“Antai Ae Kona N Ataa Ana Iango Iehova?”

“‘Antai ae kona n ataa ana iango Iehova, ae tao e na reireinna?’ Ma bon iai iroura ana iango Kristo.”​—1 I-KORINTO 2:16.

1, 2. (a) Tera te kangaanga ae a rinanona aomata aika bati? (b) Tera ae ti riai n uringnga ibukin arora n iango ao aron Iehova n iango?

KO A tia ni kunea ae e kangaanga ataakin aron temanna n iaiango? Tao ko a tibwa tia ni mare, ao ko namakinna ae akea te anga ae ko na ota raoi iai n aron raom n iaiango. Ni koauana, a kakaokoro aroia mwaane ao aine n iango ao n taetae. Maroaka ae e mwangaanga nako tein aia taetaenikawai mwaane ao aine n te taetae ae tii teuana ni katein aaba tabeua! Irarikin anne, e kona ni karekea okoroia n iaiango ao aroaroia kaokoroni kateia ma aia taetae. E ngae n anne, e na bati riki am tai ae ko nangi moanna iai n ataa aroia n iaiango tabemwaang ngkana ko a rangi ni kinaia.

² Ngaia are ti riai n aki mimi bwa a rangi ni kaokoro ara iango ma Iehova. E tuangia I-Iteraera Iehova rinanon ana burabeti are Itaia ni kangai: “Tiaki nanomi nako nanou nako, ao tiaki naba arou nako aromi nako.” E reitia nako riki Iehova ni kaikonaka te koaua aio ni kangai: “Ba aroni karawa ngkae e rietata riki nakon aontano, ao ai aron naba arou nako, ba a rietata riki nakon aromi nako, ao nanou nako nakon nanomi nako.”​—Itaia 55:8, 9, BG.

3. Baikara kawai aika uoua ake ti riai n tou mwia bwa ti aonga ni karekea ataakin “nanon Iehova ae raba”?

³ Nanona ngkanne bwa ti aki riai naba ni kataia n ataa aron Iehova n iango? Tiaki ngaia anne. E ngae ngke ti aki kona n ataa raoi ana iango nako Iehova ma e kaungaira te Baibara bwa ti na karekea “nanon Iehova ae raba.” (Wareka Taian Areru 25:14, BG; Taeka N Rabakau 3:32.) Te kawai teuana ae ti kona ni kaaniaki riki iai ma Iehova, boni mani kaotan arora n aantaeka ao mutiakinan ana mwakuri aika koreaki n ana Taeka ae te Baibara. (Taian Areru 28:5) Te kawai riki teuana, boni karekean ataakin “ana iango Kristo,” ae “katotongan te Atua ae aki nonoraki.” (1 I-Korinto 2:16; I-Korote 1:15) Ni karekean ara tai n ukeuke n reiakinan rongorongo man te Baibara ao ni kananoi ara iango iai, ti a kona ni moanna n atai aroaron Iehova ao arona n iango.

Tarataraiko Man te Iango ae Kairua

4, 5. (a) Tera te iango ae kairua ae ti riai n rarawa iai? Kabwarabwaraa. (b) Tera aroia n iango ae kairua I-Iteraera?

⁴ Ni kananoan ara iango n ana mwakuri Iehova, ti riai ni kararoaira man te nano ni kan tiriburea te Atua ni kaineti ma aia kaetieti aomata. E kaineti te iango aei ma ana taeka Iehova ake a mwaneweaki n Taian Areru 50:21 ni kangai: “Ko taku i nanom ba bon ti te bo arou ma arom.” Titeboo naba aei ma are e taekinna te tia rabakau i aon te Baibara temanna 175 te ririki n nako ngke e kangai: “A kataia aomata n tiriburea te Atua ni kaineti ma aia kaetieti ao a iangoia ae e kabaeaki bwa e na iri nanon tuua aikai n ai aroia naba.”

