Ko Kakairi n Ingaingan Nanon Iehova ao Iesu n Namwakainan te Kauring Aei?
1. Tera te mwakuri ae okoro ae a karaoia Ana Tia Kakoaua Iehova n namwakainan te Kauring?
1 E ingainga nanon Iehova ni kakoroi bukin ana kantaninga. Ngkana ti iaiangoi kakabwaia n ana Tautaeka n Uea te Atua ae taekinaki n Itaia 9:7, (BG) ni kangai: “E na karaoa aei [ingaingan] nanon Iehova.” E kaota naba te ingainga n nano Natin te Atua ibukin te taromauri ae koaua n ana mwakuri ni minita i aon te aba. (Io. 2:13-17; 4:34) Ni katoa ririki n namwakainan te Kauring, a a tia ni kakorakoraia mirion ma mirion taan uarongorongo ni katobibia te aonnaba ni kakairi n ingaingan nanon Iehova ao Iesu ni karikirakean aia mwakuri ni minita. Ko na ira naba buakoia ngkoe?
2. Ti na kangaa ni buokaki bwa ti na ingainga ni katanoataan te kauring ni moani Maati 7?
2 Te Mwakuri Ibukini Katanoataan te Kauring: E na moanaki katanoataan te Kauring n te Kaonobong, Maati 7. Karaoa am babaire ngkai bwa ko na ingainga n uataboa te mwakuri ni minita. E na bati te kimwareirei irouia kaain te ekaretia n uataboani karaoan aia aono n aron aia kabanea ni kona. A riai ni kakorakoraia ni kaoia aika reirei ma ngaiia n te Baibara, naake a okiokiriia, raoia ni mwakuri, aia utu ni kaan ao raoia n reirei n angania te beeba ni kakao ke ni kamanena te jw.org.
3. Ti na kangaa ni karababaa riki ara mwakuri ni minita i nanon Maati ao Eberi?
3 Auxiliary Bwaiania: Ti buokaki naba n ingaingan nanora bwa ti na karababaa riki ara mwakuri ni minita. Akea te nanououa bwa a na bati aika a na auxiliary bwaiania ni Maati ao Eberi kioina ngkai ti kona n rineia bwa ti na kabanea 30 te aoa ae baireaki. Tataroakina arom ni karaoan aei n tain am reirei n utu ke n am tai n ukeuke i bon iroum. (TNR. 15:22) Ingaingan nanom ni karaoan te mwakuri ni katanoata aei e kona naba ni kaingaingai nanoia tabemwaang. Ko kona ni kakairi n ingaingan nanon Iesu ngkana ko karaoi bitaki tabeua ni karaoan ae bati riki.—Mrk. 6:31-34.
4. Tera te kakabwaia ae kona n reke ngkana ti kakairi n ingaingan nanon Iehova ao Iesu?
4 Ti kona ni karekei kakabwaia aika bati ngkana ti kakairi n ingaingan nanon Iehova ao Iesu n namwakainan te Kauring aei. A na bati riki aika ti na uarongorongo nakoia n ara aono. Ti na kona ni karekea te kimwareirei ao te raunnano ae reke man ara beku ibukin Iehova ao n anga ngaira ibukia tabemwaang. (Mwa. 20:35) Moan te kakawaki riki, ti na boni kakukureia Atuara ao Natina aika a ingainga nanoia.