E Neboaki Te Atua Ni Katiteuanaakia Kristian

“Kaingaingai nanomi ni maiuakina te aro ni katiteuanaaki rinanon te taamnei.”​—I-EBETO 4:3.

1. E kanga ni karikirakeaki neboan te Atua irouia Kristian ake i Ebeto n te moan tienture?

E NEBOAKI te Atua ae koaua ae Iehova ni katiteuanaakia Kristian n te ekaretia i Ebeto rimoa. Iai tabeman taari aika Kristian aika kaubwai ni kautun te tabo n iokinibwai ae rangi ni kaubwai anne ake iai aia toro, ao iai taari tabemwaang ake bon tooro ao a bae n rangi ni maiu ni kainnano. (I-Ebeto 6:5, 9) Tabeman bon I-Iutaia ake a reiakina te koaua n ana tai te abotoro Bauro n angareirei n aia tinakoka i nanon tenua te namwakaina. Ake tabeman riki, a tataromauria ngkoa Nei Aretemiti ao bon taan tabunea ngaiia. (Mwakuri 19:8, 19, 26) E mataata bwa e botiia aomata aika kakaokoro nako rikiaia te aroaro ni Kristian ni koaua. E ataia Bauro bwa e neboaki Iehova rinanon te katiteuanaaki n te ekaretia. E korea ae kangai te abotoro: “E na neboaki rinanon te ekaretia.”​—I-Ebeto 3:21.

2. Tera te kangaanga are e kona n ruanikai iai katiteuanaakia Kristian ake i Ebeto?

² Ma e ngae n anne, e kaaitara ma te bwai ae e kona n ruanikai te kakabwaia iai ae katiteuanaakin te ekaretia i Ebeto. E anga te kauring aei Bauro nakoia unimwaane: “A na teirake mai buakomi mwaane aika a na taekin reirei aika kewe bwa a aonga ni katikiia taan rimwin Iesu bwa a na rimwia.” (Mwakuri 20:30) E anga te kauring Bauro ibukin te nano n iraraure are “mwamwakuri ngkai i nanoia natin te aki ongeaba,” are a teimatoa ni kaotiotia tabeman taari.​—I-Ebeto 2:2; 4:22.

Te Reta Are Katuruturuaki Iai te Katiteuanaaki

3, 4. E kanga ni katuruturuaki te katiteuanaaki n ana reta Bauro nakoia kaain Ebeto?

³ E ataia Bauro bwa a riai ni bane ni kakorakoraia Kristian ni karikirakea te katiteuanaaki ngkana a na teimatoa ni kaai ni mwakuri ma te boonnano. E kairaki Bauro iroun te Atua bwa e na korea te reta nakoia kaain Ebeto ae te boto n iango iai bon te katiteuanaaki. N te katoto, e koreaki ana kantaninga te Atua irouni Bauro are e na “manga ikotii iai bwaai nako i nanon te Kristo.” (I-Ebeto 1:10) E katitebooia naba Kristian ma atibu aika kakaokoro ae e tei iai te auti ngke e kangai: “E tabe n rikirake bwa te tembora ae tabu ibukin Iehova te kateitei ae bwanin ae a katomaaki raoi bwaina nako.” (I-Ebeto 2:20, 21) Irarikin anne, e katuruturua katiteuanaakia I-Iutaia ao Tientaire aika Kristian Bauro, ao e kauringia taari bwa a bane ni karikaki iroun te Atua. E taekina Iehova bwa “te Tama, are a bane n riki irouna utu ake i karawa ao aika i aon te aba.”​—I-Ebeto 3:5, 6, 14, 15.

⁴ Ngkana ti nenera I-Ebeto mwakoro 4, ti na nora iai bukini kainnanoan te kakorakora ni karekean te katiteuanaaki, aron Iehova ni buokira bwa ti na katiteuanaaki, ao aroaro aika a na buokira n teimatoa ni katiteuanaaki. E aera ko aki wareka te mwakoro aei ni kabane bwa e aonga ni bati riki kakabwaiaam man te reirei?