⁵ Ti riai n taratara raoi bwa ti na aki kariaia iangoan ae e boraoi ara iango ma Iehova ni kaineti ma ara kaetieti ao baika ti tangiri. E aera ngkai e kakawaki aio? Ngkai ti tabe n ukeuke n reirei n te Baibara, a kona n taraa n aki nakoraoi ana mwakuri Iehova tabeua man ara taratara ae tianaki ao ae aki kororaoi. E reke aroia n iango I-Iteraera anne rimoa ao a karekea aia motinnano ae kairua ni kaineti ma ana mwakuri Iehova ibukia. Nora ana taeka Iehova nakoia: “Kam kangai naba, E aki boraoi aroaron te Uea. Kam na ongora ngkai, ngkami ae te bata ae Iteraera: tiaki e boraoi aroarou? Tiaki a aki boraoi aroaromi?”​—Etekiera 18:25, BG.

6. Tera reireian Iobi ae e karekea, ao ti na kanga ni kakabwaiaaki man te baere riki nakoina?

⁶ Te anga teuana ae na buokira n rarawa n tiriburea Iehova ni kaineti ma ara kaetieti bon ataakin ae a tiatianaki ara iango ao n taai tabetai e boni kairua n te aro ae kakaiaki. E kainnanoa reiakinan te reirei aei Iobi. E kabokorakora ma te bwarannano Iobi n ana tai n rawawata, ao e a moanna n tabeakina oin nanona. E tarariaoi baika kakawaki riki. Ma e buokia Iehova ma te tangira ni karababaa ana iango. N titirakinan Iobi titiraki aika 70 ake a kakaokoro ake e aki kona ni kaekai, e a katereterea iai Iehova tiatianakin ana atatai Iobi. E nanorinano Iobi ao e kaeta ana iango.​—Wareka Iobi 42:1-6.

Arora ni Karekea “Ana Iango Kristo”

7. E aera ngkai ti buokaki n atai ana iango Iehova n neneran ana mwakuri Iesu?

⁷ E katotonga Tamana Iesu n te aro ae kororaoi ni bwaai ni kabane ake e taekin ao ni karaoi. (Ioane 14:9) Ai ngaia are ngkana ti neneri ana mwakuri Iesu, ti a buokaki iai n ataa aron Iehova n iango. (I-Rom 15:5; I-Biribi 2:5) Ngaia are ti na neneri ngkai rongorongon Euangkerio aika uoua.

8, 9. Tera ae kaira Iesu bwa e na titirakina Biribo n aron ae koreaki n Ioane 6:1-5, ao bukin tera ngkai e karaoa aio Iesu?

⁸ Iangoa te bwai ae riki aei. A a bon tibwa oki ana abotoro Iesu man te mwakuri n uarongorongo ae kamimi ni kabutaa Kariraia, imwain raoi te Toa ae te Riao n 32 C.E. Kioina ngke a a kua imwini karaoani mwakuri aikai, e a kairiia Iesu nakon te tabo ae raroa i meangi mainikun Namani Kariraia. Ma e ngae n anne a bon iraki irouia nga ma nga aomata. Ngke e a tia Iesu ni katoki aorakia te koraki ae uanao aei ao n reireinia baika bati, e a riki te kangaanga ae aki kona n ataaki aroni katokana. A na kanga aomata aikai ni kabane ni karekea kanaia n te tabo ae raroa nako aei? N noran te bae kainnanoaki, e titirakina Biribo are kaain te tabo anne Iesu ni kangai: “Ti na kabooa ia te kariki bwa kanaia te koraki aei?”​—Ioane 6:1-5.

