani baan te tamaroa i nanoni maiuiia. A uringa korakoraia ao kukukureia ngkoa are a a tia n namakinna i nanon aia bong n ataei. A ururing rikaaki nakon te tai are e karako ngkoa iai mwiokoaia, te tai are a rangi n kukukurei iai, are a kona n iaiangoi baika a nang karaoi i nanoni maiuiia.
2 Ao ngkami aika kam ataei riki ngkai, e na boni bae ni kaokoro ami iango ma ngaiia. E kona n reke ami kangaanga ibukin kaitaraan bitakin ami namakin ao bitakin rabwatami ngkai kam a rikirake n ikawai. Kam kona naba ni kaaitara ma te kariri ae korakora mairouia tabonroromi n ami kuura n reirei. Tao kam kataia ni kakorakoraingkami n rawa nakon kamanenan bwaai aika kamanging n te aro ae e aki riai, te arekooro, ao te wene ni bure. A a mwaiti naba i buakomi aika a kaaitara ma te kauntaeka ibukin teimi i nuka ke kauntaeka riki tabeua aika irekereke ma ami onimaki. Eng, e kona n riki ami bong n ataei bwa te tai ae kamengomengo. Ma e ngae n anne, ao bon aei naba te tai are kam kona n iangoi iai bwaai aika kam kani karaoia. Ma te titiraki iai ngkanne e kangai, Kam na kanga ni kamanenai maiumi?
Kakukureingkami n Ami Bong n Ataei
3. Tera ana reirei ao ana kauring Toromon nakoia rooro-n-rikirake?
3 Ane a na tuangingkami aomata aika a ikawai riki nakoimi bwa a kimototo boong n ataei, ao e bon eti anne. I nanon tii tabeua te ririki ao kam a kitani naba ami bong n ataei. Mangaia are kakukurei ngkami ngkai kam mena i nanona! Anne bon ana reirei te Uea are Toromon are e korea ae kangai: “Kukurei, ngkoe te rorobuaka, n am tai n ataei, karekea kabaiam n am tai n rikirake; karaoa ane ko tangiria, rinea ane ko taku ba e raoiroi i bukim.” Ma e ngae n anne ao e kauringia naba rooro-n-rikirake Toromon ni kangai: “Kaki mai nanom te nanokawaki, kawakina rabatam man te maraki.” E a manga taku riki: “Akea manen te tai n ataei ma te tai n rorobuaka.”—Te Minita 11:9, 10, BK.
4, 5. Bukin tera bwa a wanawana riki rooro-n-rikirake ngkana a katauraoiia ibukin taai aika a na roko? Kabwarabwaraa.
4 Kam oota n te bwai ae nanonna Toromon? Ibukin kamatataana, iangoa te roro-n-rikirake temanna ae e anganaki te bwai n tangira ae rangi ni kakawaki, n aron te mwane ae bati are e na bwaibwai iai. Tera ae na karaoia ma te mwane aei? E kona ni kabanea te mwane aei ni kakukureia iai, n aron te nati are e bakatae are n ana kaikonaki ngkoa Iesu. (Ruka 15:11-23) Ma tera ae na riki ngkana e a bane te mwane anne? Ni koauana, e na bon taonaki n te nanokawaki bwa e a tia ni karaoa ae aki riai! N te itera are teuana ngkanne, iangoia bwa aongkoa e kamanena te bwai n tangira aei teuaei n te aro ae wanawana are e na reke te bakao mai iai, are e na katea iai aana ibukin taai aika a na roko. I mwin tabeua te tai, n am iango e kona n taonaki n te nanokawaki teuaei ibukina bwa e aki bakataeia ni kabanea ibukin kakukureiana n ana bong n rikirake, ma e kabongana raoi ao e a rereke ana bakao mai iai? E na bon aki!
5 Karaua ngkanne n iangoia bwa ami bong n ataei bon ana bwai n tangira te Atua nakoimi. E na tera aroni kamanenana iroumi? Tao kam kona ni bakataea korakorami ao kukureimi n tabeakin oin nanomi, ao ni kakukureingkami n akea tokimi n akea ami katauraoi ibukin boong aika a na roko. Ngkana kam karaoa anne, ao e na taraaki iai bwa a bon aki ‘manena ami tai n ataei ma ami tai n rorobuaka.’ Ai mwaiti ra riki raoiroin kamanenan ami bong n ataei bwa ami tai ni katauraoingkami ibukin boong aika imwaimi!
