Karikia Bwa E na Kakimwareirei Namwakainan te Kauring n te Ririki Aei!
1. Tera te anga teuana ibukini karikirakeani kimwareireira n namwakainan te Kauring n te ririki aei?
1 Ko kani karikirakea kimwareireim n namwakaina aika Maati, Eberi ao Mei? Te anga teuana ni karaoan anne boni karababaan am mwakuri ni minita, ao te auxiliary bwaiania ngkana e angaraoi. E na kanga n rikirake kimwareireira n aei?
2. E na kanga n rikirake kimwareireira ni karababaan ara mwakuri ni minita?
2 Karikirakea Kimwareireim: E karikira Iehova ma te konabwai ni karekea te kimwareirei ao te raunnano man taromauriana, ao kakororaoan rikiara ae kainnanoan te Atua. (Mat. 5:3) E karikira naba n te aro anne bwa ti na karekea te kukurei ngkana ti anga ngaira nakoia tabemwaang. (Mwa. 20:35) E reke ara tai n te mwakuri ni minita ni karaoi baika uoua, ae taromaurian te Atua ao buokaia aomata. E eti ngkanne ae ngkana ti kabatiaa uataboan te mwakuri ni minita ao ti na karekea te kimwareirei ae bati. Irarikin anne, ngkana ti kabatiaa ara tai n uarongorongo ao e na rikirake riki iai rabakaura. Ngkai ti karekea rabakaura n uarongorongo, ti a karikirakea iai onimakinara i bon iroura ao ni kauarerekea te nakonnano. E na bati riki ara tai n uarongorongo ao ni moana te reirei n te Baibara. A bane ni kakimwareirei baikai n te mwakuri ni minita.
3. Bukin tera bwa a na angaraoi namwakaina aika Maati ao Eberi ibukin te auxiliary bwaiania?
3 A na angaraoi namwakaina aika Maati ao Eberi ibukin te auxiliary bwaiania, bwa ti kona n rineia bwa ti na kakoroa iai te aoa ae kainnanoaki ae 30 ke 50. Irarikin anne, ni moa man te Kaonobong, Maati 22 ni karokoa te Kauring n te Moanibong, Eberi 14, ti na uataboa iai te mwakuri ae kakukurei ae kaoaia aomata nakon te Kauring. A na rotaki n te kimwareirei ae bati ekaretia nako ngkai a na bati aika a na mwakuri ma “te bo n nano,” ni kabanea te aono ni mwakuria i nanon te tai ae baireaki.—Teb. 3:9, BG.
4. Tera ae ti riai ni karaoia ngkana ti kan auxiliary bwaiania?
4 Katauraoi Mangkai: Ngkana ko tuai karaoa aei, karekea am tai n rinanoa am babaire ao n nori bitaki aika ko riai ni karaoi ibukini karababaan am mwakuri ni minita i nanon teuana te namwakaina ke e nako riki. Tataroakinna. (Iak. 1:5) Maroroakinna ma am utu ao tabemwaang n te ekaretia. (TaeRab. 15:22) Ane ko na kunea bwa ko kona naba ni karekea te kimwareirei man te auxiliary bwaiania, n aki ongei kangaanga ni kaineti ma te aoraki ke am mwakuri ni kareketianti ni kabwanina am tai.
5. Tera ae e na riki ngkana ti karababaa ara mwakuri ni minita n namwakainan te Kauring n te ririki aei?
5 E tangiria Iehova bwa a na kimwareirei ana toro. (TaiAre. 32:11) Ngkana ti kakorakoraira ni karababaa ara mwakuri ni minita n namwakainan te Kauring n te ririki aei, e na aki tii rikirake kimwareireira ma e na kimwareirei naba iai Tamara are i karawa.—TaeRab. 23:24; 27:11.