Bukin Tera Bwa A Bati Maare Aika Aki Teimatoa?

“A [kawara Iesu] Baritaio bwa a kani kataia ao a taku: ‘E riai bwa e na buuraure ma buuna te mwaane ni kaineti ma bukina aika kakaokoro?’”​—Mataio 19:3.

A NANOUOUA aomata tabeman ake n ana bong Iesu bwa tao e riai ke e kona ni kateimatoaaki te mare. E taku Iesu nakoia: “Kam aki wareka are teuare karikiia aomata n te moantai, e karaoiia bwa te mwaane ao te aine ao e kangai, ‘Ibukin aei ao e na kitana tamana ma tinana te mwaane ao e na nim ma buuna, ao a na riki n tii te irikona naaka uoman’? Ao ai tiaki ngkai uoman naakai, bwa ai tii te irikona. Mangaia ae ane e botiia te Atua ao ke a tai karaureia aomata.”a (Mataio 19:4-6) E teretere n ana kantaninga te Atua bwa a riai n teimatoa taiani mare.

N aaba aika mwaiti ni boong aikai, tao 40 te katebubua ke e raka riki mwaitini maare aika a ‘karaureaki’ ao tokia bon te buuraure. E koaua bwa a aikoa manena taeka n reirei n te Baibara ni kaineti ma te mare n taai aikai? A kona n aki teimatoa maare ibukina bwa iai kairuan te babaire ibukin te mare n te moantai?

Iangoa te kaikonaki aei: A kabooi kaa aika titeboo aroia, uataanga. A tararuaa raoi aia kaa te taanga are teuana ao a kakaraurau ni buti iai. E aki roko n te uruaki aia kaa. A aki kabanea aia tai ke korakoraia te taanga are te kauoua n tararuaa raoi aia kaa ao a kakabubuti iai n aki akaka. E uruaki aia kaa anne ao a kaaka taekana. Antai ae na bukinaki n te baere e riki n te kauoua n tai, te kaa ke taani bwaibwai? E teretere bwa taani bwaibwai ae a na bukinaki iai bwa bon tabeia kawakinan aia kaa.

N aron naba anne, ngkana a aki teimatoa maare tiaki nanona bwa e aki nakoraoi te moani babaire ibukin te mare. E kakoauaaki n aei bwa iai mirion ma mirion mwaitini maare aika nakoraoi. A karekea te kukurei maare akanne ao ni kateimatoaia i marenaia n tatabemania nako, n aia utu, ao n aia kaawa. Ma e kainnanoa naba tararuaana raoi te mare n aron te kaa ao te katoatai n onobwai ngkana e na kateimatoaaki.

A rangi n ibuobuoki taeka n reirei n te Baibara ibukini kateimatoaani ke kamatoaan am mare, e ngae ngke ai tibwa tabebong ke tatabebwi te ririki maanna. Nori katoto tabeua n iteraniba aika imwina.

[Kabwarabwara ae nano]