Ko Teimatoa Ni Kakairi Raoi Irouni Kristo?

“N aron ae kam a nakonako iai ngkai, . . . teimatoa n ririkirake iai.”​—1 I-TETARONIKE 4:1.

1, 2. (a) Baikara baike a anainano ake a nori aomata aika bati n ana bong Iesu? (b) E aera bwa a rangi ni kakawaki naba ara tai aikai?

KO A tia n iaiangoia bwa tera aroni kakukureini maiura ngke arona bwa ti maiu ni menan Iesu i aon te aba? Tao ko bae n iangoia bwa ko na kantaningaa katokan aorakim iroun Iesu, n te aro are ko a aki rotakibuaka ni karawawatan aorakin te rabwata tabeua aika kakaiaki. Ke tao ko iaiangoa te kimwareirei ni koaua ngke arona bwa ko nora Iesu ao n reireinaki irouna ke ni bon noria ni karaoi kakai tabeua. (Mareko 4:1, 2; Ruka 5:3-9; 9:11) Ai tamaroara ngke arona bwa bon iai ngaira ngke e karaoi mwakuri akanne Iesu! (Ruka 19:37) Akea te roro teuana man te tai anne ni karokoa ngkai ae e a tia n nori baikai bwa e na aki manga oki n riki te baere e a tia ni kakororaoia Iesu i aon te aba ngkai e a tia ni “kareanna boni ngaia.”​—I-Ebera 9:26; Ioane 14:19.

² Ma a rangi ni kakawaki naba ara tai aikai. Bukin tera? Ti a maeka ngkai n te tai are e taetae ni burabetinaki n te Baibara bwa “tain te toki” ao “kabaneani boong.” (Taniera 12:1-4, 9, BG; 2 Timoteo 3:1) N te tai anne, e a tia iai ni karenakoaki Tatan mai karawa. E a kaan ana tai are e nang kabaeaki ao ni karenakoaki iai nako “nanon te kinono.” (Te Kaotioti 12:7-9, 12; 20:1-3) N te tai naba aei, iai mwiokoara ae rine ae tataekinan te “rongorongo ae raoiroi aei ae taekan te tautaeka n uea” ni kabutaa te aonnaba, n tuatuangia aomata taekan te kantaninga ibukin te Bwaretaiti ae nangi roko ae te mwakuri ae e aki kona ni manga kaokaki karaoana.​—Mataio 24:14.

3. Tera are e tuangia taan rimwina Iesu bwa a na karaoia imwain raoi rierakena nako karawa, ao tera ae irekereke ma anne?

³ E tuangia taan rimwina ni kangai Iesu imwain raoi rierakena nako karawa: “Kam na riki bwa taani kakoaua ibukiu i Ierutarem ao i Iutaia ni kabanea, ao i Tamaria ao nako tabon aonnaba.” (Mwakuri 1:8) E na irekereke te mwakuri anne ma te mwakuri n angareirei ni katobibia te aonnaba. Tera te tia ae na uaiakinaki n te mwakuri anne? Boni karekeaia taan rimwini Kristo ae nanona kabatiaaia riki taan rimwini Kristo imwain rokon te toki. (Mataio 28:19, 20) Tera ae ti riai ni karaoia ngkana ti kani kakororaoa mwiokoara are e tua Kristo?

4. (a) Tera ae ti riai ni karaoia ae katuruturua Betero n ana taeka ake n 2 Betero 3:11, 12? (b) Tera ae ti riai n tarataraira raoi mai iai?

⁴ Nori ana taeka te abotoro Betero aikai: “Tera aromi ae riai. Kam riai n riki bwa aomata aika kam itiaki n aroaroni maiumi ao ni karaoi mwakuri ibukin tangiran te Atua, ao ni kariariaa rokon ana bong Iehova ma n ururingnga.” (2 Betero 3:11, 12) E katuruturuaki n ana taeka Betero riaira n teimatoa n taratarai raoi aroarora ni kabaneani boong aikai ao ni kakoauaa raoi bwa a boto maiura i aoni mwakuri aika e kaotaki iai tangiran te Atua. A irekereke mwakuri aikai ma tataekinan te rongorongo ae raoiroi. Ai kimwareireira ngaira n nora ingaingaia tarira ni katobibia te aonnaba, are a kakororaoa iai ana mwioko Kristo ibukin tataekinan te rongorongo! N te tai naba anne, ti ataia bwa ti riai n taratara raoi bwa e na aki kamemeereaki ingaingara ni kakororaoa ara beku ibukin te Atua, mani kangaanga aika ti kaaitarai ni katoabong n ana waaki Tatan ao man rikiara ae kaibwabwarun te rabwata. Mangaia are ti na rinanoni ngkai arora ni kona n taraia raoi bwa ti teimatoa ni kakairi irouni Kristo.