6. (a) Tera ana reirei Toromon are e a riki bwa kairaia rooro-n-rikirake? (b) Tera ae e kani karaoia Iehova ibukiia rooro-n-rikirake, ao e na kanga ni kona ni kakabwaiaki te roro-n-rikirake man aei?
6 E taekina te reirei are e na kona ni buokingkami bwa kam na kamanenai iai raoi ami bong n rikirake Toromon ni kangai: “Ao ko na ururinga naba te tia Karaoiko n am bong n ataei.” (Te Minita 12:1) Bon kingin te kabwaia te reirei anne, mangaia are kakauongo iroun Iehova ao karaoa nanona. E tuangia tibun Iteraera ngkoa Iehova nanona ae e kani karaoia ibukiia ni kangai: “I ata te baire ae I a tia ni iangoia i bukimi: . . . karekean te rau nakoimi ao tiaki te kabuanibai, ba e aonga n reke iroumi te kantaninga n te tai ae e na roko.” (Ieremia 29:11, BK) E kan anganingkami naba Iehova te ‘kaantaninga ibukin taai aika a na roko.’ Ngkana kam ururingnga n ami mwakuri, n ami iango, ao ni karaoan ami babaire nako, e na bon nakoraoi ngkanne ami kaantaninga ibukin taai aika a na roko.—Te Kaotioti 7:16, 17; 21:3, 4.
“Kaania te Atua”
7, 8. E na kanga te roro-n-rikirake ni kaania te Atua?
7 E kaungaira Iakobo bwa ti na ururinga Iehova ngke e kaumakira ni kangai: “Kam na kaania te Atua, ao ane E na kaaningkami.” (Iakobo 4:8) Bon te tia Karikiriki Iehova, te tia Tautaeka ae Moan te Rietata i karawa, ae e riai n taromauriaki ao n neboaki. (Te Kaotioti 4:11) Ma e ngae n anne, ao ngkana ti kaanira ma ngaia ao ane e na kaanira naba. E aki ngkanne kakatonga nanom ni kaotiotan te tangira anne?—Mataio 22:37.
8 Ti kona ni kaania Iehova n aaro aika mwaiti. N te katoto, ao e taekina ae kangai te abotoro Bauro: “Kam na botumwaka n tataro, ao kam na kamarurungingkami iai ni katituaraoi.” (I-Korote 4:2) Nanon anne bwa ti na karekea kateira ae te tatataro. Tiaki nanona bwa e a rauaki naba nanom man tii atongan “amen” ngkana e tataro ibukim tamam ke raom ni Kristian i nanon te ekaretia. Iai te tai ae ko a tia ni bunra raoi nanom ao am iango nakon Iehova, ao n tuangnga iai bwaai aika ko iaiangoi, bwaai aika ko maaku iai, ao kangaanga aika ko kaaitara ma ngaai? Ko a tia ni maroro ma ngaia ni bwaai aika ko maamaa ni maroroakin ma aomata? E karekea te rau taian tataro aika a nako man te nano ni koaua. (I-Biribi 4:6, 7) A buokira naba ni kaanira ma Iehova, ao n namakinna bwa e boni kaanira.
9. E na kanga ni kona ni kakauongo te roro-n-rikirake nakon Iehova?
9 Ti nora te kawai riki teuana ibukin kaanian Iehova man taeka aika kairaki koreaia aikai: “Ongo te taeka ae raoiroi, ao kaki i nanom te reirei, ba ko aonga n rabakau ni kabanean am bong.” (Taeka N Rabakau 19:20) Eng, ngkana ko kakauongo nakon Iehova, ao n ongeaba nakoina, ko a bon katea iai aam ibukin taai aika a na roko. Ko na kanga ni kaotia bwa ko boni kakauongo nakon Iehova? Akea te nanououa bwa ko boni katoa tai ni kakaaei bobotaki ni Kristian ao ni kakauongo nakon reirei ni kabane. Ao ko riai naba ni ‘karinea tamam ma tinam’ n arom n iriri n te reirei n te Baibara n am utu. (I-Ebeto 6:1, 2; Ebera 10:24, 25) Moan te raoiroi karaoan anne. Ma irarikin anne, te koaua bwa ‘ko kaboa am tai’ ni karaoa iai am katauraoi imwain te botaki, ko katoa tai ni wareka te Baibara, ao n ukeuke iai? Ko kataia ni maiuakini bwaai aika ko wareki bwa ko aonga n nakonako iai n aron te ‘aomata ae wanawana’? (I-Ebeto 5:15-17; Taian Areru 1:1-3) Ngkana ko karaoa anne, ko kaania iai ngkanne Iehova.
