Titiraki Mairouia Taani Wareware ...
E aera Iesu ngke e kona n tuanga te aine are e rangi ni kinaaki bwa te tia bure, bwa a kabwaraaki ana bure?—Ruka 7:37, 48.
Ngke e tekateka Iesu n rarikiriki n amwarake n ana auti te Baritaio ae Timon, ao “e nako ni mena i akun Iesu i rarikini waena” temanna te aine. E kamwaimwai waen Iesu n rannimatana ao e kamwaui n irannatuna. Imwina, e kaboria ma waena ao e kabiri n te bwaa ae boiarara. E taekinaki neiei n te Euangkerio bwa e “kinaaki n te kaawa bwa te tia bure.” Ni koauana, bon taani bure aomata nako aika aki kororaoi, ma n angiin te tai e kabonganaaki te taeka aei n te Baibara ni kabwarabwaraan te aomata ae e rangi ni buakaka ana bure ke n ataaki n taekana ae te tia bure. E bae n ae bon te kabekaau te aine aei. Ma e kangai Iesu nakon te aeka n aomata anne: “A a kabwaraaki am bure.” (Ruka 7:36-38, 48) Tera are e nanonna Iesu? E a kanga naba ni kona ni kabwaraaki te bure aei, ngkai e tuai ni kabwakaaki te karea ni kaboomwi?
Imwini kaitiakani ma kabirani waen Iesu iroun te aine aei ao imwaini kabwaraan ana bure, e taekina te kaikonaki teuana Iesu ni kamataataa iai te reirei ae kakawaki nakon teuare ana auti te auti ae Timon. E taku Iesu nakon Timon ni kabotauan te bure ma te taarau ae rangi ni kangaanga kabwaraana: “Iai uoman mwaane ake a taarau iroun te tia kataarau. Temanna e taarau n nimabubua te tenariati, ma are temanna n nimabwi. Ma ngke a aikoa kona ni kabwarai aia taarau, ao e a kakeai baeia ni kauoman. Mangaia are antai irouia ae e na tangira riki teuare te tia kataarau?” E kaeka Timon ni kangai: “I taku bwa tao teuare e kakeaaki ana taarau ae bati riki.” E taku Iesu: “E eti am iango anne.” (Ruka 7:41-43) Ti bane ni kabaeaki bwa ti na ongeaba iroun te Atua, ma ngkana ti aki ongeaba ao ni karaoa ae bure nakoina, ti a kabwaka iai ni kaoka te bwai ae e tau n anganaki. N te aro anne ti a kauaataoa riki iai ara taarau. Ma e ngae n anne, Iehova bon titeboo ma te tia kataarau ae e tauraoi ni kabwarai taarau. Ibukin anne, e a kaungaia taan rimwina Iesu bwa a na tataro ni bubutii ni kangai nakon te Atua: “Kabwarai ara bure, n ai arora ngkai ti kabwarai aia bure akana bure nakoira.” (Mataio 6:12) A kabwarabwaraaki taarau aikai n Ruka 11:4 bwa buure.
N aaro raa ake e a tia iai te Atua ni kabwarai buure n taai ake rimoa? E kainnanoaki n ana kaetitaeka ae kororaoi bwa te tuuaa ibukin te bure bon te mate. E boni kabwakaa boon ana bure Atam ni matena. Ma i aan te Tua are e angan te natannaomata ae Iteraera te Atua, a kona ni kabwaraaki ana bure te tia bure ngkana e anga ana karea ae te man nakon Iehova. E taku te abotoro Bauro: “A kuri ni bane bwaai ni kaitiakaki n te raraa, n aron ae katauaki n te Tua, ao akea kabwaraani buure ngkana akea te raraa ae kabwaroaki.” (I-Ebera 9:22) Akea te anga riki teuana ae a ataia I-Iutaia ae kona n reke iai kabwaraan te bure mairoun te Atua. Mangaia are ti aki mimi ngke a aki kukurei taani mataku ake n ana tai Iesu n ana taeka nakon neierei. A taku i nanoia naake a tekateka n rarikiriki ma Iesu n te taibora: “Antai teuaei ngkai e kabwarai naba buure?” (Ruka 7:49) E boto i aon tera ngkanne, kabwaraan ana bure te aine ae bon te tia bure aei?