Bukini Kainnanoan te Kakorakora ni Karekean te Katiteuanaaki

5. E aera ngkai a kona ni katiteuanaaki ni beku ana anera te Atua, ao e aera bwa e kona n rangi ni kangaanga katiteuanaakira?

⁵ E butiia taari ake i Ebeto Bauro bwa a na ‘kaingaingai nanoia ni maiuakina te katiteuanaaki rinanon te taamnei.’ (I-Ebeto 4:3) Ibukini kaotaakira ni kainnanoan te kakorakora n aei, iangoa rongorongoia ana anera te Atua. A aki kona n titeboo raoi baika maiu aika uoua i aon te aba, ngaia are e kona n iangoaki naba ae e a tia ni kakabwaiaia ana anera Iehova aika mirion ma mirion mwaitiia n aroia aika kakaokoro. (Taniera 7:10) Ma e ngae n anne, a kona ni katiteuanaaki ni beku iroun Iehova bwa a bane n ongeaba ao ni kakaraoa nanona. (Wareka Taian Areru 103:20, 21.) Ngkai e koaua bwa a rangi ni kakaokoro aroaroia anera aika kakaonimaki, ma e riai n uringaki bwa a kakaokoro kabwakaia Kristian. Aio are e a kona n rangi ni kangaanga iai te katiteuanaaki.

6. Baikara aroaro aika a na buokira bwa ti na kukurei iai ni kaai ni mwakuri ma tarira ake a kaokoro kabwakara ma ngaiia?

⁶ A kakai reke aia kangaanga aomata aika aki kororaoi ngkana a kataia ni kaai ni mwakuri. N te katoto, tera aron te tari te mwaane ae nimamannei ae aki toki n ririmwi ae kaai ni beku ibukin Iehova ma te tari te mwaane ae roroko raoi i aon te tai ma e kakaiun? A kona n uaia n iangoia bwa iai katein teuare temanna ae aki riai, ma a a mwaninga are a uaia ni kabwaka. A na kanga ngkanne ni kaai ni beku ma te boonnano taari aikai? Nora buokaia are e na reke n aroaro ake e kaotii Bauro n ana taeka ake imwina riki. Iaiangoi ngkanne arora ni kona ni boutokaa te katiteuanaaki ni karikirakean aroaro akanne. E korea ae kangai Bauro: “[I butingkami] bwa kam na nakonako . . . n te nanorinano n taai nako ao n te nimamannei, ao n te taotaonakinnano, n taotaon nanomi i marenami n te tangira, ni kaingaingai nanomi ni maiuakina te aro ni katiteuanaaki rinanon te taamnei n te bwai ni kabaebae are te raoi.”​—I-Ebeto 4:1-3.

7. E aera ngkai e rangi ni kakawaki uaiakinani katiteuanaakira ma Kristian tabeman aika aki kororaoi naba?

⁷ E rangi ni kakawaki reiakinan te katiteuanaaki ni beku ibukin te Atua ma aomata aika aki kororaoi ibukina bwa bon tii teuana te botaki ibukia taan taromauri ni koaua. “Tii teuana te rabwata ao tii teuana te taamnei, n aron naba ae tii teuana te kantaninga ae kam weteaki nako iai. Tii temanna te Uea, tii teuana te onimaki, tii teuana te bwabetito, tii temanna te Atua ae te Tama ae Tamaia aomata ni kabane.” (I-Ebeto 4:4-6) E irekereke taamnein Iehova ao ana kakabwaia ma te botaki n itaritari ae e kabongana. Ti na nakea riki ngkana iai temanna ae kaunira n te ekaretia? Akea riki te tabo teuana ae ti kona n ongo iai taeka ake a kairira nakon te maiu are aki toki.​—Ioane 6:68.