10, 11. Baikara kakabwaia aika kakawaki aika reke irouia rooro-n-rikirake man te kakauongo nakon Iehova?
10 N taeka ni kaukuki n te boki ae Taeka N Rabakau, ao e kabwarabwaraa bukin korean bokin te Baibara aei te tia koreia are e kairaki iroun te taamnei ae raoiroi. Bwa e aonga n “ataaki iai te rabakau ma te reirei; ma n ataki naba taeka aika e ataibwai te aba iai; aika e na reke iai reireian te aba n te rabakau, ma te raoiroi, ma te motiki-taeka ae riai, ma te aro ae riai; aika a na anganaki iai akana a ro nanoia te nanowanawana, aika e na anganaki iai te rorobuaka te ataibwai ma te wanawana.” (Taeka N Rabakau 1:1-4) Mangaia are ngkana ko wareka te boki ae Taeka N Rabakau ao ni maiuakini taeka akana i nanona, n ikotaki naba ma kanoan te Baibara ni kabane, ko karikirakea iai ngkanne te raoiroi ao karaoan ae eti n taai nako. E na bon kukurei iai Iehova ngkai ko a kaaniko riki ma ngaia. (Taian Areru 15:1-5) Ngkana kam kabatiaa riki karikirakean te wanawana, te rabakau, te atatai ao te ataibwai, ko na bon kona iai ngkanne ni karaoi babaire aika a na nakoraoi riki.
11 Te bure kaantaningan ae rooro-n-rikirake a riai ni karaoi mwakuri n te aro ae wanawana aei? Tiaki ngaia anne, bwa a a mwaiti rooro-n-rikirake aika Kristian ake a kaakaraoa anne. Ao ibukin anne, e a reke karineaia irouia aomata tabeman ao a aikoa ‘kaakea bongaia ngkai rorobuaka n ataei ngaiia.’ (1 Timoteo 4:12) A kakatonga ibukin aia mwakuri aika raraoi aia karo, ao e taekinna naba Iehova bwa a kakukureia nanona. (Taeka N Rabakau 27:11) E ngae ngkai a ataei riki, ma a kona n onimakinna bwa a kaineti raoi nakoia taeka aika kangai: “Tarataraa te aomata ae moan te raoiroi, ao nora te aomata ae e eti arona: ba bon te rau tokin te aomata aei.”—Taian Areru 37:37.
Karaoi Motinnano Aika Raraoi
12. Tera te motinnano ae kakawaki ae a riai ni karaoia rooro-n-rikirake, ao bukin tera ngkai a kona n rotaki buaka iai i nanon te tai ae maan?
12 Bon te tai ibukin karaoan motinnano aika raraoi am bong n ataei, ao tabeua maiai, e na rota iai maium i nanon te tai ae maan. Tabeua mai buakon am motinnano aika ko karaoi ngkai, ko na bon rotaki buaka iai i nanon ririki aika mwaiti aika a na roko. A na karekea te maiu ae nakoraoi ma ni kakukurei motinnano aika wanawana. A kona ni kabuakaka maium ni kabane motinnano aika a aki wanawana. Iangoia bwa e na kanga ni koaua anne man motinnano aika uoua aika ko riai ni karaoi. Te Moan: Antai ae ko rineia bwa raoraom? Bukin tera bwa e kakawaki aei? E taekinaki ae kangai n Taeka N Rabakau, aika taeka aika kairaki koreaia: “Ko na nakonako ma aomata aika rabakau, ao ko na rabakau iai: Ma e na maraki te aomata ngkana e raonia akana nanobaba.” (Taeka N Rabakau 13:20) Nanon aei bwa ti na rikirake ni katotongia aomata aika ti iraorao ma ngaiia, aika tao a wanawana ke a nanobaba. Antai ibuakoia aomata aikai ae ko kani katotongia?
13, 14. (a) Tera riki nanon te taeka ae iraorao i rarikin are e nanonaki n te bobotaki ma aomata? (b) Tera te iango ae kairua ae a riai n totokoa rikina rooro-n-rikirake?
