Katei Tiam Ibukin Namwakainan te Kauring

Ni katoa ririki, a ingainga ana toro Iehova ni kariaa ikotakia ni bukamarua te Kauring. Ni wiki ake imwain ao imwin te Kauring, ti kamanenai raoi ara tai n neboa ao ni kaitaua Iehova ibukin ana bwaintituaraoi ae te kaboomwi. (Ebt 1:3, 7) N te katoto, ti boni kaoia aomata nakon te Kauring. Tabeman, a kaangaraoi aroia bwa a aonga ni kona ni karaoa te bwaiania ae aki katoatai ma tiaia ae 30 ke 50 aia aoa i nanon namwakaina aika Maati ke Eberi. Ko kani karakaa am tai n te mwakuri ni minita n namwakainan te Kauring aei? Tera ae na buokiko bwa ko na karaoa aei?

N angiin te tai, ti boni kakororaoa ae bati riki ni moantaaira ni karaoi ara babaire. (TNR 21:5) E waekoa n roko tain te Kauring, ngkai am tai ni moana karaoan am babaire. Iangoia bwa ko na kona ni karaoa ae bati riki n te mwakuri ni minita n tain te Kauring, ao iangoi baika ko na karaoi bwa ko aonga n roko n tiam. Imwina, butiia Iehova bwa e na kakabwaiaa am kakorakora.—1Io 5:14, 15.

Ko kona n iangoi aanga tabeua ake ko kona iai ni karaoa ae bati riki n am mwakuri ni minita n namwakainan te Kauring?