A Karikirakea te Katiteuanaaki ‘Mwaane Aika Riki Bwa Bwaai n Tituaraoi’

8. Tera are e kabongana Kristo ibukini kakorakoraara ni kaaitarai kariri aika karika te iraraure?

⁸ E kabongana te aroaro ae bwabwainaki i irouia tautia n taai ake rimoa Bauro ni kabwarabwaraa iai aron Iesu ni katauraoia ‘mwaane aika riki bwa bwaai n tituaraoi,’ ibukini buokani katiteuanaakin te ekaretia. E kona ni kaira te taenikai ae te ianena te tautia ae tokanikai, nakoni mwengana bwa ana toro ae e na buoki tabeni buuna. (Taian Areru 68:1, 12, 18, BG) N aron naba anne, a bati aika kukurei n toro iroun Iesu imwini kataean ana kai te aba. (Wareka I-Ebeto 4:7, 8.) Tera arona ni kabonganaia taenikai akanne n te aro ni kaikonaki? “E anga temwangina bwa abotoro, ao temwangina bwa burabeti, ao temwangina bwa taani kabuta te euangkerio, ao temwangina bwa taani kawakintiibu ao taan angareirei, ibukini kaetani kawaia te koraki aika itiaki, bwa a na beku ibukia tabemwaang, ao ibukini kateimatoaan rabwatan te Kristo, ni karokoa ae ti bane ni karekea te katiteuanaaki n te onimaki.”​—I-Ebeto 4:11-​13.

9. (a) A kanga ‘mwaane aika riki bwa bwaai n tituaraoi’ ni buoka kateimatoaani katiteuanaakira? (b) E aera ngkai a riai ni boutokaa te katiteuanaaki kaain te ekaretia ni kabane?

⁹ A buoka teimatoani katiteuanaakira ‘mwaane aika riki bwa bwaai n tituaraoi’ ngkai taani kawakintiibu ngaiia aika tatangira. N te katoto, ngkana e ataia unimwaanen te ekaretia bwa a ‘kauekea te kaiangatoa i marenaia’ taari mwaane aika uoman, e kona ni kakorakoraa ni buoka te katiteuanaaki n te ekaretia n arona n angania te reirei ni kairiri bwa ‘a na kaetii aroia n te nano ae nimamannei.’ (I-Karatia 5:26–​6:1) A buokira ni kateimatoa ara onimaki ae nene ae boto i aon ana reirei te Baibara ‘mwaane aika riki bwa bwaai n tituaraoi’ aikai ngkai taan angareirei. Ngaia are a a karikirakea te katiteuanaaki ao ni buoka rikirakera n ikawai n te onimaki. E korea aio Bauro “bwa ti aonga n aki tiku n aroia ataei, n uouotaki kaanga n naao ao ni katiotioaki n reirei aika ai aron taian ang aika riki man aia nanowanawana aomata ae bureburea te aba, ao keewe aika oteaki ibukini kairaia aomata nakon te kairua.” (I-Ebeto 4:13, 14) A riai Kristian ni kabane ni boutokaa te katiteuanaaki n te botaki n itaritari, n aron naba bwain nako rabwatara n ibuobuoki i marenaia ni karaoa ae kainnanoaki.​—Wareka I-Ebeto 4:15, 16.

Karikirakei Aroaro Aika Boou

10. E na kanga n ruanikai katiteuanaakira n te aroaro ae kammaira?

¹⁰ Ko nora ae kaotaki n ana reta Bauro nakoia kaain Ebeto ni mwakorona aua, ae boni kiingini karekean te katiteuanaaki bwainakin te tangira, ngkai Kristian ngaira aika ti ikawai n te onimaki? Imwina, e a kaotaki te bae irekereke ma te tangira. N te katoto, e aki kona ni kariaia te wene ni bure ao te kammaira te kakairi ni bwainakin te tangira. E kaumakiia taari Bauro bwa a na aki “nakonako n aroia kaain te aonnaba.” Akea “bwerengakia n te aroaro ni maiu ae riai,” aomata akanne ao “a arona te aroaro ae kammaira.” (I-Ebeto 4:17-19) E kona ni karuanikaia katiteuanaakira te aonnaba ae kammaira ae ti maeka iai. A bwaintakaakaroa te wene ni bure aomata, a aneneia, a kaaki botuia ni matakuakinna, ao a karaoia n te aro ae raba ke n ae noraki. Ko kona naba ni kitana Iehova ao te ekaretia ngkana ko kaitaataan nakon temanna ao akea nanom ni kani mare ma ngaia. Bukin tera? Ibukina bwa e kai kairiko nakon te wene ni bure. E kona ni kamaenakoia n te aro ae rangi n iowawa ataei ma aia karo ao ai uana naba ma raao ni mare aika akea aia bure, te kaitaataan are kairaraanga ane e a tia ni mare nakon te wene ni kimoa. Ni koauana e karekea te maenako! Maroaka ae e korea aei Bauro: “Tiaki anne aron te Kristo are kam reireinaki”!​—I-Ebeto 4:20, 21.