13 Ngkana kam iangoa te taeka ae te iraorao, kam na boni bae n iangoa bobotakimi ma aomata. E eti anne, ma e bati riki ae nanonaki iai. Ngkana ko mataku n te viteo, kakauongo nakon te anene, wareka te boki ni karaki teuana, mataku n te tabo ni kaoti taamnei, ke ni mataku n ana bwaikoraki te Internet, ko a iraorao ngkanne n arom anne. Ngkana te iraorao anne e kaungaa karaoan te iowawa, tangiran te wene ni bure, ke kamanenan bwaai ni kamanging n te aro ae e aki riai, te mamanging, ke te mwakuri riki teuana ae kauntaba ma ana reirei te Baibara, ko a iraorao iai ngkanne ma “te nanobaba,” are e karaoi ana mwakuri nako n te aro are e kaotia bwa bon akea Iehova.—Taian Areru 14:1.
14 Tao e kona naba n reke iroum iangoan ae ko boni korakora ao ko aki kona n rotaki buaka n taamnei aika tiritiri ke katangitang aika tangi raoi ma a aki raoiroi taekaia, ibukina bwa ko bon iriri bobotaki ni Kristian ao ko bebeku irarikia kaain te ekaretia. Tao ko na taku naba bwa akea te bwai ae buakaka ae na riki nakoim, ngkana ko mataku tii teutana te tai n te bwaitingako n te Internet. E tuangko te abotoro Bauro bwa a bure arom n iango akanne! E taku: “A uru aaro aika riai taian i-raorao aika bubuaka.” (1 I-Korinto 15:33) E kananokawaki, bwa a a mwaiti rooro-n-rikirake ni Kristian ake a a tia n uruaki aroaroia aika raraoi man te iraorao ae buakaka. Mangaia are kamatoaa nanom bwa ko na rarawa nakon aeka n iraorao aikai. Ngkana ko karaoa aei, ao ko toua iai mwin ana reirei Bauro ae kangai: “Tai katotonga aron aon te aba: ma kam na onikaki n onean nanomi, ba kam na riki n ata Nanon te Atua, are raoiroi, are kakukurei, are koro-raoi.”—I-Rom 12:2.
15. Tera te kauoua ni motinnano are a riai ni karaoia rooro-n-rikirake, ao baikara kangaanga aika a kona n rotaki buaka iai?
15 Aio ngkanne te kauoua ni motinnano ae ko na kaaitara ma ngaia. E na roko te tai are ko nang riai n rineia bwa tera ae ko na karaoia, ngkana e a bane am reirei. Ngkana arona bwa ko maeka n te tabo ae e karako te mwaawa n taabo ni mwakuri iai, ko kona n namakinna bwa ko riai ni kakaaea am mwakuri ae te kabanea n raoiroi ae kona n reke. Ngkana ko maeka n te aba ae kaubwai, tao ko kona ni bon rinerinea nanom kioina ngkai a a mwaiti mwakuri aika mwaawa, are tabeua mai buakoia a rangi n anainano. Ibukin tabeakinan aromi ma nanoia ni koaua, a kona ni kaumakiko am tia reirei ke am karo bwa ko na kakaaea am mwakuri ae bubura iai boom, ke tao ae e na reke iai te kaubwai. Ma te kataneiai ibukin te nakoa anne, e kona n rangi ni kauarerekea am tai are ko kona ni beku iai iroun Iehova.
16, 17. Kabwarabwaraa bwa e na kanga ni buokaki te roro-n-rikirake ni karekea ana iango ae riai ibukin rinean nakoana, man kiibu aika kakaokoro aika kaotaki.
16 Uringnga n ukeuke moa i nanon te Baibara imwain karaoan am babaire. E kaungaira te Baibara bwa ti na mwakuri ibukin maiura n te aro are ti a kaotia iai bwa ti a tauraoi n tabeakin arora. (2 I-Tetaronike 3:10-12) Ma e ngae n anne, ao iai riki bwaai aika irekereke ma rinean nakoara. Ti kaungako bwa ko na wareki kiibu aikai ao n iangoia bwa a na kanga ni kona ni buoka te roro-n-rikirake bwa e aonga ni bwaina te wanawana ngkana e rinea nakoana: Taeka N Rabakau 30:8, 9; Te Minita 7:11, 12; Mataio 6:33; 1 I-Korinto 7:31; 1 Timoteo 6:9, 10. Imwin warekan kiibu aikai, te koaua bwa ko a oota n ana iango Iehova n te itera aei?