⁹ E aera ngke e tabeka te titiraki aio Iesu nakoni Biribo? E koaua bwa e raraoma Iesu n te baere e nang karaoia? E aki. Ma tera raoi are e iangoia? E kabwarabwaraa te abotoro Ioane are e mena ikekei ni kangai: “E taekina aei [Iesu] bwa e na kataa Biribo, bwa e bon ataa ngaia te bwai ae e nang karaoia.” (Ioane 6:6) E bon tuoa aron rikiraken aia onimaki ana abotoro Iesu. N titirakinaia, e a kauekei aia iango ao n angania aia tai ni kaota aia onimaki n te baere e kona ni karaoia. Ma a kabuaa aia tai aei ao a kaotia iai bwa e tianaki raoi aia iango. (Wareka Ioane 6:7-9.) E reitianako Iesu ni kaotia bwa e kona ni karaoa te bwai ae a tuai ni kona n iangoia. E kaamwarakeia te koraki ake a baki aika nga ma nga mwaitiia n te kakai.​—Ioane 6:10-​13.

10-12. (a) E aera Iesu ngke e aki angan aineni Kuriiti te baere e bubutii n te tai naba arei? Kabwarabwaraa. (b) Tera ae ti na rinanona ngkai?

¹⁰ E kona ni buokira te rongorongo aio n ataa ana iango Iesu n te tai teuana riki. Teutana te tai imwini kaamwarakean te koraki ae rangi ni bati, ao e mwananga nakoiang Iesu ma ana abotoro i tinanikun tian Iteraera i rarikin Turo ao Titon. N tikuia ikekei, a kaitiboo ma aineni Kuriiti are e butiia Iesu bwa e na katoka aorakin natina te aine. E aki tabeakina te aine aei Iesu n te moantai. E taku Iesu nakoina ngke e a okioki ni butiia: “A riai ni ngae moa ataei, bwa e aki riai anaakini kanaia ao karenakoana nakoia kamea aika uarereke.”​—Mareko 7:24-27.

¹¹ E aera Iesu ngke e aki buoka te aine aei n te moantai? E koaua bwa e kataa neienne Iesu n aron are e karaoia nakoni Biribo bwa e na nora ae e na karaoia ibukini kaotan ana onimaki? E ngae ngke e aki kaotaki teini bwanaan Iesu n te kibu ae koreaki aei, ma e aki bwara nanon neiei. E kabongana te taeka ae “kamea aika uarereke” ni kabebetea iai te kabotau. Ai ngaia are tao e karaoa aio Iesu n aron te karo n ira nanon ana bubutii natina ma e aki kaota raoi nanona bwa e kan tuoa ana iango te ataei anne. E ngae ngke tera are riki, ma e kairaki Iesu bwa e na angan neiei te baere e bubutii ngke e kaota ana onimaki.​—Wareka Mareko 7:28-30.

¹² E reke otara ae kakawaki n Euangkerio aika uoua aikai ni kaineti ma “ana iango Kristo.” Ti na nori ngkai aroni buokara n ota raoi n ana iango Iehova n rongorongo aikai.

Aron Iehova n Reitaki ma Mote

13. Ti kanga ni buokaki bwa ti na ota raoi n aron Iesu n iango?

¹³ N otara raoi n aron Iesu n iango, ti a buokaki iai n atai kibun te Baibara aika kangaanga otara iai. N te katoto, iangoi ana taeka Iehova nakoni Mote imwini karaoan te kao mwaane ae ataei ae te koora irouia I-Iteraera bwa a na taromauria. E taku te Atua: “I nora te botanaomata aei, ao noria, bon te botanaomata ae a matoatoa roroaia: ma ngaia ae ko na tai kawarai, ba e na ura unu nako ia, ao ba N na kamaunaia: ao N na karaoiko ba te botanaomata ae ababaki.”​—Te Otinako 32:9, 10, BG.