Butimwaei Mwioko Mairoun te Atua ma te Kukurei

5, 6. (a) Tera are e kamoamoaia iai raona n te onimaki Bauro ake i Ierutarem, ao tera are e kauringia bwa a na kawakinia mai iai? (b) E aera bwa ti riai n taningamarau ni kakororaoi mwiokoara mairoun te Atua?

⁵ E kamoamoaia raona n te onimaki te abotoro Bauro n ana reta nakoia Kristian ake i Ierutarem, ibukin rongorongoni kakaonimakia n nanomwaaka rimoa i buakoni bwainikirinaia. E taku: “Teimatoa n ururingi boong ake rimoa, imwini moan reken te oota iroumi, ngke kam nanomwaaka ni marakimi n te buaka ae korakora.” Eng, e uringi teimatoaia ni kakaonimaki Iehova. (I-Ebera 6:10; 10:32-​34) Tao a bae ni korakora ungan nanoia Kristian ake i Ebera ni kamoamoaaia ae irianaki n te tangira mairouni Bauro. Ma e kauringia Bauro n te reta naba anne bwa a na kawakinia mani mamaaraia aomata, bwa ngkana e aki taobaraaki ao e kona ni kamemeerea ingaingan temanna n ana beku ibukin te Atua. E taekinna Bauro bwa a riai ni kawakinia Kristian man te “rawa n ongeaba,” ke karekean aonaia ngkai a aki toui mwin ana tua te Atua.​—I-Ebera 12:25.

⁶ E kaineti naba nakoia Kristian ni boong aikai te kauring ibukini mamaaraia aomata ae te “rawa n ongeaba” ni butimwaei mwioko mairoun te Atua. Ti ataia bwa ti riai ni kamatoai nanora bwa ti na taningamarau ni kakororaoi mwiokoara ni Kristian ke n aki kariaia buan ingaingara ibukin ara beku iroun te Atua. (I-Ebera 10:39) Bwa ni koauana, e irekereke karaoan ara beku ibukin te Atua ma maiura ke matera.​—1 Timoteo 4:16.

7, 8. (a) Tera ae na buokira ni kateimatoa ingaingara ni beku ibukin te Atua? (b) Tera ae ti riai n uringnga ibukin Iehova ao Iesu ngkana e a tia ni kerikaaki teutana ingaingara are n te moantai?

⁷ Tera ae na buokira n taraia raoi bwa ti na aki karekei aonara ibukin aki kakororaoan tabera iroun te Atua? Te anga teuana ni buakanakin te mamaara anne boni mani katoataira ni kananoi ara iango n nanon ara taetae ni bau are n ara katabu. Ni karaoan anne, ti berita iai nakon Iehova bwa ti na moanibwaia karaoan nanona ni maiura, ao ti kan teimatoa ni maiuakina ara berita anne. (Wareka Mataio 16:24.) Ngaia are n taai tabetai, ti riai ni motirawa teutana ao n titirakinira ni kangai: ‘E teimatoa ni matoa nanou bwa N na maiuakina au katabu nakon te Atua n aron are I karaoia n au bwabetito? Ke e a tia n toki moan ingaingau n ririki ake imwina ni karokoa ngkai?’

⁸ Ngkana ti kakoauaa bwa e a tia ni kerikaaki ingaingara n ara beku iroun Iehova imwin tuoara i bon iroura, e raoiroi ururingan ana taeka te burabeti ae Tebania aika kaunganano aikai: “A na tai mamara baim. E memena Iehova ae Atuam i buakom, ae temanna ae mwaka ae na kamaiu: ane E na kimareirei i aom ni kukurei.” (Tebania 3:16, 17, BG) A kamanenaaki moa taeka ni karaunano aikai nakoia I-Iteraera ake rimoa ake a okira Ierutarem imwin tautoronakia i Baburon. Ma e teimatoa ni koaua te karaunano aei irouia ana aomata te Atua ni boong aikai. Ngkai ana mwakuri Iehova ae ti karaoia, ti riai n uringnga bwa a boutokaira ao ni kakorakoraira Iehova ao Natina ibukini kakororaoani mwiokoara ake mairoun te Atua. (Mataio 28:20; I-Biribi 4:13) Ngkana ti teimatoa ni kakorakoraira ni karaoa ara mwakuri ibukin te Atua ma te ingainga, e na boni kakabwaiaira ao ni buokira n teimatoa n ririkirake n ara onimaki.