17 E riai n aki kakawaki riki te mwakuri ni kareke tianti, n te aro are e a moanibwaiaki riki nakon ara beku iroun Iehova. Ngkana ko kona ni karekea am mwakuri ae tau ibukin karekean maium imwin te reirei n te kauarinan, ao e raoiroi anne. Ngkana ko a kainnanoa riki te kataneiai imwin banen am tai n te kauarinan, ko riai ngkanne ni maroroakina anne ma am karo. Ma e ngae n anne, tai mwaninga taekan bwaai aika “moan raraoi,” are bon taekan bwaai n taamnei. (I-Biribi 1:9, 10) Tai kairua n aron Baruka, are ana tia koroboki Ieremia. E a bua tangiran mwiokoana ae kakawaki irouna ao e a nako n ‘ukoukori baika kakannato ibukina.’ (Ieremia 45:5) E a mwaninga are bon akea te ‘bwai ae kakannato’ n te aonnaba aei ae e na kona ni kaania ma Iehova ke ni buokia bwa e na kamaiuaki ngkana e a uruakaki Ierutarem. A kona naba ni kaineti ma ngaira taeka akanne ni boong aikai.
Tatangiri Bwaai n Taamnei
18, 19. (a) Tera te bwai ae a kainnanoia angiia kaain rarikim, ao tera am namakin nakoia? (b) Bukin tera bwa a aki namakina bakiia n te itera n taamnei aomata aika mwaiti?
18 Ko a tia n nori taamneia ataei n aaba ake a rotaki n te rongo n te viteo? Ngkana ko a tia, ao ni koauana ko bon rangi n nanoangaia. Ko a tia naba n nanoangaiia aomata aika maeka n uakaan ma ngkoe? Bukin tera bwa ko nanoangaiia? Ibukina, bwa angiia aomata aikai, a mate ni baki naba. A bon taonaki n te rongo are e taetae ni burabetinna Amota ni kangai: “E kangai te Uea ae Iehova, Noria, a na roko boong, aika N na kanakoa iai te rongo nako aon te aba, ae tiaki te rongo n te amarake, ao tiaki te taka n te ran, ma te rongo n te kan ongo ana taeka nako Iehova.”—Amota 8:11.
19 Te koaua bwa angiia aomata aika a taonaki n te baki ni kaineti ma bwaai n taamnei, bon akea aia ‘atatai ibukin kainnanoan bwaai n taamnei irouia.’ (Mataio 5:3, NW) A a mwaiti aomata aika a aki namakinna bwa a baki ni kaineti ma bwaai n taamnei. A kona n iangoia tabeman bwa a bon kakaamwarakeaki raoi n te itera aei. Ma ngkana a namakina aei, bon ibukina bwa ae e bon waaki naba ngkai reireiaia i aon “rabakaun aonaba,” are e irekereke ma te kanibwaibwai, aia katautau taan rabakau, iango aika kakaokoro mairouia aomata ibukin te aroaro ni maiu ae riai, ao ai bwaai riki tabeua. Tabeman naba a iangoia bwa te “rabakau” ni boong aikai, e rereirei bwa a a bane tain ana reirei te Baibara. Ma e ngae n anne, ao “a aki ata te Atua aomata n oin rabakauia.” E na bon aki buokiko rabakaun aonnaba ni kaaniko ma te Atua. Bon akea bwa tii te “nanobaba” iroun te Atua.—1 I-Korinto 1:20, 21; 3:19.
20. Bukin tera bwa e aki riai bwa ti na kani katotongia aomata aika a aki taromauria Iehova?
20 Ngke ko nori taamneia ataei ake a a mate ni baki, ko kan riki n aroia? Ko na bon aki! Ma e ngae n anne, ao tabeman rooro-n-rikirake man taian utu ni Kristian, a a tia ni kaotia bwa a kan riki n aroia aomata aika baki ni kaineti ma bwaai n taamnei. Tao ataei aikai a iangoia bwa tao a inaaomata ao a kukurei riki rooro-n-rikirake aika tiaki Kristian. A mwaninga are a riki n ianena rooro-n-rikirake aikai iroun Iehova. (I-Ebeto 4:17, 18) A a mwaninga naba are iai mwin te baki ni bwaai n taamnei, aika bubuaka. Tabeua mai buakon bwaai aika bubuaka aika kona n riki aikai, bon bikoukouiia ataei aika tebwi tabun aia ririki ni maiu, ao rotakin marurungin te rabwata ma te iango man te wene ni bure, te moko, te moi manging, ao kamanenan bwaai ni kamanging n te aro ae e aki riai. Te baki ni bwaai n taamnei e kauekea te nano ni kani karitei, te bwarannano, ao akean tiia aika raraoi aika a na kakairi aomata iai.