14. Tera aroni Mote ni kaineti ma ana taeka Iehova?

¹⁴ E reitakinako te rongorongo ni kangai: “Ao Mote e butia Iehova ae Atuana, ao e kangai, E aera ngkae e ura unim nakoia am aomata, aika Ko kaotinakoia man te aba are Aikubita n te mwaka ae ababaki ma baim ae korakora? Bukin tera ngkai a nangi taetae I-Aikubita, ni kangai, E kaotinakoia ba E na kareke kaiia, ba E na kamateia i buakoni maunga, ma ni kamaunaia mai aon te aba? Ko na rairaki nako man uran unim, ao bita nanom n nanoanga n aki kareke kaiia am aomata aikai. Ko na uringa Aberaam, ma Itaaka, ma Iteraera, ake am toro, ake Ko taetae n tuea nako ia i bon i Roum, ma n taku nako ia, N na kabatiaia ami kariki n ai aron itoini karawa, ao N na kabanea te aba aei ae I a tia n taekinna n angania ami kariki, ao a na abanna n aki toki. Ao Iehova E bita nanona n nanoanga i bukin te kai are E taku ba E nang kareke kaiia ana aomata iai.”​—Te Otinako 32:11-14, BG.a

15, 16. (a) Tera are e kona ni karaoia Mote ni kaineti ma te baere e kaotiotia Iehova? (b) E “bita nanona n nanoanga” Iehova n te aro raa?

¹⁵ E koaua bwa e riai Mote ni kaeta ana iango Iehova? E bon aki! E ngae ngke e kaota te bwai ae e kani karaoia Iehova ma tiaki aio ana kabanea ni motikitaeka. Ni koauana, e kataaki ikai Mote iroun Iehova n aron naba Iesu ngke e kataa Biribo ao aineni Kuriiti imwina riki. E anganaki ana tai Mote ni kaota ana iango.b E a tia n rineaki Mote iroun Iehova bwa te tia raoi i marenana ma I-Iteraera ao e karinea mwiokoani Mote are E anganna. E koaua bwa e na kariaia unna Mote bwa e na rotaki iai ana mwakuri? E koaua bwa e a reke ana tai Mote aei ni kaungaa Iehova bwa e na mwaninga taekan I-Iteraera ao ni karekea te natannaomata ae korakora mairouni Mote?

¹⁶ E kaotaki n ana kaeka Mote bwa e onimakina ao e mwiokoa ana kaetitaeka ae riai Iehova. E kaotaki n ana taeka bwa e aki bangaomata, ma e mwamwannanoa aran Iehova bwa e aki tangiria bwa e na kabuakakaaki. Ai ngaia are e kaotia Mote bwa e ota raoi n “ana iango Iehova” ni kaineti ma aei. (1 I-Korinto 2:16) Ma tera mwina? E taekinaki n te koroboki ae kairaki koreana rinanon te taamnei bwa e “bita nanona n nanoanga” Iehova ibukina bwa e aki matoa nanona ni kani karaoa te mwakuri teuana. N te taetae n Ebera, e kona n nanonaki te taeka aei bwa e aki karokoa te kabuanibwai Iehova are e taekinna bwa e kani karokoa i aon te natannaomata ni kabane.

Aron Iehova n Reitaki ma Aberaam

17. E kanga Iehova ni kaota ana taotaonakinnano ae korakora ni baike e tabeaianga iai Aberaam?

¹⁷ E irekereke te katoto riki teuana n aron Iehova ni kariaia ana toro bwa a na kaotiota onimakinana ao mwiokoana, ma ana bubutii Aberaam ibukin Totom. E kaota ana taotaonakinnano ae korakora Iehova n te rongorongo anne, ni kariaiakan Aberaam n tabeki titiraki aika wanua teuana imwin teuana. N te tai teuana, e a kaota ana namakin ae korakora Aberaam ngke e kangai: “E bia mena i kiraroa mai Roum te karaoa ae aron aei, ae te uaia ni kamateia ake a raoiroi ma ake a buakaka, ba a na ti te bo ake a raoiroi ma ake a buakaka; e bia mena i kiraroa te aro anne mai Roum: tiaki E na karaoa ae riai te tia Motiki taekaia kaain aonaba ni bane?”​—Karikani Bwaai 18:22-33, BG.