11. Baikara bitaki ake a kaungaaki iai Kristian man te Baibara bwa a na karaoi?

¹¹ E katerea Bauro bwa ti riai ni kaaki iango nako aika karika te kiriwe ao n onei mwia ni karikirakean aroaro aika ti na kona iai ni maeka n rau ma aomata nako ngke e kangai: “Kam riai ni kakeaa te aroaro nikawai ae tabe ni kabuakakaaki riki ni kaibwabwaruna ae mwamwanaa te aba, ae boraoi ma aroni maiumi ngkoa, bwa kam aonga ni kabooui nanomi ae ngaia ae kaira ami iango. Ao kam riai ni karina te aroaro ae boou ae karaoaki ni kaineti ma nanon te Atua ao e boraoi ma te itiaki ni koaua ao te kakaonimaki.” (I-Ebeto 4:22-24) Ti na kanga ni ‘kabooui nanora aika kairi ara iango’? Ni kananoan ara iango ma te nano ni kakaitau ibukini baika ti a tia n reiakini man Ana Taeka te Atua ao aia katoto aika raraoi Kristian aika mwaatai, ti a kona iai ni karina te aroaro ae boou “ae karaoaki ni kaineti ma nanon te Atua” ngkana ti mwakuri korakora.

Karikirakei Aaro n Taetae Aika Boou

12. E kanga taekinan te koaua ni boutokaa te katiteuanaaki, ao e aera ngkai e kangaanga bwainakin te koaua irouia tabeman?

¹² E rangi ni kakawaki tataekinan te koaua irouia kaain te utu ke n te ekaretia. A kona ni kaaniaki aomata n te taetaenikawai ae koaua, e kaotiotaki iai te tangira, ao e akoi. (Ioane 15:15) Ma tera ae na riki ngkana e kewea tarina temanna? E na kerikaaki onimakinana iroun tarina ngkana e ataa aei. Ko kona n ota ngkai e korea ae kangai Bauro: “Ke e atoatonga te koaua temanna ma temanna nakon raona.” (I-Ebeto 4:25) E kona ni kangaanga taekinan te koaua iroun te aomata ae taneiai ni kewe are tao e a kamani bwabwainna mangke e uarereke. Ma e na boni buokia Iehova ao ni butimwaea ana kakorakora ni bita maiuna.

13. Tera ae irekereke ma katokan te tinaraa?

¹³ E reireinira Iehova bwa ti na karikirakea te karinerine ao te katiteuanaaki n te ekaretia ao ara utu n tiatianakin raoi arora n taetae ngke e kangai: “E na tai otinako te taeka ae buakaka mai wimi . . . Kam na kaaki te riribai ae korakora ma te marakinnano ma te un ma te takakaa ma te tinaraa, n ikotaki ma te buakaka ni kabanea.” (I-Ebeto 4:29, 31) Te anga teuana ae ti kona n rarawa iai n taekin taeka aika kamatauninga boni karikirakean te aroaro ae raka riki iai karineaia tabemwaang. N te katoto, te mwaane ae tinaraaea buuna e riai ni kakorakoraa ni bita aroarona, ai moarara riki ngkai e ataa aron Iehova ni karineia aine. E boni kabiriia naba aine tabeman te Atua n te taamnei ae raoiroi ao e angania te kantaninga are a na tautaeka bwa ueea ma Kristo. (I-Karatia 3:28; 1 Betero 3:7) N aron naba anne, e riai ni kairaki te aine ae aki toki ni mwangaingai nakoni buuna bwa e na bita arona, ngkai e ataa aron Iesu bwa e taotaona nanona ngke e kaunaki.​—1 Betero 2:21-23.

