Namwakainan te Kauring—Te Tai Ibukini Kabatiaan Riki te Mwakuri!
1. Baikara bukina aika mwaiti ake ti na iangoa iai kabatiaan riki ara mwakuri i nanoni Maati, Eberi ao Mei?
1 Ko kona ni kabatiaa riki am ibuobuoki n te mwakuri ni minita n namwakainan te Kauring ae Maati, Eberi ao Mei, ae na roko? A na mwaiti taabo aika e raoiroi iai kanoan te bong ao e abwabwaki iai aoan te ngaina. A kona ni kabongana aia tai ni motirawa man aia mwakuri ke man aia reirei tabeman taan uarongorongo ibukin te mwakuri ni minita. E na karaoaki ni moan Eberi 2 te mwakuri ae okoro ibukini kaoakia te koraki ake a kaota te kan ongora, bwa a na airi ma ngaira ni kaea te Kauring ae e na karaoaki n Eberi 17. Imwina, ti na kakorakoraira ni karikirakea te kan ongora irouia te koraki ake a roko, ao ni kaoia naba nakon te kabwarabwara ae okoro ibukia aomata nako are e na karaoaki ni wikin Eberi 25. Ni koauana, iai bukina aika mwaiti ake ti na iangoa iai kabatiaan ara mwakuri ni minita i nanoni Maati, Eberi ao Mei.
2. Tera te anga ae te kabanea n raoiroi ni karaoan ae bati riki n ara mwakuri ni minita?
2 Auxiliary Bwaiania: Te auxiliary bwaiania bon te anga teuana ae te kabanea n raoiroi ni karaoan ae bati riki n te mwakuri ni minita. Kioina ngkai ti bane n tabetabe, e kainnanoaki ngkanne ae ti na kamani karaoi ara babaire ao ni karaoi bitaki nakon ara babaire. (TaeRab. 21:5) Tao ko kona n taoni moa karaoani mwakuri tabeua aika aki rangi ni manena aika ko taneiai ni kakaraoi. (IBir. 1:9-11) E aera ngkai ko aki kaotiota nanom ni kani bwaiania nakoia kaain te ekaretia tabemwaang n noria iai bwa a kona n raoniko ni karaoa te auxiliary bwaiania?
3. A na kanga utu nako ni bairea kabatiaan riki aia mwakuri?
3 E raoiroi maroroakinan tiia aika kona n uaiakinaki n te utu n tain ami Taromauri n Utu n te tairiki are i mwina. (TaeRab. 15:22) Ngkana a uaia n ibuobuoki kaain te utu, tao a kona tabeman n auxiliary bwaiania ibukin teuana te namwakaina ke e raka riki. Tera arona ngkana ko iangoia bwa e aki angaraoi karaoan aei? A boni kona naba kaain te utu ni bairea kabatiaan riki aia mwakuri n uataboan te mwakuri ni minita n tairiki tabeua, ke ni kamaana riki aia tai ni mwakuri n te wikeen.
4. Baikara kakabwaia aika a na reke mani kabatiaan riki ara mwakuri n te mwakuri ni minita n namwakainan te Kauring aei?
4 E nori ara mwakuri ni kabane Iehova ake ti beku iai ibukina ao e kukurei n ara angakarea. (Ebera 6:10) E reke te kimwareirei man te anga boni ngaira nakon Iehova ao nakoia naba tabemwaang. (1Rong. 29:9; Mwa. 20:35) Ko kona ni kabatiaa riki am mwakuri n namwakainan te Kauring aei ao ni karekea te kimwareirei ae bati ma taiani kakabwaia ni karaoan anne?