18. Tera reireiara n aron reitakin Iehova ma Aberaam?

¹⁸ Tera ae ti reiakinna man te rongorongo aei ni kaineti ma ana iango Iehova? E koaua bwa e riai ni maroro Iehova ma Aberaam bwa e aonga ni karaoa ana babaire ae eti? E aki, bwa ni koauana e kona ni kaman taekini bukin ana babaire Iehova n te moan tai. Ni kaineti ma titiraki aikai, e a anganaki iai ana tai Aberaam iroun Iehova bwa e aonga ni butimwaea te babaire ao n ota n Ana iango. E reke naba iai otan Aberaam ni korakoran ana nanoanga ao ana kaetitaeka ae riai Iehova. Eng, e reitaki Iehova ma Aberaam bwa raoraona.​—Itaia 41:8; Iakobo 2:23.

Reireiara

19. Ti na kanga ni kakairi iroun Iobi?

¹⁹ Tera reireiara ibukin “ana iango Iehova”? Ti riai ni kariaia Ana Taeka te Atua bwa e na anganira otara ae eti bwa ti aonga n ataa ana iango Iehova. Ti aki riai n iangoia bwa e tianaki ana konabwai Iehova n ai arora ao n tiribureia ni kaineti ma ara kaetieti ao ara iango. E taku Iobi: ‘Tiaki te aomata te Atua n ai arou ae N na kaeka iai, bwa ti na botaki iai bwa a aonga ni kaetaki taekara.’ (Iobi 9:32, BG) Ngkana ti a moanna n ota n ana iango Iehova n aron Iobi, ti a kairaki iai n taekina ae kangai: “Noria, bon tinanikun arona baikai: Ao ai ti teutana taekana ae kanga te winonginong ae ti ongo! Ao antai ae kona n ata raoi rebweni baa ni mwakana?”​—Iobi 26:14, BG.

20. Tera ae ti riai ni karaoia ngkana ti rinanoni kibun te Baibara ae e kangaanga otara iai?

²⁰ Tera ae ti riai ni karaoia ngkana ti wareware n te Baibara, ao ti rinanon te kibu ae kangaanga otara iai, ai moarara riki ni kaineti ma ana iango Iehova? Ngkana ti aki karekea te kaeka ae mataata imwin ara ukeuke iai, ti a kona n iangoa aio bwa kataakin onimakinan Iehova iroura. Uringnga bwa n taai tabetai, iai kiibu tabeua aika karekea ara tai ni kaota onimakinan aroaron Iehova. Ti bia nanorinano ni kariaia ae ti aki ota ni bwaai ni kabane ae e karaoi. (Te Minita 11:5) Ai ngaia are ti a kaungaaki bwa ti na inanoi ma ana taeka te abotoro Bauro ae kangai: “Ai batira kaubwain te Atua ma wanawanana ao ana ataibwai! Ai kangaangara ataakin ana motikitaeka, ao ai kangaangara kuneakini kawaina! Bwa ‘ai antai ae ataa ana iango Iehova ke antai ae e a tia n riki bwa ana tia angareirei n ibuobuoki?’ Ke ‘Antai ae e a tia n anganna moa te bwai teuana ao e riai ni manga anganaki booni mwina?’ Ibukina bwa ngaia ae e karaoi bwaai ni kabane, e kateimatoai bwaai ni kabane, ao bon iai baikai ibukin nanona. Ana bwai te neboaki n aki totoki. Amen.”​—I-Rom 11:33-36.

[Kabwarabwara ae nano]

Ko Uringnga?

• Tera ae na buokira n rarawa nakon te iango ae kairua ae tiriburean Iehova ni kaineti ma ara kaetieti?

• E kanga ni buokira otara n ana mwakuri Iesu bwa ti na karekea “nanon Iehova ae raba”?

• Baikara reireiam n aia maroro Iehova ma Mote ao Aberaam?

[Taamnei n iteraniba 12]

Tera reireiara ni kaineti ma ana iango Iehova n arona n reitaki ma Mote ao Aberaam?