21. Ti na kanga ni kamanoira man ituakira ni kaantaninga aika kairua aika bwainaki irouia aomata aika aki taromauria Iehova?
21 Mangaia are ngkana ko mena n te reirei i buakoia ataei aika a aki taromauria Iehova, tai kariaia bwa ko na iraraang n aroaroia aika bubuaka. (2 I-Korinto 4:18) Tabeman a na kabuakakai bwaai n taamnei. Ao botaki ni kanakorongorongo a na kataia ni kaotia bwa akea buren te wene ni bure, te kokoro ni manging, ke taetae aika kammaira. Rarawa nakon te kairiri anne. Kateimatoaa bobotakim ma aomata aika ‘taua te onimaki ma mataniwin nanoia ae raoiroi.’ Kakorakorako “n ana makuri te Uea ni kamaiti,” n taai nako. (1 Timoteo 1:19; 1 I-Korinto 15:58) Katabetabeko n taai nako ma mwakuri aika kainnanoaki karaoaia n aia Tabo n Taromauri Ana tia Kakoaua ao n te mwakuri n uarongorongo. I nanon ririki aika ko reirei iai, karekea am tai ni karaoa te auxiliary bwaiania n taai tabetai. Ngkana ko kakorakoraa riki am kaantaninga ni kaineti ma bwaai n taamnei n te aro aei, ao ko na teimatoa iai ni bwaina te wanawana i nanoni maium.—2 Timoteo 4:5.
22, 23. (a) Bukin tera bwa a kona ni karaoi aia babaire rooro-n-rikirake aika Kristian, aika a aki kona n ota iai aomata tabeman? (b) Tera ae a kaungaki rooro-n-rikirake bwa a na karaoia?
22 Ibukin iaiangoan bwaai n taamnei iroum, tao ko na bae ni karaoi babaire aika a na minotaki aia iango aomata tabemwaang iai. N te katoto, temanna te roro-n-rikirake ae te Kristian, e reke irouna te tarena n te mwaatai ni katangitang, ao te wanawana n te reirei, ike e a karekei iai ana bwi aika rangi n ririeta ni bwaai ni kabane ake e reiakinaki iai. Ngke e a tia n angabeeba te ataeinimwaane aei, ao e a irira tamana ni karaoa te bitineti ae te kaitiaki-winto, bwa e aonga ni kona ni kakoroa bukin ana motinnano are e na riki bwa te tia uarongorongo ae kabwanina ana tai iai, ke te bwaiania. A aki roko n te ataa bukin karaoan aei ana tia reirei te ataeinimwaane aei, ma ngkana ko a tia ngkoe ni kaaniko ma Iehova, ao ti kakoauaa ngkanne bwa ko bon ataa bukin karaoan aei iroun teuaei.
23 Ngkai ko tabe n iaiangoa arom ni kabonganai bwaikorakin am bong n ataei aika kakawaki, ‘kaikoa aam ae raoiroi i mwaini boong aika a nangi roko, bwa ko aonga n taua te maiu ni koaua.’ (1 Timoteo 6:19) Kakorakorako n ‘ururinga te tia Karaoiko n am bong n ataei’ ao n nikiran am bong ni maiu ni kabane naba. Bon tii anne te kawai ibukin karekean te kakabwaia nakon taai aika a na roko, ae te tai ae akea tokina.
Tera Motin Am Iango?
• Tera te reirei ae kairaki koreana ae e buokia rooro-n-rikirake ni kona ni karaoi aia babaire ibukin taai aika imwaiia?
• Baikara kawai tabeua ake a na kona ni kaira te roro-n-rikirake bwa e na “kaania te Atua”?
• Baikara babaire tabeua aika e kona ni karaoi ngkai te roro-n-rikirake, aika a kona ni kanakobuakaa aroarona n taai aika a na roko?
[Taamnei n iteraniba 25]
Ko na kabanea korakoram ao marurungim n ataei tii ibukin karaoan oin nanom?
[Taamnei n iteraniba 26, 27]
A kaeta raoi aia taratara ni kaineti ma marurungia n taamnei, rooro-n-rikirake aika Kristian aika wanawana