E kaotaki ana kantaninga Iehova n te moan taetae ni burabeti are taekinaki imwin aia karitei te moan taanga, bwa e na kateirakea te “kariki” are e na kaikoakaki bukini waena iroun Tatan ma ana “kariki.” (Karikani Bwaai 3:15, BG) E a kaikoakaki Iesu ngke e a tiringaki irouia taani karitei nakon te Atua. (I-Karatia 3:13, 16) E a riki raraani Kristo bwa te bwai ae rangi ni kakawaki are e kawawaeaki bwa te kaboomwi ae kainaomataia aomata man te bure ao te mate. Bon akea ae kona n tokobitoa Iehova mani kakororaoan ana kantaninga, ai ngaia are n taekinan taeka akana koreaki ni Karikani Bwaai 3:15, e a iangoia iai te Atua bwa ai aron ae e a kaman tia ni kabwakaaki te karea ni kaboomwi. E a kona ngkai ni kabwarai aia bure akana kaota onimakinan ana berita nako.
Iai tabeman ake e atongia Iehova bwa a raoiroi n taai ake imwain aia tai Kristian. Tabeman i buakoia nakanne bon Enoka, Noa, Aberaam, Nei Raaba ao Iobi. A kariariaa kakoroani bukin ana berita nako te Atua n aia onimaki. E korea ae kangai te tia rimwini Kristo ae Iakobo: “E onimakina Iehova Aberaam, ao e aranaki iai bwa e raoiroi.” E taku Iakobo ni kaineti ma Nei Raaba: “N aron anne tiaki e atongaki bwa e raoiroi naba Nei Raaba are te kabekaau n ana mwakuri?”—Iakobo 2:21-25.
E karaoi buure tabeua aika kakaiaki Uean Iteraera rimoa are Tawita, ma e korakora onimakinan te Atua ae koaua irouna ao e kaotiota te raraoma ao te rairannano ni koaua ni katoai taai ake e bure iai. Irarikina, e taekinaki ae kangai n te Baibara: “E anga Kristo te Atua bwa te kareanraoi ike a a raoiakinaki iai aomata rinanon onimakinan raraani Kristo. E karaoa aei te Atua bwa e aonga ni kaotia bwa e eti arona ni kabwarai buure ake a karaoaki rimoa, ngke e taotaona nanona, ao e kaotiota naba arona ae eti n te tai aei, ngkai e atonga te aomata ae onimakina Iesu bwa e raoiroi.” (I-Rom 3:25, 26) E kona Iehova ni kabwaraa ana bure Tawita ni kaineti ma ana karea ni kaboomwi Iesu are e na anga n taai ake imwaia ao e aki katinanikui iai baike a kainnanoaki ibukin Ana kaetitaeka ae riai.
E teretere bwa titeboo aei ma aron te aine are e kabiri waen Iesu. E a tia ni maiuakina te aroaro ni maiu ae aki riai, ma e a tia n raraoma ao n raira nanona. E ataia neiei bwa e kainnanoa kainaomataana man te bure, ao e kaotia ni baike e karaoi bwa e ingainga ni kani butimwaea teuare e katauraoaki te kamaiu rinanona iroun Iehova. E ngae ngke e tuai ni kabwakaaki te karea anne ma e boni kakoauaaki kakawakina, kaanga ai aron ae e a kamani kabwakaaki bwa kabwaraan aia bure aomata n tatabemania nako n aron ae riki nakon neiei. Mangaia are e a kangai Iesu nakon neiei: “A a kabwaraaki am bure.”
N aron ae e kamatataaki raoi n te rongorongo aei, e aki rarawa Iesu nakoia taani bure. E kakaraoa ae riai nakoia. Irarikin anne, e tauraoi Iehova ni kabwarai aia bure taani bure aika raraoma man rairi nanoia. Ai tamaroara ao ni kaunganano te taeka ni karaunano anne nakoira ngaira aika ti aki kororaoi!
[Taamnei n iteraniba 32]
E atongaki nakoia bwa a raoiroi