14. E aera ngkai e karuanikai kaotiotan te un?

¹⁴ E rangi n irekereke te tinaraa ma te kabwaka n taotaona te un. E kona naba aei ni kamaenakoia kaain te utu teuana. Titeboo te ai ma te un. E kai urarake ike e a kona ni karika te kabuanibwai. (Taeka N Rabakau 29:22) Ngkana e iangoia temanna bwa e riai ni kaota aki kukureina, e riai ni karaurau n taotaona unna bwa e aonga n totokoa uruakin iraorao aika kakawaki. A riai ni kakorakoraia Kristian ni kabwarai buure, n aki kaikoa marakin nanoia ao n aki manga maroroakinna. (Taian Areru 37:8; 103:8, 9; Taeka N Rabakau 17:9) E reireinia kaain Ebeto Bauro ni kangai: “Ngkana kam un ao tai bure iai. Tai kariaia unimi bwa e na ooaki ni bungin taai, ao tai kakatokaa boran te Riaboro.” (I-Ebeto 4:26, 27) Ngkana e kabwaka temanna n taotaona unna, e na reke iai ana tai te Riaboro ni karikirakea te aki boonnano ao te itabarara naba n te ekaretia.

15. Tera ae na riki ngkana ti iraa?

¹⁵ E boutokaa te katiteuanaaki n te ekaretia aki iraean aia bwai tabemwaang. Ti wareka ae kangai: “Ke e tai manga iraa te tia iraa.” (I-Ebeto 4:28) A a tia ni karikirakea onimakinaia i marenaia ana aomata Iehova. Ngkana e kabongana buaka onimakinana te Kristian n iraean te bwai, e nang uruana iai te katiteuanaaki ae kakukurei.

E Katiteuanaira Tangiran te Atua

16. Ti na kanga ni kamanenai taeka aika kaungaunga ni kakorakoraa iai katiteuanaakira?

¹⁶ E reke te katiteuanaaki n te ekaretia ni kairakia kaaina ni kabane n tangiran te Atua bwa a na tangiriia aomata. E kaungaira ara kakaitau ibukin ana akoi Iehova bwa ti na kakorakoraira ni maiuakina te reirei ni kairiri aei: “A na raraoi ami taeka nako ibukini kateimatoaan te aba n aron ae kainnanoaki, bwa a aonga ni buokaki iai akana ongora. . . . kam na iakoakoi i marenami, n atataiaomata ao n tauraoi n ikabwarabure n aron naba te Atua ngke e tauraoi ni kabwarai ami bure rinanoni Kristo.” (I-Ebeto 4:29, 32) E akoi Iehova bwa e kabwarai aia bure aomata aika aki kororaoi n arora. Tiaki te koaua bwa ti riai ni kabwarai naba aia bure aomata ngkana ti nori mwakuri aika a karaoi ibukin aki kororaoia?

17. E aera ngkai ti riai ni kakorakoraira ni karikirakea te katiteuanaaki?

¹⁷ E neboaki Iehova ni katiteuanaakia ana aomata. E kairira taamneina n aaro aika kakaokoro bwa ti aonga ni karikirakea te katiteuanaaki. Ti bia aki rarawa nakon ana kairiri te taamnei. E korea ae kangai Bauro: “Tai karawawataa naba te taamnei ae raoiroi mairoun te Atua.” (I-Ebeto 4:30) Bon te kakabwaia te katiteuanaaki ae materaoi kawakinana. E karekea te kimwareirei nakoia aomata nako ake a uataboa ao n neboa Iehova. “Mangaia ae riiki bwa taani katotonga aron te Atua, ngkai naati aika tangiraki ngkami, ao kam na teimatoa n nakonako n te tangira.”​—I-Ebeto 5:1, 2.

Ko na Kanga ni Kaeka?

• Baikara aroaro aika karikirakea te katiteuanaaki i buakoia Kristian?

• A kanga kateira ni karikirakea te katiteuanaaki n te ekaretia?

• Ti na kanga ni buokaki man ara taetaenikawai bwa ti na uaia n ibuobuoki ma tabemwaang?

[Taamnei n iteraniba 20]

A katiteuanaaki aomata aika kakaokoro nako aroia

[Taamnei n iteraniba 23]

Ko ataa raoi karuanikain te kaitaataan?