“Ukoukora Moa Ana Tautaeka n Uea” ma te Ingaingannano

9, 10. Tera ae kakawaki man ana kaikonaki Iesu ibukin te baka n te katairiki, ao tera reireiara mai iai?

⁹ Ngke e amwarake Iesu n ana auti temanna te tia tautaeka i aoia Baritaio, ao e taekina te kaikonaki ni kaineti ma te baka ibukin te katairiki. E kabwarabwaraa iai te tibwanga are a anganaki aomata aika kakaokoro ae kaainakin te Tautaeka n Uea i karawa. E kamataataa naba ae nanonaki n te “karautaeka.” (Wareka Ruka 14:16-21.) A karekei aonaia te koraki ake a kaoaki ake n ana kaikonaki Iesu ngke a aki roko n te baka n amwarake arei. E taku temanna bwa e riai n nako n tuoa ana tawaana are e a tibwa kabooa. Are temanna, e taku bwa e a tia ni kabooi kaao tabeman ao e kan tuoi. Ma e kangai are temanna: ‘I a aki kona n roko bwa I a bon tibwa mare.’ A bon aki karaunano karautaeka aikai. N etina, e riai n tia n tuoa raoi te tawaana ke te nanai ni man teuare e kabooi imwaini kaboaia, ngaia are akea riain te umaki n tutuo imwina riki. Ao e aera ngkai e na tukaki te aomata mani butimwaean te kakao kioina ngkai e a tibwa tia ni mare? Maroaka are e a rangi n un teuare e karaoa ana botaki are n te kaikonaki!

¹⁰ A bane ni kona ni karekei reireiaia ana aomata te Atua man ana kaikonaki Iesu aei. Ae tera? Ti riai n aki kariaia baika ti tangiri n aron ake e taekin Iesu n ana kaikonaki bwa a na rangi ni kakawaki riki, n te aro are ti a moanibwai moa nakon ara beku ibukin te Atua. Ngkana e aki mwinibwai baika tangiraki irouna te Kristian, e na boni kerikaaki teutana imwin teutana ingaingana n te mwakuri ni minita. (Wareka Ruka 8:14.) N totokoan rikin aei, ti riai ni maiuakina ana kaumaki Iesu aei: “Mangaia are teimatoa n ukoukora moa ana tautaeka n uea te Atua ma ana raoiroi.” (Mataio 6:33) Ai kaungananora ataakin ae a kaai ni maiuakina te reirei ae rangi ni kakawaki aei ana toro te Atua aika kaara ao ataei! Ni koauana, a bati ake a karaoi aanga tabeua ibukini kabebeteani maiuia bwa a aonga ni bati riki aia tai n te mwakuri ni minita. E reke reireiaia mani baike a riki nakoia bwa ukoukorani moa te Tautaeka n Uea ma te ingainga e karekea te kakabwaia ni koaua ao te raunnano ae korakora.

11. Tera te karaki man te Baibara ae kamatataaki iai kakawakin te beku ibukin te Atua ma nanora ni kabane ao te ingainga iai?

¹¹ Ni kamatataani kakawakin te beku iroun te Atua ma te ingainga, nora te bae riki ni maiun Ioati are Uean Iteraera. E tang Ioati nakon Eritai ibukin tabeaiangana bwa e taraa n ae e na bon tokanikai Turia i aon Iteraera. E tua te burabeti nakon teuaei bwa e na katebenakoa kanoan te kainikatebe man te kamaama are e kaitaraa Turia, are boni kakoauaan te tokanikai i aon te natannaomata anne ni bain Iehova. E bon riai ni korakora ungan nanon te uea n aei. Imwina, e tuangaki Ioati iroun Eritai bwa e na anai kanoan ana kainikatebe ao e na ororea aontano iai. E orea aontano Ioati tii tenua te tai. E un Eritai n aei bwa orean aontano nimaua ke onoua te tai, e na kakoauaaki bwa e na “orea Turia iai ni kamauna.” Ma ngkai, ai bon tii tenua ana tai n tokanikai Ioati. Ibukina bwa e karaoa te mwakuri Ioati n aki ingainga, e a tiatianaki iai ana tokanikai. (2 Uea 13:14-19, BG) Tera reireiara man te karaki aei? E na rangi ni kabatiai kakabwaiaara Iehova tii ngkana ti beku ibukina ma nanora ni kabane ao n ingainga iai.

