KARAKI 6

Te Nati Ae Raoiroi Ao Temanna Ae Buakaka

TARAA Kain ao Abera ngkai a a uaia n ikawai. E riki Kain bwa te tia ununiki. E uniki aroka ake a kakanaki koraaia, uaaia ao baaia.

E riki Abera bwa te tia tararuaia tiibu. E mwamwannanoia ana tiibu ake ataei ni karokoa ikawaia, ao a bati ana tiibu ake e riai n tararuai.

N te bong teuana a uaia n angakarea Kain ao Abera nakon te Atua. E uotii amwarake tabeua Kain ake e a tia n uniki. Ao Abera e uota te tibu ae te kabanea n tamaroa i buakoia ana nanai. E kukurei Iehova iroun Abera ma ana karea. Ma e aki kukurei iroun Kain ma ana karea. Ko ataa bukina?

Tiaki tii ibukina bwa e raoiroi riki ana karea Abera nakon Kain. Ma ibukina naba bwa bon te mwaane ae raoiroi Abera. E tangira Iehova Abera, ao e tangira naba tarina. Ma e buakaka Kain bwa e aki tangira tarina.

Mangaia are e tuangaki Kain iroun te Atua bwa e na bita arona. Ma e aki ongo Kain. E rangi n un ngke e tatangiraki riki Abera iroun te Atua. Mangaia are e taku Kain nakon Abera, ‘Ti a nako n te tawaana.’ Ngke ai tii ngaiia uoman ikekei ao e a orea naba tarina Kain. E rangi ni kakorakoraa n oreia n te aro are e a kamatea. E kakaiaki te mwakuri ae karaoia Kain ke e aki?

E ngae ngke e a tia ni mate Abera, ma e teimatoa n uringa taekana te Atua. E bon raoiroi Abera, ao e aki kona ni mwaninga taekan te aeka n aomata anne Iehova. Mangaia are e na manga kaokaki maiun Abera n te taina, iroun Iehova ae te Atua. N te tai anne ao e nang aki manga mate Abera. E na kona ni maeka n te aonnaba n aki toki. Tiaki te koaua bwa e raoiroi te iraorao ma aomata aika ai aron Abera?

Ma e aki kukurei te Atua irouia aomata aika ai aron Kain. Mangaia are imwin tiringan Abera iroun Kain, ao e a katuuaea Kain te Atua ni kanakoa nakon te tabo ae raroa, ni kararoaa ma ana utu. Ngke e a nako Kain bwa e na maeka n iteran te aonnaba are teuana, ao e kaira tao mwanena temanna, ao e a riki neiei bwa buuna.

Imwina riki ao a a kariki Kain ma buuna. A a manga mare natin Atam ma Nei Ewa ake temwangina, ao a a reke naba natiia. N te tai ae waekoa ao e a bati te aomata n te aonnaba. Ti na reiakina ngkai taekaia tabeman mai buakoia.

Karikani Bwaai 4:​2-26; 1 Ioane 3:​11, 12; Ioane 11:25.