Te Moanibwai ae Raba
Tangiriia Aomata ma Tiaki te Mwane ao Kabatiaani Bwaai
TERA ANA REIREI TE BAIBARA? “Wakaani baika bubuaka ni kabane bon tangiran te mwane.”—1 Timoteo 6:10.
TERA TE KANGAANGA IAI? Ti kaririaki n aia rongorongo taani katanoata bwa a na aki rau nanora ni baika a reke iroura. A tangirira bwa ti na mwakuri korakora ibukini karekean te mwane bwa ti aonga ni kabooi baika boou, aika raraoi ao aika bubura riki. Bon te bwai ni kabwakabwaka te mwane ao ti kai iangoia bwa e rangi ni kakawaki. Ma e anga te kauring te Baibara bwa e na aki rau nanon te aomata ae tangira te kaubwai. E korea ae kangai te Uea are Toromon: “Ane tangira te tirewa ao e na aki ngae n te tirewa; ao ane tangira kabatiani bwaai e na aki ngae ni karakani bwaai.”—Te Minita 5:10, BG.
TERA AE KO KONA NI KARAOIA? Kakairi iroun Iesu, ao reireiniko bwa ko na tangiriia riki aomata nakoni bwaai. E tauraoi Iesu n anga ana bwai nako ao maiuna naba ibukin tangiraia aomata. (Ioane 15:13) E taku: “E kakukurei riki te anga nakon te anganaki.” (Mwakuri 20:35) Ngkana ti karikia bwa anuara kamanenaan ara tai ibukia aomata ao ara bwai, a na karaoa naba anne aomata. E taku Iesu: “Teimatoa n anganga ao ane kam na manga anganaki irouia aomata.” (Ruka 6:38) A ewariia ao ni karawawataia ni maraki aika bati te koraki ake a uaiakina karekean te mwane ma kabatiaani bwaai. (1 Timoteo 6:9, 10) N te itera teuana, e reke te raunnano ni koaua man tangiraia aomata ao tangiram irouia.
E aera ko aki iaiangoia bwa tao ko kona ni kabebetea aroni maium? Ko kona ni kauarerekei mwaitin am bwai, ke mwaitini baika ko na kabooi? Ni karaoan anne, ko kona ni kunea bwa e na reke am tai ae bati ao korakoram ni baika kakawaki riki ni maium ibukini buokaia aomata ao ni beku iroun te Atua, are e a tia n anganiko baika a reke iroum.—Mataio 6:24; Mwakuri 17:28.
[Taamnei n iteraniba 4]
“Teimatoa n anganga ao ane kam na manga anganaki irouia aomata”