12. (a) Tera ae na buokira ni kateimatoa ingaingara ni beku ibukin te Atua n ara tai ni kekeiaki ribuakoni kangaanga n te maiu aei? (b) Taekina arom ni kakabwaiaaki n teimatoam ni katabetabeko n te mwakuri ni minita.

¹² A kataaki ingaingara ao korakoran tangiran ara beku ibukin te Atua ni kangaanga n te maiu aei. A bati taari aika tabe ni kekeiaki n tokanikai i aon aia kangaanga ma te kataumwane. A bwara nanoia ake tabeman ibukin tiatianakini baika kona ni karaoi n aia beku ibukin Iehova n te aoraki ae kakaiaki. Ma ti kona ngaira n tatabemanira nako ni karaoi aanga tabeua bwa ti aonga n taraia raoi bwa ti kateimatoa ingaingara ao ni kakairi raoi irouni Kristo n taai nako. Taiaoka ma nori reirei tabeua ao kiibu akana karinanaki n te bwaoki ae “Tera ae na Buokiko Bwa Ko na Teimatoa ni Kakairi Irouni Kristo?” Iangoia bwa ko na kanga ni maiuakini baikai n aron am kabanea ni kona. Ko na boni karekei kakabwaia ni koaua ngkana ko karaoa aei. Ngkana ti teimatoa ni katabetabeira n te mwakuri ni minita, iai uaana ae ti na teimatoa ni karekei n aron ae e na nakoraoi maiura, e na reke iroura te raunnano ae korakora riki, ao ai te kukurei. (1 I-Korinto 15:58) Irarikina, te beku iroun te Atua ma nanora ni kabane, e buokira ni “kariariaa rokon ana bong Iehova ma n ururingnga.”​—2 Betero 3:12.

Bwaina te Koaua n Neneran Aroarom

13. Ti na kanga ngaira n tatabemanira nako n ataa ae nanonaki ibukira n te mwakuri ma nanora ni kabane?

¹³ Ti riai n uringnga bwa karaoan te mwakuri ma nanora ni kabane, e aki kaineti ma mwaitin ara tai ae ti kabanea n te mwakuri ni minita. A kakaokoro baika riiriki nakoia aomata n tatabemania nako. Tao e kona n rangi ni kukurei Iehova iroun te aomata ae karaoa te mwakuri ni minita tii teuana ke uoua te aoa ni katoa namwakaina ngkana anne ana kabanea ni kona ni kaineti ma marurungina. (Kabotaua ma Mareko 12:41-44.) Ngaia are ngkana ti ataa raoi nanon te beku ibukin te Atua ma nanora ni koaua, ti riai ni bwaina te koaua n neneran aroarora ao ara konabwai. Ngkai taan rimwini Kristo ngaira, ti kani kaboraoi ara iango ma ngaia. (Wareka I-Rom 15:5; 1 I-Korinto 2:16) Tera ae e moanibwaia Iesu ni maiuna? E tuangia aomata aika uanao ake mai Kaberenaum ni kangai: ‘I riai naba n tataekina te rongorongo ae raoiroi ae taekan ana tautaeka n uea te Atua, bwa ngaia aei bukini kanakoau.’ (Ruka 4:43; Ioane 18:37) Neneri baika riiriki nakoim ngkai ko ururinga ingaingan Iesu ao iangoia ngkana tao ko kona ni kanakoraoa riki am mwakuri ni minita.​—1 I-Korinto 11:1.

14. Aaro raa aika ti kona ni karakai riki iai ara tai n te mwakuri ni minita?

¹⁴ Ngkana ti karauira n neneri arora, ti a kona iai ni motikia bwa ti na karakai riki ara tai n te mwakuri ni minita. (Mataio 9:37, 38) N te katoto, a a tia nga ma nga rooro n rikirake ake a a tibwa bane aia tai man te reirei, ni karakai riki aia tai n te mwakuri ni minita ao ngkai a a namakina te kimwareirei ae reke man ingaingaia ni bwaiania. Ko kan rinanon naba te kimwareirei anne? A a tia taari tabeman n iaiangoi aroia ao a baireia bwa a kona ni mwaing nakon te tabo ke te aba ae korakora riki iai kainnanoaia taan uarongorongoa te Tautaeka n Uea. Iai naba ake a a tia n reiakina te taetae ae boou ibukini buokaia aomata ake a kaokoro aia taetae ma ngaiia. E ngae ngke e kona ni kangaanga karakaan riki ara tai n te mwakuri ni minita, ma e kona ni karekei kakabwaiara aika rangi ni bati mai iai, ao tao ti kona naba ni buokiia aomata aika bati riki bwa a na “karekea te atatai ae eti ibukin te koaua.”​—1 Timoteo 2:3, 4; 2 I-Korinto 9:6.

