Aia Titiraki Taani Wareware . . .
E karekea ia buuna Kain?
▪ “Ngkana ngaia bwa uoman natin Atam ma Ewa bwa Kain ao Abera, e roko mai ia ngkanne buuni Kain?” E ngae ngke e aki toki n tabekaki te titiraki aei irouia taani kananououaa te Baibara, ma iai te kaeka ae bwarabwara raoi ao ni karaunano n te Baibara.
A taekinaki ni Karikani Bwaai mwakoro 3 ao 4 rongorongo aikai: (1) Ewa bon “tinaia akana maiu ni kabaneia.” (2) Te tai ae e bwakanako i marenani bungiakini Kain ao ana angakarea are e aki butimwaeia te Atua. (3) Imwini kakionakoani Kain bwa e na riki bwa “te tia mumun ao te tia tiotio nako,” e tabeaianga nanona bwa tao iai ae “e” na kataia n tiringnga. (4) E kanikinaea Kain te Atua ni kamanoa, are e a kaotaki n aei bwa tao iai i buakoia tarina ke ana utu aika a na kataia n tiringnga. (5) [“Imwin anne,” NW] e wene n taanga ma buuna Kain ni menaia n “te aba are Nota.”—Karikani Bwaai 3:20; 4:3, 12, 14-17, BG.
N aron ae taekinaki i eta, ti kona ni kakoauaa ae buuni Kain boni kanoan Ewa ae e aki ataaki te tai ae bungiaki iai. E taekinaki ni Karikani Bwaai 5:4, (BG) bwa e “karikiia naati mwane ma aine” Atam i nanoni maiuna ae 930 te ririki. Ni koauana, e aki taekinaki n te Baibara ae buuni Kain bon natin naba Ewa. Akea te nanououa bwa e katereaki ni bwakanakon te tai ae tau imwini kakionakoani Kain bwa e kona n riki buuna bwa temanna mai buakoia tibun Atam ma Ewa. Ma e kabwarabwaraaki n te boki ae The Amplified Old Testament bwa buuni Kain boni “kanoan naba Atam temanna.”
N te katebwi ma ruaiwa n tienture, e a katautaua te tia kanakorongorongo ae Adam Clarke bwa e kanikinaea Kain te Atua ibukini maakakia kanoan Atam tabeman ake a kaman riki aika “a kona n tei iai kaawa tabeua.”
A iangoia aba tabeua ni boong aikai ni kaineti ma kateia, bwa e aki kona ni kakoauaaki are e mare Kain ma mwaanena ke kanoan Atam te aine rimwi riki, are e nako mairoun temanna mai buakoia natin Atam mwaane ke aine aika a mareaki. E riki aei n angiin te tai ibukini baika a tabu n aia katei te botannaomata ke maakan te bwaibwainnanti. Ma e taekinna F. LaGard Smith n te boki ae The Narrated Bible in Chronological Order ni kangai: “A bae ni mareaki i marenaia taari aika ikawai aikai n aki ongea iangoan ae e aki riai te aro anne n aron ae a iangoia rooro ake imwina.” E kakaongora ataakin naba ae e waakinako anne ni karokoa anganakini Mote tuua mairoun te Atua ibukia te natannaomata ae Iteraera n 1513 B.C.E., ike e a katabuakaki iai te wene n taanga i marenaia utu ni kaan.—Nakoaia Ibonga 18:9, 17, 24.
Ni boong aikai ao ai nga ma nga te ririki raroara man te kororaoi are irouia ara moani karo. Tao a aki rotaki ara moani karo n aron rotakira n rikiara ao te genetics. Irarikin anne, e kaotaki ni kakaae ngkai n aron ae boreetiaki n te boki ae Journal of Genetic Counseling, aron uarerekeni bungiaia ataei aika bwaibwainnanti n ieinia aomata aika taari aia karo ni kabotauaki ma are a taneiai ni kakoauaa aomata. N etina, a bon aki katabeaiangaa te aba kangaanga aikai n ana bongi ni maiu Atam ke imwain ana bong Noa. Mangaia are ti a kona ni kakoauaa raoi bwa buuni Kain bon temanna mai buakoia ana koraki.