Katoto Man te Baibara Aika Ti na Kakairi Iai

15, 16. Antai ana katoto ae ti kona ni kakairi iai ngkai taan rimwini Kristo ngaira aika ti ingainga?

¹⁵ Tera aroia tabeman ake a a riki bwa abotoro ni kaekaa weteaia irouni Kristo bwa a na riki bwa taan rimwina? E kangai rongorongoni Mataio: “E kitani bwaai ni kabane teuaei, ao e teirake ma n nako n iriria.” (Ruka 5:27, 28) Ti wareka ae kangai ibukini Betero ao Anterea ake a tabe n akawa: “A kitan aia karaun n te tai naba arei, ao a iria.” Imwina, a noraki Iakobo ao Ioane iroun Iesu ni bonotii aia karaun ma tamaia. Tera aroia nakon ana kakao Iesu? “A kitana te booti ao tamaia n te tai naba arei, ao a iria.”​—Mataio 4:18-22.

¹⁶ Te katoto teuana ae raoiroi naba, bon taekan Tauro are e a riki bwa te abotoro Bauro. E ngae ngke te tia bwainikirinia taan rimwini Kristo ae rangi ni matoatoa n ana koaua teuaei, ma e bita maiuna ao e riki bwa te ‘tia mwakuri ae rineaki’ are e uouota arani Kristo. “N te tai naba anne e a moana ana uarongorongo [Bauro] n taian tinakoka n taekina Iesu bwa boni Ngaia Natin te Atua.” (Mwakuri 9:3-22) N aki ongea nanomwaakana ni kaitaraa te rawawata ae bati ao te bwainikirinaki, ma e bon aki kerikaaki ingaingana.​—2 I-Korinto 11:23-29; 12:15.

17. (a) Tera ae ko kani karaoia ngkai ko kakairi irouni Kristo? (b) Baikara kakabwaia aika reke ni karaoan nanon Iehova ma nanora ni kabane ao korakorara?

¹⁷ Ti boni kani kakairi n aia katoto aika raoiroi taan rimwini Kristo akanne ao n tou mwia ma te ingainga n akea nanououara. (I-Ebera 6:11, 12) Baikara kakabwaia aika ti karekei ngkai ti teimatoa ni kakorakoraira ni kakairi raoi irouni Kristo ma te ingainga? Ti kunea te kimwareirei ni koaua ni karaoan nanon te Atua ao ti namakina te raunnano ae reke mani butimwaeani mwiokoara ni beku riki tabeua n te ekaretia. (Taian Areru 40:8; wareka 1 I-Tetaronike 4:1.) Eng, ngkai ti kakorakoraira ni kakairi irouni Kristo, ti a karekei iai kakabwaia aika rangi ni bati aika teimatoa n aron raun ara iango, raun nanora, akoakira iroun te Atua, ao kantaningaan te maiu n aki toki.​—1 Timoteo 4:10.

Ko Uringnga?

• Tera te mwakuri ae kakawaki ae ti a tia n anganaki, ao tera arora n iangoia n te aro ae riai?

• Tera mamaaraia aomata ae ti riai ni kawakinira mai iai, ao bukin tera?

• Tera arora ni bwaina te koaua ngkana ti neneri aroarora?

• Tera ae na buokira n teimatoa ni kakairi irouni Kristo?

[Te Bwaoki/​Taamnei n iteraniba 31]

Tera ae na Buokiko Bwa Ko na Teimatoa ni Kakairi Irouni Kristo?

▪ Wareka Ana Taeka te Atua ni katoa bong ao kananoa am iango ni baika ko wareki.​—Taian Areru 1:1-3; 1 Timoteo 4:15.

▪ Tataro n taai nako ibukin ana boutoka ao ana kairiri taamnein te Atua.​—Tekaria 4:6; Ruka 11:9, 13.

▪ Bobotaki ma akana kaotiota ingaingaia n te mwakuri ni minita.​—Taeka N Rabakau 13:20; I-Ebera 10:24, 25.

▪ E riai ataakin ae ti a mena ngkai i nanon taai n umaki.​—I-Ebeto 5:15, 16.

▪ E riai ataakini karuanikain te “karautaeka.”​—Ruka 9:59-62.

▪ Katoatai n iaiangoa am taetae ni bau are n am katabu ao kakabwaia aika mwaitikurikuri ake a na reke man am beku ibukin Iehova ao arom ni kakairi ma nanom ni kabane irouni Kristo.​—Taian Areru 116:12-14; 133:3; Taeka N Rabakau 10:22.